Mataio 19–20; Mareko 10; Luka 18

Mafaufau e valaaulia tagata aoga e talanoaina fesili nei.

• O a nisi o uiga faaalia e uiga i tafaoga faamasani ma faaipoipoga i le lalolagi i aso nei? Faitau faatasi o se vasega le Mataio 19:3–9 . Valaaulia tagata aoga e faailoga upu ma fasifuaitau o loo faaalia ai lagona o le Alii e uiga i le faaipoipoga.

• O a ni fuaitau patino i lenei fuaitau e fesoasoani ia te oe e malamalama ai i le vaaiga a le Alii i le faaipoipoga? (E mafai ona faailoa mai e tagata aoga upumoni e pei o nei: O le faaipoipoga i le va o se alii ma se tamaitai ua faauuina e le Atua ma ua faamoemoe e le toe tatalaina.)

• O le a se mea ua e lagona e faigata e uiga i nei fuaiupu? Mafaufau e faitau ma talanoaina le “Mataio 19:3–9. O le a le mea na aoao mai e Iesu Keriso e uiga i faaipoipoga ma le tatalaina o faaipoipoga?” i le Fesoasoaniga mo Tusitusiga Paia: Feagaiga Fou.

Talu ai atonu e tele ni manatu eseese o au tagata aoga e uiga i le faaipoipoga, e mafai ona e faaali atu fesili ma punaoa nei ma tuu atu ia i latou e filifili po o le a se mea latou te fia talanoaina:

• Ae faapefea pe afai ou te popole i le faaipoipoga? Maimoa i le “Talanoaga Faafesaga’i mo le YSA: faatasi ai ma Elder Jeffrey R. Holland, Sister Carole M. Stephens, ma Elder Donald L. Hallstrom” mai le taimi faailo 15:25 i le 25:46. Ona talanoaina lea o mea na outou aoaoina.

  

  113:2

• O le a se mea ua aoao mai e perofeta a le Alii e uiga i le tatalaina o faaipoipoga i o tatou aso? Matamata ma talanoaina le “Faaipoipoga ma le Tatalaina o Faaipoipoga” (3:02). Pe faitau ma talanoaina le saunoaga lenei a Peresitene Dallin H. Oaks:

  

  3:2

  

  Ua toatele naua tagata lelei o le Ekalesia ua tatala faaipoipoga. … Ua matou iloa e toatele outou o ni tagata taumamaina ua afaina fua—o tagata na faalataina pea lava pea e o latou toalua ia feagaiga paia pe lafoai pe ua mumusu e faia o latou tiutetauave o faaipoipoga mo se taimi faaumiumi. O tagata o le ekalesia na oo i na sauaga ua latou iloaina lava e i latou lava ia tulaga e sili atu ona leaga nai lo le tatalaina o faaipoipoga. …

  … Mo le tele o faafitauli tau faaipoipoga, o le vaifofo e le o le tatalaina o faaipoipoga ae o le salamo. …

  … E tatau i taitoalua ona faia mea uma i lo latou malosi e faasaoina ai a latou faaipoipoga. … E tatau ona avea i laua ma uo mamae, agalelei ma magafagafa, ma nofouta i manaoga o le tasi ma le isi, ma saili pea ia fiafia le tasi i le isi. E tatau ona avea i laua ma paaga i mea tautupe a le aiga, ma galulue faatasi e pulea o laua manaoga mo mea faaletino. …

  … O se faaipoipoga lelei e le manaomia ai se alii po o se tamaitai atoatoa. E na o le pau le mea e manaomia ai se alii ma se tamaitai ua tautino atu e taumafai faatasi agai i le atoatoa. (“Tete’a,” Liahona, Me 2007, 70–71, 72, 73)

• O a nisi o laasaga aoga e mafai ona e faia e fatu ai se faaipoipoga fiafia ma tumau? Faitau le parakalafa fitu i le “O Le Aiga: O Se Folafolaga i le Lalolagi” (Gospel Library), ma talanoaina mataupu faavae autu i le fatuina o se faaipoipoga fiafia ma tumau.

• O a ni faaipoipoga faamanuiaina ua e vaai i ai? O a ni mea ua e aoaoina mai ia i latou? (Mafaufau e matamata i le “Alofa Tumau” (4:16) e vaai ai i se faataitaiga o le auaunaga alofa i totonu o se faaipoipoga.)

  

  4:12

E mafai ona e tuuina atu lau molimau e uiga i aoaoga a le Alii e uiga i le faaipoipoga.

E mafai ona e faasoa atu le tala faataitai lenei:

• O a ni ou manatu e uiga i lenei tala faataitai?

Faamanatu i tagata aoga a o lei faasoaina atu e Iesu le faataoto i le au faigaluega, sa fesili Peteru po o le a le taui o le a maua e soo mo le lafoaia o mea uma e mulimuli ia te Ia (tagai Mataio 19:27–30). Valaaulia tagata aoga e faitau le faataoto i le Mataio 20:1–16, pe mafai foi ona e faaali atu le vitio “O Tagata Faigaluega i le Tovine” (3:05). Fai atu i tagata aoga e vaavaai mo mea e mafai ona aoao mai e le faataoto ia i tatou e uiga ia Iesu Keriso. Atonu e fesoasoani le faailoa atu o le upu pene i lenei faataoto e faasino i se tenari, o le tupe Roma e masani ona faaaoga e totogi ai se tagata faigaluega mo se aso atoa o galuega.

3:5

• Ana faapea e te galue i le aso atoa, o le a sou lagona e uiga i le mauaina o le totogi lava e tasi e pei o i latou o e na faigaluega mo na o le itula?

• O le a se mea ua e aoaoina e uiga i le Atua i lenei faataoto? (E mafai ona faasoa mai e tagata aoga upumoni e pei o upumoni nei: E agalelei le Atua ma e finagalo e faamanuia tagata uma.)

Faasoa atu ma talanoaina le saunoaga lenei a Peresitene Jeffrey R. Holland.

A o ta’u atu e le pule o le fanua ia i latou i le faataoto (ma ou te toe faaupuina teisi lava): “Au uo, e le faapea ua ou le faamaoni ia te outou. …Ua totogi atu le tau atoa ia te outou. Ave lo outou totogi ma olioli i le faamanuiaga. Ae mo isi, ia mautinoa ou te saoloto e fai le mea ou te manao e fai i a’u lava tupe.” Ona tulai mai lea o lenei fesili e tuia ai le loto o soo se tagata i lena taimi po o le taimi nei e fia faalogo i ai: “Aisea e te lotoleaga ai ina ua ou filifili e agalelei atu?”

… O le a i ai taimi i o tatou olaga o le a maua ai e se tagata se faamanuiaga e lei faamoemoeina pe maua se tulaga aloaia faapitoa. Pe mafai ona ou aioi atu ia i tatou ia aua nei tiga—ma ia aua nei lagonaina le lotoleaga … ? E le faaitiitia ai o tatou manuia pe a tele ni mea e maua e le isi tagata. …

… O le tala lenei e faatatau i le lelei o le Atua, o Lona onosai ma le loto faamagalo, ma le Togiola a le Alii o Iesu Keriso. O se tala e uiga i le agalelei ma le agaalofa. O se tala e uiga i le alofa tunoa. Ua faamamafa mai ai le manatu sa ou faalogo i ai i le tele o tausaga ua mavae e mautinoa lava o le mea e sili ona fiafia i ai le Atua i le avea ai ma Atua, o le fiafia lea o le alofa mutimutivale, aemaise lava ia i latou e le o faamoemoeina lena mea ma e tele lava ina lagona latou te le agavaa i ai. …

Ou uso e ma tuafafine, ia te outou na ua faamanuiaina e le talalelei mo le tele o tausaga ona sa faamanuiaina outou i le vave mauaina [i o outou olaga], ia te outou na ua o mai i le talalelei i sia mea itiiti ma sia mea itiiti mulimuli ane, ma ia te outou na—ua auai pe lei auai lava—o loo tau manatunatu lava, ia te outou taitoatasi uma lava, ou te molimau atu i le mana faafouina o le alofa o le Atua ma le vavega o Lona alofa tunoa. O Lona popole, e mo le faatuatua o le a iu ina e mauaina, ae le o le itula o le aso na e mauaina ai lena faatuatua. (“O le Au Faigaluega i le Tovine,” Liahona, Me 2012, 31–33)

• O le a se mea e tumatila ia te oe mai aoaoga a Peresitene Holland?

• O a ni auala ua e olioli ai i le lelei, agalelei, ma le alofa mutimutivale o le Atua?

• O le a se mea e mafai ona e faia ina ia sili atu ai lou olioli ma faaitiitia ai le manao fua pe a maua e isi faamanuiaga mai le Atua? (E mafai e tagata aoga ona faamaumau o latou manatu ma lagona.)

Mafaufau e faamanatu atu i tagata aoga le tala faataitai e uiga ia Ioane mai le amataga o lenei gaoioiga aoaoina. E mafai ona e valaaulia tagata aoga e faasoa mai mea na latou aoaoina mai lenei faataoto lea e mafai ona fesoasoani mo Ioane e malamalama ai.

E mafai ona e tusia i luga o le laupapa le fesili lenei: O le a se mea ua ou le maua?

Faitau faatasi le Mareko 10:17–22, pe matamata i le “Keriso ma le Taulealea Mauoa” (2:28). Valaaulia tagata aoga e mafaufau i le fesili o loo tusia i luga o le laupapa ma le tali a le Faaola.

2:28

• Aisea na faigata ai le talosaga a le Faaola mo le alii talavou mauoa? O le a se mea faigata ua talosagaina ai oe e le Faaola? (Mafaufau e fai atu i tagata aoga e mafaufau loloto le leoa i le fesili lona lua.)

• O le a le mea na finagalo le Alii i le alii talavou e fai e ese mai le lafoaia o ana oa? (E mafai ona faailoa mai e tagata aoga se upumoni e pei o lenei: Afai tatou te mananao e mulimuli ia Iesu Keriso, e tatau ona tatou naunau e tuuina atu a tatou mea uma ia te Ia.)

Mafaufau e faailoa atu le saunoaga lenei mai ia Peresitene Jeffrey R. Holland:

Pe mauoa pe leai, e taitasi i tatou ma o mai ia Keriso ma le tautinoga lava e tasi e lē fetuuna’ia i Lana talalelei lea sa faamoemoe e fai e lenei taule’ale’a. I le gagana masani a le autalavou i aso nei, e tatau ona tatou tautino atu i tatou lava ua tatou “i ai uma i totonu.” (“O Le Oa Silisili,” Liahona, Nov. 2021, 8)

Valaaulia tagata aoga e faatulaga ni vaega toalaiti ma maua mai se faataitaiga se tasi pe lua o le uiga o le “i ai uma i totonu” a o tatou o mai ia Keriso. Afai e aoga, e mafai ona e faaali atu ia uunaiga nei mo talanoaga:

• O le salamo i a’u agasala e mafai ona faaalia ai ua ou “i ai uma i totonu” aua …

• O le osia ma le tausia o feagaiga o le malumalu ua faaalia ai ua ou “i ai uma i totonu” aua …

• O le faasoaina atu o le talalelei i se uo e mafai ona faaalia ai ua ou “i ai uma i totonu” aua …

• O le tautino atu i se faaipoipoga i le malumalu e mafai ona faaalia ai ua ou “i ai uma i totonu” aua …

• O le taliaina o se valaauga faigata o le Ekalesia e mafai ona faaalia ai ua ou “i ai uma i totonu” aua …

• O le auauna atu i se misiona e mafai ona faaalia ai ua ou “i ai uma i totonu” aua …

Tuu atu i tagata aoga se taimi e faasoa mai ai a latou faataitaiga o le uiga o le ”i ai uma i totonu.” E mafai ona e valaaulia tagata aoga e mafaufau loloto ma faamaumau se mea latou te lagona le uunaia e fai e faaali atu ai i le Alii o loo latou “i ai uma i totonu.”

E mafai ona e tusia le upu faafia-amiotonu i luga o le laupapa ma valaaulia tagata aoga e mafaufau i ni auala latou te ono vaai ai i nisi taimi ia i latou lava o ni tagata e sili atu ona lelei pe sili atu ona amiotonu nai lo isi tagata. Atonu latou te mafaufau pe na faapefea ona aafia lenā uiga i le auala na latou vaai ai pe taulimaina ai isi.

Faitau faatasi le Luka 18:9, ma valaaulia tagata aoga e faailoa mai le mafuaaga na faasoa mai ai e Iesu lenei faataoto.

Tusi le siata lenei i luga o le laupapa:

Valaaulia tagata aoga e faitau le Luka 18:10–14 ma faatusatusa tatalo a le Faresaio ma le telona. Afai e manaomia, toe iloilo le “Telona” ma le “Faresaio” i le Taiala i Tusitusiga Paia (Gospel Library).

Fai atu i tagata aoga e tusi upu ma fasifuaitau i luga o le laupapa e atagia mai ai uiga faaalia o le Faresaio ma le telona. E mafai e tagata aoga ona faamatala mai mea o loo fautuaina mai e nei upu ma fasifuaitau e uiga i alii taitoatasi. Atonu e te manaomia ona fesoasoani ia malamalama le vasega ina ua “popo [e le telona] lona fatafata” (Luka 18:13), sa ia faaali atu lona lototiga tele ma le faanoanoa loloto.

O le a le mea o loo misi mai le tatalo a le Faresaio lea e iloagofie i le tatalo a le telona? O le a le mataupu faavae e mafai ona tatou maua mai i lenei faataoto? (E mafai ona faasoa mai e tagata aoga mataupu faavae e pei o nei: Ua ofoina mai e le Atua le alofa mutimutivale i e lotomaualalo. O le faafia-amiotonu o le tagata lava ia e taofia ai le salamo ma le agaalofa i isi.)

• E faapefea e le faafia-amiotonu o le tagata lava ia ona taofia lo tatou salamo? E faapefea ona taofia ai lo tatou agaalofa i isi?

Maimoa ia Elder Robert C. Gay o loo faasoa se aafiaga i le “Taking Upon Ourselves the Name of Jesus Christ” [taimi faailo 0:37 to 2:52]. O a mea na e aoaoina mai le aafiaga na faasoa mai e Elder Gay?

10:24

Na faapefea ona taulimaina e le Faaola, o lē sa leai se agasala, i latou o e na agasala? (tagai mo se faataitaiga, Ioane 8:1–11; Luka 7:36–50).

Mafaufau e faaali atu le aoaoga lenei mai ia Elder Dale G. Renlund:

O se tagata agasala ua salamo e latalata atili atu o ia i le Atua nai lo le tagata faafia-amiotonu ua ia ta’usalaina le tagata agasala. (“O Lo Tatou Leoleo Mamoe Lelei,” Liahona, Me 2017, 31)

Ina ia fesoasoani i tagata aoga ia lagona le taua o le aloese mai le faafia-amiotonu o le tagata lava ia ma le lotomaualalo, valaaulia i latou e toe mafaufau i taimi na latou oo i ai pe na molimauina ai le mana o le lotomaualalo. Uunaia tagata aoga e faasoa mai faataitaiga. Valaaulia tagata aoga e mafaufau ma le agaga tatalo e uiga i mea o le a latou faia e atiina ae ai se uiga lotomaualalo ma le salamo.