Mataio 15–17; Mareko 7–9

E mafai ona e amata i le fai atu i tagata aoga e faailoa mai nisi o agaifanua ma tu ma aga masani i o latou aganuu i le lotoifale ma lisi i luga o le laupapa. A uma ona fatuina le lisi, valaaulia tagata aoga e mafaufau i nei tu ma aga masani i le taimi o lenei gaoioiga e aoao ai.

Faailoa atu faapea i aso o Iesu, o le tu masani a toeaina, po o le tulafono tuugutu, sa faatāuaina. O se faiga o tulafono, faiga masani, ma sauniga ua faamoemoe e fesoasoani i tagata e ola ai i le tulafono a Mose. Valaaulia tagata aoga e faitau le Mareko 7:1–13, ma vaavaai mo mea na aoao mai e Iesu e uiga i le tu masani o le fufuluina o lima a o lei aai ma le tu masani o le kopano (tagai “Mataio 15:4–9. Na faapefea ona faaaoga sese e le au Faresaio le faiga o le kopano?” ma le “Mareko 7:1–8. Aisea na faitioina ai e nisi o tusiupu ma Faresaio soo o le Faaola ona o le le mulumuluina o o latou lima?” i le Fesoasoani i Tusitusiga Paia: Feagaiga Fou).

• E mafai faapefea ona tatou faaaogaina aoaoga a le Alii e uiga i tu ma aga masani a toeaina i agaifanua ma tu ma aga masani i o tatou aso? (E mafai ona faailoa mai e tagata aoga se mataupu faavae e pei o lenei: E tatau ona tatou aloese mai tu ma aga masani ia e taofia ai i tatou mai le latalata atili atu i le Alii ma le usiusitai i Ana poloaiga.)

• O a tu ma aga masani i le lotoifale e mafai ona taofia ai i tatou mai le latalata atili atu i le Alii ma usitai i Ana poloaiga? (E mafai ona faaaoga e tagata aoga le mataupu faavae o i luga e iloilo ai le lisi o agaifanua ma tu ma aga masani o loo i luga o le laupapa.)

E mafai ona e faaali atu ma talanoaina le saunoaga lenei a Peresitene Dallin H. Oaks:

Ina ia fesoasoani i ona tagata i le lalolagi atoa, ua aoaoina i tatou e le Ekalesia e lafoai soo se tu masani po o faiga faaletagata lava ia po o le aiga, e feteenai ma aoaoga a le Ekalesia a Iesu Keriso. … Matou te talosaga atu i a matou … tagata o le ekalesia e tuu ese tu ma aganuu po o faiga faaleaganuu ia e taitai ese ai i latou mai le ala o le tuputupu ae ma le alualu i luma. Matou te talosagaina tagata uma ina ia a’ea’e i le tulaga maualuga o le aganuu o le talalelei, i faiga ma tu ma aga masani ua mauaa i le talalelei toefuataiina a Iesu Keriso. (“O le Aganuu Faaletalalelei,” Liahona, Mat. 2012, 42–43)

Tuu atu i tagata aoga ni nai minute e faailoa ai se agaifanua po o se tu masani atonu latou te manaomia ona aveesea mai o latou olaga ina ia mafai ona latou mulimuli atoatoa atili ai i le Faaola. E mafai foi e tagata aoga ona faasoa mai nisi o agaifanua po o tu ma aga masani e fesoasoani ia i latou e tumau ai i le ala o feagaiga.

Manatua: E faalagolago i manaoga o tagata aoga, mafaufau e talanoaina ni auala e mafai ona latou faamaoni ai i le talalelei a Iesu Keriso ma tumau ai i le faaaloalo i tu ma aga masani a aiga poo lotoifale e le ogatasi ma le ola ai i le talalelei.

Mafaufau e faaali atu ata o le Faaola o loo tauaveina le satauro. Valaaulia tagata aoga e mafaufau i o latou manatu ma lagona pe a latou vaai i nei ata. E mafai ona e valaaulia ni nai tagata aoga e faasoa mai o latou manatu ma lagona.

Faaali atu ma faitau le faamatalaga lenei mai ia Elder Ulisses Soares:

Sa faaaoga ma le iloaina ma faafaatusa e Iesu le faatusa o le satauro e fesoasoani ai i Ona soo ina ia malamalama atili i le uiga moni o le ositaulaga ma le tuuto i le galuega a le Alii. … [Tatou] te manaomia ona tatala o tatou mafaufau ma o tatou loto ina ia malamalama atoatoa i le taua o le aveina i o tatou luga o ō tatou satauro ma mulimuli atu ia te Ia. (“Ave Lo Tatou Satauro,” Liahona, Nov. 2019, 113)

Mafaufau e faaali atu le faamatalaga le atoatoa lenei: E mafai ona tatou aveina lo tatou satauro ma mulimuli ia Iesu Keriso e ala i le …

Valaaulia tagata aoga e faitau le Mataio 16:24–26 ma le Faaliliuga a Iosefa Samita, Mataio 16:25–29 (Gospel Library), ma vaavaai mo ma faamaumau ni auala eseese e mafai ona latou faamae’aina ai le faamatalaga. E mafai ona tusi e tagata aoga a latou faamatalaga ua maea i le laupapa. O tali e mafai ona aofia ai mea nei:

• E mafai ona tatou aveina lo tatou satauro ma mulimuli ia Iesu e ala i le:

  • Faafiti i tatou lava mai mea uma e le faaleatua.

  • Faafitia o tu’inanauga faalelalolagi.

  • Tausia o poloaiga.

  • Fa’ama’imau o tatou ola i le auaunaga a le Faaola.

Mo na o i latou pe faatasi ma se paga, e mafai e tagata aoga ona filifili se tasi o faamatalaga ua mae’a ona faalolotoina lea o lo latou malamalama i ai e ala i le faaaogaina o le tomai “Faaaogaina o Aoaoga a Taitai o le Ekalesia e Malamalama ai i Tusitusiga Paia” i le Tomai mo le Suesueina o Tusitusiga Paia. Ona valaaulia lea o tagata aoga e saunia se faamalamalamaga puupuu o le uiga o le faamatalaga. Valaaulia foi i latou e saunia se ata po o se faataitaiga moni o le olaga e faaalia ai le auala e mafai ona faaaoga ai le faamatalaga i le olaga i aso uma.

A maea sauniuniga a tagata aoga, e mafai ona latou faatulagaina ni vaega toalaiti ma faasoa mai mea na latou saunia.

Mafaufau e faaali atu le fesili lenei ma valaaulia tagata aoga e faamaumau o latou manatu:

• O le a se mea e mafai ona e amata, taofi, pe faaauau pea ona fai e ave ai lou satauro ma mulimuli i le Faaola?

Manatua: Afai e i ai ni fesili a tagata aoga e uiga i le mafuaaga tatou te le faaaogaina ai le faatusa o le satauro e pei ona faia e isi Kerisiano, valaaulia i latou e faitau le saunoaga a Peresitene Jeffrey R. Holland “Siitia ae i luga o le Satauro” (Liahona, Nov. 2022, 77–80).

Faailoa atu ua iloa e tagata suesue e toatele tagata talavou “e le faatuatuaina faalapotopotoga—e aofia ai tapuaiga faatulagaina” (Anthony D. Perkins, “The Greatest Cause in History,” Ensign, Iuni 2019, 63). E mafai ona e talanoaina faapuupuu pe aiseā e ono faapena ai lagona o le to’atele o talavou.

Faamalamalama atu faapea i le Mataio 16:13–19, ua saunia ai e le Faaola aoaoga taua e mafai ona faateleina ai lo tatou talitonuga i Lana Ekalesia ma i latou o e taitaia. Tusi le Molimau i le Faaola, Lenei Papa, ma Ki o le Malo i luga o le laupapa. Valaaulia tagata aoga e filifili se tasi o autu ma faatulaga ni vaega toalaiti faatasi ma i latou e mananao e suesue i le autu lava e tasi.

Tuuina atu i tagata aoga le pepa e tufatufa atu ina ia fesoasoani ia i latou e taiala ai a latou suesuega.

A uma ona tuu atu se taimi mo suesuega ma talanoaga, valaaulia tagata aoga e tusi a latou mataupu faavae po o malamalamaaga i lalo o le ulutala talafeagai i luga o le laupapa pe afai latou te lei faia. Ona valaaulia lea o tagata aoga e faitau ia faamatalaga eseese.

A uma ona faitau e tagata aoga faamatalaga a a latou uo, e mafai ona e valaaulia i latou e faasoa mai mea na latou aoaoina ma lagonaina mai lenei aafiaga. Valaaulia nisi o tagata aoga e faasoa mai pe faapefea ona uunaia lo latou talitonuga i le Ekalesia e lo latou malamalama e faapea E tuuina mai e Iesu Keriso faaaliga ma ki o le perisitua i Lana perofeta ma Aposetolo e taitai ai Lana Ekalesia.

Mafaufau e faaali atu se ata o Iesu Keriso. Fai atu i au tagata aoga e mafaufau filemu i fesili nei:

• O a ni ou talitonuga o loo i ai e sili ona malolosi e uiga i le Faaola?

• O a ni auala e ono vaivai ai lou faatuatua i le Faaola?

Valaaulia tagata aoga e vaavaai mo auala e faamalosia ai lo latou faatuatua ia Iesu Keriso pe a latou lagonaina ua vaivai.

Faitau le Mareko 9:17–27 faatasi o se vasega, ma vaavaai pe na faapefea ona fesoasoani le Faaola e faamalosia le faatuatua o se tagata. E mafai ona e faia se tasi o mea nei e fesoasoani ai i tagata aoga e vaai faalemafaufau i lenei aafiaga:

Maimoa i le “Mauaina o le Faatuatua ia Keriso” (mai le taimi faailo 9:55 i le 10:47).

30:12

Matamata, faitau, pe faalogologo i le toe faamatalaina e Peresitene Jeffrey R. Holland o lenei tala i lana lauga “Le Alii e, Ua Ou Faatuatua” (mai le taimi faailo 0:00 i le 3:47; Liahona, Me 2013, 93).

14:43

Mafaufau poo fea o nisi o fesili nei e mafai ona fesoasoani e faalolotoina ai le aoaoina o tagata aoga:

• O le a se mea e te iloa e taua i le aioiga ma loimata a le tama, “Le Alii e, ua ou faatuatua; ia e fesoasoani i lo’u le faatuatua”? (Mareko 9:24). O anafea na e lagona ai poo se tasi foi e te iloa e pei o lenei tama?

• E mafai faapefea e lenei aafiaga ona fesoasoani ia i tatou pe a tatou lagonaina e pei ua leai se faatuatua? (E mafai ona faailoa mai e tagata aoga se upumoni e pei o lenei: A o tatou sailia le fesoasoani a le Alii, e mafai ona Ia faamalosia lo tatou faatuatua.)

• Na faapefea ona fesoasoani le Alii ia te oe po o se tasi e te iloa e faatoilalo le le talitonu?

Faitau ma talanoaina faatasi o se vasega po o ni vaega toalaiti le saunoaga lenei a Peresitene Jeffrey R. Holland.

O le mea muamua e matau i lenei tala o le taimi e feagai ai ma luitau o le faatuatua, sa faamautu muamua e le tamā lona malosi ma o iina na ia faailoa atu ai le mea e gata ai. O lana uluai tautinoga lava o lona ioeina e aunoa ma se faatuai: “Le Alii e, ua ou faatuatua.” Ou te fia fai atu ia i latou uma o ē moomoo ia tele atu se faatuatua, ia manatua lenei tama! I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe, tusa lava pe itiiti lena faatuatua. …

Lona lua o mea e matau e fai sina ese mai le mea muamua. A oo mai faafitauli ma tulai mai ni fesili, aua nei amataina lau sailiga mo le faatuatua i lou faapea pe o le a le tele e te le o maua, ma e amata ai i lou “le faatuatua.” … Ou te le o faapea atu e te faafoliga ua ia te oe le faatuatua e le o i ai. O lea ou te fai atu ia e faamaoni i le faatuatua lena ua ia te oe. …

Maitauga mulimuli: a oo mai le le mautonu po o faigata, aua e te fefe e fesili mo se fesoasoani. Afai tatou te mananao i le fesoasoani ma le lotomaualalo ma le faamaoni e pei ona sa faia ai e lenei tamā, e mafai ona tatou maua. (“Le Alii e, Ua Ou Faatuatua,” Liahona, Me 2013, 93–94)

• O a isi ou mafaufauga ma lagona o i ai ao e faitau i lenei upusii?

• E mafai faapefea ona e faaaogaina mea ua e aoaoina e faateleina ai lou faatuatua?

Valaaulia tagata aoga e faatino soo se lagona po o ni uunaiga na latou maua i le asō e mafai ona fesoasoani ia i latou e faateleina ai lo latou faatuatua ia Iesu Keriso ma Lana talalelei.