Mataio 5; Luka 6

E mafai ona e faasoa atu le ata faataitai lenei:

• E faapefea ona e iloiloina le malamalama o Jaron e uiga i le fiafia?

Faamatala atu e faapea na muai faasoa mai e le Faaola i le Lauga i luga o le Mauga aoaoga e iva ua lauiloa o Faaamuia. Valaaulia tagata aoga e vaai faatopetope i le Mataio 5:3–12 ma sue le upu e amata ai faaamuia taitasi. Faamatala o le upu amuia e sau mai le upu Latina beatus, o lona uiga o le manuia po o le fiafia (tagai i le “Mataio 5:3–12. O a Faaamuia?” i le Scripture Helps: New Testament [Fesoasoaniga o Tusitusiga paia: Feagaiga Fou] mo nisi faamatalaga).

Mafaufau e faaali atu le upumoni lenei: O le taumafai ia maua uiga faaleatua o loo aoao mai i Faaamuia e fesoasoani tatou te o mai ai ia Keriso ma maua le fiafia sili atu.

E mafai ona e valaaulia tagata aoga e iloilo le Mataio 5:3–12 ma filifili se faaamuia latou te mananao e suesue loloto atili. Tuu atu ia i latou le pepa e tufa atu o loo avatu faatasi ai e fesoasoani ia i latou e aoao atili ai. (A o galulue tagata aoga i lenei pepa e tufa atu, o le a latou faataitaia le faaaogaina o le tomai o le “Mauaina o le Uiga o Upu ma Fasifuaitau” ma le “Faaaogaina o Aoaoga a Taitai o le Ekalesia ia Malamalama ai i Tusitusiga Paia” mai Tomai o le Suesuega o Tusitusiga Paia).

E mafai e tagata aoga ona faasoa atu i ni vaega toalaiti po o se vasega mea na latou aoaoina e uiga i le faaamuia sa latou suesueina. Fautuaina tagata aoga e faasoa mai ni aafiaga patino pe na faapefea e le faaaogaina o upumoni na aoaoina i Faaamuia ona fesoasoani ia i latou e o mai ai ia Keriso ma maua le fiafia sili atu.

E mafai ona e tuuina atu i tagata aoga se taimi e mafaufau loloto ai ma tusifaamaumau pe mafai faapefea ona latou saili atili ma le loto i ai ia maua le uiga auaumama i le faaamuia sa latou suesueina.

Toe foi i le “Filifiliga o Gaoioiga e Aoao Ai.”

E mafai ona e faaali atu ata nei o le masima ma le malamalama:

Valaaulia nisi o tagata aoga e mafaufau po o a mea na aoao mai e le Faaola e ala i le faatusa o le masima i le Mataio 5:13. Valaaulia isi e mafaufau i mea sa Ia aoao mai e ala i le faatusa o le malamalama i le Mataio 5:14–16. E mafai ona e faaali atu ma toe faamanatu fesili nei e mafai ona fesoasoani i tagata aoga e faamatala ai uiga o faatusa (tagai “Malamalama i Faatusa i Tusitusiga Paia” i le Tomai o Suesuega o Tusitusiga Paia mo nisi fesoasoani).

1. O le a le faatusatusaga o loo faia i le fuaiupu o le mau po o le fuaitau o loo e suesueina?

2. O a ni faaātaātaga e mafai ona e maua e faatatau i le uiga o le faatusa i le anotusi o tusitusiga paia, vaefaamatalaga, ma le Taiala i Tusitusiga Paia? (O tagata aoga o loo suesueina le fuaiupu e uiga i le masima e mafai foi ona faitauina le “Mataio 5:13. O le a le uiga o le avea ma ‘masima o le lalolagi’?” i le Scripture Helps: New Testament [Fesoasoaniga o Tusitusiga Paia: Feagaiga Fou].)

3. O le a le mea o loo aoao mai e le Faaola e ala i lenei faailoga?

A uma ona tuuina atu se taimi mo suesuega, mafaufau e fai atu nisi o fesili nei:

• O a ni auala e mafai ai e soo o Iesu Keriso ona faaalia uiga o le masima lelei? E mafai faapefea ona aveesea lo tatou “magalo,” [tofo lelei] po o faatosinaga lelei?

• O le a le uiga o le faasusulu atu lou malamalama? (E mafai ona faailoa mai e tagata aoga se upumoni e pei o lenei: O a tatou faataitaiga amiotonu o ni soo o Iesu Keriso e mafai ona uunaia ai isi e viia le Tama Faalelagi.) E mafai ona e faitau i aoaoga a le Faaola o loo i le 3 Nifae 18:24–25 ma talanoaina pe mafai faapefea e nei upu ona tosina ai lo tatou malamalama o le Mataio 5:14–16.

• Mafaufau i se tasi e te faamatalaina o “le masima o le lalolagi” po o se “malamalama o le lalolagi.” Na faapefea e le faataitaiga amiotonu a lenei tagata ona uunaia ai oe po o isi mo le lelei? (Atonu e fesoasoani le matamata ma talanoaina le “Shine Your Light So Others Can See” [3:19].)

  

  3:20

Uunaia tagata aoga e mafaufau pe mafai faapefea ona avea i latou ma se faatosinaga amiotonu i isi, e aofia ai i luga o ala o faasalalauga faaagafesootai. Ina ia fesoasoani i tagata aoga e mafaufau i le faatosinaga mo le lelei o loo latou maua pe mafai ona maua, e mafai ona e faaali atu ma faitau le saunoaga lenei a Peresitene Susan H. Porter:

O le a le telē o le malamalama e ati ai i le pogisa i totonu o se potu? O se ave laitiiti e tasi. Ma o lena ave o le malamalama i se nofoaga pogisa e mafai ona sau mai le mana o le Atua ia te oe.

E ui lava atonu e te lagonaina le tuuatoatasi a o pesi mai afā o le olaga, e mafai ona e faasusulu atu se malamalama i le pogisa o le lē malamalama, fenumiai, ma le lē talitonu. O lou malamalama o le faatuatua ia Keriso e mafai ona mausali ma mautinoa, ma taitai atu ai i latou o siomia oe i le saogalemu ma le filemu.

… e mafai ona suia loto ma faamanuiaina olaga a o tatou ofoina atu sina masima … ma se ave o le malamalama. (“Lesona i le Vaieli,” Liahona, Me 2022, 61)

Uunaia tagata aoga e fuafua se mea se tasi e mafai ona latou faia pe e tatau ona latou faia pea e faataunuu ai le faamoemoega o le Faaola mo i tatou ia faapei o le masima ma se malamalama mo le lalolagi.

Toe foi i le “Filifiliga o Gaoioiga e Aoao Ai.”

Faaali atu ma talanoaina le saunoaga lenei a Peresitene Dallin H. Oaks:

I se faatusatusaga i faalapotopotoga o le lalolagi, lea e aoao ai i tatou ina ia iloa se mea, ua lu’iina i tatou e le talalelei a Iesu Keriso ia avea ma se mea. (“The Challenge to Become,” Ensign, Nov. 2000, 32)

Faamatala atu e faapea o le Mataio 5, na tuuina mai ai e Iesu Keriso se tulafono maualuga atu lea na sili atu nai lo o le tulafono a Mose. Valaaulia tagata aoga e suesue le Mataio 5:17–20, 48 e iloa ai pe mafai faapefea e le ola ai i le tulafono maualuga ona suia o tatou olaga. (Fesoasoani i tagata aoga ia malamalama e faapea a o tatou taumafai e ola i le tulafono maualuga atu, o le a avea atili i tatou e faapei o le Tama Faalelagi.)

Mafaufau e faaaoga le pepa na tufa atu o loo avatu faatasi e fesoasoani ai i tagata aoga e suesue ma aoao e le tasi le isi e uiga i le tulafono maualuga a le Faaola. E mafai ona e vaevaeina lau vasega i ni vaega se lima, tasi mo autu taitasi, ma valaaulia vaega taitasi e saunia ma aoao atu le vasega. I se isi itu, e mafai ona e atofa atu i tagata aoga taitasi se tasi o autu e lima ma valaaulia i latou e fai se vaega ma i latou o e sa suesueina isi autu. Ona mafai lea ona latou saunia e aoao atu a latou autu i isi o le vaega.

Nai lo o le tuu atu i tagata aoga e lipoti mai a latou talanoaga faavaega (pe o le uma foi ona tuu atu ia i latou e lipoti mai), e mafai ona e valaaulia i latou e filifili se tasi o mataupu faavae na aoao mai e le Faaola ma mafaufau loloto i mea e mafai ona latou faia e ola lelei atili ai i lenei mataupu faavae.

Toe foi i le “Filifiliga o Gaoioiga e Aoao Ai.”