2 Korinito 8–13

E mafai ona e amata i se tulaga faataitai faapenei:

• Aisea e faigata ai i nisi taimi ona iloa le auala e fesoasoani ai ia i latou o e o loo manaomia le fesoasoani?

I le taimi o lenei talanoaga, valaaulia tagata aoga e saili musumusuga e uiga i le auala e mafai ona latou tuuina atu ai le toomaga ia i latou o loo siomia ai i latou.

Faamalamalama atu faapea i le 2 Korinito 8–9, na fautuaina ai e Paulo le Au Paia i Korinito e uiga i le tausia o e matitiva ma isi tagata e le tagolima. Faaali atu fesili ma fuaitau o loo i lalo. Valaaulia tagata aoga e galulue i ni vaega toalaiti e suesue fuaitau ma vaavaai mo upumoni e tali ai fesili e faatatau i ai:

• O le a se mea e mafai ona ou aoao mai le Faaola e uiga i le tausia o e matitiva? Faitau le 2 Korinito 8:1–5, 9.

• E fia le mea e tatau ona ou foai atu? Faitau le 2 Korinito 9:6 (tagai foi i le Alema 1:30).

• O le a lo’u uiga faaalia pe a foai atu i e o manaomia le fesoasoani? Faitau le 2 Korinito 8:12; 9:7 (tagai foi i le Moronae 7:6–8).

• E faapefea ona fesootai le foai atu i le lotofaafetai? Faitau le 2 Korinito 9:11–15.

A uma ona tuu atu se taimi mo suesuega faalevaega, valaaulia tagata aoga e tusi i luga o le laupapa upumoni na latou maua e fesoasoani e tali ai fesili. (Atonu latou te faailoa mai upumoni e pei o nei: O le malamalama i mea ua tuuina mai e le Faaola ia i tatou e mafai ona fesoasoani ia i tatou ia sili atu ona naunau e foai atu i isi. E finagalo le Atua ia tatou naunau e foai atu tusa lava pe leai sa tatou mea e foai atu. Pe afai tatou te foai atu ma le limafoa’i i ē e mana’omia le fesoasoani, o le a faamanuiaina ma le agalelei i tatou e le Atua. E alofa le Atua i lē e foai atu ma le fiafia. O le faamama avega i manaoga o isi o se ala lea e tuuina atu ai le faafetai i le Atua.)

Mafaufau e talanoaina nisi o fesili nei e fesoasoani i tagata aoga e faalolotoina ai o latou malamalama o nei upumoni.

• E mafai faapefea e le toe mafaufau i le soifuaga ma le misiona a le Faaola ona musuia oe e foai atu i isi?

• E mafai faapefea ona e agalelei i isi pe afai e le tele ni mea e te foai atu?

• O le a se mea e fesoasoani ia te oe e avea ma se tagata e foai ma le loto malie? O a ni auala ua faamanuiaina ai oe e se tagata e foai ma le loto malie?

• O le a le auala e avea ai le foai atu i isi o se faailoaga o le lotofaafetai i le Atua?

E mafai ona outou talanoaina faatasi ni auala patino e mafai ona tatou mulimuli ai i le poloaiga a le Alii e tausia i latou o loo manaomia le fesoasoani. I le avea ai ma se vaega o lenei talanoaga, e mafai ona e valaaulia tagata aoga e faasoa mai ni faataitaiga na latou vaaia i o latou lava olaga.

Mafaufau e faaiu lenei gaoioiga e ala i le faasoa atu o le saunoaga lenei a Peresitene Jeffrey R. Holland:

Ou te le iloa tonu pe o le a se tulaga e tatau ona faataunuu taitoatasi ai a outou matafaioi ia i latou o e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa e tusa ai o ni soo moni pe afai o outou mananao ma le magafagafa ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou. (“Pe Le o i Tatou Uma Ea O Ni Tagata Aisi?,” Liahona, Nov. 2014, 41)

Tuu atu i tagata aoga se taimi e mafaufau loloto ai i mea e mafai ona latou faia patino e fesoasoani ai i se tasi o loo manaomia le fesoasoani. Uunaia tagata aoga e faamaumau la latou fuafuaga.

Toe foi i le “Filifiliga o Gaoioiga e Aoao Ai.”

E mafai ona e amataina i le ata faataitai lenei:

• O a ni faafitauli o e vaaia i le auala a Maria?

• E mafai faapefea e lenei auala ona taitai atu ai i le faaseseina?

Faamalamalama atu faapea i aso o Paulo, sa fetaiai nisi o le Au Paia i Korinito ma aposetolo pepelo o e na faaseseina tagata.

Valaaulia tagata aoga e faitau le 2 Korinito 11:3–4, 13–15, ma vaavaai pe faapefea ona saili Satani e faasese i tatou.

• E tusa ai ma le faamatalaga a Paulo, e faapefea ona faaseseina i tatou? (E mafai ona faailoa mai e tagata aoga se upumoni e pei o lenei: E faaaoga e Satani faiaoga pepelo ma faiga taufaasese e taitai ese ai i tatou mai ia Iesu Keriso.)

• E mafai faapefea e Aposetolo a le Alii, e pei o Paulo, ona puipuia i tatou mai le faaseseina?

• Na faapefea ona fesoasoani perofeta ma aposetolo soifua o le Alii ia te oe e aloese mai le faaseseina? Na faapefea ona latou faatumauina lou taulai atu ia Iesu Keriso?

Valaaulia tagata aoga e vaai faalemafaufau o i latou o Maria, ma nai lo le faalogo ma faitau i punavai e tele lava ina tetee, latou te liliu atu i perofeta ma aposetolo a le Alii. E mafai ona e fai atu i tagata aoga e o i le Gospel Library ma saili se tasi o punavai nei e vaai ai po o a mea o loo aoao mai e perofeta ma aposetolo e uiga ia Iesu Keriso:

• “Molimau Faapitoa a Keriso”

• “O Le Keriso Soifua: O Le Molimau a le Au Aposetolo”

• O le autu “Iesu Keriso” i le Konafesi Aoao

A mae’a se taimi talafeagai, vala’aulia tagata a’oga e fa’asoa atu i se paga po’o le vasega mea na latou mauaina. E mafai ona e fai atu fesili faapenei:

• O le a le mea na aoao atu e le savali na e suesueina ia te oe e uiga ia Iesu Keriso?

• Na faapefea ona uunaia ou mafaufauga po o lagona e uiga i le Faaola i mea na e faitauina?

• Na faapefea ona fesoasoani le suesueina o upu a perofeta ma aposetolo a le Alii ia te oe e malamalama ai i le upumoni e uiga ia Iesu Keriso? Na faapefea ona puipuia oe mai le taufaasese?

Ina ia faaiu, mafaufau e faaali atu le saunoaga lenei a Peresitene Russell M. Nelson:

E leai se muta’aga i mea taufaasese a le fili. Faamolemole ia saunia. ‘Aua ne’i e faalogo i se fautuaga mai ia i latou o ē lē talitonu. Saili atu i le taitaiga mai leo e mafai ona e faatuatuaina—mai perofeta, tagatavaai, ma talifaaaliga ma mai musumusuga a le Agaga Paia, o lē “o le a faaali mai e ia ia te outou mea uma e tatau ona outou faia.” [2 Nifae 32:5; faaopoopo le faamamafa]. (“Mafaufau Faaselesitila!,” Liahona, Nov. 2023, 119)

Uunaia tagata aoga e mafaufau i mea e mafai ona latou faia e avea ai upu a perofeta ma aposetolo o se vaega e sili atu ona taua o o latou olaga.

Toe foi i le “Filifiliga o Gaoioiga e Aoao Ai.”

Valaaulia tagata aoga e faasoa mai ni luitau po o ni vaivaiga o loo feagai ma talavou matutua. Tusi a latou tali i luga o le laupapa. Ona tuu atu lea i tagata aoga se taimi e mafaufau ai i se luitau po o se vaivaiga patino o loo latou taumafai e faatoilalo. Valaaulia i latou e manatua o latou luitau po o vaivaiga patino i le taimi o lenei gaoioiga aoaoina ma faamaumau soo se uunaiga latou te maua.

Faamalamalama atu faapea i le 2 Korinito 12:1–6, na faasino ai le Aposetolo o Paulo i se faaaliga vaaia ofoofogia na ia vaaia. Ina ua uma ona talanoa e uiga i lenei faaaliga, ona ia talanoa lea e uiga i se vaivaiga sa feagai ma ia. Valaaulia le vasega e faitau le 2 Korinito 12:7–10, ma vaavaai pe na faapefea ona faamatalaina e Paulo lona vaivaiga. A o faasoa mai e tagata aoga mea na latou maua, mafaufau e faaali atu se ata o laau matuitui e pei o lenei:

• O le a se mea e te iloa e taua i le faatusatusaina e Paulo o lona luitau po o lona vaivaiga i “le mea matuitui i le tino”? (fuaiupu 7). (Manatua: Atonu e fesoasoani le faauigaina o upu faigata ma faasoa atu le faamatalaga “2 Korinito 12:7–9: O le a le mea matuitui na faalavelave ia Paulo?” i le Fesoasoaniga mo Tusitusiga Paia: Feagaiga Fou.)

Valaaulia tagata aoga e faitau le 2 Korinito 12:8–10, ma vaavaai mo mea na aoaoina e Paulo a o ia ole atu mo se fesoasoani mai le Alii.

• O a ni mea na e aoaoina e uiga i le luxxwws123e45678890f5tg5g5rrtghhgxesxgdZAitau a Paulo?

• O a ni fasifuaitau sa matua tulaga ese ia te oe? Aisea? (E mafai ona e valaaulia tagata aoga e filifili se fasifuaitau latou te iloa e faapitoa lava le musuia ma faaalu ni nai minute e tauloto ai. Atonu o se nofoaga lelei lea e faaaoga ai le tomai o le “Taulotoina o Fuaitau o Mau” i le Tomai mo Suesuega o Tusitusiga Paia).

• O a upumoni sa e aoaoina e uiga i le Faaola mai le aafiaga a Paulo? (E mafai ona faailoa mai e tagata aoga upumoni e pei o nei: Ua lava le alofa tunoa o Iesu Keriso e faamalosia ai i tatou i o tatou vaivaiga. E le aveesea pea e le Alii o tatou luitau, ae o le a Ia faamalosia i tatou a o tatou onosaia i latou ma le faamaoni.)

• E mafai faapefea e le iloaina o nei upumoni ona aafia ai le auala e te tali atu ai i ou vaivaiga po o le lē atoatoa patino?

E mafai e tagata aoga ona faatulaga ni vaega toalaiti ma suesue i le “Alofa Tunoa” i Autu ma Fesili (Gospel Library). Valaaulia i latou e vaavaai mo mafuaaga ua lava ai le alofa tunoa o le Faaola mo i latou. A uma ona faasoa mai e tagata aoga mea ua latou maua, mafaufau e talanoaina faatasi o se vasega fesili nei:

• O le a se mea ua e aoaoina e uiga i le Faaola i aso nei e faamalosiauina pe fesoasoani ia te oe?

• O anafea na e lagonaina ai le faamalosia o oe e Iesu Keriso e ala i ou vaivaiga? (I le avea ai o se vaega o la outou talanoaga o lenei fesili, mafaufau e matamata le vitio “Let God Guide You: From Weakness to Strength” [6:06]. Valaaulia tagata aoga e vaavaai ma talanoaina pe na faapefea ona faataitaia aoaoga a Paulo mai le 2 Korinito 12 i le vitio lenei.)

  

  6:7

E mafai ona tou faaiu e ala i le faasoa i le saunoaga lenei a Bishop Gérald Caussé:

O le Atua e le o le Atua o tamaautu, po o tagata e leai ni vaivaiga. E lē o i ai ni tagata faapena! E fesoasoani le Atua i tagata e pei o oe ma a’u, o i latou o e iloa o latou tapulaa ma vaivaiga o o latou tulaga ma saili Lana fesoasoani ma le taitaiga. …

… A o e … tuu atu lou talitonuga i le Alii, o le a e vaaia ai le suia o ou vaivaiga i malosiaga e ala i le mana ma le alofa tunoa o Lana Togiola. (“For When I Am Weak, Then Am I Strong” [faigalotu a le Iunivesite o Polika Iaga, 3 Tes., 2013], 3, 6–7, speeches.byu.edu)

Tuu atu i tagata aoga se taimi e mafaufau ai pe faapefea ona latou faaaogaina upumoni ua latou aoaoina i o latou tulaga patino. Uunaia i latou e faamaumau la latou fuafuaga ma uunaiga faaleagaga na latou maua.

Toe foi i le “Filifiliga o Gaoioiga e Aoao Ai.”