1 ma le 2 Tesalonia

Mafaufau e amata i le faasoa atu o le saunoaga lenei a Elder Gerrit W. Gong:

I le avea ai ma soo o Iesu Keriso, tatou te saili ia auauna atu i isi e faapei ona Ia faia aua o loo faatalitali olaga ina ia suia. (“Auaunaga,” Liahona, Me 2023, 16)

Valaaulia tagata aoga e mafaufau i a latou taumafaiga o loo i ai nei e auauna atu i isi. E mafai foi ona latou mafaufau i fesili po o popolega o loo i ai e uiga i le auaunaga. Uunaia i latou a o latou suesue e gauai atu i mea e mafai ona aoao atu e le Agaga ia i latou e uiga i le auauna atu i isi e pei ona faia e le Faaola.

Ina ia fesoasoani i tagata aoga ia malamalama i le anotusi o aoaoga a Paulo i le 1 Tesalonia, mafaufau e faasoa atu le aotelega lenei:

Valaaulia tagata aoga e suesue le 1 Tesalonia 2:7–14; 3:6–13. Uunaia i latou e faailoa ma faailoga fuaitau o loo faaalia ai le auaunaga faaKeriso. Ina ia fesoasoani i tagata aoga e faasoa mai mea sa latou maua, e mafai ona e fai atu fesili e pei o lenei:

• O a nisi o faataitaiga o le auaunaga faaKeriso na e maua i nei fuaiupu?

• O le a se mea ua e aoao mai i nei fuaiupu e uiga i le aafiga o lau auaunaga FaaKeriso i isi? (Afai e manaomia, e mafai ona e toe faasino atu tagata aoga i le 1 Tesalonia 2:13–14. E mafai ona faailoa mai e tagata aoga se upumoni e pei o lenei: A o tatou auauna atu i isi i le alofa, e mafai ona tatou fesoasoani ia i latou ia avea ma soo sili atu o Iesu Keriso.)

Faailoa atu e faaopoopo atu i tofiga e tatau ona tatou auauna atu ai i a tatou uarota po o paranesi, e tele atu avanoa tatou te auauna atu ai i o tatou olaga i aso uma.

• O a nisi o auala patino e mafai ona tatou auauna atu ai i isi e pei ona faia e le Faaola? (I le avea ai o se vaega o la outou talanoaga, mafaufau e valaaulia se tagata aoga e faitau le saunoaga lenei a Sister Jean B. Bingham):

O ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia. O le a le mea na faia e le Faaola? E ala i Ana meaalofa faalelagi o le Togiola ma le Toetu … “e leai lava se isi na i ai se aafiaga loloto faapea [i] e uma na soifua ma e o le a soifua i luga o le fogaeleele” [“O Le Keriso Soifua,” Gospel Library]. Ae sa Ia ataata foi i, talanoa i, savavali ma, faalogo atu i, faaavanoa se taimi mo, faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei. O na faatinoga “faigofie” o auaunaga ma le alofa ua maua ai se mamanu mo a tatou auaunaga i aso nei. (“Auauna Atu e pei ona Faia e le Faaola,” Liahona, Me 2018, 104)

• O a nisi taimi na auauna atu ai ma le alofa le Faaola i isi? (Mafaufau e tuu atu i tagata aoga se taimi e suesue ai i tusitusiga paia e maua ai faataitaiga. E mafai ona e faaali atu ni nai mau faasino mo tagata aoga o e manaomia le fesoasoani, e pei o le Mareko 2:14–17; Ioane 8:1–11; 3 Nifae 17:1–9. E mafai ona talanoaina e tagata aoga ma se vaega toaitiiti mea na latou maua.)

Valaaulia tagata aoga e mafaufau i taimi na auauna atu ai ma le alofa isi ia i latou. E mafai ona e fai atu i ni nai tagata aoga e faasoa mai o latou aafiaga ma pe na faapefea ona fesoasoani na aafiaga ia i latou e avea ai ma se soo sili atu o Iesu Keriso.

Faaiu i le valaaulia o tagata aoga e saili ma le agaga tatalo le fesoasoani a le Tama Faalelagi ia iloa ai po o ai o le a Ia finagalo latou te auauna atu i ai i lenei aso ma pe faapefea. Valaaulia i latou e tusifaamaumau o latou uunaiga faaleagaga.

Toe foi i le “Filifiliga o Gaoioiga e Aoao Ai.”

Faaali se ata o loo faaalia ai le Afio Mai Faalua o Iesu Keriso, e pei o lea sa faaali i le amataga o le lesona. Mafaufau e valaaulia tagata aoga e talanoaina le fesili lea faatasi ma se paga po o se vaega toaitiiti:

• O a ni manatu, fesili, po o ni atugaluga e oo mai i lou mafaufau pe a e mafaufau i le Afio Mai Faalua o Iesu Keriso?

Faamalamalama atu, e pei o le toatele i o tatou aso, sa i ai i le Au Paia Tesalonia ni fesili ma ni atugaluga e uiga i le Afio Mai Faalua o le Faaola. E tusa ai ma a’oa’oga a Paulo i nei mataupu, atonu na latou faia ai ni fesili e pei o fesili o loo lisiina i le gaoioiga su’esu’e lenei. Mafaufau e faaali atu nei fesili ma mau faasino o loo i ai.

Valaaulia tagata aoga e filifili se filifiliga se tasi pe sili atu e suesue ai. I se isi itu, e mafai ona e vaevaeina tagata aoga i ni vaega taitoatolu ma atofa atu i tagata aoga taitasi se vaega e suesue ai. Ona mafai lea ona latou aoteleina mo la latou vaega mea na latou aoaoina.

O A Mea o le a Tutupu i e o Soifua ma e ua Maliliu i le Afio Mai Faalua o Iesu Keriso?

• Aoaoga a Paulo: 1 Tesalonia 4:13–18, e aofia ai le Faaliliuga a Iosefa Samita o loo maua i vaefaamatalaga a i fuaiupu e 15 ma le 17

• Mau fesootai: Mataupu Faavae ma Feagaiga 88:96–98

O Afea e Tupu ai le Afio Mai Faalua o Iesu Keriso?

• Aoaoga a Paulo: 1 Tesalonia 5:1–6

• Mau fesootai: Mataupu Faavae ma Feagaiga 106:4–5

E mafai faapefea ona ou saunia a’u lava ia e feiloai ma le Faaola pe a toe afio mai o Ia?

• Aoaoga a Paulo: 1 Tesalonia 5:14–22

• Mau fesootai: Mataupu Faavae ma Feagaiga 87:8

A maea ona suesue tagata aoga, valaaulia i latou e aotele mea na latou aoaoina, a le i a latou vaega ua atofaina pe faatasi foi o se vasega. E mafai foi ona e valaaulia i latou e faasoa mai upumoni na latou maua mai a latou suesuega. I le faaaogaina ai o a latou lava upu, e mafai ona latou faailoa mai upumoni e pei o nei:

• O le Au Paia faamaoni e oti a o lei oo i le Afio Mai Faalua o le a toetutu pe a toe afio mai Keriso (tagai i le 1 Tesalonia 4:13–14).

• O le Au Paia faamaoni o e ola i le Afio Mai Faalua o le a segia ae e faafetaiai ia Iesu Keriso pe a afio mai o Ia. (tagai i le 1 Tesalonia 4:16–17).

• Afai tatou te taumafai e avea ma “tagata o le malamalama” e ala i le mulimuli ia Iesu Keriso, o le a tatou saunia pe a toe afio mai o Ia (tagai i le 1 Tesalonia 5:4–6; Mataupu Faavae ma Feagaiga 106:4–5).

Mafaufau e fai atu fesili e pei o lenei e fesoasoani ai i tagata aoao ia loloto lo latou malamalama o nei upumoni:

• E mafai faapefea e le manatuaina o nei upumoni ona aumaia le faamafanafanaga ia i latou o e o i ai popolega po o fefefe e faatatau i le Afio Mai Faalua o le Faaola?

• O le a sou lagona i lou iloaina o loo finagalo le Faaola i Ona soo amiotonu e faatasi ma Ia pe a Ia toe afio mai?

• O le a se mea e mafai ona tatou faia e valaaulia ai nisi malamalama o le Faaola i o tatou olaga ina ia mafai ona avea i tatou ma “tagata o le malamalama”? (1 Tesalonia 5:5). (I le avea ai o se vaega o la outou talanoaga, e mafai ona e valaaulia tagata aoga e faasoa mai ni faatinoga mai le 1 Tesalonia 5:14–22 latou te manatu o le a faapitoa lava le fesoasoani. E mafai foi ona e faasoa atu le saunoaga lenei a Elder Craig C. Christensen:

Ina ia avea ma tagata o le malamalama o lona uiga ia tetee atu i le mana o le fili ma ia filifili i aso taitasi e mulimuli i le Malamalama o Keriso.

O le fasifuaitau ‘tagata o le malamalama‘ e faamatala ai se nuu e susulu pupula ai le malamalama o le talalelei. E faamatala ai se nuu o e saili i le malamalama ma e tosina atu i mea e amioatua, mama, ma atoatoa. E i ai se faamalamalamaga faapea o fanau o le malamalama e mataalia ma mataala---e le momoe, i se uiga faaleagaga, i le taimi e tatau ona ala ai (tagai 2 Nifae 1:13; 1 Tesalonia 5:5–8). O tagata o le malamalama e le nofoa‘i i le pogisa, e ia i latou le lototoa e tutu ai i luga ma o ese. Pe a oo ina sau le fili, o tagata o le malamalama e iloa le taimi e finau atu ai, le taimi e fai atu ai e leai, ma le taimi e na o le savali ese ai. (“Avea ma Tagata o le Malamalama,” Liahona, Aok. 2014, 67)

Faaiu i le valaauliaina o tagata aoga e toe mafaufau i faatinoga na latou lagonaina le uunaia e fai o le a fesoasoani ia i latou ia saunia atili ai e toe feiloai i le Faaola. Valaaulia i latou e tusifaamaumau o latou manatu ma uunaiga.

Toe foi i le “Filifiliga o Gaoioiga e Aoao Ai.”

Mafaufau e amata lenei gaoioiga e aoao ai i le faasoaina atu o le vaaiga faataitai lenei:

Valaaulia tagata aoga e mafaufau po o le a lo latou saunia o i ai e taliina le fesili lenei.

Faailoa atu o aoaoga a Paulo i le Au Paia i Tesalonia e fesoasoani ia i tatou ia malamalama ai i le mafuaaga ua manaomia ai le Ekalesia toefuataiina a le Faaola i le lalolagi i aso nei. Faamanatu i tagata aoga sa manatu nisi o le Au Paia i Tesalonia o le aso o le Afio Mai Faalua o le Faaola ua “latalata mai” (2 Tesalonia 2:2).

Valaaulia tagata aoga e suesue i le 2 Tesalonia 2:1–9, ma vaavaai mo mea na valoia e Paulo o le a tupu a o lei oo i le Afio Mai Faalua o le Faaola. (Atonu e fesoasoani le faasino atu o le Faaliliuga a Iosefa Samita o le 2 Tesalonia 2:2–3 [i le vaefaamatalaga a o le fuaiupu 2 ma le vaefaamatalaga a o le fuaiupu 3] ma le 2 Tesalonia 2:7–9 [Gospel Library]. Mo nisi fesoasoani i nei fuaiupu, faasino tagata aoga i le “2 Tesalonia 2:1–4. O le a le mea na aoao mai e Paulo e uiga i le Liliuese?” ma le “2 Tesalonia 2:3–9. O ai le ‘atalii o le malaia?’” i le Fesoasoaniga mo Tusitusiga Paia: Feagaiga Fou.)

• O le a le mea na aoao mai e Paulo o le a tupu a o lei oo i le Afio Mai Faalua o Iesu Keriso? (E mafai ona faailoa mai e tagata aoga se upumoni e pei o lenei: Na valoia anamua e faapea, a o lei oo i le Afio Mai Faalua o Iesu Keriso, o le a tupu se liliuese mai Lana Ekalesia. Afai e manaomia, faamatala e faapea o le “tetea ese” na faamatalaina e Paulo o le Liliuese Tele, lea na tupu ina ua mavae le maliliu o Aposetolo a Iesu Keriso.)

Faamatala atu e faapea ona e silafia e le Tama Faalelagi mea uma (tagai i le 2 Nifae 9:20), sa lei avea ai le oo mai o le Liliuese Tele o se mea na faateia ai o Ia. I Lona alofa ma le poto, na Ia saunia ai se auala e faatoilalo ai lenei Liliuese Tele e ala i le Toefuataiga o le Ekalesia a Iesu Keriso (tagai i le Galuega 3:19–21; Efeso 1:10).

Mafaufau e faaaoga se tasi pe sili atu o manatu aoao atu nei e fesoasoani ai i tagata aoga e faaloloto lo latou malamalama i le Liliuese Tele ma le Toefuataiga:

• Valaaulia tagata aoga e suesue “O Le Toefuataiga o le Atoatoa o le Talalelei a Iesu Keriso: O Se Folafolaga e Lua Selau Tausaga i le Lalolagi” (Gospel Library), pe matamata le vitio o Peresitene Russell M. Nelson o faitauina le folafolaga. Ona tuu atu lea i tagata aoga e faasoa atu a latou malamalamaaga i se paga po o i ni vaega toalaiti.

  

  9:22

• Valaaulia tagata aoga e sue ni fuaitau faaopoopo o mau o loo valoia ai le Liliuese Tele ma le Toefuataiga. E mafai e tagata aoga ona faaaoga le vaega o le sailiga o le Gospel Library pe suesue foi i faamatalaga mo le “Liliuese” ma le “Toefuataiga o le Talalelei” i le Taiala i Tusitusiga Paia. Atonu e te fautuaina i latou e faaaoga le vaega o le faailogaina i le Gospel Libary e faailoga ai fuaitau o mau latou te maua. Valaaulia tagata aoga e faasoa taitoalua pe i ni vaega toalaiti ia mau na latou maua.

• Faaali atu le vitio “Dispensations: The Pattern of Apostasy and Restoration” (6:52) po o le “Jesus Christ’s Church” (1:27). Valaaulia tagata aoga e talanoaina po o a mea e fesoasoani nei vitio ia i latou ia malamalama pe lagonaina lelei ai e uiga i le Tama Faalelagi ma Iesu Keriso.

  

  6:55
  

  1:27

E mafai foi ona outou mafaufau e talanoaina fesili e pei o nei:

• E faapefea ona fesoasoani le malamalama i le Liliuese Tele ina ia e malamalama ai i le manaomia o le Toefuataiga?

• E faapefea ona aafia lou olaga i le atoatoaga o le talalelei a Iesu Keriso ua i le lalolagi?

Faaiu i le faasoaina atu o lau molimau o le talalelei toefuataiina a Iesu Keriso.

Toe foi i le “Filifiliga o Gaoioiga e Aoao Ai.”