Kalatia

Mafaufau e faasoa atu le ata faataitai lenei. Valaaulia tagata a’oga e manatunatu i taimi na latou oo ai i ni aafiaga tutusa.

• O le a sou manatu o a ni lagona o Carlos?

Faamalamalama atu e masani ona fetaiai le Au Paia i Kalatia ma aoaoga e feteenai ma le talalelei a Iesu Keriso na aoaoina e ala mai i Ana perofeta. Valaaulia tagata a’oga e su’e se paga ma faitau faatasi le Kalatia 1:1–12. Ona valaaulia lea o i latou e talanoaina ma a latou paga pe mafai fa’apefea ona faatatau le savali a Paulo i tagata Kalatia i le tulaga o Carlos.

A mae’a a latou talanoaga, mafaufau e valaaulia ni nai tagata a’oga e faasoa atu i le vasega mea na latou aoaoina. E mafai foi ona e talanoaina fesili nei:

• E faapefea ona e faaaogaina le savali a Paulo i lou olaga?

• E tusa ai ma fuaiupu 1 ma le 11–12, aisea e mafai ai ona tatou talitonuina mea o loo aoao mai e Aposetolo a le Alii? (Fesoasoani i tagata a’oga e faailoa mai se upumoni e pei o lenei: E mafai ona tatou faatuatuaina Aposetolo a le Alii aua e faaali mai e le Alii upumoni o Lana talalelei ia i latou.)

• O a ni auala e puipuia ai oe pe a e faamuamua aoaoga a Aposetolo soifua a le Alii?

Mafaufau e faasoa atu le faamatalaga lenei mai i le tuafafine ia Carol F. McConkie:

Tatou … te lagolagoina le [Au Peresitene Sili] ma le Korama a Aposetolo e Toasefululua o ni perofeta, tagatavaai, ma talifaaaliga. “Latou te umia le aia tatau, le mana, ma le pule e folafola atu ai le mafaufau ma le finagalo [o le Alii] … , e ala i … i le Peresitene o le Ekalesia.” Latou te saunoa atu i le suafa o Keriso. Latou te vavalo atu i le suafa o Keriso. Latou te faia mea uma i le suafa o Iesu Keriso. I a latou upu tatou te faalogoina ai le siufofoga o le Alii ma tatou te lagona ai le alofa o le Faaola. …

A o tatou faitau ma suesue ma le agaga tatalo i upu paia faaperofeta ma le faatuatua ia Keriso, ma le manatu moni, o le a fetalai mai le Agaga Paia i upumoni i o tatou mafaufau ma loto. Faamoemoe o le a tatala o tatou taliga ina ia faalogo, o tatou loto ina ia malamalama, ma o tatou mafaufau ina ia mafai ona tatala mai mealilo a le Atua i la tatou vaai. (“Ola e Tusa ma Upu a Perofeta,” Liahona, Nov. 2014, 77, 79)

Valaaulia tagata a’oga e mafaufau i se mea na latou aoaoina talu ai nei mai perofeta ma aposetolo a le Alii na fesoasoani ia i latou. E mafai ona e fesili atu:

• Na faapefea ona puipuia oe e aoaoga a perofeta ma aposetolo a le Alii mai taufaasese a le lalolagi?

• Na faapefea ona fesoasoani a latou aoaoga ia te oe e faatoilalo ai le masalosalo po o le lē mautonu?

• Na faapefea ona fesoasoani a latou aoaoga ia te oe e malamalama atili ai i le uiga moni o le talalelei a le Faaola?

Valaaulia tagata a’oga e faasoa mai ni o latou aafiaga.

Faaiu le gaoioiga i le valaauliaina o se tagata aoga se toatasi pe toalua e faasoa mai a latou molimau e uiga i le taua o le suesue ma mulimuli i mea o loo aoao mai e perofeta ma aposetolo a le Alii. Valaaulia tagata aoga e mafaufau i mea e mafai ona latou faia e avea ai afioga a le Alii e ala mai i Ana perofeta o se faamuamua maualuga atu i o latou olaga.

Toe foi i le “Filifiliga o Gaoioiga e Aoao Ai.”

E mafai ona e amataina lenei gaoioiga e aoao ai i le faasoaina atu o le vaaiga faataitai lenei:

• O ā manatu sesē atonu na faia e Ioane e uiga i le Atua?

• O le a se mea e te manao ia malamalama i ai Ioane e uiga i le Atua?

Valaaulia tagata aoga e mafaufau i taimi na latou maua ai nei lagona e pei o Ioane. Faamalamalama atu faapea, i lana tusi i Kalatia, na aoao mai ai e Paulo mataupu faavae taua e uiga i le auala e mafai ai ona tatou tutu ma le le pona ma le mautinoa i luma o le Atua. Tuu atu i tagata aoga le pepa e tufa atu “E Mafai Faapefea Ona Faamaonia i Tatou i luma o le Atua?,” ma valaaulia i latou e vaavaai mo upumoni e mafai ona fesoasoani ia Ioane. E mafai e tagata aoga ona faia lenei gaoioiga ta’itoatasi pe i ni vaega toalaiti.

A lava loa le taimi o tagata aoga e talanoa ai, ona valaaulia lea o i latou e faasoa mai a latou tali. Fesoasoani ia i latou e faailoa mai le upumoni e faapea ua tauamiotonuina i tatou i luma o le Atua e ala i lo tatou faatuatua ia Iesu Keriso ma le faamaoni o Keriso. (Mafaufau e faitau faatasi le “Kalatia 2:15–16. E faapefea ona tauamiotonuina i tatou e le faatuatua ia Iesu Keriso?” i le Fesoasoaniga mo Tusitusiga Paia: Feagaiga Fou.)

Atonu e aoga le faasoa atu o le saunoaga lenei a Elder D. Todd Christofferson o se vaega o la outou talanoaga:

O le tauamiotonuina ma le faapaiaina o fua ia o le “amio mama e le gata” o le Togiola, o le mamā lea tatou te ta’ua foi o le alofa mutimutivale po o le alofa tunoa. …

O lea, e le faapea tatou te mauaina nei meaalofa, ae nai lo lena, tatou te filifili e saili ma talia le tauamiotonuina ma le faapaiaina. Talu ai na totogi e le Faaola a tatou agasala ma faamalieina le faamasinogatonu mo i tatou, o lea ua avea ai i tatou ma ē nofo aitalafu ia te Ia nai lo le faamasinogatonu. O lea e tatau ai ona tatou ausia aiaiga ua Ia faatuina mo le faamagaloga ma le faamamāina. … E tatau i se tasi ona filifili Keriso ina ia maua ai mea ua ofoina mai e Keriso. (“Faamaoniga ma le Faapaiaina,” Liahona, Iuni 2001, 18, 23)

Mafaufau pe faapefea e fesili nei ona faalolotoina le malamalama o tagata aoga i le tauamiotonuina:

• E mafai faapefea e le malamalama i le matafaioi a le Faaola i le tauamiotonuina ona aumaia ia i tatou le filemu ma le faamoemoe nai lo le popole ma le le mautonu?

• O le a sou lagona e uiga i le Faaola, i le iloaina sa Ia puapuagatia mo au agasala ina ia mafai ona tauamiotonuina oe i luma o le Atua?

• O le a se mea e mafai ona e faia e faaali atu ai lou agaga faafetai ia Iesu Keriso mo mea ua naunau o Ia e fai mo oe? (E mafai e tagata aoga ona faamaumau o latou manatu.)

Toe foi i le “Filifiliga o Gaoioiga e Aoao Ai.”

Faaali atu le ata lenei ma faitau faatasi le Kalatia 5:16–17. Valaaulia tagata aoga e faasoa mai pe faapefea ona faaaoga lenei ata o se toso-ga-maea e faatusa i le savali a Paulo.

• Aisea e te manatu ai o loo i ai se tauiviga i le va o le tino ma le Agaga mo tagata uma?

E mafai ona tou faitauina faatasi le saunoaga lenei a Elder David A. Bednar:

I le avea ai o ni atalii ma afafine o le Atua, ua tatou maua ai gafatia paia mai ia te Ia. Ae o loo tatou nonofo i le taimi nei i se lalolagi pau. O elemene tonu lava sa foafoaina mai ai o tatou tino, o lo latou natura lava o le pau ma e aafia lava i le agasala, o mea piopio, ma le oti. O le mea la lea, o le Pau o Atamu ma ona taunuuga faaleagaga ma faaletino ua aafia tuusao ai lava i tatou e ala i o tatou tino faitino. (“Matou te Talitonu i le Nofomama,” Liahona, Me 2013, 42-43)

• O le a se mea na e aoaoina mai ia Elder Bednar e uiga i le tauiviga i le va o le tino ma le Agaga?

Mafaufau e valaaulia tagata aoga e galulue ma se paga. Tuu atu i paga taitasi se fasi pepa (pe tuu atu ia i latou e faaaoga se masini faaeletonika). Ona tuu atu lea ia i latou e tusi ni ulutala se lua i luga o le pepa: Fua o le Agaga ma Tu’inanauga o le Tino. Valaaulia tagata aoga e suesue le Kalatia 5:18–26 ma lisi upu po o fasifuaitau i lalo o le ulutala talafeagai. (Uunaia tagata aoga e faaaoga le vaega o le “Faamatala” i le Potutusi o le Talalelei e fesoasoani ai ia i latou i soo se upu latou te le malamalama i ai.) Tuu atu i tagata aoga e talanoaina ma a latou paga po o a upu po o fasifuaitau na tulaga ese ia i latou ma pe aisea.

Mafaufau e talanoaina faatasi o se vasega fesili nei:

• O le a se mea e mafai ona faigata ai ona aloese mai “galuega a le tino”? (fuaiupu 19).

• E tusa ai ma le faamatalaga a Paulo, e faapefea ona tatou faatoilaloina tu’inanauga o le tino? (E mafai ona faailoa mai e tagata aoga se upumoni e pei o lenei: A o tatou savavali i le Agaga, e mafai ona tatou faatoilaloina faaosoosoga a le tino.)

• O le a lou manatu i le uiga o le “savavali i le Agaga”?(fuaiupu 25).

E mafai e tagata aoga ona fausia ni vaega toalaiti ona faasoa mai lea o aafiaga na latou lagonaina ai fua o le Agaga o loo lisiina i fuaiupu 22–23. Pe mafai foi e tagata aoga ona faamaumau se aafiaga lata mai o le Agaga, ona mafai lea ona e valaaulia nisi o tagata aoga o e naunau e faasoa mai mea na latou tusia.

• Na faapefea e aafiaga i fua o le Agaga ona tosinaina lau sootaga ma le Tama Faalelagi ma Iesu Keriso?

Ina ia faaiuina le gaoioiga, e mafai ona e fai atu i tagata aoga e mafaufau i mea o le a latou faia e olioli atili ai i fua o le Agaga i o latou olaga.

Toe foi i le “Filifiliga o Gaoioiga e Aoao Ai.”

E mafai ona e faaali atu le ata lenei ma valaaulia ni tagata aoga e faasoa mai poo le a le savali o faaalia mai i lenei ata.

Faamalamalama atu faapea i le Kalatia 6, ua uunaia ai e Paulo le Au Paia e savavali i le Agaga ma fesoasoani e tauave avega a le tasi ma le isi. Ona ia aoao atu lea o se lesona loloto e faaaoga ai le vaaiga o le totoina ma le seleseleina. Faailoa atu na faaaoga e Paulo upu lūlū (toto) ma selesele (seleselega).

Valaaulia tagata aoga e suesue le Kalatia 6:7–10, ma vaavaai mo le lesona na aoao mai e Paulo e faaaoga ai le faatusa o le lulu ma le seleseleina.

• O le a le savali a Paulo i le fuaiupu e 7?

  E mafai ona e tuu atu i tagata aoga e tusi i luga o le laupapa a latou lava faaupuga o le savali a Paulo. Mo se faataitaiga: Aua le faaseseina oe lava. E le mafai ona ulagia le Atua. O le mea e te maua mai lou olaga (seleselega) o mea ia e te tuuina i lou olaga (toto).

• O a nisi o faataitaiga o nei upumoni i o tatou olaga i aso uma?

• O le a le eseesega i le va o le lulu e faafiafia ai le tino ma le lulu e faafiafia ai le Agaga?

• O le a lou manatu i le uiga o le “aua ne’i tatou faapalapala i le amio lelei”? (fuaiupu 9).

Atonu e fesoasoani le mafaufau pe faapefea ona avea Iesu Keriso ma faataitaiga atoatoa o le le vaivai i le faia o mea lelei.

Tuu atu i tagata aoga se avanoa e mafaufau ai pe faapefea ona latou faaaogaina upumoni ua latou aoaoina i o latou olaga. O se tasi o auala e faia ai lenei mea o le tuuina atu lea i tagata aoga o le pepa e tufa atu “O Fea o Taitaiina Ai A’u e O’u Mafaufauga ma Faatinoga?” ma tuu atu ia i latou se taimi e faamaea ai.

Toe foi i le “Filifiliga o Gaoioiga e Aoao Ai.”