Pinadayag 6–14

Mahimo nimong sugdan kini nga kalihokan sa pagkat-on pinaagi sa pagpakita sa mosunod nga imahe sa usa ka karaang nilukot nga papel nga adunay pito ka selyo.

Ipasabot ngadto sa mga estudyante nga ang karaang mga linukot nga papel kasagaran giselyohan og gamay nga yutang kulonon o wax. Usa ka singsing o selyo ang mahimong iduot diha sa yutang kulonon o wax sa dili pa kini ipagahi. Kini nga selyo nagpamatuod sa katungod sa tawo nga miselyo sa linukot nga papel. Pahinumdomi ang mga estudyante nga sa panan-awon ni Juan, gigunitan sa Dios sa Iyang tuong kamot ang usa ka linukot nga papel, o basahon, nga adunay pito ka selyo. Si Jesukristo, ang kordero, gihulagway isip mao lamang ang bugtong nga takos nga moabli sa matag selyo (tan-awa sa Pinadayag 5:1–9; 6:1).

• Unsa kaha ang gisimbolohan niining linukot nga papel? (Ikonsiderar ang pagbasa sa Doktrina ug mga Pakigsaad 77:6–7.)

Ipakita ang mosunod nga tsart ug dapita ang mga estudyante sa pagtrabaho diha sa gagmay nga mga grupo aron sa pag-ila unsa ang gipanagna sa matag selyo, o sulod sa panahon, nga gihulagway sa Pinadayag 6. Isip kabahin sa ilang pagtuon, mahimong basahon sa mga estudyante ang “Pinadayag 6. Unsa man ang atong nahibaloan mahitungod sa unang unom ka selyo?” diha sa Mga Tabang sa Kasulatan: Bag-ong Tugon.

Human mabasa sa mga estudyante ang mahitungod sa matag selyo, dapita sila sa paghisgot diha sa ilang mga grupo sa posible nga mga rason nga tingali gusto sa Ginoo nga atong masayran mahitungod niini nga mga panagna. Mahimo dayon nimong sultian nga ipakigbahin nila ang ilang mga panabot ngadto sa klase.

Ipasabot nga ang nahibilin nga mga kapitulo sa basahon sa Pinadayag nag-una sa pagtubag sa ika-unom ug ika-pitong mga selyo. Sa laing pagkasulti, ang gitutokan sa panan-awon ni Juan mao ang kataposang mga adlaw—atong mga adlaw. Dapita ang mga estudyante sa pagbasa sa Pinadayag 7 uban sa ilang mga grupo, nga mangita unsa ang matudlo kanila mahitungod sa pagpuyo sa kataposang mga adlaw. Ikonsiderar ang pagdapit sa mga estudyante nga basahon usab ang Doktrina ug mga Pakigsad 77:8–11 aron mas masabtan kini nga kapitulo. Human ang mga estudyante mahatagan og panahon sa pagtuon ug paghisgot, ikonsiderar ang pagpangutana sa mosunod:

• Unsa ang gitudlo niini nga mga tudling sa kasulatan mahitungod sa pagpundok sa Israel? (Alang sa dugang nga mga panabot, mahimo ninyong dungang basahon ang “Pinadayag 7:4–8. Kinsa ang 144,000?” sa Mga Tabang sa Kasulatan: Bag-ong Tugon.)

• Sa unsang paagi ang pagpundok sa Israel nag-andam kanato alang sa celestial nga himaya?

Ikonsiderar ang pagpakita sa mosunod nga imahe sa celestial nga gingharian, ug sa paghisgot sa sunod nga hut-ong sa mga pangutana.

• Unsa tingali ang girepresentaran sa puti nga kupo nga gihulagway sa Pinadayag 7:9? (Alang sa dugang nga mga panabot, mahimo ninyong basahon ang “Pinadayag 7:9, 13–14. Kinsa ang mga tawo nga nakaputi og mga kupo?” sa Mga Tabang sa Kasulatan: Bag-ong Tugon.)

• Sa unsang paagi kamo makaangkon og inyong kaugalingong puti nga kupo? (Mahimong mailhan sa mga etsudyante ang usa ka kamatuoran nga sama sa mosunod: Pinaagi sa Pag-ula ni Jesukristo, mahimo kitang putli ug makatagamtam sa celestial nga himaya uban sa Dios.)

• Sa unsang paagi ang pagkasayod nga ang gahom sa Manluluwas makahimo ninyong putli nga moimpluwensiya sa inyong pagsanong ngadto sa mga kagul-anan sa kataposang mga adlaw?

Ikonsiderar ang pagbasa sa mosunod nga pamahayag ni Elder Neil L. Andersen:

Mga kaigsoonan, akong saad diha ninyo nga ang pagpalambo sa inyong hugot nga pagtuo diha ni Ginoong Jesukristo magdala kaninyo og dugang nga kalig-on ug mas dakong paglaom. Alang kaninyo, ang matarong, ang Tig-ayo sa atong mga kalag, sa Iyang panahon ug sa Iyang paagi, moayo sa tanan ninyong mga samad. Walay inhustisya, walay pagpanglutos, walay pagsulay, walay kasakit, walay pag-antos, walay samad—bisan unsa ka lawom, unsa ka dako, unsa kahapdos—ang dili malakip sa pagkahupay, sa kalinaw, ug malungtarong paglaom diha Kaniya kansang mahangopon nga mga bukton ug samaran nga mga kamot mohangop kanato balik sa Iyang presensiya. Nianang adlawa, si Apostol Juan nagpamatuod, nga ang mga matarong nga “nanagpakalabang sa dagkung kasakitan” [Pinadayag 7:14] mobarog nga “nanagsul-ob ug mga bisting maputi … atubangan sa trono sa Dios.” Ang Kordero “anaa taliwala [kanato] … ug pagapahiran sa Dios ang tanang luha sa [inyong] mga mata” [tan-awa sa Pinadayag 7:13, 15, 17]. Kining adlawa moabot. (“Nasamdan,” Liahona, Nob. 2018, 86)

Dapita ang pipila ka estudyante sa pagpakigbahin kon sa unsang paagi ang pagpalambo sa pagtuo diha ni Jesukristo nagdala ngadto kanila sa mas dakong kalig-on ug paglaom. O mahimong sultian nimo ang mga estudyante nga ipakigbahin unsa sa ilang hunahuna ang pagkahimong “nagsul-ob og mga bisting maputi … atubangan sa trono sa Dios” (Pinadayag 7:13, 15).

Balik ngadto sa “Mga Opsiyon nga Kalihokan sa Pagkat-on.”

Mahimo nimong ihatag sa mga estudyante ang mosunod nga tinuod o sayop nga pasulit.

Dapita ang mga estudyante sa pagpakigbahin kon giunsa nila sa pagtubag ang mga pangutana nga (1 = sayop; 2 = sakto; 3 = sayop; 4 = sakto). Ipasabot nga niini nga panaghisgot, ang mga estudyante makat-on mahitungod kon unsa ang nakita ni Juan sa iyang panan-awon mahitungod sa kataposang mga adlaw.

Han-aya ang mga estudyante ngadto sa grupo nga tinagutlo. Ipakita ang mosunod nga mga tudling sa kasulatan. Ipasabot nga ang mga bersikulo sa Doktrina ug mga Pakigsaad naghatag og importanteng mga panabot ngadto sa mga bersikulo sa Pinadayag (tan-awa sa “Paggamit sa Kasulatan sa Pagpahiuli aron Masabtan ang Biblia” sa Mga Kahanas sa Pagtuon sa Kasulatan). Dapita ang matag estudyante diha sa mga grupo sa pagtuon sa usa sa mosunod nga mga hut-ong sa mga kasulatan. Dapita sila sa pagpangita kon unsa ang gipadayag mahitungod sa Pagpahiuli, sa pagpundok sa Israel, ug sa Ikaduhang Pag-anhi. Ikonsiderar ang pagpakita sa mosunod nga mga pangutana ug pagdapit sa mga estudyante sa paghisgot niini diha sa ilang mga grupo.

1. Unsa kaha ang importante mahitungod sa 144,000 ka tawo gikan sa mga tribo sa Israel?

   Pinadayag 7:1–10; Doktrina ug mga Pakigsaad 77:8–11; “Pinadayag 7:4–8. Kinsa ang 144,000?” diha sa Mga Tabang sa Kasulatan: Bag-ong Tugon

2. Unsa ang ipasabot sa gamay nga basahon nga gikaon ni Juan?

   Pinadayag 10; Doktrina ug mga Pakigsaad 77:14; “Pinadayag 10:1–2, 9–10. Unsa ang simbolo sa gamay nga basahon nga gikaon ni Juan?” sa Mga Tabang sa Kasulatan: Bag-ong Tugon

3. Unsa ang tahas nga gidala sa langitnong mga mensahero sa Pagpahiuli?

   Pinadayag 14:6–7; Doktrina ug mga Pakigsaad 128:20–21; 133:36–40

Human ang mga estudyante adunay panahon nga makapakigbahin uban sa ilang grupo sa unsay ilang nakat-onan, mahimo kang mosulat sa pisara sa mosunod nga kamatuoran: Si Juan nanagna mahitungod sa kataposang mga adlaw, sa Pagpahiuli, ug sa pagpundok sa Israel aron sa pag-andam kanato alang sa Ikaduhang Pag-anhi ni Jesukristo. Depende sa gitutokan sa inyong panaghisgot, mahimo kang mangutana sama sa mosunod:

• Unsa sa inyong hunahuna ang gipasabot sa pagbaton og selyo sa Dios diha sa inyong agtang? (Tan-awa sa Pinadayag 7:3–4. Kon gikinahanglan, mahimong tun-an sa mga estudyante ang “Pinadayag7:2–3. Unsa ang ipasabot sa pagbutang og selyo diha sa mga agtang sa mga sulugoon sa Dios?” sa Mga Tabang sa Kasulatan: Bag-ong Tugon.)

• Sa unsang paagi nga ang pagkahibalo nga adunay dakong pundok sa katawhan diha sa trono sa Dios nakaapekto sa inyong pagbati mahitungod sa umaabot? (tan-awa sa Pinadayag 7:9–10).

• Nganong importanteng masayran nga si Juan naghulagway sa mga panghitabo sa kataposang mga adlaw isip tam-is ug pait? (tan-awa sa Pinadayag 10:9–10).

• Sa unsang paagi ang mahangtoron nga ebanghelyo mousab sa kalibotan? Sa unsang paagi kini nakausab kaninyo? (tan-awa sa Pinadayag 14:6–7).

Mahimo nimong taposon ang kalihokan sa pagkat-on pinaagi sa pagbasa sa mosunod nga pamahayag ni Elder Ronald A. Rasband:

Si Juan ang Tigpadayag nanagna bahin sa usa ka anghel sa Labawng Makagagahum nga nagdala sa importanteng mga elemento sa Pagpahiuli pinaagi niining mga pulong: “Ug nakita ko ang laing manulonda nga naglupad sa taliwala sa kalangitan, ug kini siya may gidalang walay katapusang maayong balita aron imantala ngadto sa mga nanagpuyo sa yuta, ug sa tanang kanasuran, ug kabanayan, ug pinulongan, ug katawhan” [Pinadayag 14:6]. Si Moroni mao kana nga anghel. …

Kita nagpuyo nianang gipanagna nga panahon; kita ang katawhan nga gitahasan sa responsibilidad sa dili pa moabut ang Ikaduhang Pag-anhi ni Jesukristo; kita ang mopundok sa mga anak sa Dios, kadtong maminaw ug mohangup sa mga kamatuoran, mga pakigsaad, ug mga saad sa walay katapusang ebanghelyo. Si Presidente Nelson mitawag niini nga mao “ang labing dakong hagit, ang labing dakong kawsa, ug ang labing dakong buhat sa yuta karon.” (“Katumanan sa Panagna,” Liahona, Mayo 2020, 75–76)

• Unsa ang inyong gibati mahitungod sa pagkahimong kabahin sa “ang labing dako nga hagit, ang labing dako nga kawsa, ug ang labing dako nga buhat [dinhi] sa yuta karon”?

• Unsa ang pipila ka yanong mga paagi nga makapangandam ang inyong kaugalingon ug ang uban alang sa Ikaduhang Pag-anhi ni Jesukristo? (Awhaga ang mga estudyante sa pagrekord sa bisan unsang mga impresyon nga ilang madawat.)

Balik ngadto sa “Mga Opsiyon nga Kalihokan sa Pagkat-on.”

Mahimo nimong isulat sa pisara ang mosunod nga ulohan: Gubat sa Langit

Dapita ang mga estudyante nga mopakigbahin og mubo sa unsay ilang nakat-onan mahitungod sa Gubat sa Langit o mangutana sa bisan unsa nilang mga pangutana. Mahimo usab nimong isulat ang ilang mga panabot o mga pangutana diha sa pisara ug dayon mangutana:

• Sa inyong hunahuna nganong importante alang kanato nga masayod mahitungod sa Gubat sa Langit?

Ipasabot nga ang mga bersikulo 7–12 naghulagway sa Gubat sa Langit. Ang uban nga mga bersikulo sa Pinadayag 12 naghulagway kon giunsa sa dragon (Satanas) pagsulay sa paglaglag sa Manluluwas ug sa Iyang Simbahan.

Dapita ang mga estudyante sa pagtrabaho uban sa pares ug magtuon sa Pinadayag 12, o Hubad ni Joseph Smith, Pinadayag 12:1–17 (Librarya sa Ebanghelyo), nga mangita unsa ilang nakat-onan mahitungod ni Satanas ug unsaon siya pagpildi. Isip kabahin sa ilang pagtuon, ang mga estudyante mahimong magbasa sa mga entry nga may kalabotan niini nga mga bersikulo sa Mga Tabang sa Kasulatan: Bag-ong Tugon.

Human mahatagan og panahon ang mga estudyante sa pagtuon, mahimo nimong ipakita ang musunod nga litrato. Hangyoa ang mga estudyante sa pagpakigbahin kon unsa ang girepresentaran niini nga paghulagway sa Pinadayag 12. Sila makagamit sa kahanas sa “Pagsabot sa Simbolismo diha sa mga Kasulatan” sa Mga Kahanas sa Pagtuon sa Kasulatan.

Dapita ang mga estudyante sa paghisgot kon unsa ang ilang nakat-onan mahitungod ni Satanas ug sa iyang mga sumusunod samtang ilang tun-an ang Pinadayag 12. Mahimo usab kang modapit sa mga estudyante sa pagpakigbahin unsa ang ilang nakat-onan mahitungod kon sa unsang paagi nabuntog sa mga sumusunod ni Jesukristo si Satanas didto sa Gubat sa Langit. (Mahimong mailhan sa mga estudyante ang usa ka kamatuoran nga sama sa mosunod: Nabuntog sa mga sumusunod ni Jesukristo si Satanas pinaagi sa pagsalig sa Pag-ula ni Jesukristo ug pagpabiling matinuoron sa ilang mga pagpamatuod.)

Ikonsiderar ang pagpangutana og sama sa mosunod aron matabangan ang mga estudyante nga mapalawman ang ilang pagsabot niini nga kamatuoran:

• Unsa ang gitudlo niini nga kamatuoran kaninyo mahitungod sa gahom ni Jesukristo?

• Unsa ang gitudlo niini nga kamatuoran kaninyo mahitungod sa gahom sa personal nga pagpamatuod?

• Sa unsang paagi nga ang paghinumdom niini nga kamatuoran makatabang kaninyo sa inyong pagpakiggubat batok ni Satanas?

Ikonsiderar ang pagbasa sa mosunod nga pahayag ni Elder Ronald A. Rasband:

Nasayud si Satanas nga dili gyud siya magdugay sa iyang kadautan ug kana nga panahon nagkamubo. Sa iyang kabakakon ug kamangingilad, dili siya modaug. Bisan pa man, padayon siyang nanlimbasug sa pagtintal kanato. Alang sa atong proteksiyon, kinahanglan kitang magtukod og kuta sa pagkaespirituhanon ug panalipod alang sa atong mga kalag mismo, usa ka kuta nga dili madutlan sa dautan. … Ang inyong pagpamatuod kang Jesukristo mao ang inyong personal nga kuta, ang seguridad sa inyong kalag. … Kon magpakabuhi kita sa ebanghelyo ni Jesukristo, kon magsalig kita sa Pag-ula sa Manluluwas ug mopadayon sa unahan inubanan sa hugot nga pagtuo, dili mahadlok, kita malig-on batok sa kaaway. (“Magtukod og Kuta sa Pagkaespirituhanon ug Proteksyon,” Liahona, Mayo 2019, 108, 110)

Sa pagtapos niini nga kalihokan sa pagkat-on, mahimo nimong ipakita ang mosunod nga mga pag-aghat ug dapita ang mga estudyante sa pagpili og usa:

• Paghunahuna kon sa unsang paagi ang inyong pagpamatuod ni Jesukristo nakapalig-on kaninyo batok ni Satanas ug irekord ang inyong mga hunahuna ug mga impresyon.

• Pamalandongi kon sa unsang paagi ang pagsalig ni Jesukristo ug sa Iyang Pag-ula nagdala kaninyo o modala kaninyo sa mas dakong seguridad.

• Kon kamo dili segurado mahitungod sa inyong pagpamatuod kang Jesukristo, irekord unsa ang inyong mabuhat aron sa pagpalig-on sa inyong pagpamatuod ngadto Kaniya.

Pwede ninyong dapiton ang pipila ka estudyante sa pagpakigbahin sa ilang mga hunahuna. Awhaga ang mga estudyante sa paglihok sa mga impresyon nga ilang nadawat.

Balik ngadto sa “Mga Opsiyon nga Kalihokan sa Pagkat-on.”