“Mga Buhat 10–15,” Manwal sa Bag-ong Tugon alang sa Magtutudlo sa Institute (2025)
Mga Buhat 10–15
Naaghat tungod sa iyang kasinatian uban sa usa ka Hentil nga ginganlan og Cornelio, si Pedro nakadawat og usa ka pagpadayag nga nagdirekta kaniya sa pagdawat sa mga Hentil ngadto sa Simbahan. Kini nga panan-awon nag-una sa unang misyonaryo nga panaw ni Pablo nga “[miabli sa] pultahan sa pagtuo ngadto sa mga Hentil” (Mga Buhat 14:27). Ang pagdaghan sa Hentil nga mga kinabig nakaingon sa usa ka panagbingkil taliwala sa mga Santos. Ang ubang Hudeyo nga mga Kristiyano miinsistir nga ang Hentil nga mga kinabig kinahanglang tulion aron maluwas. Ang uban nagtudlo nga ang kaluwasan moabot pinaagi kang Jesukristo ug dili pinaagi sa pagtuli o sa pagtuman sa balaod ni Moises. Kini nga kontrobersiya mao ang gitutokan sa usa ka komperensiya sa mga lider sa Simbahan sa Jerusalem.
Dugang nga mga Kapanguhaan
Mga Tabang sa Kasulatan: Bag-ong Tugon, “Mga Buhat 10–15”
Ang “Pasiuna ngadto sa Kurso” naghatag og giya kon unsaon sa paggamit ang upat ka sumbanang mga elemento sa leksiyon nga mosunod.
Pag-awhag og Personal nga Pagtuon
Sa dili pa ang klase, ikonsiderar ang pagpadala sa mga estudyante og usa o daghan pa sa mosunod nga mga mensahe o pipila sa imong kaugalingon:
-
Nakahunahuna ka ba sukad kon nganong ang mga palisiya sa Simbahan mausab? Samtang magtuon ka sa Mga Buhat 10 ug 15, unsa ang imong makat-onan mahitungod kon sa unsang paagi ang Ginoo naggiya sa Iyang Simbahan?
-
Ang ubang mga miyembro sa Simbahan mibati nga sila wala mahisakop o mohaom. Mibati ka ba sukad niini nga paagi o nakaila og usa ka tawo nga mibati niini? Hunahunaa kon unsay imong nakat-onan sa Mga Buhat 10 bahin sa pagkahimong madawaton sa tanang tawo.
-
Nakasinati ka ba og oposisyon sa imong mga paningkamot sa pagpakabuhi ug pagpakigbahin sa ebanghelyo? Unsa ang imong nakat-onan gikan Mga Buhat 12–14 mahitungod sa pag-atubang og kalisdanan nga adunay hugot nga pagtuo diha ni Jesukristo?
Mga Pangutana ug Pagpakigbahin
Hatagi og panahon ang mga estudyante sa pagpangutana ug pagpakigbahin og mga panabot ug mga kamatuoran nga ilang nadiskobrehan sa ilang personal nga pagtuon sa Mga Buhat 10–15.
Pagbansay sa Kahanas
Ang Mga Buhat 10 ug 15 mahimong makatabang nga mga dapit aron magamit ang kahanas sa “Pagsabot sa mga Kasulatan gikan sa Kinatibuk-ang Mensahe” diha sa Mga Kahanas sa Pagtuon sa Kasulatan.
Mga Opsiyon sa Kalihokan sa Pagkat-on
Pagpalambo sa Atong Pagtudlo ug Pagkat-on
Mahimong andam sa posibleng mga kausaban diha sa pagbansay sa mga kahanas sa pagtuon sa kasulatan. Ang mga kalihokan sa pagkat-on sa matag leksiyon naglakip sa mga sugyot alang sa mga estudyante sa pagkat-on, pagrebyo, o pagbansay sa piho nga mga kahanas sa pagtuon sa kasulatan. Mobati nga gawasnon sa paggamit niini nga mga sugyot o pagbansay sa ubang mga kahanas, depende sa mga panginahanglan sa imong mga estudyante. Hinumdomi nga usa sa nag-unang mga katuyoan niini nga kurso mao ang pagtabang sa mga estudyante sa pagpalambo sa ilang abilidad sa pagsabot sa mga kasulatan.
Mga Buhat 10–11
Unsaon nako sa pagtabang niadtong gikan sa lainlaing kultura ug mga kagikan nga mobati nga mas gihangop sa Simbahan sa Ginoo?
Ipakita ang mosunod nga pamahayag: “Dili ko haom uban kaninyo diha sa Simbahan.”
-
Ngano kaha nga ang usa ka tawo mobati sa ingon niini nga paagi?
Ipasabot nga niini nga kalihokan sa pagkat-on, ang mga estudyante makakat-on gikan sa kasinatian ni Cornelio ug ni Pedro mahitungod sa kamahinungdanon sa pagkahimong madawaton ug masuportahon niadtong gikan sa lainlaing kultura ug mga kagikan.
Isulat ang ngalan nga Cornelio diha sa pisara. Dapita ang mga estudyante sa pagkat-on sa tanan nga ilang mahimo mahitungod kang Cornelio pinaagi sa pagbasa sa Mga Buhat 10:1–8 ug sa “Mga Buhat 10:1–8. Unsa ang importante mahitungod sa pagkakabig ni Cornelio ngadto sa Kristiyanidad?” diha sa Mga Tabang sa Kasulatan: Bag-ong Tugon.
-
Unsa nga mga babag sa kultura ang tingali giatubang ni Cornelio sa dihang nagtinguha nga makabig ngadto sa Kristiyanidad?
Ipasabot nga si Pedro adunay panan-awon sa pagtabang sa pag-andam sa dalan alang sa Hentil nga mga kinabig sama ni Cornelio nga mahimong hingpit nga mga partisipante sa Simbahan sa Manluluwas. Aron matabangan ang mga estudyante nga makasabot sa panan-awon ni Pedro, hatagi sila sa handout nga “Pagsabot sa Panan-awon ni Pedro.” Ang mga estudyante mahimong makigtambayayong sa usa ka kauban, o diha sa gagmay nga mga grupo.
Human magtugot og panahon alang sa pagtuon ug panaghisgotan, dapita ang mga estudyante sa pagpakigbahin kon giunsa nila pagtubag ang mga pangutana diha sa handout. Seguroha nga sila makaila sa usa ka kamatuoran sama sa mosunod gikan sa Mga Buhat 10:34–35: Tungod kay ang Dios walay pinalabi sa mga tawo, Siya nagtanyag og kaluwasan ngadto sa tanan Niyang mga anak. Aron matabangan ang mga estudyante nga mapalawman ang ilang pagsabot bahin niini nga kamatuoran, ikonsiderar ang papangutana sa mosunod nga mga pangutana:
-
Unsa kaha ang gipasabot nga ang Dios walay pinalabi sa mga tawo? (Mahimo ninyong basahon ang 2 Nephi 26:33.)
-
Unsa nga mga hiyas sa Langitnong Amahan ug ni Jesukristo ang gihulagway niini nga kamatuoran? Sa unsa nga paagi nga kini nga mga hiyas makaapekto sa inyong mga pagbati ngadto Kanila?
-
Sa unsang paagi nga ang pagkahibalo niini nga kamatuoran makaimpluwensiya kon unsaon ninyo sa pagtratar ang mga tawo sa nagkalainlaing kultura ug mga kagikan?
Ikonsiderar ang pagbasa ug paghisgot sa mosunod nga pamahayag ni Presidente Dieter F. Uchtdorf, kanhi sakop sa Unang Kapangulohan:
Tingali moingon ang uban, “Dili ko haom uban kaninyo diha sa Simbahan.” …
Ang inyong kaagi o kasinatian tingali lahi kay sa inyong nakita diha sa mga Santos sa Ulahing mga Adlaw, apan mahimo kana nga panalangin. Mga kaigsoonan, [minahal nga] mga higala, gikinahanglan namo ang inyong espesyal nga mga talento ug panglantaw. Ang panaglahi sa mga tawo ug katawhan libot sa kalibotan maoy kalig-on niini nga Simbahan. (“Dali, Pakig-uban Kanamo,” Liahona, Nob. 2013, 23)
Mahimo nimong hangyoon ang mga estudyante sa pagpakigbahin og mga higayon nga sila o ang usa ka tawo sa lain nga kultura o kagikan mainiton nga giabiabi ngadto sa Simbahan sa Ginoo.
Ipakita ang mosunod nga mga pangutana, ug dapita ang mga estudyante sa pagmalandong ug sa pagrekord sa ilang mga hunahuna ug mga pagbati:
-
Unsay akong mabuhat aron mas mahimong madawaton ug masuportahon sa mga tawo sa lainlaing kultura ug kagikan?
Kon sa imong hunahuna kini mahimong makatabang, ang klase mahimong motan-aw sa “Is There a Place for Me?” (3:59).
Mga Buhat 10; 15
Unsaon nako sa pagpalambo sa akong pagsalig nga ang Ginoo naggiya sa Iyang Simbahan?
Mahimo nimong sugdan pinaagi sa pagpakigbahin sa mosunod nga pamahayag ni Presidente Russell M. Nelson:
“Tungod kay ang Pagpahiuli nagpadayon, ang mga kausaban sa palisiya seguradong magpadayon.” (“The Love and Laws of God” [debosyonal sa Brigham Young University, Sept. 17, 2019], 4, speeches.byu.edu)
Isip kabahin sa nagpadayon nga Pagpahiuli, ang mga lider sa Simbahan sa Ginoo usahay mopahibalo og mga kausaban sa Simbahan. Isip usa ka klase, paghimo og pipila ka bag-o nga mga ehemplo niini nga mga kausaban, sama sa mga kausaban sa naandan o palisiya sa Simbahan.
-
Ngano nga ang pipila ka miyembro mahimong maglisod kon ang mga kausaban sa Simbahan mahitabo?
Ipasabot nga diha sa Mga Buhat 10, si Pedro adunay usa ka panan-awon gikan sa Ginoo nga miandam sa dalan alang sa usa ka mahinungdanon nga kausaban diha sa Simbahan mahitungod sa mga Hentil. Aron matabangan ang mga estudyante nga makasabot kon sa unsang paagi nahitabo ang kausaban, hatagi sila sa handout nga “Ang mga Hentil ba Pwede Mahimong Kabahin sa Simbahan sa Manluluwas?” Sa dili pa magsugod ang mga estudyante sa handout, mahimo nimong daklit nga rebyohon ang kahanas nga “Pagsabot sa mga Kasulatan gikan sa Kinatibuk-ang Mensahe” diha sa Mga Kahanas sa Pagtuon sa Kasulatan.
Human ang mga grupo adunay panahon sa paghisgot kon sa unsang paagi nahitabo ang kausaban, ikonsiderar ang pagpangutana sa mosunod:
-
Unsa nga kamatuoran ang gipadayag sa Ginoo ngadto ni Pedro nga nag-andam sa dalan alang sa kausaban mahitungod sa mga Hentil? (Mahimo nimong hatagan og gibug-aton ang Mga Buhat 10:34–35.)
-
Unsa ang matudlo kanato niini nga asoy mahitungod kon sa unsang paagi ang Ginoo naggiya sa Iyang Simbahan? (Ang mga estudyante mahimong moila og usa ka kamatuoran sama sa mosunod: Si Jesukristo nagdirekta sa Iyang Simbahan pinaagi sa pagpadayag pinaagi sa buhi nga mga propeta.)
-
Nganong importante nga ang matag usa kanato makaangkon sa atong kaugalingong saksi nga ang Simbahan sa Manluluwas gigiyahan pinaagi sa nagpadayon nga pagpadayag? (Mahimo nimong dapiton ang mga estudyante sa pagpakigbahin og personal nga mga kasinatian kon giunsa nila sa pagsalig nga ang Simbahan ni Jesukristo gigiyahan pinaagi sa pagpadayag.)
Itudlo nga bisan human madawat ni Pedro ang pagpadayag nga nagdirekta kaniya sa pagdawat sa mga Hentil ngadto sa Simbahan, ang ubang mga miyembro naglisod sa pagdawat niini nga kausaban (tan-awa sa Mga Buhat 15:1–5). Usa ka konseho sa Simbahan ang gihimo aron sa pagsulbad niini nga mga kabalaka (tan-awa sa Mga Buhat 15:6–31). Bisan human gihatag ang dugang nga pagpatin-aw, ang pipila ka mga miyembro misukol gihapon niini nga kausaban (tan-awa sa Mga Taga-Galacia 5:2–10; 6:13).
Dapita ang mga estudyante sa pagpili og usa ka pagtulun-an, naandan, o palisiya sa Simbahan diin sila o usa ka tawo nga ilang kaila nalisdan. Dayon hatagi ang mga estudyante sa handout ug dapita sila sa pagkonsiderar kon sa unsang paagi nga ang mga lakang niini nga handout mahimong magamit sa sitwasyon nga ilang gihunahuna.
Mga Buhat 12–14
Unsaon nako sa pagtuman sa buhat sa Manluluwas kon mag-atubang og oposisyon?
Dapita ang mga estudyante sa pagpakigbahin og mga ehemplo kon sa unsang paagi sila o ang usa ka tawo nga ilang nailhan nakasinati og oposisyon samtang nagtinguha sa pagpakigbahin sa ebanghelyo. Mahimo dayon nimong isulat ang mosunod nga kamatuoran diha sa pisara: Samtang kita magpakita og hugot nga pagtuo ni Jesukristo, kita makadawat og kalig-on sa paghimo sa Iyang buhat.
Isulat ang mosunod nga mga tudling sa pisara. Dapita ang mga estudyante sa pagpili og usa ka tudling ug sa pagbasa niini, mangita sa mosunod mahitungod sa mga tawo diha sa asoy: (1) ang oposisyon nga ilang nasinati, (2) giunsa nila pagpakita og hugot nga pagtuo ni Jesukristo, ug (3) giunsa sila paglig-on sa Manluluwas.
-
Si Pedro gibilanggo: Mga Buhat 12:1–11
-
Si Pablo ug si Bernabe miatubag sa usa ka salamangkero, Mga Buhat 13:1–13
-
Si Pablo ug si Bernabe maisogon: Mga Buhat 13:42–52
-
Ang dili matuohon nga mga Hudeyo nagpaukyab og oposisyon: Mga Buhat 14:1–7
-
Pipila ka Hudeyo gikan sa Antioquia ug Iconio mibato kang Pablo: Mga Buhat 14:19–28
Human magtugot og panahon alang sa mga estudyante sa pagtuon sa ilang gipili nga tudling, dapita sila sa pagporma og gagmay nga mga grupo uban niadtong kinsa mituon og laing tudling ug sa pagpakigbahin sa unsay ilang nakat-onan.
Ikonsiderar ang pagbasa og dungan sa mosunod nga pamahayag ni Presidente Jeffrey R. Holland o pagtan-aw sa “Defend Your Beliefs” (0:57):
Pagmalig-on. Pagpuyo nga matinud-anon sa ebanghelyo bisan og ang uban sa inyong palibot dili matinud-anon. Panalipdi ang inyong mga tinuohan uban sa maayong pamatasan ug kamanggiloy-on, [apan] panalipdi kini. … Sa paglakaw sa dalan nga maisogon, inyong makaplagan ang dili matarog nga pagtuo, makakaplag kamo og kaluwasan batok sa mga daotan, bisan ang gilis sa unos, ug makaplagan ang sama sa bato nga kalig-on sa atong Manunubos diin kamo natukod kon kamo motukod sa inyong mahalaron nga pagkadisipulo, kamo dili mapukan. (“Ang Bili—ug mga Panalangin—sa Pagkadisipulo,” Liahona, Mayo 2014, 9)
Ang mga estudyante mahimong mopakigbahin og mga ehemplo kon sa unsang paagi ang Manluluwas mitabang kanila o sa usa ka tawo nga ilang kaila sa pagpanalipod sa ilang mga tinuohan uban sa kaisog ug kaluoy. Kini mahimong mga kasinatian nga ilang nasinati sa social media, isip usa ka misyonaryo, o sa personal nga mga pakig-uban sa mga kauban sa trabaho, mga higala, o pamilya.
Dapita ang mga estudyante sa pagpamalandong ug sa pagrekord kon sa unsang paagi sila makapakita og mas dakong hugot nga pagtuo sa Manluluwas kon sila mag-atubang og oposisyon.