2 Mga Taga-Corinto 1–7

Dapita ang mga estudyante sa pagsulat og pipila ka pagsulay nga ilang giatubang o giatubang karon. Dayon hangyoa sila sa pagpamalandong sa mosunod nga pangutana:

• Sa kasagaran unsaon ninyo pagtubag sa mga pagsulay ug mga kasamok nga inyong giatubang?

Ipasabot nga sa iyang pagpangalagad, si Pablo nag-atubang og daghang mga pagsulay. Mahimong basahon sa mga estudyante ang 2 Mga Taga-Corinto 11:23–28 ug mangita sa mga pagsulay nga giatubang ni Pablo. Human mabasa sa mga estudyante kini nga lista sa mga pagsulay ni Pablo, dapita sila sa pagtuon sa 2 Mga Taga-Corinto 1:3–7, mangita sa tambag ni Pablo kon unsaon sa pag-atubang og mga pagsulay ug mga kasamok. (Kon gikinahanglan, ipasabot nga usa ka gamayng grupo sa mga miyembro sa Simbahan sa Corinto misupak ni Pablo ug gusto nga mominus ang iyang impluwensya tali kanila. Niini nga mga bersikulo, gitimbaya ni Pablo ang mga Santos sa Corinto ug gisultihan sila sa kahupayan ug kalipay nga gihatag sa Dios kaniya ug sa iyang misyonaryo nga mga kompanyon.)

Pwede ninyong hisgotan ang mosunod nga mga pangutana:

• Unsa ang gitudlo niini nga mga bersikulo kanato mahitungod sa kinaiya sa Dios? (Ang mga estudyante mahimong moila og kamatuoran sama sa mosunod: Ang Langitnong Amahan usa ka Dios sa kaluoy, kinsa mohupay kanato sa atong mga pagsulay ug mga kasamok.)

• Unsa ang mga ehemplo gikan sa mga kasulatan mahitungod sa Langitnong Amahan o ni Jesukristo nga naghupay sa katawhan panahon sa ilang mga pagsulay ug mga kasamok? Aduna bay mga ehemplo gikan sa inyong kaugalingong kinabuhi?

Aron matabangan ang mga estudyante nga mas molawom ang pagbati ug mahibalo nga ang Langitnong Amahan usa ka Dios sa kaluoy ug kahupayan, ikonsiderar ang pagtan-aw sa “Feeling the Lord’s Love and Goodness in Trials” (4:18).

4:17

• Sumala sa 2 Mga Taga-Corinto 1:3–4, unsay resulta sa pagsinati sa kaluoy ug paghupay sa Langitnong Amahan?

Mahimo ninyong ipakigbahin ang mosunod nga pamahayag gikan ni Elder John C. Pingree Jr.:

Ang atong mga pagsulay makatabang nato sa pagdiskobre ug pag-andam alang sa buhat nga giandam sa Langitnong Amahan alang nato. Mipasabut si Alma, “Human sa daghan nga kalisdanan, ang Ginoo … naghimo kanako nga himan sa iyang mga kamot” (Mosiah 23:10). Sama sa Manluluwas, kansang maulaong sakripisyo nakapahimo Niya sa pagtabang nato (tan-awa sa Alma 7:11–12), magamit nato ang kahibalo nga naangkon gikan sa malisod nga mga kasinatian sa pagbayaw, paglig-on, ug pagpanalangin sa uban. (“Ako Adunay Buhat alang Kanimo,” Liahona, Nob. 2017, 32)

Dapita ang mga estudyante sa pagpakigbahin og mga panig-ingnan kon giunsa nila sa paghupay o paglig-on sa laing tawo tungod sa impluwensiya sa Manluluwas. O mahimo silang mopakigbahin kon giunsa sa laing tawo paghupay o pagpalig-on nila.

Dapita ang mga estudyante sa pagtan-aw sa mga pagsulay nga ilang gisulat sa pagsugod niini nga kalihokan. Hatagi sila og panahon sa pagpamalandong ug pagrekord sa ilang mga hunahuna sa mosunod nga mga pangutana:

• Sa unsang mga paagi kaha ang Langitnong Amahan ug si Jesukristo naghatag ninyo og kahupay ug kaluoy sa inyong sitwasyon?

• Sa unsang paagi kaha ang inyong mga pagsulay ug mga kasamok nag-andam ninyo sa paghupay, pagbayaw, paglig-on, ug pagpanalangin sa uban?

Aron sa pagtapos, puweding paminawon o kantahon ninyo og dungan ang “Ang Kalinaw Asa Ko Pangitaa?” (Mga Himno, nu.75). Dapita ang mga estudyante sa pagsubay o pagpaminaw sa mga pulong nga o hugpong sa mga pulong nga makahuluganon para kanila ug nga makatabang nila sa ilang mga sirkumstansiya.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakita sa mosunod nga hulagway sa usa ka caterpillar nga nag-anam og kahimong alibangbang. Dapita ang mga estudyante sa pagpakigbahin kon unsa ang nakapahingangha nila mahitungod niini nga kasusaban. Dayon isulat diha sa pisara ang mosunod nga dili kompleto nga pamahayag ug iparekord sa matag estudyante kon unsaon nila kini pagkompleto. Pagdapit og pipila ka estudyante sa pagpakigbahin unsay ilang gisulat.

Sama nga ang usa ka caterpillar mahimong usa ka alibangbang, ang mga tawo usab makahimo sa pag-usab aron mahimong …

Ipasabot nga diha sa 2 Mga Taga-Corinto 5:11–21, nagtudlo si Pablo nga mahimo kitang mausab ngadto sa bag-ong mga binuhat. Dapita ang mga estudyante sa pagsiksik sa 2 Mga Taga-Corinto 5:14–21 (lakip ang Hubad ni Joseph Smith nga anaa sa footnote a sa bersikulo 16), mangita sa gitudlo ni Pablo mahitungod niini nga pagkausab.

• Sa inyong hunahuna unsa ang buot ipasabot sa mahimong usa ka bag-ong binuhat?

• Tingali makatabang ang pagpahimo sa mga estudyante og gagmay nga mga grupo ug moadto sa Giya ngadto sa mga Kasulatan ug basahon ang ubang mga tudling ubos sa ulohan nga “Tawo, Bag-o, Natawo sa Dios, Nataw Pag-usab.” Dapita sila sa pagpangita og mga pulong ug mga hugpong sa mga pulong nga mopatin-aw kon unsa ang kahulogan sa pagkahimong bag-ong binuhat. Hangyoa sila sa pagpakigbahin sa ilang mga panabot. Base sa unsay ilang nakat-onan, mahimong usbon sa mga estudyante ang pamahayag nga ilang gisulat sa pagsugod niini nga kalihokan.

• Unsa ang tahas ni Jesukristo sa inyong pagkausab aron mahimong bag-ong binuhat? (Ang mga estudyante mahimong moila og usa ka kamatuoran sama sa mosunod: Pinaagi ni Jesukristo mahimo kitang mapasig-uli sa Langitnong Amahan ug mahimong bag-ong mga binuhat.)

• Unsa ang ipasabot sa kang Jesukristo nga “pagpangalagad sa pagpasig-uli”? (Mahimong basahon sa mga estudyante ang “2 Mga Taga-Corinto 5:18–21. Unsay ipasabot sa mapasig-uli ngadto sa Dios?” diha sa Mga Tabang sa Kasulatan: Bag-ong Tugon.)

• Unsa ang inyong mga pagbati kang Jesukristo, nasayod nga tungod sa Iyang Pag-ula mahimo kamong mapasig-uli ngadto sa Langitnong Amahan ug mahimong bag-ong binuhat?

Aron matabangan ang mga estudyante sa paggamit sa unsay ilang nakat-onan, mahimo ninyong ipakita ang mosunod nga senaryo:

• Base sa atong diskusyon, unsa ang mga kamatuoran nga tingali makahatag ni Kofi og paglaom?

Ikonsiderar ang pagpakigbahin sa mosunod nga pamahayag ni Elder Kevin S. Hamilton:

Usa sa dakong mga bakak ni Satanas mao nga ang mga lalaki ug mga babaye dili mausab. …

Ang atong labing dako nga mga kahuyang mahimong atong labing dako nga mga kalig-on. Kita mahimong mausab ug “mahimo nga bag-o nga mga nilalang” [Mosiah 27:24–26; tan-awa usab sa 2 Mga Taga-Corinto 5:17]. …

Ang Manluluwas mihimo sa Iyang walay kinutoban ug mahangtoron nga Pag-ula aron nga kita sa tinuod mausab, maghinulsol, ug mahimong mas maayo. Kita sa pagkatinuod mahimong matawo pag-usab. Kita makabuntog og mga kinaiya, mga adiksyon, ug gani sa “hilig sa pagbuhat og daotan” [Mosiah 5:2]. Isip mga anak nga lalaki ug mga anak nga babaye sa usa ka mahigugmaong Amahan sa Langit, kita adunay gahom diha sa atong kaugalingon nga mag-usab. (“Niana Ako Mohimo sa Mahuyang nga mga Butang nga Mahimo nga Malig-on,” Liahona, Mayo 2022, 52)

• Unsay anaa niini nga pamahayag nga tingali makatabang ni Kofi? Sa unsang paagi kini makatabang kaninyo? (Ang mga estudyante makarekord sa ilang mga hunahuna.)

• Unsa ang pipila ka mga ehemplo gikan sa mga kasulatan o gikan sa inyong kaugalingong kinabuhi nga naghulagway nga ang mga tawo tinud-anay nga mausab ug mahimong bag-ong mga binuhat pinaagi sa tabang sa Manluluwas? (Kon makatabang, mahimo ninyong tan-awon ang “His Grace: Change Is Possible Through Christ” [3:29].)

  

  3:29

Dasiga ang mga estudyante sa pagrekord og espirituwal nila nga mga impresyon mahitungod sa unsay ilang mahimo aron makasinati og kausaban pinaagi ni Jesukristo.

Balik ngadto sa “Mga Opsiyon nga Kalihokan sa Pagkat-on.”

Mahimo nimong sugdan pinaagi sa pagpakigbahin sa mosunod nga senaryo:

• Unsay makita nga labing dako nga kabalaka ni John? Unsa man kaha ang kulang?

Ipasabot nga diha sa 2 Mga Taga-Corinto 7, nagtudlo si Pablo og importanteng mga kamatuoran mahitungod sa diosnon ug kalibutanon nga kasubo. Dapita ang mga estudyante sa pagbasa sa 2 Mga Taga-Corinto 7:8–10, mangita kon nganong importante ang pagtinguha og diosnong kasubo sa atong kinabuhi. (Pahinumdom: Importante tingali alang niadtong naggamit sa King James nga Bersiyon ang pagkasayod nga ang pulong nga gihubad og “naghinulsol” diha sa bersikulo 8 nagpasabot nga “nagmahay.” Usab ang, “dili pagabasolan” nagpasabot nga “dili kamahayan.”)

• Unsay atong makat-onan mahitungod sa diosnon nga kasubo ug sa kalibotanon nga kasubo gikan ni Pablo? (Tabangi ang mga estudyante sa pag-ila sa mosunod nga mga kamatuoran: Ang diosnong kasubo mosangpot sa sinsero nga paghinulsol ug sa kinabuhing walay pagmahay. Ang Kalibotanong kasubo mahimong mosangpot sa espirituhanong kamatayon o pagkabulag gikan sa Dios.)

• Unsaon ninyo sa paghulagway ang kalainan tali sa diosnong kasubo ug kalibotanong kasubo? (Mahimong basahon sa mga estudyante ang “2 Mga Taga-Corinto 7:8–11. Unsa ang diosnong kasubo?” diha sa Mga Tabang sa Kasulatan: Bag-ong Tugon.)

I-display ug basaha ang mosunod nga pamahayag ni Presidente Dieter F. Uchtdorf, kanhi sakop sa Unang Kapangulohan. Dapita ang mga estudyante sa pagpangita kon unsay iyang gitudlo mahitungod sa diosnong kasubo.

Ang diosnong kasubo mosangpot sa pagkakabig ug kausaban sa kasingkasing. Tungod niini masilag kita sa sala ug mahigugma sa kamaayo. Kini modasig kanato sa pagbarog ug paglakaw diha sa kahayag sa gugma ni Kristo. Ang tinuod nga paghinulsol nagpasabot nga pag-usab, dili pagpanakit o pagpaantos. Oo, ang kinasingkasing nga pagmahay ug tinuod nga pagbasol sa pagkamasinupakon sagad sakit ug importante kaayo nga lakang sa sagradong proseso sa paghinulsol. Apan kon ang kahasol sa tanlag mosangpot sa kasilag sa kaugalingon o mopugong sa atong pagbangon og balik, kini makababag imbes makadasig sa atong paghinulsol. …

… Dunay mas maayo pa nga paagi. … Kita dunay mananaog, usa ka Manluluwas, nga milatas sa walog sa kamatayon alang kanato. Iyang gihalad ang Iyang kaugalingon ingon nga lukat sa atong mga sala. Walay bisan kinsa nga may gugma nga labaw pa niini … . Giako Niya ang atong pag-antus. Gipas-an Niya ang atong palas-anon, ang atong pagkasad-an diha sa Iyang mga abaga. (“Makahimo Kamo Niini Karon!,” Liahona, Nob. 2013, 56)

• Unsaon ninyo paghulagway sa “mas maayong paagi” nga gitudlo ni Presidente Uchtdorf?

• Sa unsang paagi ang pagtutok sa Manluluwas ug sa Iyang Pag-ula mogiya kanato ngadto sa diosnong kasubo, sinsero nga paghinulsol, ug tinuod nga kausaban?

Ipasulat og usab sa mga estudyante ang senaryo mahitungod ni John sa paagi nga magpakita nga nagsinati siya og diosnong kasubo sa iyang mga binuhatan. Dapita ang mga estudyante sa pagpakigbahin sa ilang inusab nga mga sinulat.

Awhaga ang mga estudyante sa pagkonsiderar kon unsay ilang mabuhat aron mas daling mobati og diosnong kasubo sa ilang kinabuhi.

Balik ngadto sa “Mga Opsiyon nga Kalihokan sa Pagkat-on.”