Lucas 22; Juan 18

Ipakita ang mosunod nga mga hulagway, ug dapita ang mga estudyante sa pagpakigbahin og pipila ka importanting mga kasinatian diha si Pedro uban sa Manluluwas.

• Unsa ang nahibaloan ni Pedro mahitungod sa Manluluwas pinaagi niini nga mga kasinatian?

Basaha og dungan ang Lucas 22:31–32, mangita sa unsa pay gikinahanglan nga mahitabo sa kinabuhi ni Pedro sa dili pa siya makalig-on sa uban. Tabangi ang mga estudyante sa pag-ila sa mosunod nga kamatuoran: Samtang kita nahimong tinuod nga nakabig, atong mapatubo ang atong kapasidad sa paglig-on sa uban sa ilang hugot nga pagtuo diha ni Jesukristo. (Kon ang mga estudyante nagkinahanglan og tabang sa pagsabot bersikulo 31, tudloi sila ngadto sa “Lucas 22:31. Unsay ipasabot nga pagaayagon ni Satanas sama sa trigo?” diha sa Mga Tabang sa Kasulatan: Bag-ong Tugon.)

• Nganong importante kini nga mahibaloan nga ang Manluluwas nag-ampo alang sa hugot nga pagtuo ni Pedro? Unsay imong bation nga mahibalo nga ang Manluluwas nag-ampo usab alang kanimo? (tan-awa sa Juan 17:20).

• Sa unsa nga mga paagi kaha ang personal nga pagkakabig nag-apekto sa imong abilidad sa paglig-on sa uban?

Hunahunaa ang pagpakigbahin sa mosunod nga pamahayag gikan ni Presidente Dallin H. Oaks o tan-awa ang “Strengthen Thy Brethren” (1:48).

1:48

Aron mapalig-on ang iyang mga kaigsoonan—sa pag-alima ug pagpangulo sa panon sa Dios—kini nga tawo [Pedro] kinsa misunod ni Jesus sulod sa tulo ka tuig, kinsa gihatagan og awtoridad sa balaan nga pagkaapostol, kinsa nahimo nga usa ka maisog nga magtutudlo ug tigpamatuod sa Kristiyano nga ebanghelyo, ug kansang pagpamatuod maoy hinungdan nga ang Agalon mitawag kaniya nga dalaygon kinahanglan pa gihapon nga “makabig.”

Ang hagit ni Jesus nagpakita nga ang pagkakabig nga Iyang gikinahanglan alang niadtong kinsa mosulod sa gingharian sa langit (tan-awa sa Mat. 18:3) mas labaw pa kay sa nakabig lang aron sa pagpamatuod sa kamatuoran sa ebanghelyo. Ang pagpamatuod mao ang pagkasayod ug ang pagpahayag. Ang ebanghelyo naghagit kanato nga mahimong “nakabig,” nga nagkinahanglan kanato sa pagbuhat ug sa pagkahimo. Kon si bisan kinsa kanato nagsalig lamang sa atong kahibalo ug pagpamatuod sa ebanghelyo, anaa kita sa samang posisyon sa mga bulahan apan dili pa hingpit nga Apostoles kinsa gihagit ni Jesus nga mahimong “nakabig.” Kitang tanan adunay nailhang tawo nga may lig-ong pagpamatuod apan wala mogamit niini aron mahimong nakabig. (“The Challenge to Become,” Ensign, Nov. 2000, 33)

• Nganong importante nga masabtan ang kalainan tali sa nahibalo mahitungod ni Kristo ug nakabig ngadto Kaniya?

• Unsa nga mga lihok ang nakatabang kanimo nga mas nakabig ngadto sa Manluluwas? (Pahinumdomi ang mga estudyante sa dili paghikalimot sa gagmay ug yanong mga butang nga nagpalambo sa pagkakabig.)

Ikonsiderar ang pagdapit sa mga estudyante sa paghunahuna mahitungod sa usa ka tawo nga ilang kaila kinsa sa tinuod nakabig ngadto sa Ginoo. Bahina ang mga estudyante ngadto sa panagpares o gagmay nga mga grupo, ug dapita ang matag estudyante sa pagsulti mahitungod sa tawo nga ilang nailhan. Sila makahisgot kon giunsa ang pagkakabig niana nga tawo ngadto sa Manluluwas naka-impluwensiya kanila.

Awhaga ang mga estudyante sa pagrekord kon sa unsang paagi ilang mapalawom ang ilang pagkakabig ngadto ni Jesukristo ug sa Iyang ebanghelyo aron sila mas maayong makapangandam sa paglig-on sa uban.

Balik ngadto sa “Mga Kapilian nga Kalihokan sa Pagkat-on.”

Hunahunaa ang pagpakita sa mga sakop sa klase og usa o daghan pa sa mosunod nga mga hulagway ni Jesukristo nga nag-ampo diha sa Tanaman sa Getsemani. Ipasabot nga didto sa Getsemani, ug sa wala madugay didto sa Kalbaryo, gisinati ni Jesukristo ang dili masabtan nga pag-antos isip kabahin sa Iyang maulaong sakripisyo. Dapita ang pipila ka mga estudyante sa pagpakigbahin sa unsay ilang nakita ug gibati sa dihang sila magtan-aw niini nga mga paghulagway sa pag-antos sa Manluluwas.

Dapita ang mga estudyante sa pagporma og gagmay nga mga grupo sa dili mokubos sa tulo ka tawo. Ipabasa sa matag sakop sa grupo bisan hain sa Lucas 22:39–46; Mateo 26:36–41; o Marcos 14:32–38, mangita alang sa unsay atong makat-onan mahitungod sa kasinatian sa Manluluwas. Dapita ang mga estudyante sa pagpakigbahin sa usag usa sa unsay ilang nakaplagan. Ang mga estudyante mahimong moila og mga panabot sama sa mosunod: Gilig-on si Jesus pinaagi sa usa ka anghel samtang Siya nag-antos. Diha sa paghingutas, nag-ampo pa sa kinasingkasing si Jesukristo. Ang pag-antos sa Manluluwas hilabihan sa ka grabe nga misingot Siya og dagkong tulo sa dugo. Mitugyan sa hingpit si Jesus ngadto sa kabubut-on sa Dios, bisan pa og nabug-atan Siya sa pag-antos.

Ipakita nga samtang kini nga mga tudling sa kasulatan nagtudlo kanato mahitungod sa unsay nahitabo sa Getsemani, ang Pagpahiuli nga kasulatan nagpadayag og importanting mga kamatuoran mahitungod sa unsay natuman sa Manluluwas. Sa pagdiskobre niini nga mga kamatuoran, dapita ang mga estudyante sa pagbansay sa kahanas sa “Using Restoration Scripture to Understand the Bible” diha sa Mga Kahanas sa Pagtuon sa Kasulatan. Ang mga estudyante mahimong mogamit sa mga footnote, sa pagsiksik nga bahin sa Librarya sa Ebanghelyo, o sa Giya ngadto sa mga Kasulatan (tan-awa sa “Dugo,” “Ula, Pag-ula,” o “Getsemani”). O ikaw makasugyot nga ang mga estudyante magtuon sa Mosiah 3:7; 15:9; Alma 7:11–13; ug sa Doktrina ug mga Pakigsaad 19:16–19. Dapita ang mga estudyante sa pagpangita alang sa unsay gidugang niini nga kasulatan ngadto sa ilang pagsabot mahitungod sa Pag-ula sa Manluluwas.

Human sa paghatag og panahon alang sa pagtuon, dapita ang mga estudyante sa pagrekord diha sa pisara sa mga kamatuoran nga ilang nakaplagan. Mahimong moila ang mga estudyante og mga kamatuoran sama sa mosunod: Si Jesukristo miantos og dili masabot nga sakit tungod sa akong mga sala aron ako makahinulsol (tan-awa sa Mosiah 15:9; Doktrina ug mga Pakigsaad 19:16–19). Giantos ni Jesukristo ang mga sakit sa matag matang aron siya makasabot kanako ug makatabang kanako sa akong mga kaluyahon (tan-awa sa Mosiah 3:7; Alma 7:11–13).

Hunahunaa ang paghisgot sa mosunod nga mga pangutana:

• Sa unsa nga paagi kini nga mga kamatuoran gikan sa Pagpahiuli nag-impluwensiya kon giunsa nimo pagtan-aw ang Manluluwas?

• Unsa ang kahulogan nganha kanimo sa kasinatian sa Manluluwas diha sa Tanaman sa Getsemani ug sa wala madugay didto sa krus?

• Sa unsang paagi ang pagsabot ug pagpamalandong sa unsay giantos sa Manluluwas alang kanimo maka-impluwensiya sa paagi ikaw mobati mahitungod Kaniya?

Makahimo ka sa pagpakita ug paghisgot sa mosunod nga pamahayag ni Presidente Russell M. Nelson:

Samtang nakigbisog ako sa grabe nga kasakit tungod sa bag-ong kadaot sa akong lawas, akong gibati ang mas lawom nga pagpasalamat alang ni Jesukristo ug sa dili matugkad nga gasa sa Iyang Pag-ula. Hunahunaa kana! Ang Manluluwas nag-antos sa “mga sakit ug kasakit ug mga pagtintal sa matag matang” [Alma 7:11] aron Siya makahupay kanato, makaayo kanato, makaluwas kanato, sa mga panahon sa panginahanglan. (“Paghunahuna og Celestial!,” Liahona, Nob. 2023, 117)

Dapita ang mga estudyante sa pagpamalandong kon unsaon nga makapakita sila og pagpasalamat alang sa pag-antos sa Manluluwas alang sa ilang kaugalingon. Makasulat sila sa unsay ilang gihunahuna. Awhaga sila sa paglihok sa ilang mga pag-aghat. (Makatugtog ka sa himno “Ako Nagpabilin nga Natingala” [Mga Himno, nu. 114] samtang sila nagpamalandong o nagsulat.)

Balik ngadto sa “Mga Kapilian nga Kalihokan sa Pagkat-on.”

Hangyoa ang mga estudyante sa pagpakigbahin og mga ehemplo sa pag-antos nga sila o ang mga tawo nga ilang kaila nag-atubang.

• Sa unsang paagi ang pag-antos nag-impluwensiya sa atong mga kinabuhi?

• Sa unsang paagi ang pag-antos mag-apekto sa atong pagkaandam sa pagbuhat sa kabubut-on sa Dios?

Ipasabot nga diha sa mga takna tali sa Iyang pag-antos diha sa Tanaman sa Getsemani ug didto sa Iyang Paglansang sa Krus, si Jesus giabusohan ug gilutos sa Iyang mga kaaway. Ikaw makapakita og pipila ka hulagway niini nga mga panghitabo. (Tan-awa ang mga imahe diha sa “Media” seksiyon sa “Lucas 22; Juan 18” diha sa Mga Tabang sa Kasulatan: Bag-ong Tugon.)

Ipakita ang mosunod nga mga panghitabo, mga tudling sa kasulatan, ug mga pangutana. Dapita ang mga estudyante sa pagporma og gagmay nga mga grupo, pagpili og usa o daghan pa sa mosunod nga mga panghitabo, basaha ang kalakip nga mga bersikulo, ug dayon paghisgot sa mga pangutana nga anaa sa ubos:

• Gidakop si Jesus: Mateo 26:47–50; Lucas 22:47–48; Juan 18:1–12

• Jesus gikasohan sa atubangan sa pangulong mga pari: Lucas 22:63–71

• Jesus gihukman ni Pilato: Juan 18:33–40

• Unsa nga mga hunahuna ug mga pagbati ikaw aduna samtang namalandong ka sa kasinatian sa Manluluwas?

• Unsay nakapadani kanimo mahitungod sa pagtubag sa Manluluwas ngadto sa Iyang mga tiglutos?

• Unsa ang imong nakat-onan gikan sa Manluluwas mahitungod sa pag-atubang sa mga kalisdanan?

Human mabasa ug mahisgotan sa mga estudyante ang mga pangutana, makapakita ka sa mosunod nga kamatuoran: Kon mag-atubang og dakong kalisdanan, mipabilin si Jesukristo nga matinud-anon ngadto sa Iyang balaang misyon ug calling. Isip usa ka klase, kamo makahisgot sa mosunod nga mga pangutana:

• Ngano sa imong hunahuna si Jesukristo nagpabilin nga nakapunting sa Iyang balaang misyon bisan pa sa kalisdanan nga Iyang giatubang? (Isip kabahin niini nga panaghisgot, mahimo kang makadapit sa mga estudyante sa pagtuon sa 1 Nephi 19:8–9. Makapangita sila sa unsay gitudlo ni Nephi mahitungod kon nganong ang Manluluwas andam sa paglahutay sa mapintas ug walay kaangayan nga pagtagad.)

• Unsay makatabang kanimo sa pagpabilin nga nakapunting diha sa mga katuyoan sa Dios alang kanimo?

• Giunsa ikaw pagpanalangin pinaagi sa pagpili sa pagsunod sa kabubut-on sa Langitnong Amahan, bisan kon ikaw nag-atubang og pag-antos?

Dapita ang mga estudyante sa paghunahuna kon unsaon nila nga makasunod sa ehemplo sa Manluluwas sa pagtuman sa mga katuyoan sa Langitnong Amahan bisan kon nag-atubang og kalisdanan. Makahatag ka sa mga estudyante og panahon sa pagsulat mahitungod sa ilang espirituhanong mga pagbati ug sa tumong nga sila aduna alang sa ilang mga kaugalingon.

Balik ngadto sa “Mga Kapilian nga Kalihokan sa Pagkat-on.”