Mateo 18; Lucas 10

Hatagi og panahon ang mga estudyante sa pagpangutana ug pagpakigbahin og mga panabot ug mga kamatuoran nga ilang nadiskobrehan sa ilang personal nga pagtuon sa Mateo 18; Lucas 10.

Ikaw makasugod pinaagi sa pagpasabot ngadto sa mga estudyante nga niini nga asoy ang Apostoles naglantugiay tali sa ilang mga kaugalingon mahitungod kon kinsa ang mahimong labing halangdon (tan-awa sa Marcos 9:33–34; Mateo 18:1).

• Unsa sa imong hunahuna ang labing dako nga suliran niini nga panaghisgot?

Dapita ang mga estudyante sa pagbasa sa Mateo 18:1–5. Dayon dapita ang mga estudyante sa paghisgot kon unsa ang gitudlo sa Manluluwas sa Iyang mga disipulo. (Tabangi ang mga estudyante sa pag-ila og kamatuoran sama sa mosunod: Nagtinguha ang Manluluwas sa Iyang mga disipulo nga makabig ug mahimong sama sa gagmay nga mga bata.)

3:13

Mahimo kang mopakita og pipila sa mosunod nga mga imahe ni Jesus ngadto sa mga bata. Hisgoti ang mga kalidad nga kita kinahanglan gayud aduna nga mahimong ingon sa gagmay nga mga bata.

1:5

• Unsa ang kalainan tali sa pagkabata-bataon ug sa sama sa usa ka bata? (Makahimo ka sa pagsulat sa Bata-bataon ug Sama sa usa ka gamay nga bata diha sa pisara ug dayon isulat ang mga tubag sa mga estudyante ubos sa angay nga ulohan.)

• Ngano kaha nga kita kinahanglan gayod nga mahimong sama sa gagmay nga mga bata aron makasulod sa gingharian sa Dios?

Makadapit ka sa mga estudyante sa pagbasa sa Mosiah 3:19 ug sa paghisgot kon unsa ang gitudlo ni Hari Benjamin mahitungod sa pagkahimong “sama sa usa ka gamay nga bata.” Isip kabahin sa inyong panaghisgot, mahimo nimong ipakigbahin ang mosunod nga pamahayag ni Presidente Henry B. Eyring:

Si Hari Benjamin mihulagway niana nga kausaban sa atong mga kinaiya [pinaagi sa Pag-ula ni Kristo] uban sa usa ka usa ka matahom nga pasumbingay nga kanunay nga nakatandog sa akong kasingkasing. Kini gigamit sa mga propeta sulod sa liboan ka tuig ug sa Ginoo Mismo. Kini mao nga: kita kinahanglan gayod nga mahisama sa usa ka bata—usa ka gamay nga bata.

Alang sa uban, kana dili sayon nga dawaton. Kadaghanan kanato gusto nga mahimong kusgan. Tingali atong gikonsiderar nga ang pagkahimong sama sa usa ka bata ingon og huyang. Kadaghanan sa mga ginikanan naglantaw alang sa adlaw nga ang ilang mga anak dili na kaayo magbinata. Apan si Hari Benjamin, kinsa nakasabot usab sama ni bisan kinsa nga mortal kon unsa ang gipasabot nga mahimong usa ka tawo nga may kalig-on ug kaisog, nagpatin-aw nga ang pagkasama sa usa ka bata wala magpasabot nga magbinata. Kini mao nga mahisama sa Manluluwas, kinsa nag-ampo ngadto sa Iyang Amahan alang sa kalig-on aron makatuman sa kabubut-on sa Iyang Amahan ug mag-ula alang sa mga sala sa tanang anak sa Iyang Amahan ug dayon mibuhat niini. Ang atong mga kinaiya kinahanglan nga mausab aron mahisama sa usa ka bata aron makabaton sa kalig-on nga kinahanglan nga aduna kita aron lig-on nga makabarog ug magmalinawon atol sa mga panahon sa kalisod. (“Lig-on diha sa mga Unos,” Liahona, Mayo 2022, 28–29)

Awhaga ang mga estudyante sa pagrekord og paagi nga sila makahimo nga mas mahisama sa gagmay nga mga bata ug sa pagpamalandong kon sa unsang paagi ang Manluluwas makatabang kanila sa pagbaton niini nga hiyas.

Makasugod ka pinaagi sa pagsulat sa mosunod nga wala mahuman nga pamahayag diha sa pisara: Ang pagpasaylo malisod kon … Dapita ang mga estudyante sa pagduol ngadto sa pisara ug sa pagsulat og lainlaing mga paagi sa pagkompleto niini nga pamahayag.

• Nganong importante nga kita dili maghukom sa atong mga kaugalingon o sa uban og sakit kon nakigbisog kita sa pagpasaylo sa uban?

Dapita ang mga estudyante sa pagbasa sa Mateo 18:21–22, mangita alang sa unsay gitudlo ni Jesukristo ni Pedro mahitungod sa pagpasaylo.

• Unsa sa imong hunahuna ang gipasabot sa Manluluwas sa dihang gisultihan Niya si Pedro sa pagpasaylo “kutob sa kapitoan pil-on og kapito”? (tan-awa sa “Mateo 18: 21–22. Unsay ipasabot sa pagpasaylo sa uban ‘kutob sa kapitoan pil-on og kapito’?” diha sa Mga Tabang sa Kasulatan: Bag-ong Tugon).

Dapita ang mga edstudyante sa pagbasa sa Mateo 18:23–35. (Sa pagkat-on mahitungod sa tibuok kahulogan sa sambingay, makabasa ang mga estudyante sa “Mateo 18:23–35. Unsa ang kalainan tali sa 10,000 ka talento ug 100 ka salapi?” diha sa Mga Tabang sa Kasulatan: Bag-ong Tugon.)

3:29

• Unsa nga mga kamatuoran mahitungod sa pagpasaylo ang imong nakat-onan gikan niini nga sambingay? (Ang mga estudyante mahimong moila og mga baroganan sama sa mosunod: Kita nagsunod sa ehemplo sa Manluluwas kon kita nagpasaylo sa uban ingon nga Siya nagpasaylo kanato. Kinahanglan gayod kitang mopasaylo sa uban diha sa atong mga kasingkasing aron madawat ang pagpasaylo sa Ginoo.)

• Giunsa sa agalon sa pagpakita og hustisya diha sa iyang pagtagad sa walay kalooy nga sulugoon?

• Nganong importante ang pagpasaylo sa uban diha sa atong mga kasingkasing? (Hunahunaa ang pagbasa sa Doktrina ug mga Pakigsaad 64:8–9.)

Ikaw makapakigbahin ug makahisgot sa mosunod nga mga pamahayag ni Presidente Jeffrey R. Holland ug Elder Neil L. Andersen:

Kini … importante alang sa pipila kaninyo nga nagsinati og tinuod nga kasakit nga maghunahuna nga [ang Manluluwas] wala mag-ingon. Siya wala nag-ingon nga, “Kamo wala tugoti nga mobati og tinuod nga kasakit o tinuod nga kasubo gikan sa makalilisang nga kasinatian nga imong naangkon gikan sa uban.” Wala usab Siya nag-ingon, “Aron makapasaylo sa hingpit ipadayon ang makadaot nga relasyon o ibalik ngadto sa abusado, makadaot nga kahimtang.” Apan bisan pa man ang labing makaguol nga kalapasan nga tingali moabot kanato, molampos lang kita batok sa atong kasakit kon motunob kita sa dalan sa tinuod nga pagkaalim. Kana nga dalan mao ang pagpasaylo nga gisubay ni Jesus sa Nazaret, kinsa nagtawag sa matag usa kanato, “Umanhi ka ug sumunod kanako” [Lucas 18:22]. (“Ang Pangalagad sa Pagpasig-uli,” Liahona, Nob. 2018, 79)

Kita mas maayo ang pagsabot sa gahom sa Pag-ula ni Jesukristo kon mopasaylo kita og usa ka tawo kinsa, sa atong hunahuna, dili angay nga pasayloon. (The Divine Gift of Forgiveness [2019], 234)

• Sa unsang paagi kini nga mga pamahayag magtabang sa usa ka tawo kinsa nakigbisog sa pagpasaylo?

Makadapit ka sa mga estudyante sa pagpakigbahin kon giunsa sa Manluluwas pagtabang kanila sa pagpasaylo sa ilang mga kaugalingon o sa uban. Ang mga estudyante makapakigbahin usab kon sa unsang paagi ang pagpasaylo nagdala kanila og kalinaw, o makatan-aw kamo sa “Principle of Peace: Forgiveness” (1:49).

1:50

Dapita ang mga estudyante sa pagpamalandong kon aduna bay usa ka tawo nga kinahanglan nilang pasayloon. Awhaga sila sa pagsulat og bisan unsa nga ilang gibati nga buot sa Ginoo nga ilang mahibaloan o buhaton.

Ipakigbahin ang mosunod nga pahamayag ni Propeta Joseph Smith:

“Ako adunay usa ka yawe nga akong masabtan ang mga kasulatan. Ako nangutana, kon unsa ang pangutana nga mihatag sa tubag o mihimo ni Jesus sa pagsulti sa sambingay? (sa Kasaysayan, 1838–1856 [Manuscript History of the Church], volume D-1, 1459, josephsmithpapers.org; punctuation ug capitalization gi-moderno)

Basaha ang Lucas 10:25–29 nga magdungan ang tibuok klase. Dayon isulat diha sa pisara ang duha ka pangutana nga miaghat sa Manluluwas sa pagtudlo sa sambingay sa maayong Samarianhon.

Ang mga estudyante makatrabaho nga may pares o sa ginagmay nga mga grupo ug basahon ang Lucas 10:30–37 sa pagkat-on kon giunsa sa sambingay sa pagtubag ang mga pangutana nga anaa sa pisara. Isip kabahin sa ilang pagtuon, awhaga ang mga estudyante sa pagkat-on sa kinatibuk-ang kahulogan sa sambingay pinaagi sa pagbasa sa “Lucas 10:31–36. Unsa ang importansiya sa pari, Levite, ug Samarianhon diha sa sambingay sa maayong Samarianhon?” diha sa Mga Tabang sa Kasulatan: Bag-ong Tugon.

Human tugoti og panahon sa pagtuon, dapita ang mga estudyante sa pagpakigbahin kon unsaon nila sa pagtubag ang mga pangutana diha sa pisara. (Mahimo nga ang mga estudyante mag-ila og mga kamatuoran sama sa mosunod: Aron mapanunod ang kinabuhing dayon, kita kinahanglan gayod mahigugma sa Dios ug sa atong silingan. Aron mahisama sa Manluluwas, kita kinahanglan gayod mahigugma ug moalagad sa atong silingan.) Human ang mga estudyante makigbahin sa ilang mga panabot, hunahunaa kon aduna ba sa mosunod nga mga pangutana ang makatabang sa pagpasabot kanila pag-ayo:

• Sa unsang paagi ang paghigugma sa Dios ug sa uban nagtabang kanato sa pagpangandam alang sa kinabuhing dayon?

• Sa unsang paagi ang paghigugma ug pag-alagad sa ubang mga tawo mitabang kanimo nga mas mapaduol ngadto sa Dios?

Hunahunaa ang pagpakita sa hulagway sa maayong Samarianhon gikan sa sinugdanan sa leksiyon. Dapita ang mga estudyante sa pagpakigbahin og mga hunahuna ug mga pagbati nga sila aduna samtang sila nagtan-aw diha niini nga mga hulagway.

• Sa unsang paagi nagrepresentar ang maayong Samarianhon sa Manluluwas ug sa unsay Iyang gihimo alang kanato?

• Sa unsang paagi ang Manluluwas nahimong sama sa maayong Samarianhon alang kanimo?

• Nganong importante kini ang pagsunod sa ehemplo sa maayong Samarianhon ug “lakaw, ug buhata … ang sama niana”? (Lucas 10:37).

Dapita ang mga estudyante sa pagpakigbahin og mga ehemplo nga ilang nakita sa modernong panahon nga maayong mga Samarianhon. O kamo makatan-aw sa “A Good Samaritan”.(5:44).

5:44

Dapita ang mga estudyante sa paghangyo sa Langitnong Amahan alang sa panabang nga mas makamatngon kon kinsa sila makaserbisyo. Awhaga sila sa pagpangita alang sa mga oportunidad nga mahimong sama sa maayo nga Samarianhon karon.

Makadapit ka sa mga estudyante sa paghimo og usa ka lista sa mga reponsibilidad ug mga kalihokan nga magpalabay sa ilang panahon sa usa ka semana.

• Uban sa usa ka limitado nga gidaghanon sa panahon ug kalihokan, unsaon nimo sa paghukom kon unsa ang labing maayo nga hatagan og importansiya sa matag adlaw?

Hunahunaa ang pagpakita og imahe ni Maria ug Marta kauban sa Manluluwas.

Pahinumdomi ang mga estudyante nga si Jesus mihunong sa usa ka balangay ug mibisita sa panimalay ni Marta. Dapita ang mga estudyante sa pagbasa sa Lucas 10:38–42 ug pangitaa ang unsay gihatagan og importansiya ni Maria ug Marta atol sa Iyang pagbisita.

• Sa unsang paagi ang mga lihok sa matag babaye nagpakita sa iyang gugma ug debosyon alang ug ngadto ni Jesukristo? (Kini mahimong makatabang ang pagribyu sa “Lucas 10:38–42. Unsa ang gipaabot sa usa ka tig-abiabi nga tagbalay sa mga panahon sa Bag-ong Tugon?” sa Mga Tabang sa Kasulatan: Bag-ong Tugon.)

• Unsa nga mga kamatuoran ang atong makat-onan gikan sa mga tubag sa Manluluwas ngadto ni Marta diha sa mga bersikulo 41–42? (Mahimong mag-ila ang mga estudyante og usa ka kamatuoran sama sa mosunod: Kinahanglan nga atong unahon ang mga kapilian nga magdala kanato nga mas maduol ngadto ni Jesukristo.)

Sa pagtabang sa mga estudyante sa paghunahuna kon unsaon nila sa pag-una ang Ginoo labaw sa ubang mga butang, mahimo nimong ipakigbahin ang mosunod nga pamahayag ni Presidente Dallin H. Oaks:

Tungod lamang kay ang usa ka butang maayo kini dili igo nga rason sa pagbuhat niini. Ang gidaghanon sa maayong mga butang nga atong mahimo misobra kaayo sa panahon nga magamit sa pagbuhat niini. Pipila sa mga butang mas maayo kay sa maayo, ug kini mao ang mga butang nga nagkinahanglan nga unang hatagan og pagtagad sa atong mga kinabuhi. …

Dalaygon si Marta nga “nagmatngon ug nabalaka sa daghang mga butang” (b. 41), apan ang pagkat-on sa ebanghelyo gikan sa Labing Maayong Magtutudlo mas labaw nga “gikinahanglan.” …

… Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo tungod kay kini nag-ugmad og hugot nga pagtuo diha sa Ginoong Jesukristo ug naglig-on sa atong mga pamilya. (“Maayo, Mas Maayo, Labing Maayo,” Liahona, Nob. 2007, 104, 107)

• Unsa ang pipila sa mga ehemplo sa maayong mga butang nga mahimong magpalayo kanato gikan sa mas maayo ug labing maayo nga mga butang?

• Unsa ang nagtabang kaninyo sa pagpabiling nagpunting diha sa mas maayo ug labing maayo kon adunay daghan kaayong maayo nga mga butang nga kapilian?

Dapita ang mga estudyante sa paghunahuna og usa ka panahon sa dihang ilang giuna ang Manluluwas ug ang Iyang ebanghelyo labaw sa ubang maayong mga butang. Mahimo nilang ipakigbahin ang ilang mga kasinatian ug unsay ilang nakat-onan gikan niini. Hatagi ang mga estudyante og panahon sa pagribyu sa lista nga ilang gihimo sa pagsugod niining kalihokan sa pagkat-on. Dapita sila sa paghimo og usa ka plano sa pag-una sa Manluluwas ug sa iyang ebanghelyo sa umaabot nga semana.