Mateo 1; Lucas 1

Dapita ang mga estudyante sa paghunahuna mahitungod kon sa unsa nga paagi sila mosaulog og Pasko diha sa ilang panimalay o kultura. Dayon pangutana kon nakadungog ba sila sukad sa kasagarang pangutana nga “Andam ka na ba alang sa Pasko?” Ipasabot nga si Elder David A. Bednar misugyot nga kita mangutana og lahi nga pangutana: “Andam na ba ikaw ug ako alang kang Kristo?” (tan-awa sa “Elder Bednar’s Teachings Help Us Find the Savior in Christmas Symbols,” Dec. 20, 2022, newsroom.ChurchofJesusChrist.org).

• Sa unsang paagi ang halawom nga paghunahuna mahitungod sa pangutana ni Elder Bednar motabang kaninyo nga mahimong usa ka mas nakasentro kang Kristo nga tawo? Sa unsa nga paagi nga kini makatabang kaninyo sa paghimo sa panahon sa Pasko nga usa ka mas nakasentro kang Kristo nga kasinatian?

Ipasabot nga ang anghel Gabriel mipakita ngadto ni Maria ug mipahibalo nga siya ang mamahimong inahan sa Anak sa Dios. Human namabdos si Maria, usa ka anghel mipakita ngadto kang Jose diha sa usa ka damgo ug misulti kaniya nga ang bata nga gidala ni Maria “gikan sa Espiritu Santo” (Mateo 1:20). Gikan niini nga mga kasinatian, si Maria ug Jose nakakat-on og importante nga mga kamatuoran mahitungod sa pagkatawo ni Jesukristo. Kini nga mga kamatuoran mitabang kanila nga “maandam alang kang Kristo.” Aron sa pagtabang sa mga estudyante sa pag-ila niini nga mga kamatuoran, hunahunaa ang pagsulat diha sa pisara sa mosunod nga dili kompleto nga mga pamahayag.

Ang mga estudyante mahimong moporma og ginagmay nga mga grupo ug magsiksik sa Lucas 1:28–35 ug Mateo 1:20–25, mangita alang sa mga paagi sa pagkompleto sa mga pamahayag diha sa pisara. Mahimo dayon nimong dapiton ang mga estudyante sa pagrekord kon unsaon nila sa pagkompleto niini nga mga kapahayag. Awhaga ang mga estudyante sa pagpangita alang sa mga ngalan, mga titulo, ug mga tahas ni Jesukristo (tan-awa sa “Pagtutok kang Jesukristo diha sa mga Kasulatan,” Mga Kahanas sa Pagtuon sa Kasulatan).

Human ang mga estudyante mirekord sa ilang nakompleto nga mga pamahayag, hangyoa sila sa pagpakigbahin diha sa ilang mga grupo kon unsay ilang nakit-an. Mahimo kining maglakip sa mga pamahayag sama sa mosunod: Si Jesukristo mao ang Anak sa Dios. Si Jesukristo mao ang anak sa usa ka mortal nga inahan. Si Jesukristo maghari sa balay ni Jacob sa kahangtoran. Si Jesukristo moluwas sa Iyang katawhan gikan sa ilang mga sala. Si Jesukristo (Immanuel) magauban kanato.

Dapita ang mga grupo sa pagpili og usa ka pamahayag ug hisgoti kon sa unsang paagi ang pagkahibalo niini nga kamatuoran mahitungod sa Manluluwas mahimong (1) makadugang sa atong pagsabot sa Iyang balaanong misyon ug (2) makapalig-on sa atong hugot nga pagtuo diha Kaniya.

Mahimo kang motapos niini nga kalihokan pinaagi sa pagpangutana:

• Sa unsang paagi kaha ang pagkahibalo niini nga mga kamatuoran mahimong nakatabang ni Maria ug Jose nga mahimong “andam alang kang Kristo”?

• Unsaon nimo nga makahinumdom nga mahimong “andam alang kang Kristo” sa panahon sa Pasko ug sa tibuok tuig?

Pahinumdom: Kon gusto sa imong mga estudyante nga hisgotan ang kamahinungdon sa talagsaon nga kagikan ni Jesukristo, ikonsiderar ang pagrebyo og dungan sa “Lucas 1:31–35. Ngano nga si Jesus kinahanglang adunay usa ka mortal nga inahan ug usa ka imortal nga Amahan?” ug “Mateo 1:20. Unsa man ang atong nahibaloan mahitungod sa pagpanamkon kang Jesukristo?” diha sa Scripture Helps: New Testament [Mga Tabang sa Kasulatan: Bag-ong Tugon].

Balik ngadto sa “Mga Opsiyon sa Kalihokan sa Pagkat-on.”

Hunahunaa ang paghatag sa mga estudyante sa mosunod nga pagtimbang-timbang sa kaugalingon. Ipasabot nga ang unsay ilang irekord dili ipakigbahin sa uban.

Ipakita ang mosunod nga litrato. Ipasabot nga kini naghulagway ni Maria nga nagbisita sa iyang ig-agaw nga si Elisabet. Bag-ohay lang nahibaloan ni Maria gikan ni anghel Gabriel nga mamahimo siyang inahan sa Anak sa Dios (tan-awa sa Lucas 1:26–38). Niining panahona, si Elisabet unom ka bulan nga mabdos ni Juan Bautista (tan-awa sa Lucas 1:36).

• Unsa kaha ang matudlo kanato niini nga mga babaye mahitungod sa Manluluwas?

Aron sa pagkat-on gikan niini nga talagsaon nga mga babaye, dapita ang pipila ka estudyante sa pagbasa sa mga pulong ni Elisabet diha sa Lucas 1:39–45 ug ang uban sa pagbasa sa mga pulong ni Maria diha sa Lucas 1:46–55. O makatan-aw kamo sa “Mary and Elisabeth Rejoice Together [Si Maria ug Elisabet Magkaubang Nagmaya]” (gikan sa time code 1:13 hangtod sa 5:14).

5:15

Hunahunaa ang pagpangutana sa usa o mas daghan pa sa mosunod nga mga pangutana:

• Unsa nga mga hunahuna ug mga pagbati nga anaa kamo mahitungod ni Elisabet ug Maria samtang gitun-an ninyo ang ilang mga pagpamatuod?

• Unsa ang atong makat-onan mahitungod sa Manluluwas gikan niini nga mga pagpamatuod? Unsa nga kalainan ang mahimo nga motutok sa Manluluwas kon kita mopakigbahin og pagpamatuod? (Tabangi ang mga estudyante nga makasabot nga kita mopalig-on sa uban samtang kita motudlo ug magpamatuod ni Jesukristo.)

• Sa unsang paagi kamo naimpluwensiya pinaagi sa mga pagpamatuod sa usa ka tawo bahin sa Manluluwas?

Mahimo ninyong basahon og dungan ang mosunod nga pamahayag ni Elder Neil L. Andersen:

Uban niadtong anaa sa atong palibot, mas magmatinuoron kita, mas andam nga maghisgot bahin ni Kristo. …

Pagmadayganon diha sa social media sa paghisgot sa inyong pagsalig kang Kristo. …

Ang pipila sa atong isig ka mga Kristiyano, usahay, nagduhaduha sa atong gituohan ug mga motibo. Magmaya kita sa tinud-anay uban kanila sa atong giambitan nga pagtuo kang Jesukristo ug sa mga kasulatan sa Bag-ong Tugon nga ganahan natong tanan. …

Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. (“Kita Naghisgot kang Kristo,” Liahona, Nob. 2020, 90)

Hatagi ang mga estudyante og mubong panahon sa pagpamalandong niini nga pangutana: Kinsa tingali ang nagkinahanglan nga makadungog sa imong pagpamatuod sa Manluluwas?

Ipasabot nga ang pagpakigbahin sa atong pagpamatuod mahitungod ni Jesukristo usa ka pagpahayag sa hugot nga pagtuo. Mahimo kining maglakip sa unsay atong nahibaloan, gituohan, ug gilaoman nga tinuod. Dapita ang mga estudyante sa pagsulat sa ilang pagpamatuod mahitungod ni Jesukristo o maghimo og bidyo niini diha sa ilang phone. Sila dayon mahimong mopakigbahin sa unsay ilang gisulat o girekord ngadto sa laing sakop sa klase, i-text o i-email kini ngadto sa usa ka higala, o i-post kini sa social media.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa pagpamalandong ug pagrekord og kadiyot sa usa ka hagit nga ilang kasamtangang giatubang. Awhaga sila sa pagsulat og mga ideya atol niining kalihokan sa pagkat-on nga makatabang kanila sa ilang hagit.

Mahimo nimong ipakita ang mosunod nga litrato ug ipasabot nga sa dihang “si Maria niadtong panahona gitakda nga maminyo kang Jose” (Mateo 1:18), sila misulod sa usa ka kasabotan nga gitawag og pagkasinayoran. Aron makasabot sa mga obligasyon sa pagkasinayoran, ikonsiderar ang pagrebyo uban sa mga estudyante sa “Mateo 1:18. Unsa ang gipasabot nga mahimong sinayoran?” diha sa Scripture Helps: New Testament [Mga Tabang sa Kasulatan: Bag-ong Tugon].

Ikonsiderar ang pagpares-pares sa mga estudyante. Usa ka estudyante mahimong mobasa mahitungod ni Jose diha sa Mateo 1:18–25, ug ang lain mahimong mobasa mahitungod ni Maria sa Lucas 1:26–38. Ipakita ang mosunod nga mga pangutana, ug dapita ang mga estudyante sa paghisgot niini:

• Unsa may hagit niini nga sitwasyon alang kang Maria? Unsa man pod ang hagit alang kang Jose? (tan-awa sa “Mateo 1:18–25. Unsa may mga opsiyon ni Jose sa dihang iyang nahibaloan nga mabdos si Maria?” diha sa Scripture Helps: New Testament [Mga Tabang sa Kasulatan: Bag-ong Tugon]).

• Unsay atong makat-onan mahitungod sa pagdumala og lisod nga mga sitwasyon gikan sa paagi nga si Maria ug si Jose mitubag sa ilang mga kahimtang? (Ang mga estudyante mahimong moila og usa ka kamatuoran sama sa mosunod: Makabuhat kita og lisod nga mga butang samtang kita magtinguha nga masayod ug motugyan ngadto sa kabubut-on sa Dios. [Pahinumdom: Ang pulong nga “naghunahuna” diha sa Mateo 1:20 naggikan sa Griyego nga pulong nga enthymeomai, nga nagpasabot sa pagkonsiderar o pagpamalandong.])

• Unsa nga mga panalangin ang miabot ngadto kang Maria ug Jose tungod kay sila mipili sa pagtugyan sa ilang mga kabubut-on ngadto sa Dios?

Human ang mga magkauban maghisgot niini nga mga pangutana, dapita ang mga estudyante sa pagpakigbahin sa ilang mga panabot ngadto sa klase.

Ikonsiderar ang pagpakigbahin og usa o duha sa mosunod nga mga pamahayag ug may kalabotan nga mga pangutana aron sa pagtabang sa mga estudyante sa paghimo og matarong nga mga aksiyon sa ilang mga kinabuhi.

Samtang kita maghunahuna sa mga babaye kansang matarong nga impluwensiya molungtad hangtod sa kahangtoran, atong ikonsiderar si Maria, ang “bililhon ug pinili nga tawo” (Alma 7:10). Giatubang sa usa ka anghel nga adunay walay sama, balaan nga pamahayag, siya mabination nga mitugyan ngadto sa kabubut-on sa Ginoo: “Sulugoon ako sa Ginoo; mahitabo unta kanako ang imong gisulti” (Lucas 1:38). Ang iyang hugot nga pagtuo, pagkamasulundon, ug pagkamapainubsanon mitakda og usa ka sumbanan alang sa tanang babaye. (Virginia U. Jensen, “Ripples,” Ensign, Nov. 2000, 93)

• Sa unsang paagi ang mabinationg pagtugyan ngadto sa kabubut-on sa Ginoo motabang kaninyo sa usa ka hagit nga inyong giatubang?

• Kinsa ang usa ka Maria sa modernong adlaw ang inyong nailhan? Unsa ang inyong makat-onan gikan sa iyang ehemplo?

Si Mateo nagsulti kanato nga … [Si Jose] usa ka matarong ug mabination nga tawo, nga diha sa damgo usa ka anghel ang misulti kaniya kon kinsa si Jesus, nga siya masulundon, ug nga siya mihatag kang Jesus sa iyang ngalan, nga nagkahulogan og manluluwas. (Tan-awa sa Mat. 1.) Nasayod kita nga iyang gidala si Maria ngadto sa Betlehem, diin natawo si Jesus. (Tan-awa sa Lucas 2:4–6.) Wala kaabot og duha ka tuig human niana, gidala ni Jose ang iyang pamilya ngadto sa Ehipto aron makalingkawas kang Herodes, human mapasidan-i diha sa usa ka damgo. Didto sa Ehipto, usa ka damgo usab ang misulti kaniya kon kanus-a mobalik, ug sa laing damgo misulti kaniya nga moadto sa Galilea. (Tan-awa sa Mat. 2:13–15, 19–22.) Upat ka damgo gikan sa Dios! Si Jose tingali usa gayod ka tawo nga makakita og panan-awon ug sensitibo sa espirituhanong butang. (Gerald N. Lund, Jesus Christ, Key to the Plan of Salvation [1991], 51)

• Sa unsang paagi ang pagtinguha ug pagdawat og pagpadayag gikan sa Langitnong Amahan motabang kaninyo sa usa ka hagit nga inyong giatubang?

• Kinsa ang usa ka Jose sa modernong adlaw ang inyong nailhan? Unsa ang inyong makat-onan gikan sa iyang ehemplo?

Dapita ang mga estudyante sa pag-ila og usa ka butang nga ilang nakat-onan gikan sa mga aksiyon o Kristohanon nga mga kinaiya ni Maria o ni Jose nga mahimong magamit sa ilang mga sirkumstansiya. Awhaga sila sa pagrekord ug paglihok sa bisan unsa nga mga impresyon nga ilang nadawat.

Balik ngadto sa “Mga Opsiyon sa Kalihokan sa Pagkat-on.”