Mga Taga-Roma 7–16

Ikonsiderar ang pagsugod sa leksiyon pinaagi sa pagpakigbahin sa mosunod nga senaryo. Kon gikinahanglan, mahimo nimong ipahiuyon ang mga detalye sa senaryo aron mas mohaom sa mga panginahanglan ug sa mga kahimtang sa imong mga estudyante.

Dapita ang mga estudyante sa paghunahuna kon mibati na ba sila sukad og sama ni Lucas. Ipasabot nga sa iyang sulat ngadto sa mga taga-Roma, si Pablo mipakigbahin og mga kamatuoran nga makatabang kanato nga makaila sa mga panalangin sa pagsunod ni Jesukristo. Awhaga ang mga estudyante samtang sila magtuon sa paghatag og pagtagad sa mga pag-aghat gikan sa Espiritu Santo nga makatabang kanila sa ilang indibidwal nga mga kahimtang.

Ikonsiderar ang pagpakita sa mosunod nga mga instruksiyon aron matabangan ang mga estudyante nga magtuon sa mga pagtulun-an ni Pablo diha sa Mga Taga-Roma 8. (Alang sa lakang 1, mahimo nimong i-assign ang katunga sa mga estudyante sa pagtuon sa mga bersikulo 1–9 ug ang laing katunga sa pagtuon sa mga bersikulo 10–18.)

1. Basaha ang Roma 8:1–18, mangita sa mga kamatuoran nga makatabang sa usa ka tawo nga naglisod nga mahimong usa ka sumusunod ni Jesukristo.

2. Isulat ang duha o tulo ka kamatuoran nga imong nakit-an nga labing makahuloganon.

3. Isulat kon nganong sa inyong hunahuna kadto nga mga kamatuoran makatabang sa pagdasig kanato sa pagsunod ni Jesukristo.

Human ang mga estudyante adunay panahon sa pagkompleto sa kalihokan sa pagtuon, hatagi sila og kahigayonan sa pagpakigbahin sa unsay ilang gisulat ngadto sa usa ka pares o sa gamay nga grupo. Dayon hisgoti ang mga kamatuoran nga nakaplagan sa mga estudyante isip usa ka klase. Mahimong ilang maila ang mga kamatuoran sama sa mosunod: Ang paghunahuna kanunay sa mga butang nga tawhanon mosangpot sa kamatayon apan ang paghunahuna kanunay sa mga butang nga espirituhanon mosangpot sa kinabuhi ug kalinaw. Kon kita mosunod sa impluwensiya sa Espiritu Santo, mamahimo kitang isigkamanununod uban ni Jesukristo sa tanan nga Iya sa Langitnong Amahan.

Aron matabangan ang mga estudyante nga mapalawom ang ilang pagsabot niini nga mga kamatuoran, ikonsiderar ang paghisgot sa pipila sa mosunod nga mga pangutana:

• Unsa ang labing nakatabang kaninyo nga mahimong usa ka tawo nga may mas espirituhanon nga panghunahuna? Sa unsang paagi ang Dios mipanalangin kaninyo niini nga mga paningkamot?

• Unsa kaha sa imong hunahuna ang buot ipasabot sa pagkahimong “manununod sa Dios” ug “isigkamanununod uban kang Kristo”? (Kon nagkinahanglan og tabang ang mga estudyante, ikonsiderar ang pagdirekta kanila ngadto sa entry nga “Mga Taga-Roma 8:17. Unsay ipasabot sa pagkahimong ‘mga manununod sa Dios, ug mga isigkamanununod uban kang Kristo’?” diha sa Mga Tabang sa Kasulatan: Bag-ong Tugon. Mahimo usab nimong ipakigbahin ang mosunod nga pamahayag ni Elder Dieter F. Uchtdorf.)

Kon kita mobati nga walay ayo, gisalikway, ug gikalimtan, atong makat-onan nga kita makalaom nga ang Dios wala makalimot kanato—gani, Siya mitanyag ngadto sa tanan Niyang mga anak og usa ka butang nga dili katuohan: ang mamahimong “manununod sa Dios, ug isig ka manununod uban ni Kristo” [Mga Taga-Roma 8:17; tan-awa usab sa Doktrina ug mga Pakigsaad 84:38].

Unsay ipasabot niini?

Nga kita mabuhi hangtod sa kahangtoran, makaangkon og kahingpitan sa kalipay, ug adunay potensyal nga “makapanunod og mga trono, mga gingharian, ug mga kagamhanan” [Doktrina ug mga Pakigsaad 132:19].

Makapatandog nga mahibaloan nga kini nga halangdon ug balaanon nga kaugmaon posible—dili tungod kon si kinsa kita apan tungod kon si kinsa ang Dios.

Kay nakahibalo na niini, ngano nga kita magbagutbot o magpabiling naglain ang buot? Ngano nga kita magpabiling ubos ra kaayo og pagtan-aw sa atong kaugalingon kon ang Hari sa mga hari nagdapit kanato nga tumanon ang atong mga potensyal ngadto sa usa ka dili katuohan nga umaabot nga adunay balaanong kalipay? (“Ang Dios taliwala Kanato,” Liahona, Mayo 2021, 8)

• Unsa ang natabang kaninyo sa gisaad nga mga panalangin nga gihulagway diha sa Mga Taga-Roma 8 nga makasabot mahitungod sa Langitnong Amahan ug ni Jesukristo?

Dapita ang mga estudyante sa pagpamalandong sa unsay ilang nakat-onan ug gibati gikan sa Espiritu Santo nga makatabang kanila sa ilang kasamtangan nga mga hagit o mga desisyon. Awhaga sila sa pagrekord sa ilang mga espirituwal nga mga impresyon. Pagpamatuod sa mga kamatuoran nga inyong gihisgotan niini nga kalihokan sa pagkat-on.

Balik ngadto sa “Mga Opsiyon sa Kalihokan sa Pagkat-on.”

Sa pagsugod niini nga kalihokan sa pagkat-on, ikonsiderar ang pagpakigbahin sa mosunod nga asoy nga gisaysay ni Elder Brian K. Taylor:

Si Jen, … sa pagkatin-edyer maoy hinungdan sa grabing aksidente sa sakyanan. Bisan grabe ang iyang pisikal nga pag-antos, sakit kaayo ang iyang gibati kay namatay man ang laing driver. “Adunay nawad-an og mama, ug kadto akong sayop,” miingon siya. Si Jen, kinsa mga adlaw lang ang milabay mibarog ug mi-recite, “Kita mga anak nga babaye sa atong Langitnong Amahan, kinsa nahigugma kanato,” karon nangutana,“Unsaon ako Niya sa paghigugma?” (“Ako Ba Anak sa Dios?,” Liahona, Mayo 2018, 12)

Hangyoa ang mga estudyante sa paghunahuna mahitungod sa unsay ilang mahimong isulti ngadto kang Jen kon siya ilang higala ug miduol kanila nga aduna niini nga pangutana.

Ipasabot nga ang sulat ni Pablo ngadto sa mga Santos sa Roma naglangkob og tambag nga makatabang kanato nga mobati sa gugma sa Langitnong Amahan alang kanato, bisan kon mobati kita nga dili takos niini. Dapita ang mga estudyante sa pagtuon sa Mga Taga-Roma 8:31–39, mangita sa mga pulong o mga hugpong sa mga pulong nga gusto nilang ipakigbahin kang Jen.

Hatagi ang mga estudyante og kahigayonan sa paghisgot kon unsa ang ilang nakat-onan ug gibati samtang sila nagtuon niini nga mga bersikulo. Ang mga estudyante mahimong moila og usa ka kamatuoran nga susama sa mosunod: Walay makapahimulag kanato gikan sa gugma sa Dios.

• Unsa nga kalainan ang mahimo sa pagbati sa gugma sa Dios alang kanimo diha sa imong kinabuhi?

• Unsa ang pipila ka paagi nga ang Langitnong Amahan ug si Jesukristo nagpakita sa Ilang gugma alang kaninyo? (Isip kabahin sa inyong panaghisgot, mahimo nimong i-refer ang mga estudyante ngadto sa mga bersikulo 32 ug 34.)

• Unsa ang inyong mahimo aron mas makaila sa gugma sa Dios alang kaninyo?

Aron matabangan ang mga estudyante nga mobati sa kamahinungdanon niini nga baroganan, ikonsiderar ang pagpakita sa bidyo nga “There Is No Limit to God’s Love | His Grace” (5:38). Dapita ang mga estudyante sa paghisgot kon sa unsang paagi ang gugma sa Dios nakaapekto sa tawo niini nga bidyo.

5:37

Mahimong makatabang ang pagpasabot nga mahimo natong masaypan pagsabot ang gugma sa Dios kon dili nato kini hunahunaon sulod sa konteksto sa ubang may kalabotan nga mga kamatuoran sa ebanghelyo (tan-awa sa “Pagpatunhay og Doktrinal nga Balanse” diha sa Mga Kahanas sa Pagtuon sa Kasulatan). Mahimo nimong ipakita o hatagan ang mga estudyante og mga kopya sa mosunod nga pamahayag ni Elder D. Todd Christofferson. Dapita sila sa pagpangita kon giunsa niya pagpatunhay og doktrinal nga balanse pinaagi sa pagtutok sa mga kamatuoran ug sa mga kasulatan nga may kalabotan sa gugma sa Dios:

Ang Biblia nagsulti kanato nga “ang Dios gugma” [1 Juan 4:8]. Siya ang hingpit nga ehemplo sa gugma, ug misalig gayod kita sa padayon ug kamalukpanon niana nga gugma. Sama sa gipahayag ni Presidente Thomas S. Monson: “Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay” [Thomas S. Monson, “Wala Kita Mag-inusara,” Liahona, Nob. 2013, 124].

Anaay daghang paagi sa paghulagway ug pagsulti bahin sa balaang gugma. Usa sa mga termino nga sagad natong mabati karon mao nga ang gugma sa Dios “walay kondisyon.” Samtang sa usa ka pagsabot tinuod kana, ang paghulagway nga walay kondisyon dili makita sa kasulatan. Kondili, ang Iyang gugma gihulagway sa kasulatan isip “dako nga katingalahan nga gugma” [Doktrina ug mga Pakigsaad 138:3], “hingpit nga gugma” [1 Juan 4:18; Moroni 8:16], “matubsanon nga gugma” [Alma 5:26], ug “gugma nga walay kataposan” [Jeremias 31:3]. Mas maayo kini nga mga termino tungod kay ang pulong nga walay kondisyon maghatod og sayop nga mga impresyon mahitungod sa balaang gugma, sama sa, mouyon ra ang Dios sa tanang butang ug dili ra kita hukman kay ang Iyang gugma walay kondisyon, o ang Dios walay pangayoon gikan kanato tungod kay ang Iyang gugma walay kondisyon, o ang tanan luwas na sa langitnong gingharian sa Dios tungod kay ang Iyang gugma walay kondisyon. Ang gugma sa Dios walay sukod ug kini mohangtod, apan kon unsay kahulogan niini sa matag usa kanato mag-agad kon unsaon nato sa pagsanong ang Iyang gugma. …

Sa kanunay ang Dios nahigugma kanato, apan dili Siya makaluwas kanato sa atong mga sala. (“Magpabilin Kamo sa Akong Gugma,” Liahona, Nob. 2016, 48)

• Unsa ang dugang nga mga panabot ang inyong naangkon mahitungod sa gugma sa Dios gikan sa pamahayag ni Elder Christofferson?

• Ngano kaha nga importante alang kanato ang pagpaningkamot alang sa doktrinal nga balanse samtang magtuon ug magtudlo kita sa ebanghelyo?

Taposa kini nga kalihokan pinaagi sa pagpamatuod sa gugma sa Langitnong Amahan ug ni Jesukristo nga anaa alang sa matag tawo. Awhaga ang mga estudyante sa pagtinguha nga mabati ang gugma sa Dios alang kanila ug sa uban.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa mosunod nga mga hulagway ug sa paghisgot og kadiyot kon sa unsang paagi gihimo ang usa ka tapestry. (Ang usa ka tapestry gihimo pinaagi sa paghablon og dungan og pangdekorasyon nga panapton ngadto sa usa ka desinyo.) Dayon basaha og dungan ang pamahayag ni Elder Robert D. Hales o tan-awa ang “Weaving Our Spiritual Tapestry” (4:18).

4:19

Ang mga disipulo nagpakabuhi aron ang mga kinaiya ni Kristo mamahimong lig-on nga bahin sa ilang pagkatawo, sama sa usa ka espirituhanon nga kalig-on. …

… Ang pagpalig-on sa … espirituhanon nga personal nga pagkadisipulo nagkinahanglan og labaw pa kay sa nag-inusarang hilo nga pangtahi. (“Pagkahimong usa ka Disipulo sa Atong Ginoong Jesukristo,” Liahona, Mayo 2017, 46)

• Unsa ang matudlo kanato sa sumbingay sa tapestry mahitungod sa proseso sa pagkahimong sama ni Kristo?

Ipasabot nga sa kataposan sa basahon sa Mga Taga-Roma, gihulagway ni Pablo ang daghang Kristohanong mga kinaiya ug mga pamatasan nga mahimong ilakip sa atong kinabuhi. Ipakita ang mosunod nga dili kompleto nga pamahayag diha sa pisara: Ako mahimong mas mahisama ni Jesukristo pinaagi sa …

Ipakita ang mosunod nga mga tudling. Dapita ang mga estudyante sa pagbasa og usa o daghan pa niini, mangita og lainlaing paagi nga ilang mahuman ang pamahayag diha sa pisara.

• Mga Taga-Roma 12:1–6

• Mga Taga-Roma 12:9–21

• Mga Taga-Roma 13:8–14

Ang mga estudyante mahimong moadto sa pisara ug mosulat og mga paagi nga ilang nakompleto ang pamahayag. Aron mapalawom ang ilang pagsabot, mahimo nimong hisgotan ang mga pangutana sama sa mosunod:

• Hain nga mga pamahayag diha sa pisara ang inyong gibati nga labing may kalabotan diha kaninyo? Ngano man?

• Giunsa pagpakita ni Jesukristo ang pipila niini nga mga hiyas atol sa Iyang mortal nga pangalagad?

• Sa unsang paagi sa inyong hunahuna nga ang paghablon niining Kristohanon nga hiyas ngadto sa inyong espirituhanong tapestry makaapekto sa inyong kinabuhi?

Mahimo nimong taposon pinaagi sa pagdapit sa mga estudyante sa paghunahuna kon unsa nga Kristohanong mga hiyas ang ilang gisugdan sa paghablon ngadto sa espirituhanong mga tapestry. Dapita sila sa pagpili og usa sa mga hiyas o pamatasan nga ilang gitun-an karon ug sa paghimo og plano kon unsaon nila kini paglakip nga mas makugihon ngadto sa ilang mga kinabuhi. Awhaga sila nga mainampoong motinguha sa tabang sa Langitnong Amahan uban sa ilang gipili nga hiyas o kinaiya.

Balik ngadto sa “Mga Opsiyon sa Kalihokan sa Pagkat-on.”