Pinadayag 1–5

Ikonsiderar ang pagsulat sa pulong nga mga simbolo diha sa pisara. Ipasabot nga ang Ginoo kanunay migamit sa simbolismo diha sa mga kasulatan aron sa pagtabang kanato nga mas makasabot kon kinsa Siya ug aron sa pagtudlo kanato mahitungod sa Iyang ebanghelyo. Mahimo nimong dapiton ang mga estudyante sa paghisgot sa mosunod nga mga pangutana uban ang usa ka pares:

• Unsa ang pipila ka simbolo nga inyong mahunahunaan nga nahisgotan diha sa mga kasulatan?

• Unsa ang matudlo niini nga mga simbolo kaninyo mahitungod ni Jesukristo ug sa Iyang ebanghelyo?

Ipasabot nga ang basahon sa Pinadayag puno sa abundang simbolismo. Tingali makatabang ang pagpasabot nga ang Pinadayag gisulat ni Apostol Juan. Niini nga basahon, si Juan mirekord sa mga kamatuoran nga gipadayag ngadto kaniya mahitungod ni Jesukristo, sa Iyang tahas sa plano sa Langitnong Amahan bahin sa kaluwasan, sa mga panghitabo nga mag-una sa Iyang Ikaduha nga Pag-anhi, ug sa Iyang Milenyal nga paghari. (Alang sa dugang background nga impormasyon, tan-awa sa “Ngadto kang kinsa gisulat ang basahon sa Pinadayag ug ngano?” sa Mga Tabang sa Kasulatan: Bag-ong Tugon.)

Niini nga kalihokan sa pagkat-on, ang mga estudyante makat-on gikan sa pipila ka simbolo nga makita sa Pinadayag 1. Aron sa pag-andam sa mga estudyante alang niini nga kalihokan, ikonsiderar ang pagpaila kanila sa tulo ka sugyot gikan sa “Pagsabot sa Simbolismo diha sa mga Kasulatan” sa Mga Kahanas sa Pagtuon sa Kasulatan.

Ipakita ang mosunod nga mga instruksiyon. Dapita ang mga estudyante sa paggamit sa mga sugyot alang sa pagsabot sa simbolismo ug sa pagtinguha sa espirituhanong giya sa ilang mga pagtuon.

1. Tun-i ang Pinadayag 1:3–6, 9–20 (lakip ang Hubad ni Joseph Smith alang sa Pinadayag 1:1–8 [Librarya sa Ebanghelyo] ug 1:20).

2. Gamita ang mga kapanguhaan nga makita sa Mga Tabang sa Kasulatan: Bag-ong Tugon, “Pinadayag 1–5,” aron sa pagtabang ninyo nga mas makasabot sa kahulogan ug simbolismo niini nga mga bersikulo.

3. Pangandam sa pagpakigbahin sa mosunod:

   • Usa ka simbolo nga inyong nakit-an

   • Unsa ang matudlo sa simbolo kaninyo mahitungod ni Jesukristo, sa inyong relasyon uban Kaniya, o ang Iyang tahas sa plano sa Dios

Hatagi og panahon ang mga estudyante sa pagpakigbahin uban sa kapares o sa gagmay nga grupo unsa ang ilang nadiskobrehan. Dayon ipangutana ang sama sa mosunod, dapita ang pipila ka estudyante nga ipakigbahin sa klase ang ilang mga panabot:

• Unsa ang pipila ka kamatuoran nga inyong nakat-onan mahitungod ni Jesukristo gikan sa mga simbolo nga inyong gitun-an? (Ang pipila sa mga ehemplo sa daghang kamatuoran nga tingali ipakigbahin sa mga estudyante naglakip sa: Pinaagi ni Jesukristo kita malimpyohan sa atong mga sala [tan-awa sa Pinadayag 1:5]. Si Jesukristo nagbantay ug nagpakabana sa Iyang matinud-anong mga sumusunod [tan-awa sa Pinadayag 1:13, 20]. Si Jesukristo nahimaya, nabanhaw nga binuhat kinsa adunay gahom batok sa kamatayon ug sa hades [tan-awa sa Pinadayag 1:17–18].)

• Sa unsang paagi nga ang paghinumdom niini nga mga kamatuoran mahitungod sa Manluluwas makaapekto kaninyo?

Awhaga ang mga estudyante sa pagpadayon sa pagtinguha sa pagsabot sa simbolismo diha sa ilang pagtuon sa basahon sa Pinadayag. Mahimo nimong i-follow-up sa umaabot nga mga leksiyon pinaagi sa pagdapit nila sa pagpakigbahin unsa ang ilang nakat-onan gikan sa mga simbolo nga ilang nakaplagan.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagsugod niining kalihokan sa pagkat-on pinaagi sa paghisgot sa mosunod nga pamahayag ni Presidente Russell M. Nelson:

Kita karon nagpuyo sa unsay segurado nga mao ang labing komplikado nga panahon sa kasaysayan sa kalibotan. Ang mga ka komplikado ug mga hagit nakapahimo sa daghang mga tawo nga mobati nga nabug-atan ug gikapoy. (“Buntoga ang Kalibotan ug Pangita og Kapahulayan,” Liahona, Nob. 2022, 95)

• Unsa ang pipila ka komplikado ug mga hagit sa kinabuhi nga nakapahimo nga magpabilin ang mga tawo nga mobati nga nabug-atan ug gikapoy? (Hunahunaa ang pagsulat sa mga tubag sa mga estudyante diha sa pisara.)

Ipasabot nga ang mga Santos nga gitumong ni Juan sa basahon sa Pinadayag nagpuyo usab sa komplikadong panahon. Nag-atubang sila og daghang mga hagit, lakip ang grabe nga pagpanggukod ug apostasiya gikan sa sulod sa Simbahan. Pinaagi ni Juan, ang Manluluwas mihatag sa mga pulong sa tambag ug pagdasig. Dapita ang mga estudyante sa paghunahuna og piho nga mga hagit nga tingali ilang gisagubang sa ilang mga kinabuhi. Awhaga sila samtang sila magtuon sa paghatag og pagtagad kon unsa ang gitudlo sa Espiritu Santo kanila mahitungod sa pagbuntog sa ilang mga hagit.

Ipakita ang mosunod nga mga tudling. Ipasabot nga ang matag tudling mao ang mensahe ngadto sa usa sa pito ka branch sa Simbahan nga gitumong ni Juan diha sa basahon sa Pinadayag.

• Pinadayag 2:1–7

• Pinadayag 2:8–11

• Pinadayag 2:12–17

• Pinadayag 2:18–20, 26–28

• Pinadayag 3:1–5

• Pinadayag 3:7–12

• Pinadayag 3:14–21

Dapita ang mga estudyante sa pagpili og usa o mas daghan pa niini nga mga tudling sa pagtuon. Mahimo nimong dasigon sila sa paggamit sa Mga Tabang sa Kasulatan: Bag-ong Tugon, “Pinadayag 1–5,” alang sa tabang sa pagsabot sa lisod nga mga pulong o hugpong sa mga pulong. Dapita sila nga mangandam sa pagpakigbahin sa mga tubag sa mosunod nga mga pangutana:

• Unsa nga mga hagit ang gihulagway niini nga mga bersikulo nga gikinahanglan nga buntogon?

• Unsay inyong makat-onan bahin sa Ginoo gikan sa Iyang mga pagtulun-an ngadto niining mga Santos?

• Unsa nga mga panalangin ang gisaad sa Ginoo niadtong nakabuntog?

Dapita ang mga estudyante sa pagpakigbahin sa ilang mga tubag uban sa usa ka pares o gagmay nga grupo. Kon mahuman na ang mga estudyante sa ilang panaghisgot, ipasabot nga ang matag hut-ong sa tambag ngadto sa mga Santos naglangkob sa saad gikan sa Ginoo niadtong nakabuntog. Kon gikinahanglan, dapita ang mga estudyante sa pagrebyo niini nga tambag sa Pinadayag 2:7, 11, 17, 26–28; 3:5, 12, 21. O mahimo nimong ipakigbahin ang mosunod nga pamahayag ni Elder Neil L. Andersen:

Ang mga panalangin nga gisaad sa Ginoo niadtong makabuntog sa kalibutan nindot kaayo. Sila “pagasul-uban og mga bisti nga maputi … ug [malista] sa basahon sa kinabuhi.” Ang Ginoo “[motug-an sa ilang] ngalan [sa] Amahan, ug sa atubangan sa iyang mga manolunda.”[Pinadayag 3:5]. Ang matag usa makaangkon og “bahin sa una nga pagkabanhaw,” [Doktrina ug mga Pakigsaad 76:64], makadawat og kinabuhing dayon, ug “dili na magagula” [Pinadayag 3:12] gikan sa presensya sa Dios. (“Pagbuntog sa kalibutan,” Liahona, Mayo 2017, 59)

• Unsaon ninyo sa pag-summarize ang mga panalangin nga gisaad sa Ginoo niadtong kinsa naningkamot sa pagbuntog sa kalibotan ug sa kauban niini nga mga hagit? (Mahimong mailhan sa mga estudyante ang usa ka kamatuoran nga sama sa mosunod: Kon kita makabuntog sa mga kadaotan sa kalibotan, nan ang Manluluwas mohatag kanato sa mga panalangin sa kahimayaan.)

• Sa unsang paagi ang paghinumdom sa gisaad nga mga panalangin sa Manluluwas makatabang ninyo sa pagbuntog sa inyong mga hagit?

Ikonsiderar ang pagbasa sa Juan 16:32–33 ug ang mosunod nga pamahayag ni Presidente Russell M. Nelson. Dapita ang mga estudyante sa paghisgot sa unsang paagi kini nga mga pagtulun-an makahatag nato og paglaom samtang kita magtinguha sa pagbuntog sa kalibotan.

Tungod kay si Jesukristo mibuntog niining napukan nga kalibotan, ug tungod kay Siya miula alang sa matag usa nato, kamo usab makabuntog niining puno sa sala, nakasentro sa kaugalingon, ug sa kasagaran makakapoy nga kalibotan. …

Ang pagbuntog sa kalibotan dili usa ka kalihokan nga mahitabo sa usa ka adlaw o duha. Kini mahitabo sa tibuok kinabuhi samtang kita balik-balik nga modawat sa doktrina ni Kristo. …

Samtang kita maningkamot sa pagsunod sa mas taas nga mga balaod ni Jesukristo, ang atong mga kasingkasing ug ang atong pagkatawo magsugod sa pagkausab. Ang Manluluwas motabang nato sa pagbuntog sa mga tintasyon niini nga kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan. (“Buntoga ang Kalibotan ug Pangita og Kapahulayan,” Liahona, Nob. 2022, 97)

Sa unsang paagi kamo mibati nga nalig-on pinaagi ni Jesukristo sa pagbuntog sa kalibotan ug sa mga hagit niini? (Isip kabahin sa inyong panaghisgot, mahimo ninyong tan-awon ang “Overcoming Challenges” [5:02]).

5:2

Dapita ang mga estudyante nga mainampoong ikonsiderar kon unsa ang gusto sa Ginoo nga ilang buntogon uban sa Iyang tabang. Awhaga sila sa pag-ila unsa ang ilang buhaton aron sa pagtinguha sa tabang sa Dios sa pagbuntog niini nga mga hagit.

Balik ngadto sa “Mga Opsiyon nga Kalihokan sa Pagkat-on.”

Ipakita ang imahe ni Jesukristo sama sa usa nga gikan sa sinugdanan sa leksiyon. Dapita ang mga estudyante sa paghanduraw nga sila nakigsulti uban sa usa ka higala kinsa wala kaayo makaila bahin sa Manluluwas. Ang higala nangutana, “Unsa ang nakahimo ni Jesukristo nga lahi gikan sa ubang mga tawo sama nimo ug nako?”

• Unsaon nimo pagtubag ang imong higala?

Ipasabot nga si Apostol Juan nakakita og panan-awon nga makatabang kanato sa pagsabot sa gahom ug kaharianon ni Jesukristo. Awhaga ang mga estudyante samtang sila nagtuon niini nga asoy nga mahimong maminaw sa mga pagbati gikan sa Espiritu Santo nga makatabang nila nga mobati og dugang nga gugma ug pagtahod alang sa Manluluwas.

Aron sa pagpaila sa mga estudyante ngadto niini nga panan-awon, ipasabot nga nakita ni Juan ang Dios nga Amahan nga naglingkod sa Iyang trono didto sa langit. Sa palibot sa trono mao ang lain-laing nahimaya nga mga binuhat ug mga mananap nga nagdayeg ug nagsimba Kaniya. (Tan-awa sa Pinadayag 4:1–11. Aron sa pagtabang sa mga estudyante nga makasabot sa simbolismo gikan niini nga mga bersikulo, mahimo nimong i-refer sila ngadto sa Mga Tabang sa Kasulatan: Bag-ong Tugon, “Pinadayag 1–5.” Mahimo usab sila nga magtuon sa Doktrina ug mga Pakigsaad 77:1–5.)

Dapita ang mga estudyante sa pagbasa sa Pinadayag 4:8–11, nga mangita kon unsay gisulti ug gibuhat niadtong nanag-alirong sa Langitnong Amahan.

• Unsa ang mipatigbabaw kaninyo mahitungod sa mga pulong ug mga lihok niadtong nag-alirong sa trono sa Dios? Ngano man?

• Unsa kaha ang girepresentahan sa mga elder nga nang-itsa sa ilang mga purong-purong sa atubangan sa trono sa Langitnong Amahan? (Ang posibleng mga tubag maglakip sa ilang pag-ila sa kahalangdon sa Langitnong Amahan; ilang pag-ila nga utang nila ang ilang kahimayaan ngadto Kaniya; ug sa ilang pagtahod, pagdayeg, ug matugyanong debosyon ngadto Kaniya.)

Dapita ang mga estudyante sa pagtuon sa Pinadayag 5:1–14, nga mangita sa importanteng tahas nga gidala ni Jesukristo niini nga panan-awon. Ipasabot nga adunay daghang simbolo niini nga mga bersikulo. Awhaga ang mga estudyante sa paggamit sa Mga Tabang sa Kasulatan: Bag-ong Tugon, “Pinadayag 1–5,” alang sa tabang sa pagsabot sa pipila niini nga mga simbolo. (Makatabang usab kanimo isip magtutudlo nga mapamilyar sa mga sulod niining MgaTabang sa Kasulatan nga seksiyon aron kamo maandam sa paghisgot sa mga panabot ug mga pangutana sa mga estudyante.)

Dapita ang mga estudyante nga mopakigbahin sa ilang mga panabot gikan sa Pinadayag 5. Kon gikinahanglan, ikonsiderar ang paggamit sa mga pangutana sama sa mosunod:

• Unsa nga mga kamatuoran ang inyong makat-onan o mabati mahitungod ni Jesukristo samtang inyong tun-an kini nga mga bersikulo? (Samtang ang mga estudyante motubag, mailhan tingali sa pipila ang usa ka kamatuoran sama sa mosunod: Gitubos kita ni Jesukristo pinaagi sa Iyang maulaong sakripisyo.)

• Ngano nga si Jesukristo lamang ang bugtong takos ug makahimo sa pagtubos kanato?

• Sa unsang paagi ang pagbati og sinsero nga gugma ug pasalamat alang sa Langitnong Amahan ug ni Jesukristo makaapekto sa mga desisyon nga inyong himoon?

Pahinumdomi ang mga estudyante sa senaryo nga gikan sa sinugdanan sa kalihokan sa pagkat-on. Dapita sila sa pagpangita sa ubang mga kasulatan nga mahimo nilang ipakigbahin uban sa ilang higala nga makatabang nila sa pagsabot sa kamahinugdanon sa gidala nga tahas ni Jesukristo sa plano sa Langitnong Amahan sa kaluwasan. Pwede silang mangita og mga tudling sa ilang kaugalingon, o mahimo silang magtuon sa pipila sa mosunod: Juan 14:6; Mosiah 3:17; 15:1; Doktrina ug mga Pakigsaad 19:16–19; 38:1–3.

Human matapos ang mga estudyante sa pagtuon, hatagi sila og oportunidad sa pagpakigbahin kon unsa ang ilang nakaplagan uban ang kapares o sa gagmay nga grupo. Dapita sila sa pagpasabot nganong ilang gibati ang kamahinungdanon sa mga tudling nga ilang gipili. Sa laing paagi, mahimo nimong hatagan ang mga estudyante og panahon sa pagsulat og tubag ngadto sa higala gikan sa senaryo. Dayon pwede nilang ipakigbahin kadto nga mga tubag sa usa ka pares o sa gagmayng grupo.

Ikonsiderar ang pagdapit og pipila ka estudyante sa pagpakigbahin sa ilang pagpamatuod ni Jesukristo diha sa klase. Mahimo nimong taposon pinaagi sa pagpakigbahin sa imong kaugalingong pagpamatuod.

Balik ngadto sa “Mga Opsiyon nga Kalihokan sa Pagkat-on.”