Santiago

Mahimo nimong sugdan pinaagi sa pagpakita sa mosunod nga mga pangutana ni Presidente Russell M. Nelson. Dayon pasulati sa mga estudyante ang mga blangko nga anaa sa ubos sa kinutlo.

Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Ipasabot nga si Santiago, ang igsoon nga lalaki ni Jesus, mitudlo sa mga Santos sa iyang panahon kon unsaon pagpangita og kaalam gikan sa Dios. Dapita ang mga estudyante sa pagtuon sa Santiago 1:5–6, nga mangita kon unsay gitudlo ni Santiago mahitungod sa paagi kon unsaon nato pag-angkon og kaalam.

• Unsa ang gitudlo niini nga mga bersikulo kaninyo mahitungod sa kaalam? (Mahimong moila ang mga estudyante og usa ka kamatuoran sama sa mosunod: Ang Langitnong Amahan madagayaong mohatag og kaalam niadtong mangayo Kaniya uban sa hugot nga pagtuo.)

• Unsa nga mga kasinatian ang nagtabang kaninyo nga mahibalo nga ang saad diha sa Santiago 1:5–6 tinuod?

Hatagi ang mga estudyante og higayon sa pagtuon sa Santiago 1:6–8, nga mangita kon unsay gitudlo ni Santiago kon unsaon nato pagduol sa Langitnong Amahan alang sa kaalam. Aron mapalawom ang pagsabot sa mga estudyante, ikonsiderar ang pagpangutana:

• Unsa kahay gipasabot nga mangayo inubanan sa hugot nga pagtuo?

• Unsa ang labing makatabang kaninyo nga malikayan ang pagduhaduha sa inyong pagtuo?

• Sa unsang paagi nga ang “maduhaduhaon” (bersikulo 8) makapugong kanimo sa kaalam? (Alang sa dugang nga panabot mahimo ninyong basahon ang 1 Mga Hari 18:21; Mateo 6:24; 1 Mga Taga-Corinto 10:21).

Aron matabangan ang mga estudyante nga mas makonsiderar ang kamahinungdanon sa mga pagtulun-an ni Santiago, ipakita ang mosunod nga mga opsiyon sa pagtuon. Hatagi og panahon ang mga estudyante sa pagkompleto sa usa o sa duha:

1. Gamita ang Librarya sa Ebanghelyo sa pagpangita sa mga pagtulun-an gikan sa mga lider sa Simbahan o mga kasulatan nga may kalabotan sa Santiago 1:5–6. Mahimo nimong gamiton ang mga termino sa pagpangita sama sa “Santiago 1:5” o “Pangutan-a ang Dios” diha sa search bar sa Librarya sa Ebanghelyo. Ikonsiderar ang pag-link sa mga kapanguhaan nga inyong makit-an sa Santiago 1:5–6. Irekord ang inyong mga hunahuna kon sa unsang paagi kini nga mga pagtulun-an makapalig-on sa inyong pagsalig nga kamo makaangkon og kaalam gikan sa Dios.

2. Tun-i ang pagpangita ni Joseph Smith sa kamatuoran sa Joseph Smith–Kasaysayan 1:10–17. Irekord kon unsay labing importante diha kaninyo mahitungod sa kasinatian ni Joseph Smith, lakip sa unsay inyong nakat-onan o gibati mahitungod sa Langitnong Amahan ug ni Jesukristo.

Pagkahuman sa mga estudyante, dapita sila sa pagpakigbahin sa pipila sa ilang mga panabot diha sa gagmay nga mga grupo o isip usa ka klase.

Ikonsiderar ang pagtapos pinaagi sa paghisgot sa nahabilin nga pamahayag ni Presidente Russell M. Nelson:

Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? Sunda ang ehemplo ni Propeta Joseph. Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.

Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga inyong mahunahunaan. Irekord ang inyong mga gibati ug sundi kini sa paglihok sa unsay giaghat nga angay ninyong buhaton. (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Dapita ang mga estudyante sa pagrebyo kon unsa ang ilang nasulat sa sinugdanan niining kalihokan sa pagkat-on. Hatagi sila og panahon sa pagpamalandong kon unsaon nila sa paggamit sa unsay ilang nakat-onan ug gibati karon aron sa pagtabang kanila sa pagpangita sa giya sa Ginoo. Awhaga sila sa pagrekord sa ilang mga hunahuna ug espirituhanong mga impresyon.

Balik ngadto sa “Mga Opsiyon nga Kalihokan sa Pagkat-on.”

Sugdi pinaagi sa pagpakita sa mosunod nga hulagway ug pangutana:

• Unsang gahom o potensiyal ang inyong nakita dinhi?

Ipakita ang sunod nga duha ka hulagway ug pangutana:

• Kon ang tapok sa kahoy nagrepresentar sa panalangin sa Dios alang kanato, unsa kaha ang girepresentar sa posporo? Unsa man ang kabahin sa kalayo?

• Sa unsang paagi kini nga analohiya makompara sa hugot nga pagtuo ug mga buhat?

Ipasabot nga si Santiago mitudlo og importante nga mga leksiyon mahitungod sa relasyon tali sa hugot nga pagtuo ug mga buhat (mga paningkamot ug mga aksiyon). Dapita ang mga estudyante sa pagtuon sa Santiago 2:14–26, nga mangita kon sa unsang paagi ang mga pagtulun-an ni Santiago magamit sa analohiya sa usa ka pundok sa kahoy, posporo, ug nagdilaab nga kalayo. (Aron tabangan ang mga estudyante nga masabtan kini nga mga bersikulo, ikonsiderar ang pagpunting kanila ngadto sa “Santiago 2:14–26. Unsa ang gitudlo ni Santiago mahitungod sa hugot nga pagtuo ug mga buhat” diha sa Mga Tabang sa Kasulatan: Bag-ong Tugon.)

Sa pagtabang sa pagpalawom sa pagsabot sa mga estudyante niini nga mga bersikulo, hunahunaa ang pagpangutana sama sa mosunod:

• Unsa sa inyong hunahuna ang gipasabot sa hugpong sa mga pulong nga “ang pagtuo patay kon kini walay binuhatan” (bersikulo 26)?

• Sa unsang paagi ang maayong mga buhat (mga lihok ug mga paningkamot) may kalabotan sa atong hugot nga pagtuo kang Jesukristo? (Ang mga estudyante mahimong moila og usa ka kamatuoran sama sa mosunod: Ang tinuod nga hugot nga pagtuo kang Jesukristo gipakita pinaagi sa atong matarong nga mga buhat.)

• Sa unsang paagi nga ang inyong hugot nga pagtuo diha ni Jesukristo nakaimpluwensya sa inyong mga lihok ug mga paningkamot?

• Sa unsang paagi ang inyong mga paningkamot ug mga lihok nakaimpluwensiya sa inyong hugot nga pagtuo diha ni Jesukristo?

Mahimo ninyong ipakita ug basahon ang mosunod nga pamahayag ni Elder Dale G. Renlund, o mahimo ninyong tan-awon ang sinugdanan sa “Abound with Blessings” (time code 1:15 hangtod 3:27) nga naghisgot sa analohiya nga gigamit sa sayo pa diha sa klase.

15:10

Kadaghanan sa mga panalangin nga tinguhang ihatag sa Dios kanato nagkinahanglan og buhat sa atong bahin—lihok nga magbase sa atong [hugot nga] pagtuo kang Jesukristo. Ang [hugot nga] pagtuo diha sa Manluluwas usa ka baroganan sa paglihok ug gahom. Una molihok kita inubanan sa [hugot nga] pagtuo; dayon moabot ang gahom—sumala sa kabubut-on sa Dios ug panahon. Mahinungdanon kini nga paagi. Ang gikinahanglan nga lihok, bisan pa, kanunayng gamay kon itandi sa mga panalangin nga unya atong madawat. (“Magamadagayaon [Buhong] sa mga Panalangin,” Liahona, Mayo 2019, 70)

• Sa unsang paagi nga napanalanginan ang inyong kinabuhi pinaagi sa paglihok inubanan sa hugot nga pagtuo?

Aron tabangan ang mga estudyante sa paggamit sa unsay ilang nakat-onan, ikonsiderar ang pagbahin sa klase ngadto sa gagmayng mga grupo. Ipakita ang mosunod nga mga sitwasyon, ug dapita ang mga grupo sa pagpili og usa o dugang pa nga hisgotan. Sa matag sitwasyon nga ilang pilion, dapita sila sa paghisgot kon unsa nga mga aksiyon ang mahimo sa usa ka tawo kon sila (1) motutok sa mga buhat ug magpasagad sa pagtuo kang Jesukristo, (2) magtutok sa pagtuo ug magpasagad sa mga buhat, o (3) mopakita sa ilang hugot nga pagtuo kang Jesukristo pinaagi sa ilang matarong nga mga buhat.

• Pagbuntog sa pagkaadik

• Pagdawat sa giya sa Ginoo mahitungod sa usa ka importante nga desisyon sa kinabuhi

• Pag-angkon og pagpamatuod

• Pagserbisyo og misyon

• Pagsagubang sa mga pakigbisog sa kahimsog sa pangisip

• Dapita ang mga estudyante sa pagpakigbahin og mga panabot nga ilang naangkon gikan sa ilang mga panaghisgotan sa grupo.

Sa pagtapos, dapita ang mga estudyante sa paghunahuna og mga paagi nga mas makapakita sila sa ilang hugot nga pagtuo diha ni Jesukristo pinaagi sa ilang mga buhat. Hatagi sila og panahon sa pagrekord sa mga pag-aghat nga ilang nadawat gikan sa Espiritu Santo ug sa pagtakda og tumong. Awhaga sila sa paglihok sa ilang mga plano.

Balik ngadto sa “Mga Opsiyon nga Kalihokan sa Pagkat-on.”

Ipakigbahin ang mosunod nga pamahayag ni Elder Ronald A. Rasband:

Ang mga pulong mahinungdanon kaayo. Sublion nako sa pagsulti kana. Ang mga pulong mahinungdanon! Mao kini ang pundasyon unsaon nga makonektar kita; nagrepresentar kini sa atong mga gituohan, mga moral, ug mga panglantaw. Usahay kita ang mosulti, ug sa ubang higayon kita ang maminaw. Ang mga pulong mopahiluna sa kinaiya. Mopagawas kini sa atong mga hunahuna, mga pagbati, ug mga kasinatian alang sa maayo o sa dili maayo. (“Ang mga Pulong Mahinungdanon,” Liahona, Mayo 2024, 70)

Dapita ang mga estudyante sa paghunahuna mahitungod sa mga pulong nga ilang gigamit karon nga adlaw.

• Unsay epekto sa inyong mga pulong ngadto sa uban? Unsa kaha sa imong kaugalingon? (Mahimo nimong dapiton ang pipila ka estudyante sa pagpakigbahin og mga kasinatian nga dili kaayo personal.)

Ipasabot nga si Santiago migamit og simbolikong paghulagway sa pagpasidaan sa mga Santos mahitungod sa ilang mga pulong. Dapita ang mga estudyante sa pagtuon sa Santiago 1:26; 3:2–12, mangita sa mga hulagway nga gigamit ni Santiago. Dapita sila sa pagbasa sa “Santiago 3:1–12. Unsa ang gitudlo ni Santiago mahitungod sa baba ug dila?” diha sa Mga Tabang sa Kasulatan: Bag-ong Tugon aron mas masabtan kini nga paghulagway.

Mahimo nimong ipakita ug dapiton ang mga estudyante sa paghisgot sa mosunod nga mga pangutana uban sa usa ka pares o diha sa gagmay nga grupo:

• Hain sa mga simbolo nga gigamit ni Santiago sa pagtudlo mahitungod sa atong mga pulong ang may kalabotan kaayo para ninyo? Ngano man?

• Unsa ang inyong nakat-onan gikan niini nga mga simbolo nga makaapekto sa paagi sa inyong pagpakigsulti sa uban?

Dapita ang pipila ka estudyante sa pagpakigbahin sa klase sa pipila ka kamatuoran nga ilang nadiskobrehan gikan sa mga pagtulun-an ni Santiago. (Gamit ang ilang kaugalingong mga pulong, mahimo silang makaila sa mga kamatuoran sama sa mosunod: Samtang kita makakat-on sa pagpugong sa atong sinultihan, kita makakat-on sa pagpugong sa uban natong mga aksiyon [tan-awa sa Santiago 3:2]. Ang mga pulong nga atong gigamit mahimong adunay dako nga epekto, sa maayo o sa daotan [tan-awa sa Santiago 3:3–8]. Ang mga sumusunod sa Diyos naningkamot sa paggamit sa ilang mga pulong alang sa matarong nga katuyoan, dili sa pagpakaylap ug daotan [tan-awa sa Santiago 3:8–12].)

Ikonsiderar ang paghisgot og mga pangutana sama sa mosunod aron matabangan ang mga estudyante nga mas makasabot niini nga mga kamatuoran:

• Ngano kaha nga ang inyong gisulti makaimpluwensya sa inyong paglihok?

• Sa unsang paagi ang atong mga pulong mahimong sama sa kalayo (tan-awa sa Santiago 3:6) ug maoy hinungdan sa kasamok, kasakit, ug pag-antos?

• Unsa ang atong makat-onan gikan sa Manluluwas kon unsaon sa pagpakigsulti sa uban? (Kon makatabang, mahimo nimong dapiton ang mga estudyante sa pagpangita og mga tudling sa kasulatan nga nagsulti kon sa unsang paagi ang Manluluwas mipanalangin sa usa ka tawo pinaagi sa Iyang mga pulong. Ang mosunod mahimong gamiton isip mga ehemplo: Mateo 16:21–27; Lucas 23:34; Juan 8:1–11; Santiago 11:5, 23–26, 40–43; Juan 14:27; 3 Nephi 17:15–17; Doktrina ug mga Pakigsaad 121, 7-9.)

Ikonsiderar ang pagpakigbahin sa mosunod nga pamahayag ni Presidente Russell M. Nelson. Dapita ang mga estudyante sa paghatag og pagtagad sa mga paagi nga kita mahimong mas sama kang Kristo diha sa atong komunikasyon sa uban.

Kon giunsa nato pagtagad ang usag usa importante kaayo! Kon unsaon nato pagpakigsulti sa uban ug paghisgot mahitungod kanila diha sa panimalay, sa simbahan, sa trabaho, ug sa online importante kaayo. Karon, ako mohangyo kanato sa pagtagad sa uban sa mas labaw, mas balaan nga paagi. … “Kon adunay mga butang nga mahiyason, matahom, o maayo og dungog o dalaygon,” nga atong masulti mahitungod sa laing tawo—sa dayag o sa tago—kana mao unta ang atong sumbanan sa komunikasyon. (“Gikinahanglan ang mga Tigpasiugda og Kalinaw,” Liahona, Mayo 2023, 99–100)

Aron matabangan ang mga estudyante sa paghunahuna mahitungod sa mas labaw, mas balaan nga mga paagi sa pagsulti ug mahitungod sa uban, ipakita ang mosunod nga mga pulong isip mga ulohan diha sa pisara:

• Pagbayaw

• Pag-ayo

• Nasakitan

• Nanghinaway

Dapita ang mga estudyante sa pagkonsiderar sa pipila sa ilang kaugalingong pulong nga ilang gigamit kaniadto nga mahimong may kalabotan sa matag ulohan. (Mahimo nimong dapiton sila sa pag-scroll sa pipila sa ilang bag-ong digital nga komunikasyon aron mangita og mga ehemplo.) Human sa igong panahon, hangyoa sila sa mainampoong pagpamalandong ug pagrekord og mga paagi nga sila maningkamot nga mahimong mas sama sa Manluluwas kon unsaon nila sa pagsulti ug mahitungod sa uban. Mahimo nimong hangyoon ang pipila ka andam nga mga estudyante sa pagpakigbahin sa mga plano nga dili kaayo personal diha sa klase.

Pagpamatuod sa mga kamatuoran nga inyong nahisgotan. Awhaga ang mga estudyante nga mahimong mas sama sa Manluluwas sa ilang mga komunikasyon ngadto sa uban.

Balik ngadto sa “Mga Opsiyon nga Kalihokan sa Pagkat-on.”