Mateo 8; Marcos 2–4; Lucas 7

Ikonsiderar ang pagpakita sa mosunod nga pamahayag: “Tan-awa, Ako mao ang Dios; ug Ako mao ang usa ka Dios sa mga milagro” (2 Nephi 27:23). Dayon ipakita ang mosunod nga mga pamahayag, ug dapita ang mga estudyante sa pagsukod kon unsa katinuod ang matag pamahayag para nila gamit ang sukdanan nga 1 hangtod 5 (1 =supak gayod; 5 = uyon gayod).

• Ako makaila sa mga milagro nga gihimo sa Manluluwas sa akong kinabuhi o sa uban nga mga kinabuhi.

• Ako mosalig nga si Jesukristo makahimo ug makahimo og mga milagro sa akong kinabuhi.

Ipasabot nga ang Mateo 8 naglangkob og pipila ka mga asoy sa mga milagro sa Manluluwas. Iorganisar ang mga estudyante nga magtinagop-at. Dapita ang matag sakop sa grupo sa pagtuon sa mosunod nga mga milagro ug mangandam sa paghisgot sa mga pangutana nga mosunod.

(Mahimo nimong awhagon ang mga estudyante sa paggamit sa kahanas “Pagsabot sa mga Kasulatan sa Konteksto” sa Mga Kahanas sa Pagtuon sa Kasulatan pinaagi sa pagrebyo sa mga bersikulo ug human sa ilang pagpili sa tudling. Ang mga estudyante makarebyo usab sa katugbang nga mga seksiyon sa Mga Tabang sa Kasulatan: Bag-ong Tugon.)

• Mateo 8:1–4

• Mateo 8:5–13

• Mateo 8:14–15

• Mateo 8:23–27

• Sa imong hunahuna sa unsa kaha nga paagi nga ang mga indibidwal niining nga asoy nga inyong gibasa naapiktohan sa milagro sa Manluluwas?

• Unsa ang atong makat-onan mahitungod sa Manluluwas gikan niining milagro?

• Sa inyong hunahuna unsa kaha ang mensahe alang kanato niining asoy?

Human sa pagtugot og higayon alang sa personal nga pagtuon, dapita ang mga grupo sa paggamit sa nag-unang mga pangutana aron mapahiluna ang usa ka panaghisgotan mahitungod sa unsay ilang nakat-onan gikan niining mga asoy.

Kon makatabang, mahimo nimong dapiton ang pipila ka estudyante sa pagpakigbahin sa klase kon unsa ang labing nakapainteresado o nakapadani kanila gikan sa ilang panaghisgotan sa grupo. Samtang mopakigbahin, mahimo nimong isulat ang ilang mga panabot diha sa pisara. Ang ilang mga panabot mahimong maglakip sa mga kamatuoran sama sa mosunod: Ang Manluluwas makahimo kanako nga malimpyo. Ang hugot nga pagtuo diha ni Jesukristo nagdapit sa Iyang milagroso nga gahom nganha sa atong mga kinabuhi. Makakaplag kita og kalinaw pinaagi ni Jesukristo atol sa mga unos sa kinabuhi.

Samtang mopakigbahin ang mga estudyante sa ilang mga panabot, pangita og mga oportunidad sa pagdapit kanila sa pagpakigbahin sa ilang mga kasinatian ug mga pagpamatuod sa impluwensiya ug milagroso nga gahom sa Maluluwas. Ikonsiderar kon ang mosunod nga mga pangutana makatabang ba nga mapalawman ang panaghisgotan:

• Sa unsang paagi ninyo nasinati ang gahom ug impluwensiya sa Manluluwas sa inyong kinabuhi?

• Unsa ang gitudlo niini nga mga kasinatian diha kaninyo kabahin sa Manluluwas? Sa unsang paagi nga kini nakaimpluwensiya sa inyong hugot nga pagtuo diha Kaniya?

• Kanus-a man kamo nakakaplag og kalinaw pinaagi ni Jesukristo atol sa mga unos sa inyong kinabuhi?

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpaambit sa mosunod nga mga sitwasyon:

Dapita ang pipila ka estudyante sa pagpakigbahin kon unsaon kaha nila pagtubag ang pangutana ni Emi. Dayon ipasabot nga diha sa Marcos 2:23–28; 3:1–6, si Jesus mihatag og giya alang sa unsa ang tukma nga buhaton sa adlaw nga Igpapahulay. Tabangi ang mga estudyante nga makasabot kon nganong ang aksiyon sa Manluluwas ug ang mga aksiyon sa Iyang mga disipulo sa Igpapahulay nakapaukyab og dakong kontrobersiya. Usa ka paagi nga imo kining mabuhat mao ang pagpakigbahin sa “Marcos 2:23–28. Nganong ang mga eskriba ug mga Pariseo misupak ngadto sa mga gibuhat sa mga disipulo diha sa Igpapahulay?” diha sa Mga Tabang sa Kasulatan: Bag-ong Tugon.

Dapita ang mga estudyante sa pagbasa sa Marcos 2:23–28; Hubad ni Joseph Smith, Marcos 2:26–27 (sa Marcos 2:28, footnote a); ug Marcos 3:1–6. Dapita sila sa pagpakigbahin kon unsa ang ilang nakat-onan gikan sa ehemplo ug pagtulun-an sa Manluluwas mahitungod sa adlaw nga Igpapahulay.

Samtang mopakigbahin ang mga estudyante kon unsa ang ilang nadiskobrehan, tabangi sila sa pag-ila og usa ka kamatuoran sama sa mosunod: Ang Igpapahulay mao ang usa ka adlaw sa paghimaya sa Dios ug sa pagbuhat og maayo.

• Sa unsang paagi ang pagsabot niining kamatuoran makatabang ni Emi nga modesisyon kon unsa ang angay o dili angay nga buhaton sa adlaw nga Igpapahulay?

• Unsa ang pipila ka paagi nga kamo makasunod sa ehemplo sa Manluluwas sa pagbuhat og maayo sa Igpapahulay?

Aron matabangan ang mga estudyante sa pagdesisyon kon unsaon sa paggamit ang ilang oras sa adlaw nga Igpapahulay, ikonsiderar ang pagpakigbahin sa mosunod nga pamahayag ni Presidente Russell M. Nelson:

Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan [tan-awa sa Exodo 31:13; Ezequiel 20:12, 20]. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, “Unsa man nga timailhan ang gusto nakong ihatag ngadto sa Dios?” Kana nga pangutana nakapaklaro kaayo sa akong mga pagpili sa adlaw nga Igpapahulay. …

… Unsa nga timailhan ang inyong ihatag sa Ginoo sa pagpakita sa inyong gugma alang Kaniya? (“Ang Igpapahulay usa ka Kahimut-an,” Liahona, Mayo 2015, 130)

Mahimo na dayon nimong hangyoon ang mga estudyante sa paghunahuna kabahin sa usa ka adlaw nga Igpapahulay sa dihang sila mihimaya sa Dios (mitahod Kaniya) o mibuhat og maayo ngadto sa uban. Dapita sila sa pagpakigbahin sa ilang mga kasinatian.

Dapita ang mga estudyante sa pagsusi sa ilang kaugalingon nga pagtuman sa Igpapahulay ug maghunahuna og mga paagi nga sila mas makahimaya sa Dios ug mobuhat og maayo niana nga adlaw. Mahimo nimo silang dapiton sa pagrekord sa ilang mga ideya diha sa usa ka journal.

Balik ngadto sa “Mga Opsiyon sa Kalihokan sa Pagkat-on.”

Aron masugdan ang panaghisgotan, mahimo nimong ipakigbahin ang mosunod nga pamahayag ni Elder Joseph B. Wirthlin:

Ang tinuod nga disipulo ni Jesukristo adunay kahingawa alang sa usa. Si Jesukristo mao ang atong talagsaong ehemplo. Siya napalibotan sa daghang mga tawo ug namulong sa liboan, apan bisan pa niana Siya adunay kahingawa alang sa usa. (“Kahingawa alang sa Usa,” Liahona, Mayo 2008, 18)

Dapita ang mga estudyante sa pagbasa sa Lucas 7:11–16 o motan-aw sa bidyo nga “Widow of Nain” (2:26) ug maghunahuna kon unsa kaha ang mahisama niining biyuda. (Ikonsiderar ang pagpakigbahin sa “Lucas 7:11. Unsa nga mga paningkamot ang nabuhat sa Manluluwas aron makaabot ngadto sa balangay sa Nain?” ug “Lucas 7:12. Unsa nga mga hagit nga tingali gisagubang sa biyuda sa Nain sa dihang ang iyang bugtong nga anak nga lalaki namatay?” diha sa Mga Tabang sa Kasulatan: Bag-ong Tugon alang sa dugang nga mga panabot.) Mahimo dayon nimong ipangutana ang mosunod:

2:26

• Unsa kaha ang imong gibati kon ikaw pa ang biyuda sa Nain? Unsa ang gitudlo niini nga kasinatian ngari kanato kabahin sa Manluluwas?

• Kanus-a nimo nabati ang kamaloloy-on sa Manluluwas alang kanimo?

Isip kabahin sa inyong panaghisgotan, mahimo nimong ipakigbahin ang mosunod nga pamahayag ni Elder Ulisses Soares:

Si Jesus nakamatikod nga dili lamang sa grabing pag-antos sa makalolooy nga inahan apan sa lisod nga mga kahimtang sa iyang kinabuhi, ug Siya natandog uban sa tinud-anay nga kalooy alang kaniya.[tan-awa sa Lucas 7:11–15].

Sama lang sa … biyuda sa Nain, daghang mga tawo diha sa atong sirkulo sa impluwensiya nga nagtinuha og kahupay, pagtagad, nahisakop, ug bisan unsa nga tabang nga atong matanyag kanila. Kitang tanan mahimong mga instrumento sa mga kamot sa Ginoo ug mopakita og kamaloloy-on ngadto niadtong nagkinahanglan og tabang, sama sa gibuhat ni Jesus. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 14)

Ikonsiderar ang pagpakita sa mosunod nga baroganan: Kita makasunod sa ehemplo ni Jesukristo pinaagi sa pagpakita og kalooy alang sa uban.

• Unsa ang pipila ka panglimbasog nga imong giatubang sa pagpaugmad og Kristohanon nga kalooy? Unsaon nimo sa pagbuntog niining mga panglimbasog?

• Sa unsang paagi nga imong nabati ang kalooy gikan sa uban? Unsa ang imong nakat-onan gikan sa imong mga kasinatian kabahin sa Kristohanon nga kalooy?

Ipakita ang mosunod nga mga kahimtang, ug dapita ang mga estudyante sa paghisgot diha sa ginagmay nga grupo kon unsaon kaha nila sa pagsunod sa ehemplo sa Manluluwas niining mga sitwasyon:

1. Nagtrabaho ka uban sa usa ka tawo kansang inahan nadayagnos og sakit nga makamatay.

2. Nakamatngon ka nga ang usa ka higala nga sa makausa ganahan moadto sa simbahan mihunong na sa pag-adto.

3. Usa ka miyembro sa ward mitug-an diha nimo nga wala niya nabati nga aduna pay luna ang simbahan alang kaniya tungod kay siya adunay mga pangutana ug mga pagduha-duha kabahin sa lingtunganay sa mga pagtuo.

4. Nanglimbasog ka kon unsaon sa pagpakita og kalooy ug paglakip alang niadtong anaa sa kumonidad sa LGBTQ nga dili makompromiso ang imong gituohan kabahin sa mga pagtulun-an sa Dios mahitungod sa kaminyoon ug pamilya.

Mahimo nimong hatagan og panahon ang mga estudyante aron sa minampoon nga paagi maghunahuna kon sa unsang paagi sila mamahimong mas maloloy-on sama sa Manluluwas. Awhaga sila sa pagrekord sa ilang mga hunahuna ug mga impresyon.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa mosunod nga litrato ug pagdapit og usa ka estudyante aron i-summarize og kadali ang asoy sa Lucas 7:36–50.

Washing Jesus’s Feet [Paghugas sa mga Tiil ni Jesus], ni Brian Call

Dapita ang mga estudyante sa pagporma og ginagmay nga mga grupo ug gamita ang mosunod nga handout sa paggiya sa ilang panaghisgotan Lucas 7:36–50. Hangyoa ang mga estudyante sa pagrekord sa mga kinaiya ni Simon ug sa babaye ngadto sa Manluluwas, ang paagi nga ang matag usa nila mitratar Kaniya, ug ang mga kamatuoran nga Iyang gitudlo sa matag usa kanila. Dapita ang mga estudyante sa pagrekord usab sa mga paagi nga atong ipahisama kining asoy sa atong mga kinabuhi. Human makompleto sa mga estudyante ang handout, dapita sila sa pagpakigbahin sa klase kon unsa ang ilang nakat-onan.

Samtang ang mga estudyante mopakigbahin og mga paagi sa pagpahisama niining asoy, ikonsiderar nga isulat diha pisara ang mga kamatuoran nga ilang nailhan. Ang mga estudyante mahimong moila sa mga kamatuoran sama sa mosunod: Ang atong gugma sa Manluluwas makapadasig kanato sa paghinulsol sa atong mga sala. Ang atong gugma ug pagdayeg alang sa Manluluwas modako kon kita makasinati sa balaan nga kapasayloan. Ang garbo mogapos kanato sa atong panginahanglan sa paghinulsol ug sa tabang sa Manluluwas.

Ikonsiderar ang pagpakita sa kauban nga hulagway ug hisgoti ang relasyon tali sa gugma alang ni Jesukristo ug paghinulsol ug balaan nga kapasayloan.

Sa pagtapos, mahimo nimong ipakita ang mosunod nga pamahayag ni Presidente Dieter F. Uchrdorf, kanhi sakop sa Unang Kapangulohan. Dapita ang mga estudyante sa pagpamalandong sa iyang mga pangutana.

Hain niining duha ka tawo kita labing nahisama?

Nahisama ba kita ni Simon? Masaligon ug komportable ba kita sa atong maayo nga mga buhat, nagsalig sa atong pagkamatarong? Kita ba kaha may gamay nga pagkawalay pailob niadtong wala mosunod sa atong mga sumbanan? Mekanikal ba ang atong lihok, naglihok nga wala maghunahuna, nagtambong sa atong mga miting, nanghoy-ab sa klase sa Doktrina sa Ebanghelyo, ug tingali nagtan-aw sa atong mga cell phone panahon sa tulumanon sa sakramento?

O kita parehas ba niini nga babaye, kinsa naghunahuna nga siya hingpit ug walay paglaom nga nawala tungod sa sala?

Kita ba dako og paghigugma?

Kita ba nakasabot sa atong pagka-utangan ngadto sa atong Langitnong Amahan ug nangamuyo sa tibuok natong mga kalag alang sa grasya sa Dios?

Kon kita moluhod sa pag-ampo, kini mao ba ang paghinumdom sa labing nindot sa atong kaugalingong pagkamatarong, o pagkumpisal ba kini sa atong mga sayop, pagpangamuyo ba kini para sa kalooy sa Dios, ug paghilak ba sa pagpasalamat alang sa nindot nga plano sa katubsanan? (“Ang Gasa sa Grasya,” Liahona, Mayo 2015, 108)

Balik ngadto sa “Mga Opsiyon sa Kalihokan sa Pagkat-on.”