Mateo 11–12; Lucas 11

Mahimo nimong ipakita ang litrato ni Juan Bautista gikan sa Mga Tabang sa Kasulatan: Bag-ong Tugon ug ipasabot nga samtang gibilanggo siya ni Herod, ang iyang mga sumusunod padayong nagtamod kaniya isip usa ka propeta. Gipadala ni Juan ang iyang duha ka sumusunod sa pagpangutana kang Jesus og pipila ka pangutana.

Basaha og dungan ang Mateo 11:2–6, nga mangita kon giunsa ni Jesus sa pagtubag ang mga disipulo ni Juan Bautista.

• Si Juan may pagpamatuod nang daan kon si kinsa si Jesus (tan-awa sa Mateo 3:13–17; Doktrina ug mga Pakigsaad 93:11, 15). Maong ngano kaha nga gipadala man ni Juan ang iyang mga disipulo sa pagpangutana kon si Jesus ba ang gisaad nga Mesiyas?

• Unsay gitudlo ngari kanato sa mga gibuhat ni Juan mahitungod sa tahas sa mga propeta? (Tabangi ang mga estudyante sa pag-ila sa kamatuoran nga ang mga propeta nagpunting kanato ngadto sa Manluluwas.)

• Unsay inyong nakat-onan mahitungod sa Manluluwas gikan sa Iyang mga propeta? Giunsa nila sa pagpunting kaninyo ngadto Kaniya?

Pasabta ang mga estudyante nga human nanglakaw ang mga disipulo ni Juan, gihatagan ni Jesus ug matahom nga pasidungog si Juan. Dapita ang mga estudyante sa pagbasa sa Mateo 11:7–15 aron sa pagkat-on kon unsay gitudlo ni Jesus mahitungod ni Juan.

• Ngano kaha nga lahi man si Juan kay sa ubang mga propeta? (tan-awa sa “Mateo 11:7–15. Unsay nakahimo ni Juan Bautista nga usa ka talagsaong propeta?” sa Mga Tabang sa Kasulatan: Bag-ong Tugon).

Kon gikinahanglan, hisgoti nga si Juan mao ang gitagna nga mensahero nga moandam sa dalan alang sa katawhan sa pagdawat kang Jesukristo (tan-awa sa bersikulo 10). Mahimo kang mopakita og usa ka kamatuoran sama sa mosunod: Ang mga propeta moandam kanato sa pagdawat kang Jesukristo.)

Ikonsiderar ang pagpakigbahin sa mosunod nga mga pamahayag ni Elder Neil L. Andersen ug ni Sister Carol F. McConkie:

Akong nabantayan nga samtang mainampuon kong nagtuon sa mga pulong sa propeta sa Dios ug sa mainampingon, uban sa pagpailub, sa espiritwal nga paagi mipahiangay sa akong kabubut-on ngadto sa iyang dinasig nga mga pagtulun-an, ang akong pagtuo diha ni Ginoong Jesukristo kanunay nga milambo. (“Ang Propeta sa Dios,” Liahona, Mayo 2018, 27)

[Ang mga propeta] mohimo sa tanang butang sa ngalan ni Jesukristo. Sa ilang mga pulong atong madungog ang tingog sa Ginoo ug atong mabatyagan ang gugma sa Manluluwas. (“Pagpuyo sumala sa mga Pulong sa mga Propeta,” Liahona, Nob. 2014, 78)

Mahimo nimong praktison ang usa ka kahanas nga “Paggamit sa mga Pagtulun-an sa mga Lider sa Simbahan sa Pagsabot sa mga Kasulatan” nga anaa sa Mga Kahanas sa Pagtuon sa Kasulatan pinaagi sa pagdapit sa mga estudyante sa pagpangita og ehemplo gikan sa bag-ohay lang nga pakigpulong sa kinatibuk-ang komperensiya sa usa ka propeta nga nagpunting kanato ngadto ni Jesukristo o nag-andam kanato sa pagdawat kang Jesukristo. Dayon dapita ang mga estudyante sa pagpakigbahin sa mga ehemplo nga ilang nakit-an diha sa ginagmay nga grupo.

Mahimo usab nga hatagan nimo ang mga estudyante og oras sa pagpakigbahin sa propetikanhong pagtulun-an nga ilang napalgan ngadto sa uban pinaagi sa pagpadala og mensahe pinaagi sa text, social media, email, o sa mga minugbong sinulat. Mahimo silang mopakigbahin kon sa unsang paagi ang propetikanhong pagtulun-an nakatabang nga molambo ang ilang pagtuo ang Jesukristo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagdapit sa mga estudyante sa paghatag og kahulogan sa konsepto sa pagpahulay. Mahimo usab nilang tan-awon ang entri [entry] nga “Kapahulayan” nga anaa sa Giya ngadto sa mga Kasulatan, nga makita diha sa Librarya sa Ebanghelyo.

Basaha og dungan ang Mateo 11:28–30. Dayon hatagi ang mga estudyante og higayon sa pagbalik og basa niini nga mga bersikulo, mangita sa mga pagdapit sa Manluluwas nga mosangko sa pahulay.

Tabangi ang mga estudyante sa pag-ila sa kamatuoran sama sa mosunod: Kon moduol kita kang Jesukristo, isangon ang Iyang yugo ngari kanato, ug magkat-on gikan Kaniya, Siya mohatag kanato og kapahulayan.

Aron mapalawman ang panabot sa mga estudyante niini nga kamatuoran, mahimo nimong dapiton sila sa pagpraktis niini nga kahanas nga “Paggamit sa mga Pagtulun-an sa mga Lider sa Simbahan sa Pagsabot sa mga Kasulatan” nga anaa sa Mga Kahanas sa Pagtuon sa Kasulatan. Ang mga estudyante mahimo rang mogamit sa mga kapanguhaan sama sa Librarya sa Ebanghelyo o Scripture Citation Index nga anaa sa scriptures.byu.edu sa pagsiksik sa mga pagtulun-an gikan sa mga propeta ug sa ubang mga lider sa Simbahan nga may kalabotan sa Mateo 11:28–30. O ang mga estudyante mahimong mogamit niini nga mga kapanguhaan sa pagsiksik og mga termino ug mga hugpong sa pulong sama sa “dali sunod kanako,” “yugo,” “pagkat-on gikan kanako,” “kaaghop,” o “kapahulayan.”

Human ang mga estudyante adunay igong panahon sa pagsiksik sa mga pagtulun-an ug sa mga hugpong sa mga pulong, dapita sila sa pagpakigbahin ngadto sa kapares, sa ginagmayng grupo, o sa klase kon unsay ilang napalgan. Dapita sila sa pagpakigbahin kon sa unsang paagi kini nga mga pagtulun-an nagtabang sa pagpalawom sa ilang panabot sa Mateo 11:28–30. Ang mga estudyante tingali maghisgot og mga pangutana sama sa:

• Unsaon nato sa pagduol ngadto sa Manluluwas?

• Unsay buot ipasabot sa isangon ang Iyang yugo ngari kanato? Sa unsang paagi ang yugo nagsimbolo sa atong gipakigsaad nga relasyon ngadto ni Jesukristo? (Kon gikinahanglan, mahimo nimong dapiton ang mga estudyante sa pagtan-aw sa hulagway sa usa ka yugo ug sa pagbasa sa paghulagway nga anaa sa “Mateo 11:28–30. Unsay girepresentahan sa yugo?” diha sa mga Tabang sa Kasulatan: Bag-ong Tugon.)

• Unsay ipasabot sa pagkat-on gikan sa Manluluwas? Sa unsang paagi nga kini atong mahimo sa mas maayong paagi? Ngano kaha nga piho mang gilitok sa Manluluwas nga Siya “maaghop ug mapaubsanon sa kasingkasing? (bersikulo 29).

Mahimo nimong hatagan ang mga estudyante og pipila ka gutlo sa pagpakigbahin sa ilang mga pagpamatuod sa kamatuoran nga anaa sa Mateo 11:28–30. O ang mga estudyante mahimong mopakigbahin kon giunsa nila sa pagsinati ang kapahulayan sa Manluluwas sa kaugalingon nilang kinabuhi.

Ang mga estudyante mahimo usab nga morekord sa bisan unsang mga impresyon nga ilang naangkon mahitungod kon unsaon sa pagkadawat og dugang nga kapahulayan nga ikahatag ni Jesukristo.

Balik ngadto sa “Mga Opsiyon sa Kalihokan sa Pagkat-on.”

Pahinumdomi ang mga estudyante nga dihang giayo ni Jesus ang usa nga gisudlan og yawa, ang pipila ka mga Pariseo misulay sa pagdaot sa iyang reputasyon. Giakusahan nila Siya nga naghimo og milagro gamit ang gahom sa yawa (tan-awa sa Mateo 12:22–24).

Basaha og dungan ang Mateo 12:25–30 o Lucas 11:17–23, mangita kon giunsa sa Manluluwas sa pagtubag ang akusasyon sa mga Pariseo.

6:0

• Unsay nakita nimo nga mahinungdanong mga mensahe diha sa mga pagtulun-an sa Manluluwas?

Ipakita ang mosunod nga mga kamatuoran gikan sa Mateo 12:30: “Ang dili dapig kanako, batok gayod kanako. Ug ang dili motabang kanako pagtigom, nagpatibulaag lang.”

• Unsa kaha sa paminaw ninyo ang gipasabot sa dili pagdapig ngadto sa Ginoo? Unsaon nato sa pagtabang aron matigom uban sa Ginoo?

• Kon dili kita dapig sa Manluluwas, ngano man kaha nga kita batok Kaniya?

Ikonsiderar ang pagpakigbahin sa mosunod nga pamahayag ni Elder Gary B. Sabin:

Sa dihang kita gibunyagan, hingpit kitang giunlod isip simbolo sa atong saad sa bug-os nga pagsunod sa Manluluwas, dili taphaw lang. Kon hingpit ang atong pasalig ug “ihatag ang tanan,” ang mga langit mokurog alang sa atong kaayohan [tan-awa sa Doktrina ug mga Pakigsaad 21:6]. Kon dili kita bugnaw o dili init o dili kaayo mapasaligon, mawala kanato ang ubang pinili nga panalangin sa langit [tan-awa sa Pinadayag 3:15–16]. (“Magmalig-on sa Pagbarog ug Ihatag ang Tanan,” Liahona, Mayo 2017, 52)

• Unsa ang pipila ka paagi nga atong “ihatag ang tanan,” o hingpit ang kamasaligon ngadto sa Manluluwas?

• Unsa ang pipila ka ehemplo sa mga tawo nga hingpit ang kamasaligon sa Manluluwas ug sa Iyang buhat?

Mahimo nimong hatagan og panahon ang mga estudyante aron makapamalandong sa ilang personal nga pasalig sa Manluluwas. Dapita ang mga estudyante sa paghunahuna og usa ka paagi nga ilang mapalig-on o mapalig-onan pa ang ilang pasalig Kaniya.

Balik ngadto sa “Mga Opsiyon sa Kalihokan sa Pagkat-on.”

Ipakita ang mosunod nga hugpong sa mga pulong:

• “Magtutudlo, wala ka ba mabalaka nga hapit na man kita malunod?” (Marcos 4:38).

• “Amahan, … dili ang akong pagbuot maoy matuman, kondili ang imo” (Lucas 22:42).

• “Kon ikaw Anak sa Dios, kanaog nianang krus” (Mateo 27:40).

• “Sa ngalan ni Jesukristo nga Nazaretnon, tindog ug lakaw” (Mga Buhat 3:6).

Dapita ang mga estudyante nga mag-pares sa paghisgot kon unsay ikasulti sa mga pulong diha sa matag hugpong sa pulong mahitungod niadtong misulti niini. Pagkahuman, mahimo ninyong hisgotan ang mosunod nga pangutana sa tibuok klase:

• Unsay inyong nakat-onan mahitungod sa kaimportante sa mga pulong nga inyong gipangsulti?

Basaha ang Mateo 12:34–37, ug hisgoti isip usa ka klase kon unsay gitudlo sa Manluluwas ngadto sa mga Pariseo mahitungod sa mga pulong nga atong gipamulong. (Mahimo nimong ipasabot nga ang “nakapuno sa kasingkasing” [bersikulo 34] nagpasabot sa unsay anaa sa sulod sa kasingkasing ug nga ang “pulong nga walay pulos” [bersikulo 36] niini nga konteksto nagpasabot sa pagkawalay paghunahuna, mga pulong nga walay pulos nga mga malisyoso o makadaot.)

Isip kabahin sa diskusyon, ang mga estudyante tingali makatino og kamatuoran sama sa mosunod: Ang atong mga pulong nagpakita kon unsay naa sa atong kasingkasing.

• Unsay gitug-an sa mga pulong sa Manluluwas, atol sa Iyang pangalagad ug hangtod karon, kon unsay anaa sa Iyang kasingkasing?

• Unsaon nato sa pagpalambo ang kaugalingon natong pinulongan ug mga mensahe dinhi sa atong kaugalingon ug ngadto sa uban?

Ikonsiderar ang pagpakigbahin sa imong pagpamatuod bahin sa gahom sa mga pulong. Pagdapit usab og pipila ka estudyante nga mopakigbahin sa ilang mga pagpamatuod.

Balik ngadto sa “Mga Opsiyon sa Kalihokan sa Pagkat-on.”