Manwal sa Bag-ong Tugon alang sa Magtutudlo sa Institute

Ang matag leksiyon naghatag og mga ideya alang sa pag-awhag og personal nga pagtuon. Si Presidente Russell M. Nelson mitudlo:

Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon. (“Paminaw Kaniya,” Liahona, Mayo 2020, 89)

Paghunahuna og mga paagi sa pagdapit, pag-awhag, ug pagtabang sa mga estudyante nga magtuon sa ilang mga kasulatan sa tibuok semana. Pananglitan, mahimong mopadala kamo og mga mensahe nga motabang sa mga estudyante nga magtuon sa gisangon nga hut-ong sa kasulatan alang sa semana ug moabot sa klase nga andam nga mopakigbahin og mga pangutana ug mga panabot. Ang pagpadala og mga mensahe sa mga ideya nga makita sa sinugdanan sa matag gilatid nga leksiyon. Kasagaran tugbang usab kini sa usa sa mga opsiyon nga kalihokan sa pagkat-on diha sa leksiyon.

Pananglitan, ania ang mga ideya sa mga mensahe nga imong ipadala ngadto sa mga estudyante nga nagtuon sa Juan 1:

• Pamalandongi kon unsa ang inyong makat-onan mahitungod ni Jesukristo gikan sa Iyang mga tahas ug mga titulo nga giila diha sa Juan 1:1–14.

• Basaha ang Juan 1:35–51 aron makat-on kon nganong importante ang pagdapit sa uban sa pagduol ngadto kang Kristo. Ikonsiderar ang pagdapit sa usa ka tawo nga motambong sa institute uban nimo niining semanaha.

Mahimo usab nga imong susihon ang mga panginahanglan sa mga estudyante pinaagi sa pagdapit kanila sa pagpadala nimo sa ilang mga pangutana mahitungod sa hut-ong sa kasulatan. Sa ubang mga komunikasyon, mahimo nimong dapiton ang mga estudyante sa pagsugod sa paghisgot og hilisgotan uban sa mga kauban sa klase sa dili pa ang klase. Paghunahuna og mga paagi sa pagtabang sa mga estudyante nga makab-ot ang ilang mga tumong sa pagtuon ug makaangkon og mas lawom nga gugma alang sa ilang personal nga pagtuon sa kasulatan.

Hatagi og panahon ang mga estudyante sa pagpangutana ug pagpakigbahin og mga panabot ug mga kasinatian. Makatabang kini nila nga makonektar ang mga kasulatan ngadto sa ilang mga kinabuhi. Makahimo usab kini nimo nga mas makasusi sa mga panginahanglan ug mga tinguha sa mga estudyante. Maayo tingali kini nga panahon sa pag-follow up sa mga imbitasyon ug mga kasinatian gikan sa miaging klase.

Ang paghatag og panahon sa mga estudyante sa pagpangutana ug pagpakigbahin og mga panabot mahitungod sa hut-ong sa kasulatan makatugot usab nila sa pag-impluwensya sa direksyon sa panaghisgotan. Ang gidugayon sa panahon sa pagpakigbahin kinahanglan nga mausab-usab. Kinahanglang makahibalo ka kanus-a motabang sa mga estudyante nga mopadayon ngadto sa usa sa mga kalihokan sa pagkat-on, nga makatabang sa mga estudyante nga mogamit unsay ilang gihisgotan.

Aron makaaghat og mga pangutana ug pagpakigbahin, ikonsiderar ang mosunod nga mga paagi sa pagsugod sa kalihokan:

• Rebyoha ang mga mensahe nga imong gipadala ngadto sa mga estudyante atol sa semana o sa bisan unsa nga mga pangutana nga ilang gipadala kanimo.

• Ipakita ang mga litrato o mga pulong nga naghulagway sa mga panghitabo o importante nga mga pagtulun-an diha sa hut-ong sa kasulatan.

• Pangutan-a ang mga estudyante unsa nga mga pangutana o mga panabot nga gusto nilang hisgotan.

Mahimo nimong dapiton ang mga estudyante sa pagpangutana ug pagpakigbahin og mga panabot isip usa ka klase, sa gagmay nga mga grupo, nga adunay kauban, o sa ubang mamugnaon nga mga paagi, sama sa paggamit sa social media. Ikonsiderar ang paghatag sa mga estudyante og oras sa pagrebyo o pagtuon sa hut-ong sa kasulatan sa dili pa sila mopakigbahin.

Pahinumdom: Kon ang piho nga pangutana o panabot mosangpot ngadto sa dili importante sa kamatuoran nga gitudlo, pangita og mga paagi nga mobalik ang panaghisgotan sa importante nga mga kamatuoran sa mga kasulatan. Usab, labing maayo ang pagtubag sa pipila ka pangutana human sa klase o human sa dugang nga pagtuon. OK ra nga moingon og, “Wala ko kahibalo. Tun-an nato kini og dugang pa ug tan-awon unsay atong makat-onan sa dili pa ang sunod nga klase.”

Ikonsiderar kon sa unsang paagi nga ang mga kinabuhi sa mga estudyante nausab samtang mahimo silang mas mapaningkamuton nga mga tigkat-on sa ebanghelyo. Kon makahimo sila sa pagkat-on sa ilang mga kaugalingon, mas makapaduol sila ngadto sa Manluluwas. Ang pagtabang sa mga estudyante nga molambo sa ilang abilidad sa pagkat-on alang sa ilang mga kaugalingon mao ang sentro sa Kristohanong pagtulun-an.

Kini nga kurso nagtabang sa mga estudyante sa pagpalambo og mga kahanas nga mopadugang sa ilang kapasidad sa pagsabot ug pagpakigsulti mahitungod sa mga kasulatan. Sa kasagaran kini nga mga kahanas iapil sa mga kalihokan sa pagkat-on aron dili kini makabalda sa dagan sa leksiyon. Alang sa dugang nga tabang sa paggamit niini nga mga kahanas, ang mga magtutudlo ug mga estudyante makaadto sa Scripture Study Skills sa Gospel Library. Kini nga kapanguhaan naghatag og giya unsaon sa paghulagway, pagpakita, ug pagbansay ang matag kahanas.

Samtang balikbalikon sa pagbansay sa mga estudyante kini nga mga kahanas sa kinatibuk-an sa kurso, mabati nila ang mas dako nga pagsalig sa ilang abilidad sa pagkat-on gikan sa mga kasulatan. Pangita og panahon sa pag-follow up ug pagdapit sa mga estudyante sa pagpakigbahin sa ilang mga kasinatian gamit niini nga mga kahanas.

Ang matag leksiyon maglakip sa daghang opsiyon sa kalihokan sa pagkat-on. Susiha ang mga panginahanglan sa mga estudayante, ug tinguhaa ang giya sa Espiritu Santo samtang magpili ka sa mga opsiyon sa kalihokan sa pagkat-on nga labing maayo alang kanila. Paggahin og panahon nga gikinahanglan aron sa pagpalawom sa pagsabot sa mga estudyante aron sila mobati sa kamatuoran ug sa kaimportante sa unsay ilang nakat-onan. Sa kasagaran adunay mas daghang opsiyon sa kalihokan sa pagkat-on nga mahimo sa usa ka klasehan, mao nga ayaw pagbati nga kinahanglan nimong gamiton kining tanan.

Ang unang leksiyon sa materyal sa magtutudlo mahimong magamit sa unang adlaw sa klase kon magsugod na kamo nianang tuiga. Kini nga leksiyon makatabang sa mga estudyante sa paghimo og luwas nga kahimtang sa pagkat-on, pagtakda og mga tumong alang sa ilang kaugalingong pagkat-on, ug pagtuon sa kinatibuk-an sa mga Ebanghelyo o sa Mga Buhat hangtod sa Gipadayag.

Kon magtudlo sa materyal nga sunod-sunod, pagpili tali sa mga kalihokan sa pagkat-on nga nagtakdo sa hut-ong sa pagtuon alang sa semana. Pananglitan, sa semana 4, mahimo nimong gamiton ang magamit nga mga kalihokan sa pagkat-on nga naglakip sa kamatuoran nga makita sa Mateo 19–25 sa materyal sa magtutudlo.