Mateo 9–10; Marcos 5; Lucas 9

Mahimo nimong ipakita ang kasamtangang mga litrato sa Korum sa Napulog Duha ka Apostoles ug ipakigbahin ang mosunod nga senaryo:

Ang mga misyonaryo bag-ohay lang nagtudlo ni Paula mahitungod sa Korum sa Napulog Duha ka Apostoles. Tungod sa milabayng mga kasinatian, wala na kaayo siyay salig sa dunay mga awtoridad. Giingnan niya ang mga misyonaryo: “Nganong saligan ko man kining mga tawhana ug ang ilang mga gitudlo? Mga imperpekto lang silang mga binuhat. Makasalig ko ni Jesukristo apan kanila dili.”

Pagdapit og usa o duha ka estudyante nga mopakigbahin kon unsaon kaha nila sa pagtubag ang pangutana ug mga kabalaka ni Paula.

Ikonsidera nga ipakita ang kauban nga hulagway ni Jesus nga nag-orden sa Iyang Napulog Duha ka Apostoles. Mahimo nimong ipasabot nga ang pulong nga apostol nagpasabot nga “usa ka pinadala” (tan-awa sa Giya ngadto sa mga Kasulatan, “Apostol,” Librarya sa Ebanghelyo). Dapita ang mga estudyange sa pagbasa sa Mateo 9:36–38; 10:1–8, 19–20, 40–42, mangita sa mga responsibilidad sa mga Apostol.

• Nganong makasalig man kita sa mga Apostol sa Ginoo? (Ang mga estudyante mahimong moila og usa o sobra pa sa mosunod nga mga baroganan: Ang mga Apostol sa Ginoo molihok ug mamulong pinaagi sa Iyang gahom. Kon dawaton nato ang mga Apostol sa Ginoo, gidawat nato Siya. Kon sundon nato ang mga sulugoon sa Ginoo, nagsunod kita Kaniya.)

• Unsaon ninyo sa pagtabang og tawo aron molambo ang ilang pagsalig ug kamasaligon niadtong gitawag sa Ginoo nga mahimong Iya nga mga Apostol? (Mahimong pahisgotan og balik sa mga estudyante ang maong senaryo.)

• Kanus-a kamo mibati nga ang modernong mga Apostol namulong o milihok pinaagi sa gahom sa Manluluwas?

Mahimo nimong hatagan og oras ang mga estudyante sa pagpangutana og mga pangutana nga tingale aduna sila mahitungod sa modernong mga Apostol. Dasiga ang mga estudyante sa pagtubag sa mga pangutana sa ilang mga kauban.

11:7

Imbis motan-aw sa bidyo, mahimo nimong dapiton ang mga estudyante sa pag-abli sa labing bag-o nga kinatibuk-ang komperensiya diha sa Librarya sa Ebanghelyo ug hilom nga morebyo sa pipila ka pakigpulong sa mga sakop sa Unang Kapangulohan ug sa Korum sa Napulog Duha ka Apostoles. Human mahatagan og oras ang mga estudyante sa pagrebyo sa mga pakigpulong, dapita sila sa pagpakigbahin sa paborito nilang mga pagtulon-an nga ilang nadiskobrehan ug kon sa unsang paagi kadto nga mga pagtulon-an nagpalig-on sa ilang pagtuo kang Jesukristo. Mahimo nimong dapiton ang usa o duha ka estudyante sa pagpakigbahin sa ilang pagpamatuod bahin sa buhing mga Apostol sa Ginoo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga pamahayag ni Sister Amy A. Wright. Mahimo ra ninyong tan-awon og una ang porsiyon sa mensahe ni Sister Wright “Si Kristo Moayo Nianang Naguba” dihang gipakigbahin niya ang istorya sa buak nga antique nga kolon (gikan sa time code 0:00 to 1:15).

10:39

Kitang tanan adunay usa ka butang sa atong kinabuhi nga naguba nga nagkinahanglan nga tul-iron, tarongon, o ayohon. … Ako mopamatuod nga walay butang sa inyong kinabuhi nga naguba nga dili maayo, matubos, ug mahimo sa gahom ni Jesukristo. (“Si Kristo Moayo Nianang Naguba,” Liahona, Mayo 2022, 84)

• Unsa ang pipila ka pananglitan sa nagkalain-laing mga paagi nga atong gikinahanglan ang makaayo nga gahom sa Manluluwas? (Tabangi ang mga estudyante sa pagsabot nga tingale magkinahanglan kita sa makaayo nga gahom sa Manluluwas sa pisikal, espiritwal, o sa emosyonal nga paagi.)

Dapita ang mga estudyante sa paghunahuna ug sa pagrekord og butang sa ilang kinabuhi nga kinahanglan tul-iron, tarongon, o ayohon. Mahimo nimong ipakita ang mosunod nga mga kamatuoran ug dapiton ang mga estudyante sa pagpangita kon sa unsang paagi kini nga mga kamatuoran gipakita diha sa mga asoy sa kasulatan sa kauban nga handout: Makakaplag kita og paglaom ug pagkaayo kon moduol kita sa Manluluwas. Makagamit kita sa gahom ni Jesukristo kon moduol kita Kaniya uban sa hugot nga pagtuo.

Bahina ang mga estudyante ngadto sa paresan. Hatagi ang matag estudyante sa paresan og usa sa mga handout sa ubos. Dapita sila sa pagpraktis sa kahanas nga “Pagsulat og Makahuloganong mga Minugbo nga mga Sulat” nga anaa sa Mga Kahanas sa Pagtuon sa Kasulatan samtang tun-an nila ang naka-assign diha kanila nga asoy sa kasulatan. Mahimo nimong i-display ang mosunod ug awhaga ang mga estudyante sa paghimo niini samtang magtuon sila:

• Hunong aron mapamalandongan ang unsay imong gikat-onan.

• Pag-ampo alang sa panabot ug unsaon paggamit.

• I-rekord ang unsay imong nakat-onan, gihunahuna, ug gibati, (sa usa ka papel nga journal o notebook, sa mga kasulatan, o sa Librarya sa Ebanghelyo).

Human ang mga estudyante dunay panahon sa pagtuon sa gi-assign diha kanila nga mga asoy sa kasulatan, dapita sila sa pagpakigbahin ngadto sa ilang partner kon unsay ilang nakat-onan. Hatagi sila og panahon sa pagpakigbahin sa mga hunahuna, mga kasinatian, ug mga pagpamatuod nga ilang girekord. Mahimo nimong pangutan-on ang klase:

• Unsa nga mensahe sa paglaom ang nakit-an ninyo diha sa asoy nga inyong gitun-an?

Mahimo kang mopakigbahin sa imong pagpamatuod bahin sa paglaom ug pagkaayo nga moabot pinaagi sa hugot nga pagtuo kang Jesukristo. Awhaga ang mga estudyante nga lihokon ang mga impresyon nga ilang nadawat ug narekord.

Balik ngadto sa “Mga Opsiyon sa Kalihokan sa Pagkat-on.”

Mahimo nimong Isulat ang mosunod diha sa pisara: Moadto ko ug mobuhat sa bisan unsa nga ipabuhat sa Ginoo kanako! Pangutan-a ang mga estudyante kon unsa kaha ang pangayoon ngadto niadtong mga tawo nga andam mobuhat sa bisan unsa nga ipabuhat sa Ginoo kanila.

Dapita ang mga estudyante sa pagbasa sa Lucas 9:57–62, nga mangita kon unsay gilaoman sa Manluluwas niadtong mga mipili sa pagsunod Kaniya.

• Unsa ang nakita nimo nga malisod mahitungod sa mga gilaoman sa Manluluwas? (Ang pipila sa pamahayag sa Manluluwas dinhi niini nga mga bersikulo maingon og dili manggihunahunaon o nanubra ra kaayo alang sa mga estudyante. Ikonsiderar ang paggamit sa mga kapanguhaan alang niini nga mga bersikulo nga naa sa Tabang sa mga Kasulatan: Bag-ong Tugon.)

• Unsa nga baroganan ang atong makat-onan gikan sa mga pagtulon-an sa Manluluwas alang niadtong nagtinguha sa pagsunod Kaniya? (Ang mga estudyante mahimong moila og usa ka kamatuoran nga susama sa mosunod: Ang mga sumusunod ni Jesukristo mibutang og una Kaniya sa Ilang kinabuhi.)

• Unsa kaha ang buot ipasabot sa Manluluwas dihang mipahimangno Siya batok sa pagbutang sa atong “kamot sa daro ug molingi sa mga butang nga naa sa luyo”? (bersikulo 62).

Dapita ang mga estudyante sa pagpakigbahin og mga ehemplo kon sa unsang paagi ang Manluluwas mibutang og una sa Langitnong Amahan. Kon gikinahanglan, mahimo nimong ipunting ang mga estudyante sa Moises 4:1–2; Juan 6:38–39; o Lucas 22:39–44. Mahimo sab nga mopakigbahin ang mga estudyante og mga ehemplo sa mga tawo nga ilang nailhan kinsa mibutang og una sa Dios sa ilang kinabuhi.

• Ngano nga usahay lisod man ang pagbutang og una sa Dios?

• Unsa nga mga panalangin ang inyong nasinati dihang gibutang ninyo og una ang Dios sa inyong kinabuhi?

Aron matabangan ang mga estudyante nga mobati sa kamatuoran ug sa kaimportante niini nga baroganan, mahimo nimong basahon ug hisgotan ang mosunod nga pamahayag ni Presidente Jeffrey R. Holland:

Ang tanan kinsa mamulong niining kinatibuk-ang komperensiya tanan moingon, sa daghang paagi, unsa ang giingon ni Kristo ngadto sa dato nga tawo: “Duol ngadto sa imong Manluluwas. Duol sa hingpit ug bug-os nga kasingkasing. Pas-ana ang inyong krus, bisan unsa pa kini kabug-at, ug sunda Siya” [tan-awa sa Marcos 10:21]. … Walay tinipik lang nga buhat, walay mosugod ug unya mohunong nga wala pa mahuman, walay paglingi. … Kon malisod ang mga butang nga gipabuhat kanato, bisan niadtong sukwahi sa atong gipanganti sa atong kasingkasing, hinumdomi nga ang pagkamaunungon nga atong gipasalig sa kawsa ni Kristo mao ang labing gamhanan nga debosyon sa atong kinabuhi. (“Ang Labing Dako nga Katigayonan,” Liahona, Nob. 2021, 8–9)

Ikonsiderar ang pagpakita sa mosunod nga mga pangutana. Dayon dapita ang mga estudyante sa mainampoong pagpamalandong niini nga mga pangutana ug sa pagrekord sa ilang mga hunahuna.

• Unsay makababag kaninyo gikan sa “hingpit ug bug-os nga kasingkasing” nga pagsunod sa Manluluwas?

• Unsa ang usa ka butang nga inyong mahimo aron ikapakita ang inyong tinguha nga unahon ang Langitnong Amahan ug ang Manluluwas sa inyong kinabuhi?

Balik ngadto sa “Mga Opsiyon sa Kalihokan sa Pagkat-on.”