Mga Hebreo 1–6

Ikonsiderar ang pagpakita og litrato sa usa ka panghitabo gikan sa kinabuhi sa Manluluwas, sama sa usa sa sinugdanan niini nga leksiyon. Dapita ang mga estudyante nga morebyo sa laktod sa gihulagway nga panghitabo. Dayon pangutana:

• Unsay atong makat-onan mahitungod sa mga hiyas ni Jesukristo gikan niini nga panghitabo?

• Sa unsang paagi nga ang pagkat-on og dugang mahitungod sa mga tahas, mga titulo, ug mga hiyas ni Jesukristo makapalig-on sa atong hugot nga pagtuo Kaniya?

Ipasabot nga sa iyang sulat ngadto sa Mga Hebreo, gihulagway ni Pablo ang daghan nga mga titulo ug mga hiyas sa Manluluwas. Ikonsiderar ang pagdapit sa mga estudyante sa paghimo og listahan sa mga tahas, mga titulo, ug mga hiyas nga ilang maila niining kalihokan sa pagkat-on. Dapita ang mga estudyante sa pagbantay sa unsay itudlo sa Espiritu Santo kanila mahitungod ni Jesukristo samtang magtuon sila.

Aron matabangan ang mga estudyante sa ilang pagtuon, mahimo ninyong ipakita ang mosunod nga mga instruksiyon:

1. Tun-i ang pipila sa mosunod nga mga bersikulo, mangita sa mga titulo, mga tahas, ug mga hiyas ni Jesukristo: Mga Hebreo 1:1–6, 9–12; 2:7–10, 17–18; 3:1–2; 5:8–10.

2. Pangita og mga paagi nga makompleto ninyo ang mosunod nga hugpong sa mga pulong: “Makabaton ko og hugot nga pagtuo kang Jesukristo tungod kay …” (Pananglitan, Makabaton ko og hugot nga pagtuo kang Jesukristo tungod kay Siya mosuporta sa tanang butang pinaagi sa gahom sa Iyang pulong [tan-awa sa Mga Hebreo 1:3].)

3. Pagpili og usa o duha ka tahas, titulo, o hiyas sa Manluluwas nga tun-an pag-ayo. Gamita ang mga footnote, ang Giya ngadto sa mga Kasulatan, o ang mga artikulo sa pagsiksik sa Librarya sa Ebanghelyo sa pagpangita sa mga tudling sa kasulatan, mga pagtulun-an sa mga lider sa Simbahan, ug sa ubang makatabang nga mga basahon.

Dapita ang mga estudyante sa pagpakigbahin unsay ilang nakat-onan mahitungod sa Manluluwas uban sa usa ka kauban o sa gamay nga grupo. Dayon mahimo ninyong dapiton sila sa paghisgot sa mosunod nga mga pangutana:

• Sa unsang paagi nga ang pagsabot niini nga tahas, titulo, o hiyas makapalig-on sa inyong hugot nga pagtuo kang Jesukristo?

• Unsa ang gisugyot niini nga titulo, tahas, o hiyas mahitungod kon unsaon sa Maluluwas nga makatabang ninyo?

Taposa ang kalihokan sa pagkat-on pinaagi sa pag-ambit sa inyong pagpamatuod ni Jesukristo. Mahimo ninyong dapiton ang pipila ka estudyante sa pagpakigbahin sa ilang mga pagpamatuod. Awhaga ang mga estudyante sa pagpadayon sa pagpangita atol sa ilang personal nga pagtuon kon unsay gitudlo sa mga kasulatan mahitungod sa Manluluwas.

Balik ngadto sa “Mga Opsiyon nga Kalihokan sa Pagkat-on.”

Ikonsiderar sa pagsugod niini nga kalihokan sa pagkat-on pinaagi sa paghisgot og dungan sa mosunod nga mga pangutana isip usa ka klase.

• Unsa ang pipila ka labing komon nga mga hagit nga giatubang sa mga young adult? (Mahimo ninyong isulat ang mga tubag sa mga estudyante diha sa pisara.)

• Asa moduol ang mga tawo kon maningkamot sila sa pag-atubang niini nga mga hagit?

Dapita ang usa ka estudyante sa pagbasa sa mosunod nga pamahayag ni Presidente Russell M. Nelson:

Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kaluoy, sa Iyang doktrina, ug sa Iyang gipahiuli nga ebanghelyo bahin sa pagkaayo ug paglambo. Dangop ngadto Kaniya! Sunod Kaniya! (“Ang Tubag sa Kanunay Mao si Jesukristo,” Liahona, Mayo 2023, 127)

• Ngano sa inyong hunahuna nga ang mga tubag sa atong mga hagit o mga pangutana makita kanunay sa kinabuhi ug mga pagtulun-an ni Jesukristo?

Dapita ang mga estudyante sa pagpamalandong kon unsa ka sagad sila moduol ngadto sa Manluluwas kon mag-atubang sila og mga hagit ug mga pangutana. Awhaga sila samtang sila magtuon sa pagbantay sa espirituhanong mga pag-aghat nga makatabang kanila nga makabaton og mas dakong hugot nga pagtuo diha ni Jesukristo.

Dapita ang mga estudyante sa pagtuon sa Mga Hebreo 2:7–18; 4:14–16, mangita sa mga pagtulun-an mahitungod sa Manluluwas nga makapadugang sa atong tinguha sa pagduol ngadto Kaniya. (Aron matabangan ang mga estudyante nga mas makasabot sa konteksto kalabot niini nga mga pagtulun-an, ikonsiderar ang pagdapit nila sa pagbasa usab sa “Mga Hebreo 1:4–2:10. Ngano nga si Jesukristo gitandi ngadto sa mga anghel?” diha sa Mga Tabang sa Kasulatan: Bag-ong Tugon.)

Ikonsiderar ang pagpakita sa mosunod nga mga pangutana. Dapita ang mga estudyante sa paghisgot niini uban sa usa ka kauban o gamay nga grupo.

• Unsa nga mga pagtulun-an gikan niini nga mga bersikulo ang inyong nakaplagan nga labing makahuluganon? Ngano man?

• Sa unsa nga paagi nga ang pagsabot niini nga mga pagtulun-an makaapekto sa atong tinguha sa pagduol ngadto ni Jesukristo kon mag-atubang kita og mga hagit?

Human matapos sa mga estudyante ang ilang panaghisgot, dapita ang pipila kanila sa pagpakigbahin sa ilang mga panabot diha sa klase. Kon ang mga estudyante dili makahisgot sa mga pagtulun-an gikan sa Mga Hebreo 2:18, ikonsiderar sa pagkuha sa ilang atensyon niana nga bersikulo ug mangutana sa mosunod nga pangutana:

• Unsa sa inyong hunahuna ang gipasabot nga si Jesukristo “makahimo sa pagtabang kanila nga gitental”? (Kon makatabang, basaha pagdungan ang “Mga Hebreo 2:18. Sa unsang paagi si Jesukristo makatabang nato kon kita gitental?” diha sa Mga Tabang sa Kasulatan: Bag-ong Tugon.)

Dapita ang mga estudyante sa pagpakigbahin sa kamatuoran nga ilang nakat-onan mahitungod ni Jesukristo gikan sa bersikulo 18. Mahimong mopakigbahin sila sama sa mosunod: Tungod kay si Jesukristo nag-antos ug natental sa tanang butang, Siya makatabang nato sa mga panahon sa panginahanglan. (Ang propeta nga si Alma diha sa Basahon ni Mormon mitudlo usab niini nga kamatuoran. Mahimo ninyong dapiton ang mga estudyante sa pagbasa sa Alma 7:11–12 ug, kon naggamit sa digital nga mga kasulatan, i-link kini ngadto sa Mga Hebreo 2:18.)

• Sa unsang paagi nga ang pagkasabot niini nga kamatuoran makatabang kaninyo nga mosalig sa Manluluwas? (Isip kabahin sa inyong panaghisgotan niini nga pangutana, mahimo ninyong ipakigbahin ang mosunod nga pamahayag ni Elder Ulisses Soares.)

Ang Manluluwas mitanyag usab nato og tabang ug kahupayan samtang atubangon nato ang atong mga kasakit, mga tentasyon, ug mga kahuyang sa mortal nga kinabuhi. … Ako mopaniguro kaninyo nga si Kristo nakahibalo sa mga kalisod nga atong nasinati dinhi sa pagka-mortal. Siya nakasabot sa tanan nga kapait, paghingutas, ug pisikal nga kasakit ingon man usab sa emosyonal ug espirituwal nga mga hagit nga atong giatubang. Ang kasingkasing sa Manluluwas napuno sa kaluoy, ug Siya andam kanunay sa pagtabang kanato. Posible kini tungod kay Siya personal nga nmisinati ug midala sa Iyang Kaugalingon diha sa unod sa kasakit sa atong mga kahuyang ug mga kakulangan. (“Jesukristo: Ang Tig-atiman sa Atong Kalag,” Liahona, Mayo 2021, 83)

Dapita ang mga estudyante sa paghunahuna ug sa pagpakigbahin og mga ehemplo nga naghulagway sa abilidad sa Manluluwas sa pagtabang sa Iyang katawhan. Mahimong mga ehemplo kini gikan sa ilang kaugalingong kinabuhi, sa mga kinabuhi sa mga tawo nga ilang nailhan, o sa mga tawo diha sa mga kasulatan. Kon ang mga estudyante nagkinahanglan og tabang sa paghunahuna sa mga ehemplo, mahimo silang magtuon sa Juan 11:21–27, 32–36; Mosiah 24:11–15; o Doktrina ug mga Pakigsaad 122:5–9.

Dapita ang mga estudyante sa pagpamalandong unsay ilang nakat-onan ug nabati atol niini nga kalihokan sa pagtuon. Awhaga sila sa pagkonsiderar ug sa pagrekord sa mga aksiyon nga giaghat nila sa Espiritu Santo nga buhaton. Ipamatuod ang gugma sa Manluluwas alang nato ug sa Iyang abilidad sa pagtabang nato.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagsugod niini nga kalihokan sa pagkat-on pinaagi sa paghisgot sa mosunod nga senaryo:

Si Jeremy namiyembro sa Simbahan sulod sa pila na ka tuig. Karong bag-o, naghunahuna siya nga mobalik sa iyang kanhing paagi sa pagpuyo tungod kay gibati niya nga ang pagkamiyembro sa Simbahan nagkinahanglan og daghan kaayo.

• Unsa ang inyong mga hunahuna mahitungod niini nga senaryo?

• Ngano kaha nga ang mga tawo nakakaplag nga mahagiton ang mahimong miyembro sa Simbahan sa Manluluwas?

Dapita ang mga estudyante sa pagkonsiderar kon aduna ba silay nailhan nga mga tawo nga anaa sa sitwasyon sama sa gihulagway sa senaryo. Mahimo usab nga inyong dapiton ang mga estudyante sa paghunahuna sa ubang mga sitwayon nga ilang atubangon nga makapahimo nila nga mobati nga nabug-atan ug gikapoy. Awhaga ang mga estudyante samtang magtuon sila sa pagpangita sa mga kamatuoran nga makatabang nila niini nga mga sitwasyon.

Aron maandam ang mga estudyante sa pagtuon sa Mga Hebreo 3–4, ipasabot nga atol sa panahon ni Pablo, ang Judeo nga mga Kristiyano nakasinati og pagpanggukod tunggod sa ilang mga pagtuo. Daghan ang naghunahuna nga mobalik sa ilang kanhi nga mga paagi sa kinabuhi aron malikayan ang dugang nga pagpanggukod. Usa sa mga tumong ni Pablo sa pagsulat sa basahon sa Mga Hebreo mao ang pagtabang niining mga tawhana nga magpabilin nga makanunayon sa ilang pasalig ngadto ni Jesukristo. (Alang sa dugang nga impormasyon, tan-awa sa “Ngadto kang kinsa ang basahon sa Mga Hebreo gisulat ug ngano?” diha sa Mga Tabang sa Kasulatan: Bag-ong Tugon.)

Mipakigbahin si Pablo sa asoy ni Moises ug sa mga anak ni Israel aron matabangan ang mga Judeo nga mga Kristiyano nga makasabot sa kakuyaw sa pagbalik ngadto sa estilo sa kinabuhi sa pagrebelde ug pagkawalay pagtuo. Dapita ang mga estudyante sa pagtuon sa Mga Hebreo 3:7–19 ug sa pag-ila sa mensahe ni Pablo.

• Unsa nga mga pagtulun-an ang inyong nakaplagan nga mahimong makatabang sa Judeo nga mga Kristiyano nga naghunahuna nga mobiya sa ilang mga pagtuo?

Itudlo nga usa sa mga sangpotanan nga giatubang sa mga Israelita mao nga sila wala tugoti nga mosulod ngadto sa gisaad nga yuta o sa kapahulayan sa Ginoo (tan-awa sa Mga Hebreo 3:11, 18). Dapita ang mga estudyante sa pagbasa sa Mga Hebreo 4:11, mangita sa imbitasyon ni Pablo ngadto sa Judeo nga mga Kristiyano.

• Unsa sa inyong hunahuna ang gipasabot sa pagsulod sa kapahulayan sa Ginoo? (Aron matabangan ang mga estudyante nga mas makasabot niini nga hugpong sa mga pulong, mahimo ninyong dapiton sila sa pagbasa sa “Mga Hebreo 3:7–4:16. Unsa ang gipasabot sa pagsulod ngadto sa kapahulayan sa Ginoo?” diha sa Mga Tabang sa Kasulatan: Bag-ong Tugon.)

• Unsay inyong nakat-onan gikan sa mga pagtulun-an ni Pablo mahitungod kon unsaon nato sa pagsulod ngadto sa kapahulayan sa Ginoo? (Tabangi ang mga estudyante nga makaila sa kamatuoran sama sa mosunod: Kon magpabilin kita nga matinud-anon ngadto sa Manluluwas ug dili magpatig-a sa atong mga kasingkasing, makasulod kita ngadto sa kapahulayan sa Ginoo [tan-awa usab sa Alma 12:34–37].)

• Ngano sa inyong hunahuna nga ang kapahulayan sa Ginoo usa ka panalangin nga takos ipadayon?

Isip kabahin sa inyong panaghisgot niini nga mga pangutana, ikonsiderar ang pagpakigbahin sa mosunod nga pamahayag ni Presidente Russell M. Nelson:

Minahal nga mga kaigsoonan, ako naguol niadtong kinsa mobiya sa Simbahan tungod kay sila mibati nga ang pagkamiyembro nagkinahanglan og daghan gikan nila. Sila wala makadiskobre nga ang paghimo ug pagtuman og mga pakigsaad sa tinuod makahimo sa kinabuhi nga sayon! Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. Palihog palandonga kanang talagsaon nga kamatuoran!

Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. Sa ingon niana, ang mga tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios. …

… Bisan pa sa mga makalibog dili ensakto nga mga kamatuoran nga anaa sa atong palibot, makakita kamo og tinuod nga kapahulayan—nagpasabot nga kahupayan ug kalinaw—bisan taliwala sa inyong labing makahasol nga mga problema. (“Buntoga ang Kalibotan ug Pangita og Kapahulayan,” Liahona, Nob. 2022, 96)

Dapita ang mga estudyante sa pagpamalandong sa unsang paagi sila nakasinati sa kapahulayan sa Ginoo ug unsa ang piho nga mga aksiyon ang ilang gihimo nga nagtabang nila nga mosinati sa kapahulayan sa Ginoo. Mahimo ninyong dapiton ang pipila ka estudyante sa pagpakigbahin sa ilang mga kasinatian. Tingali inyong ikonsiderar ang pagpakigbahin usab sa inyong kaugalingon nga kasinatian.

Awhaga ang mga estudyante sa pagkonsiderar unsay ilang mahimo sa pagsinati pa sa kapahulayan sa Ginoo sa ilang mga kinabuhi. Dapita sila sa pagrekord sa espirituwal nga mga impresyon nga ilang nadawat gikan sa Espiritu Santo. Pagpamatuod sa mga kamatuoran nga inyong nahisgotan karon.

Balik ngadto sa “Mga Opsiyon nga Kalihokan sa Pagkat-on.”