Mga Buhat 1–5

Mahimo nimong ipakita ang mosunod nga hulagway sa Pagkayab ni Jesukristo. Ipasabot nga human sa Iyang 40 ka adlaw nga pangalagad, si Jesukristo mikayab ngadto sa langit (tan-awa sa Mga Buhat 1:9–11). Dapita ang mga estudyante sa paghunahuna kon sama sa unsa kaha kini alang sa mga Apostol human ang Manluluwas mikayab ngadto sa langit.

The Ascension og Jesus (Ang Pagkayab ni Jesus), ni Harry Anderson

• Unsa kaha nga mga pangutana o mga kabalaka ang anaa kanimo kon ikaw anaa pa sa sitwasyon sa mga Apostol?

Basaha og dungan ang Buhat 1:5–8, mangita kon unsay gisaad sa Ginoo sa iyang mga disipulo sa wala pa Siya mokayab sa langit.

• Ngano kaha nga ang mga disipulo sa Ginoo naghinam-hinam sa pagdawat sa Espiritu Santo pagkahuman sa pagbiya ni Jesukristo? (Kon makatabang, mahimo nimong rebyohon sa daklit kon unsa ang gitudlo ni Jesukristo kanila mahitungod sa Espiritu Santo sa wala pa ang Iyang kamatayon [tan-awa sa Juan 14:13, 16–17, 26–27; 15:26; 16:7–8, 13–14].)

Ipasabot nga adlaw kadto sa Pentecostes nga ang mga Apostol nakadawat sa gisaad nga gasa sa Espiritu Santo. (Mahimo kamong magdungan sa pagbasa sa “Mga Buhat 2. Unsa ang mahinungdanon mahitungod sa adlaw sa Pentecostes?” ug sa “Mga Buhat 2:1–6. Sa unsang paagi nga ang Espiritu Santo mabati sa adlaw sa Pentecostes?” sa Mga Tabang sa Kasulatan: Bag-ong Tugon.)

Ikonsiderar ang paghangyo sa mga estudyante nga magtinabangay nga magpares, ug hatagi sila og handout “Ang Adlaw sa Pentecostes.” Patun-i sa usa ka pares ang bahin 1 ug sa laing pares ang bahin 2. Dayon dapita sila sa pagpakigbahin kon unsa ang ilang nakat-onan ngadto sa usag usa.

Human ang mga estudyante makabaton og igong panahon sa paghuman sa ilang panaghisgot, dapita sila nga mopakigbahin og bisan unsa nga mga panabot diha sa klase. Mahimo usab ninyong hisgotan ang mosunod nga mga pangutana:

• Unsa ang pipila ka mga paagi nga ang Espiritu Santo mipanalangin kaninyo bag-ohay lang? (Mahimo ninyong tan-awon ang “How Does the Holy Spirit Guide?” [3:25] alang sa dugang nga mga ehemplo.)

  

  3:25

Pagpamatuod sa tinguha sa Manluluwas sa pagpanalangin kanila pinaagi sa gasa sa Espiritu Santo. Awhaga ang mga estudyante sa pagtinguha sa giya sa Espiritu Santo diha sa ilang kaugalingong mga kinabuhi.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa paghunahuna ug sa pagsulat og usa ka paagi nga sila o ang tawo nga ilang kaila nagtinguha og pagkaayo gikan sa Manluluwas. Hangyoa sila sa pagtimaan niini sa ilang hunahuna atol niining kasinatian sa pagkat-on.

Ipakita ang mosunod nga litrato. Magdungan sa pagbasa sa Mga Buhat 3:1–2, ug dapita ang mga estudyante sa pagpakigbahin kon unsa kaha ang bation nga dili makalakaw gikan sa pagkatawo ug kinahanglan nga magpakilimos kada adlaw alang sa suporta.

• Unsa ang kasagarang mga paagi nga ang mga tawo tingali motubag ngadto sa usa nga anaa sa sitwasyon niini nga tawo sa atong panahon?

Magdungan sa pagbasa sa Mga Buhat 3:3–11 o tan-awa ang “Peter and John Heal a Man Crippled Since Birth” (3:28), mangita kon giunsa nilang Pedro ug Juan sa pagtubag ang tawo nga naghangyo og limos.

3:28

• Unsa ang labing nakapadani kanimo mahitungod niining istorya? (Dapita ang mga estudyante sa paggahin og pipila ka gutlo nga mosulay sa paghanduraw nga makakita niini nga pagkaayo diha sa mga mata sa bakol nga tawo, ni Pedro ug ni Juan, ug sa ubang mga tawo kinsa nakasaksi sa milagro.)

Basaha og dungan ang Mga Buhat 3:11–16, magdapit sa mga estudyante sa pagpangita sa unsa ang gitudlo ni Pedro sa dihang iyang nakita ang mga tawo nga nahingangha sa pagkaayo sa tawo.

• Unsang importanteng mensahe ang anaa ni Pedro alang niadtong nakakita sa milagro? (Ang mga estudyante mahimong moila og usa ka kamatuoran sama sa mosunod: Pinaagi sa hugot nga pagtuo diha ni Jesukristo, kita mahimong mamaayo.)

• Unsa ang lain-laing mga paagi nga ang Maluluwas makaayo kanato? Giunsa ninyo pagsinati ang pagkaayo pinaagi sa Manluluwas?

• Unsa kaha ang inyong isulti ngadto sa usa ka tawo kinsa sinserong nagtinguha sa makaayo nga gahom sa Manluluwas apan wala makasinati niini?

Mahimo kamong magdungan sa pagbasa sa mosunod nga pamahayag ni Elder Matthew L. Carpeter:

Dili kita makakontrolar sa panahon kon kanus-a ang makaayo nga gahom ni Kristo moepekto sa atong mga balatian nga pisikal. Ang pagkaayo moepekto sumala sa Iyang kabubut-on ug kaalam. Diha sa mga kasulatan, ang uban nag-antos sulod sa mga dekada; ang uban, sa tibuok nilang kinabuhi. Ang mga kahuyang sa mortal makahashas kanato ug molig-on sa atong pagsalig sa Dios. Apan kon motugot kita nga maapil si Kristo, sa kanunay Siya molig-on kanato sa espiritwal nga paagi aron makabaton kita og mas dakong kapasidad sa paglahutay sa atong mga palas-anon.

Sa kataposan, nasayod kita nga ang matag pisikal nga balatian, sakit, o sa pagka dili hingpit mamaayo ra unya inig ka Banhaw. Mao kana ang gasa sa tanang katawhan tungod sa Pag-ula ni Jesukristo.

Si Jesukristo makaayo dili lang sa atong pisikal nga lawas. Makaayo usab Siya sa atong espiritu. (“Buot Ka Bang Maayo,” Liahona, Nob. 2018, 102)

• Unsay mipatigbabaw nimo gikan sa pamahayag ni Elder Carpenter?

Dapita ang mga estudyante sa pagpakigbahin sa unsay ilang nakat-onan mahitungod sa pagsalig sa panahon sa Ginoo, kabubut-on, ug kaalam samtang sila naghunahuna mahitungod sa makaayo nga gahom sa Ginoo.

Iparebyo sa mga estudyante kon unsa ang ilang narekord sa sinugdanan niining kalihokan sa pagkat-on. Awhaga sila sa pagpamalandong kon sa unsang paagi nga ang unsay ilang nakat-onan ug nabati mahimong magamit sa pag-ayo nga gitinguha nila o sa usa ka tawo nga ilang nailhan.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga pamahayag ni Elder Gary E. Stevenson:

Ako nakahinumdom sa makausa nga misakay og taxi sulod sa 45 minutos didto sa Siyudad sa New York. Nakabaton og usa ka mahigalaon nga panag-istorya bahin sa ebanghelyo uban sa drayber atol sa akong biyahe padulong sa tugpahanan, mibayad ko niya ug nangandam nga mogawas sa taxi. Dayon nakaamgo ko nga wala pa ko nakahatag og usa ka pagpamatuod sa akong gipakigbahin. (“Mga Pag-aghat sa Espiritu,” Liahona, Nob. 2023, 44)

• Duna ba kaninyo ang anaa sa usa ka sitwasyon diin inyong gihunahuna, “Mopakigbahin ba ko sa akong pagpamatuod?” Unsa nga mga hunahuna o mga emosyon ang inyong nasinati niadtong mga gutloa?

Usahay makasinati kita og kabalaka o kahadlok mahitungod sa pagbarog isip usa ka saksi ni Jesukristo. Samtang magtuon kita sa asoy nilang Pedro ug Juan nga gipangdakop, hatagi og pagtagad ang inyong makat-onan ug mabati nga lagmit mahimong makapadasig kaninyo.

Ipasabot nga si Pedro ug si Juan gidakop ug gidala sa atubangan sa usa ka konseho tungod kay sila nagtudlo ug nagpamatuod kang Jesukristo (tan-awa sa Mga Buhat 4:1–4). Dapita ang mga estudyante sa pagbasa sa Mga Buhat 4:5–21 o sa pagtan-aw sa “Peter and John Are Judged” (2:54), mangita kon unsay ilang makat-onan mahitungod sa pagkahimong maisogon nga saksi sa Manluluwas.

2:55

• Sumala sa Mga Buhat 4:13, nganong ang mga lider sa Hudeo nahingangha sa walay kahadlok nga sinultihan, o sa kaisog, nilang Pedro ug Juan? (Pahinumdom: Ang “walay hibangkaagan” diha sa King James Version mahimo usab nga hubaron isip “ordinaryo ug yano nga mga tawo.”)

• Sa inyong hunahuna unsa kaha ang nagtugot nilang Pedro ug Juan nga mahimong maisogon sa ilang pagsaksi kang Jesukristo? (Kon gikinahanglan, ibalhin ang pagtagad sa mga estudyante ngadto sa Mga Buhat 4:8 ug ilha ang usa ka kamatuoran nga susama sa mosunod: Ang Espiritu Santo nagtabang sa ordinaryong mga tawo nga dili mahadlok sa pagtudlo ug sa pagpamatuod kang Jesukristo.)

• Sa unsang paagi nga ang mas magtutok sa Espiritu Santo ug dili kaayo magtagad sa imong mga kahadlok ug mga kakulangan makaimpluwensiya sa imong abilidad sa pagtudlo ug sa pagpamatuod kang Jesukristo nga adunay mas dakong kaisog?

Ipasabot nga si Pedro ug si Juan, bisan pa man napasidan-an na, nagpadayon sa pagtudlo ug sa pagpamatuod kang Jesukristo ug gidakop sa ikaduha nga higayon. Mahimo ninyong basahon ang Mga Buhat 5:27–32, 40–42 o motan-aw sa “Peter and John Continue Preaching the Gospel” (5:38) ug hunahunaa kon unsa pa gayod nga mga leksiyon ang inyong makat-onan mahitungod sa pagkamaisogon nga saksi kang Jesukristo.

5:41

• Sa inyong hunahuna sa unsang paagi nga ang pagpadayon ni Pedro ug ni Juan sa pagsangyaw nakaapekto sa mga tawo nga nagpalibot kanila?

• Kanus-a kamo nakapamatuod o nakadungog og usa ka tawo nga maisogong nagpamatuod mahitungod sa Manluluwas pinaagi sa gahom sa Espiritu Santo? Unsa ang epekto nianang pagpamatuod diha kaninyo o sa uban nga anaa?

Ikonsiderar ang paghisgot sa mosunod nga pamahayag ni Elder Neil L. Andersen:

Uban niadtong anaa sa atong palibot, himoon unta nato nga mas bukas, mas andam sa paghisgot kabahin ni Kristo. Si Presidente Nelson miingon, “Ang tinuod nga mga disipulo ni Jesukristo andam nga mobarog, motingog, ug magpalahi gikan sa mga tawo sa kalibotan.” …

Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. Samtang kita mopakigbahin sa kahayag nga atong nadawat gikan Kaniya, ang Iyang kahayag ug ang Iyang balaan nga makaluwas nga gahom modan-ag niadtong andam nga moabli sa ilang mga kasingkasing. Si Jesus miingon, “Mianhi … ko [ingon] nga kahayag sa kalibotan.” (Kita Naghisgot kang Kristo, Liahona, Nob. 2020, 88)

Mahimo nimong taposon pinaagi sa pagdapit sa mga estudyante sa pagpakigbahin og mga ehemplo sa mga tawo nga ilang nailhan kinsa “andam nga mobarog” ug “mosulti” diha sa ilang pagsaksi sa Manluluwas. Kon itugot sa panahon, ang mga estudyante mahimong dapiton sa pagpakigbahin sa ilang pagsaksi sa Manluluwas.

Awhaga ang mga estudyante sa pag-ampo alang sa mga oportunidad sa pagpakigbahin sa ilang mga pagsaksi sa Manluluwas sa gawas sa klase. Ikonsiderar ang pag-follow up niini nga pagdapit sa sunod nga mga klase.

Balik ngadto sa “Mga Opsiyon sa Kalihokan sa Pagkat-on.”