“Mga Buhat 22–28,” Manwal sa Bag-ong Tugon alang sa Magtutudlo sa Institute (2025)

Mga Buhat 22–28

Samtang didto sa Jerusalem, si Pablo bakak nga giakusahan og pag-agni og rebelyon [sedition]. Gipaubos siya sa sunodsunod nga mga paghusay ug mga pagdungog didto sa Jerusalem, Cesarea, ug sa kataposan sa Roma. Si Pablo maisog nga mipamatuod sa iyang pagkakabig ngadto ni Jesukristo sa bisan asang dapit siya mopanaw. Sa iyang pagbiyahe sakay sa barko ngadto sa Roma, ang iyang gasa sa pagkamanalagna miluwas sa daghang kinabuhi. Ang gahom sa pagpamatuod ni Pablo nakaapekto sa tanan nga moabli sa ilang mga dalunggan sa pagpaminaw.

Dugang nga mga Kapanguhaan

Mga Tabang sa Kasulatan: Bag-ong Tugon, “Mga Buhat 22–28”

Pahinumdom: Ang “Pasiuna ngadto sa Kurso” naghatag og giya kon unsaon sa paggamit ang upat ka sumbanan nga mga elemento sa leksiyon nga mosunod.

Pag-awhag og Personal nga Pagtuon

Sa dili pa ang klase, ikonsiderar ang pagpadala sa mga estudyante og usa o daghan pa sa mosunod nga mga mensahe o pipila sa imong kaugalingon:

Samtang magbasa ka mahitungod sa mga kasinatian ni Pablo sa Mga Buhat 22–26, ikonsiderar kon unsa ang kalainan nga nahimo sa iyang pagpamatuod sa Manluluwas sa iyang kaugalingon ug sa uban. Samtang mamalandong ka sa imong kaugalingong pagpamatuod, mahimo nimong tan-awon ang “A Personal Testimony of Jesus Christ” (1:27).

1:27
Kanus-a nimo nakita ang mga panalangin nga miabot kanimo o sa uban human sa pagsunod sa tambag sa mga propeta ug mga apostoles? Samtang magbasa ka sa Mga Buhat 27, pangitaa ang mga ehemplo nga nagpakita sa kaimportante sa pagsunod sa mga sulugoon sa Ginoo.
Samtang mobasa ka sa Mga Buhat 28:23–24, pangitaa ang lain-laing mga reaksiyon sa mga tawo nga naminaw ni Pablo nga nagtudlo mahitungod ni Jesukristo. Sa imong hunahuna ngano kaha nga ang pipila ka mga tawo dali ra nga motuo sa ebanghelyo ni Jesukristo samtang ang uban wala modawat niini?

Mga Pangutana ug Pagpakigbahin

Paggahin og panahon alang sa mga estudyante nga mangutana ug mopakigbahin og mga panabot ug mga kamatuoran nga ilang nadiskobrehan sa ilang personal nga pagtuon sa Mga Buhat 22–28.

Pagbansay sa Kahanas

Ang Mga Buhat 22–26 tingali makatabang nga dapit sa pagbansay sa kahanas sa “Pag-ila sa mga Kamatuoran sa Ebanghelyo diha sa mga Kasulatan” sa Mga Kahanas sa Pagtuon sa Kasulatan.

Mga Opsiyon sa Kalihokan sa Pagkat-on

Daghang mga opsiyon sa pagkat-on ang gihatag kanimo ug sa imong mga estudyante. Sa mainampoong paagi pagpili kon hain nga opsiyon o mga opsiyon ang mahimong labing makahuloganon alang sa imong klase.

Mga Buhat 22–26

Unsaon nako pagbaton og dugang mga oportunidad sa paghatag og pagpamatuod kang Jesukristo?

Mahimo kang magsugod pinaagi sa pagpakigbahin sa mosunod nga kasinatian ni Presidente Bonnie H. Cordon, kanhi Kinatibuk-ang Presidente sa Young Women:

Niadtong 2011, samtang ako nagserbisyo kauban sa akong bana isip mga lider sa misyon sa matahom nga Curitiba, Brazil, ang akong cellphone mibagting atol sa miting. Nagdali aron sa pagpahilom niini, akong nabantayan nga ang tawag gikan sa akong amahan. Dalidali nako nga gibiyaan ang miting ug mitubag: “Kumusta, Pa!”

Wala damha, ang iyang tingog napuno sa emosyon: “Kumusta, Bonnie. Naa koy kinahanglan nga isulti nimo. Gidayagnos ko nga adunay ALS.”

Naglibog kaayo ko, “Huwat usa! Unsa man ang ALS?”

Gipasabot na dayon ni Papa, “Ang akong hunahuna magpabilin nga abtik samtang ang akong lawas hinay-hinay nga maluya.”

Gibati nako nga dako gayod ang mahimong kausaban niini sa akong kinabuhi samtang nagsugod ko sa pagpakigbisog sa unsay mahimong mga sangpotanan niining makapasubo nga balita. Apan nianang dili malimtan nga adlaw, ang iyang kataposan nga gipamulong ang adunay dako kaayo nga impluwensiya ug kanunay nakong mahinumdoman. Ang akong pinalanggang amahan misulti nga may pagkadinalian, “Bonnie, gamita gayod ang tanang kahigayonan nga makapamatuod kang Kristo.” (“Gamita Gayod ang Tanang Kahigayonan nga Makapamatuod kang Kristo,” Liahona, Mayo 2023, 10.)

Nakadungog ka ba o nakabasa og pagpamatuod mahitungod ni Kristo bag-ohay lang? Kon mao, sa unsang paagi kini nakaapekto kanimo?

Ipasabot nga diha sa Mga Buhat 22–26, si Pablo mihatag og pipila ka mga pakigpulong nga nanalipod sa iyang kaugalingon atubangan sa relihiyoso ug sibil nga mga awtoridad. Sa matag higayon siya usab migamit sa oportunidad sa pagpamatuod sa Manluluwas.

Ipakita ang mosunod nga mga tudling. Ang mga estudyante mahimong magporma og ginagmay nga mga grupo. Tahasi ang matag grupo og usa sa mga tudling. Dapita ang mga estudyante sa pagpangita sa unsay ilang nakat-onan mahitungod sa pagpakigbahin og pagpamatuod gikan sa kasinatian ni Pablo.

Mga Buhat 21:40; 22:1–8, 12–16, 22–23
Mga Buhat 22:30; 23:1–6, 11–14
Mga Buhat 24:1–6, 9–16, 24–25
Mga Buhat 26:1–3, 12–29

Human sa igo nga panahon alang sa grupo sa pagtuon ug sa paghisgot, hangyoa ang mga estudyante sa pagpakigbahn kon unsa ang ilang nakat-onan gikan ni Pablo mahitungod sa paghatag og papamatuod. Tabangi ang mga estudyante sa pag-ila og usa ka kamatuoran sama sa mosunod: Ang mga disipulo ni Jesukristo andam nga mobarog isip mga saksi Niya sa tanan nga mga panahon ug sa tanan nga mga dapit. (Mahimo kamo magdungan sa pagbasa sa Mosiah 18:9.)

Sa unsa nga mga kahimtang o mga sitwasyon nga mahimong lisod ang mahimong usa ka saksi sa Manluluwas?
Unsa ang nagtabang nimo nga mahimong mas andam sa pagpamatuod kang Jesukristo?
Sa unsang paagi ang imong hugot nga pagtuo naimpluwensiyahan kon ikaw makadungog sa ubang mga tawo nga nagpamatuod kang Jesukristo?

Mahimo nimong taposon pinaagi sa pagpakigbahin sa mosunod nga pagdapit gikan ni Sister Cordon:

Ang akong amahan kapin na karon sa 11 ka tuig nga namatay, apan ang iyang mga gisulti buhi lang gihapon ngari kanako. “Bonnie, gamita gayod ang tanang kahigayonan nga makapamatuod kang Kristo.” Ako modapit kaninyo nga moapil nako sa pagdawat niini nga imbitasyon. Pangitaa si Kristo bisan asa—ako mosaad nga Siya anaa! Ang tinuod nga kalipay anaa sa atong kaandam nga mas mapaduol ngadto ni Kristo ug mosaksi mismo sa atong kaugalingon. (“Gamita Gayod ang Tanang Kahigayonan nga Makapamatuod kang Kristo,” Liahona, Mayo 2023, 12)

Dapita ang mga estudyante sa pagdawat sa pagdapit ni Sister Cordon pinaagi sa pagpangita ug pag-ampo alang sa oportunidad sa pagpamatuod kang Kristo sa dili pa ang sunod nga klase. Pahinumdumi ang mga estudyante nga ang pagpakigbahin og usa ka pagpamatuod sa Manluluwas dili kinahanglan nga ingrande o pormal. Sa kasagaran, kini mahitabo diha sa gamay ug yano nga mga paagi. Ang mga estudyante mahimong makahangyo og usa ka pares sa pagpahinumdom kanila atol sa semana sa pagtuman sa imbitasyon ni Sister Cordon.

Pagpalambo sa Atong Pagtudlo ug Pagkat-on

Awhaga ang mga estudyante sa pagtabang sa usag usa sa pagtuman sa ilang mga pasalig. Ang mga estudyante mas lagmit nga motuman sa mga pasalig kon sila adunay tabang gikan sa ubang mga tawo. Ang mga estudyante mahimong mopili og usa ka pares ug dayon mopahinumdom ug moawhag sa usag usa atol sa semana sa pagtuman sa ilang mga pasalig.

Balik ngadto sa “Mga Opsiyon sa Kalihokan sa Pagkat-on.”

Mga Buhat 27

Sa unsang paagi nga ang mga propeta ug mga apostoles sa Ginoo makahatag kanako og kaluwasan ug proteksiyon?

Ikonsiderar ang pagsulat diha sa pisara sa mosunod nga pamahayag ni Sister Sheri L. Dew, kanhi Ikaduhang Magtatambag sa Kinatibuk-ang Kapangulohan sa Relief Society: “Ang mga propeta motabang kanato nga makakita sa mga suok” (“Prophet Can See around Corners” [Brigham Young University-Hawaii devotional, Nov. 2, 2022], speeches.byuh.edu).

Unsa kaha ang gipasabot niini nga pamahayag? (Mahimo nimong basahon ang Mosiah 8:16–18 aron sa paghatag og doktrinal nga pundasyon alang sa pamahayag ni Sister Dew. Mahimo dayon nimong usbon ang pamahayag diha sa pisara sama sa mosunod: Isip mga manalagna, ang mga propeta ug apostoles sa Ginoo makatabang kanato sa pagpangandam alang sa umaabot nga mga panghitabo aron kita makapuyo nga adunay dugang nga kaluwasan ug panalipod.)

Ipasabot nga si Pablo usa ka binilanggo samtang siya mibiyahe paingon sa Roma agi sa dagat atol sa mga bulan nga tingtugnaw. Samtang gibasa sa mga estudyante ang Mga Buhat 27:7–44, dapita sila sa pagpangita kon sa unsang paagi ang gasa sa pagkamanalagna ni Apostol Pablo mitugot kaniya nga “makakita sa palibot” atol niini nga panaw. (Pahinumdom: Mahimo nimong ipasabot sa mga estudyante ang “Mga Buhat 27:9. Unsa ang gipasabot sa ‘tingpuasa‘ nga gihisgotan dinhi?”ug “Mga Buhat 27:14. Unsa ang ‘Hangin nga Amihan [Euroclydon]’?” diha sa Tabang sa Kasulatan: Bag-ong Tugon alang sa dugang nga konteksto.)

Human nga ang mga estudyante makagahin og higayon sa pagbasa sa tudling, dapita sila sa pagpakigbahin kon unsa ang ilang nakat-onan mahitungod sa gasa sa pagkamanalagna ni Pablo. Kon makatabang, mahimo ka nga makapangutana sama sa mosunod:

Unsa man ang mga sangpotanan sa pagbaliwala sa tambag ni Pablo? (tan-awa sa mga bersikulo 10–20)?
Unsay epekto sa mga pulong ni Pablo diha sa mga pasahero sa barko (tan-awa sa mga bersikulo 21–36)?
Unsay inyong nakat-onan mahitungod sa mga gasa sa pagkamanalagna gikan niini nga asoy?

Mahimo nimong ipakita ang mga litrato sa Unang Kapangulohan ug sa Korum sa Napulog Duha ka Apostoles ug mopamatuod nga sila gitawag ni Jesukristo sa paggiya sa Iyang Simbahan isip mga propeta, mga manalagna, ug mga tigpadayag.

Nganong importante man kaayo nga kita adunay mga manalagna sa atong panahon?
Unsa ang pipila ka mga ehemplo kon sa unsang paagi nga kita napanalanginan pinaagi sa pagsunod sa mga propeta, mga manalagna, ug mga tigpadayag? (Mahimo nimong ipapangita sa mga estudyante ang bag-ohay lang nga mga pakigpulong sa kinatibuk-ang komperensiya o mga mensahe ngadto sa mga young adult alang sa mga pananglitan.)
Sa unsang paagi nga ang pagsunod sa mga propeta, mga manalagna, ug mga tigpadayag makapaduol kaninyo ngadto ni Jesukristo? Sa unsang paagi ang pagpatalinghog sa ilang mga pulong nagpakita sa inyong pagsalig diha sa Manluluwas?

Ikonsiderar ang pagpakigbahin sa mosunod nga pamahayag ni Sister Dew:

Ang mga propeta makakita sa mga butang nga dili nato makita tungod kay “ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta” [Amos 3:7].

Mao kini ang hinungdan nga ang mga propeta naghimo kanato nga mas maalamon kay sa ubang mga lider o mga tig-impluwensiya dinhi sa yuta. Ang mga propeta nagtabang kanato nga makakita sa mga pilegro nga dili nato makita ug mga oportunidad nga dili gani nato mahanduraw. …

Minahal kong mga higala, kang kinsa kamo maminaw? Asa man nga han-ay nakabutang ang pagsunod sa propeta diha sa lista niadtong imong duolan alang sa tambag? Pila man ka mga buta nga giya, kansang hanap nga panan-aw sa kinabuhi dili labaw pa kaysa sa imo, nagsunod ka ba og mga podcast ug TikTok? Ayaw itugot nga ang buta nga mga tiggiya mohap sa imong panan-awon sa mga manalagna, kinsa makakita sa suok sa palibot. …

… Ang imong labing dako nga espirituhanong kaluwasan moabot pinaagi sa pagsunod sa propeta. (“Prophet Can See around Corners” [Brigham Young University-Hawaii devotional, Nob. 2, 2022], speeches.byuh.edu)

Hatagi ang mga estudyante og igong panahon sa pagpamalandong sa pamahayag ni Sister Dew. Awhaga sila sa pagrekord kon unsay ilang mahimo aron maseguro nga sila nagsunod sa tambag sa buhi nga mga propeta, mga manalagna, ug mga tigpadayag sa Ginoo. Mahimo usab nga mopakigbahin ang mga estudyante kon sa unsang paagi sila nakasinati og dugang nga kaluwasan ug proteksiyon pinaagi sa pagsunod sa buhi nga mga manalagna sa Ginoo.

Balik ngadto sa “Mga Opsiyon sa Kalihokan sa Pagkat-on.”