1 Mga Taga-Corinto 14–16

Mahimo ninyong sugdan ang klase pinaagi sa pagpakigbahin sa mosunod nga pamahayag ni Presidente Joseph Fielding Smith:

Ang tanang miyembro sa Simbahan kinahanglan nga magtinguha sa gasa sa pagpanagna. (Church History and Modern Revelation [1953], 1:201)

• Ngano kaha nga angay man kitang magtinguha sa gasa sa pagpanagna?

Ipasabot nga diha sa 1 Mga Taga-Corinto 14, naghisgot si Pablo mahitungod sa importansiya sa gasa sa pagpanagna pinaagi sa pagkompara niini ngadto sa gasa sa pinulongan. Dapita ang mga estudyante sa pagbasa sa “1 Mga Taga-Corinto 14:1–6. Unsa ang gasa sa pagpanagna?” ug “1 Mga Taga-Corinto 14:2–22. Unsa ang gasa sa pinulongan?” diha sa Mga Tabang sa Kasulatan: Bag-ong Tugon. Hangyoa sila sa pagpasabot sa matag usa niining mga gasa ngadto sa kapares pinaagi sa ilang kaugalingong mga pulong.

• Unsa ang giklaro o gihusto niini nga mga pulong sa inyong pagsabot mahitungod niini nga mga gasa?

Seguroha nga makasabot ang mga estudyante nga samtang ang mga propeta sa Ginoo, mga manalagna, ug mga tigpadayag mao lamang ang mga tawo nga makadawat og pagpadayag alang sa tibuok Simbahan, ang mga indibiduwal makasinati sa gasa sa pagpanagna alang sa ilang kaugalingong kaayohan (tan-awa sa Dallin H. Oaks, “Spiritual Gifts,” Ensign, Sept. 1986, 71).

Dapita ang mga estudyante sa pagbasa sa 1 Mga Taga-Corinto 14:1–6, 22–26, 39, susihon kon ngano nga angay kitang magtinguha sa gasa sa pagpanagna:

• Ngano nga ang gasa sa pagpanagna mas labaw kay sa gasa sa pinulongan?

• Sumala ni Pablo, sa unsang paagi ang gasa sa pagpanagna mopanalangin sa inyong kinabuhi? (Mahimong makaila ang mga estudyante og usa ka kamatuoran nga sama sa mosunod: Ang gasa sa pagpanagna makahatag og kalig-on, kadasig, ug kalipay [tan-awa sa bersikulo 3].)

• Ngano kaha nga importante man alang kaninyo ang pagpangibog (mahinamon nga pagtinguha) sa gasa sa pagpanagna?

Ikonsiderar ang pagpakigbahin sa mosunod nga panabot gikan ni Presidente Dallin H. Oaks mahitungod sa gasa sa pagpanagna:

Sigon sa atong mabasa sa Basahon sa Pagpadayag, “Ang pagpamatuod ni Jesus mao ang espiritu sa pagpanagna.” (Pin. 19:10.) Si Propeta Joseph Smith misalig niini nga kasulatan sa pagtudlo nga ang “matag tawo nga adunay pagpamatuod ni Jesus” usa ka propeta [diha sa Elders’ Journal, July 1838, 43]. Sa samang paagi, si Apostol Pablo mipahayag nga “siya nga nagahimog profesiya nagasulti ngadto sa mga tawo aron sa paglig-on, ug pagdasig, ug paglipay kanila.” (1 Mga Taga-Cor. 14:3) Sa ingon, mahitungod niini nga paghisgot sa espirituhanong mga gasa, ang usa ka propeta mao ang tawo nga mopamatuod ni Jesukristo, magtudlo sa mga pulong sa Dios, ug motambag sa mga katawhan sa Dios. …

“… Sa atong panahon, si Elder Joseph Fielding Smith mipahayag nga ang “tanang mga miyembro sa Simbahan angay nga magtinguha sa gasa sa pagpanagna, alang sa ilang kaugalingong giya, nga mao ang espiritu diin ang pulong sa Ginoo masabtan ug ang iyang katuyoan mahibaloan.” (Church History and Modern Revelation, 3 vols., Salt Lake City, Deseret Book Co., 1953, 1:201.) (“Spiritual Gifts,” 71)

• Unsa ang inyong nakat-onan gikan ni Presidente Oaks ug ni Presidente Smith mahitungod sa gasa sa pagpanagna?

• Sa unsang paagi ang pagtinguha sa gasa sa pagpanagna mas makapaduol ninyo ug niadtong inyong gidasig ngadto sa Manluluwas?

Pahunahunaa ang mga estudyante sa mga panahon nga nabati nila ang Espiritu Santo ug nagpamatuod ni Jesukristo, nagtudlo sa ebanghelyo, nagdasig sa uban, o mas nakasabot sa mga katuyoan sa Ginoo. Dapita ang mga estudyante kinsa matinguhaong mopakigbahin sa ilang mga kasinatian kalabot sa gasa sa pagpanagna.

Dapita ang mga estudyante sa pagsunod sa tambag ni Pablo ug sa pagtinguha ug paggamit sa gasa sa pagpanagna sa ilang kinabuhi.

Balik ngadto sa “Mga Opsiyon nga Kalihokan sa Pagkat-on.”

Kon dunay pangutana ang mga estudyante mahitungod sa 1 Mga Taga-Corinto 14:34–35, ipabasa nila ang “Approaching Difficult or Confusing Passages” diha sa Scripture Study Skills ug ipabasa og dungan ang “Define” nga seksiyon. Dayon pahimoa ang mga estudyante og gagmay nga mga grupo ug buhaton ang mosunod:

• Basahon ang “Questions to Ask When You Find Confusing or Difficult Passages” diha sa “Approaching Difficult or Confusing Passages” (Scripture Study Skills). Pwedeng hisgotan sa mga estudyante kon unsaon nila pagtubag sa usa o sa mas daghan pa nga mga pangutana.

• Basahon ang “1 Mga Taga-Corinto 14:34–35. Nganong gisulti ni Pablo nga ang mga babaye kinahanglan nga magpakahilom sa simbahan?” diha sa Mga Tabang sa Kasulatan: Bag-ong Tugon alang sa dugang nga tabang niana nga tudling.

Human sa panahon sa pagtuon, dapita ang mga estudyante sa pagpakigbahin sa unsay ilang nakat-onan mahitungod sa pamaagi sa pagtuon og lisod nga tudling sa kasulatan.

Pahinumdumi ang mga estudyante nga si Pablo nagsulat ngadto sa mga tawo nga lahi kaayo og kultura og mga sirkumstansya kay sa atoa. Tingali mahinungdanon ang paggahin og pipila ka minuto ug maghisgot sa mga tingog sa kababayen-an sa Simbahan sa Ginoo sa atong panahon. Ikonsiderar ang pagpakigbahin sa mosunod nga pamahayag ni Presidente Russell M. Nelson:

Minahal kong mga sister, bisan unsay inyong calling, bisan unsay inyong mga kahimtang, nagkinahanglan kami sa inyong mga hunahuna, inyong mga panabot, ug sa inyong inspirasyon. Kami nagkinahanglan kaninyo nga motingog ug mamulong diha sa mga konseho sa ward ug sa stake. Nagkinahanglan kami sa matag minyo nga sister nga mamulong isip “usa ka makatampo ug hingpit nga kauban” [Spencer W. Kimball, “Privileges and Responsibilities of Sisters,” Ensign, Nov. 1978, 106] samtang kamo makighiusa sa inyong bana sa pagdumala sa inyong pamilya. Minyo o dili, kamong mga sister adunay talagsaong mga kapasidad ug espesyal nga panabot nga inyong nadawat isip gasa gikan sa Dios. Kaming mga lalaki dili makapareha sa inyong talagsaong impluwensya. (“Usa ka Hangyo ngadto sa Akong mga Sister,” Liahona, Nob. 2015, 97)

• Unsa ang gitudlo ni Presidente Nelson mahitungod sa mga tingog sa kababayen-an? (Tabangi ang mga estudyante sa pag-ila sa kamatuoran nga ang mga kontribusyon ug mga tingog sa kababayen-an mahinungdanon kaayo sa matag aspeto sa buluhaton sa Manluluwas.)

• Sa unsang paagi nga ang mga tingog sa kababayen-an nakalig-on sa inyong pagtuo ni Jesukristo? Sa unsang paagi kini nakapaduol ninyo ngadto sa Manluluwas?

Mahimo kang modapit sa mga estudyante sa paghunahuna mahitungod sa usa ka bag-ohay nga pakigpulong, leksiyon, o pagpamatuod sa usa ka sister nga nakapalig-on sa ilang pagtuo kang Jesukristo ug sa Iyang Ebanghelyo. Mahimo nilang ipakigbahin ang ilang mga hunahuna sa usag usa pinaagi sa gagmay nga mga grupo.

Dasiga ang mga sister sa inyong klase nga mosalig sa Espiritu kon mobati nga giaghat ug mosulti sa ilang hunahuna diha sa ilang mga pamilya, sa ward, ug sa ubang mga sitwasyon. Mahimo ninyong taposon pinaagi sa pagtan-aw sa “Women’s Voices” ni Presidente Camille N. Johnson, Kinatibuk-ang Presidente sa Relief Society (1:39).

Balik ngadto sa “Mga Opsiyon nga Kalihokan sa Pagkat-on.”

Dapita ang mga estudyante sa pag-ila sa mga hagit nga atong giatubang tungod kay kita adunay mortal nga mga lawas. Mahimo ninyong isulat ang ilang mga tubag diha sa pisara. (Seguroha nga ilang maila ang kamatayon isip usa sa mga hagit.) Karon ipahunahuna sa mga estudyante kini nga mga hagit kon pananglitan wala pa mabanhaw si Jesukristo.

• Unsa kaha ang kahulogan niana para sa kalibotan ug para kaninyo mismo?

Ipasabot nga adunay nagtaho kang Pablo nga ang ubang mga indibiduwal sa Corinto nagtudlo nga walay Pagkabanhaw sa mga patay. Mitubag si Pablo gamit ang mga kamatuoran nga makatabang kanato aron mahibalo ug mobati sa kamatuoran ug sa kamahinungdanon sa Pagkabanhaw sa Manluluwas.

Isulat diha sa pisara ang mosunod nga dili kompleto nga mga hugpong sa mga pulong:

• Kon si Jesus wala pa mabanhaw gikan sa pagkamatay, ang mahitabo …

• Tungod kay si Jesus mibangon gikan sa mga patay, ang mahitabo …

Dapita ang katunga sa klase sa pagbasa sa 1 Mga Taga-Corinto 15:12–19, mangita kon unsa kaha ang mahitabo kon si Jesukristo wala pa mobangon gikan sa kamatayon. Dapita ang laing katunga sa pagbasa sa 1 Mga Taga-Corinto 15:20–28, mangita sa mga panalangin nga moabot tungod sa pagbuntog ni Jesukristo sa kamatayon. Human sa igong panahon, tugoti ang mga estudyante sa pagpakigbahin kon unsa ang ilang nadiskobrehan.

• Sumala ni Pablo, unsa ang moresulta kon wala mabanhaw si Jesukristo?

• Unsa nga doktrina ang gitudlo ni Pablo niini nga mga bersikulo? (Ang mga estudyante mahimong moila og usa ka kamatuoran sama sa mosunod: Kay nabanhaw man si Jesukristo, ang tanan mabanhaw.)

• Unsa ang inyong gibati alang ni Jesukristo, sanglit nasayod nga nag-andam Siya og paagi aron kamo makabuntog sa kamatayon ug sa matag pisikal nga kahuyang nga kamo aduna o sa umaabot inyong atubangon?

Balik ngadto sa lista as mga hagit nga anaa sa pisara. Samtang maghunahuna niini nga mga hagit, basaha og dungan ang 1 Mga Taga-Corinto 15:51–58 ug ang mosunod nga pamahayag ni Presidente Jeffrey R. Holland:

Ako mopamatuod sa balaang Pagkabanhaw, nianang dili matukib nga labing mahinungdanon nga gasa sa Pag-ula ni Ginoong Jesukristo! Uban ni Apostol Pablo, ako mopamatuod nga ang lawas nga madunot pagabanhawon nga dili [na] madunot ug kadtong gitisok nga mahuyang pagabanhawon [unya] nga makagagahom. Ako mopamatuod niana nga adlaw nga ang atong mga minahal nga may kakulangan dinhi sa mortalidad mobarug sa atong atubangan nga mahimayaon ug halangdon, sa makapatingala nga hingpit nga lawas ug hunahuna. Pagkamahinamon nga paaboton nianang higayona! Wala ko masayod kon kita ba mas malipayon para sa atong kaugalingon nga nakasaksi niining milagro o mas malipayon para sa uban nga sila nahingpit ug sa kataposan “maluwas.” Hangtod sa oras nga ang hingpit nga gasa ni Kristo mabatyagan natong tanan, kita unta magpakabuhi nga may pagtuo, mohupot og maayo sa paglaum, ug mopakita nga “maloloy-on sa usag usa” [1 Pedro 3:8]. (Sama sa Usa ka Sudlanan nga Nabuak,” Liahona, Nob. 2013, 42)

• Sa unsang paagi nga ang pagtuo sa Pagkabanhaw sa Manluluwas makatabang kaninyo nga magpakabuhi nga malaomon samtang mag-atubang kamo og mga hagit nga may kalabotan sa pisikal nga lawas?

Mahimo usab ninyong tan-awon ang “The Good News” (2:18) ug tugotan ang mga estudyante sa pagpamalandong ug pagsulat sa ilang mga pagbati mahitungod sa mga panalangin nga madawat nila tungod sa Pagkabanhaw ni Jesukristo.

2:18

Balik ngadto sa “Mga Opsiyon nga Kalihokan sa Pagkat-on.”

Mahimo ninyong sugdan pinaagi sa pag-display sa mosunod nga mga hulagway ug hangyoon ang mga estudyante sa pagpakigbahin kon unsa kaha ang gitudlo niini mahitungod sa Pagkabanhaw.

Ipasabot nga diha sa 1 Mga Taga-Corinto 15, nagtudlo si Pablo og importanteng mga kamatuoran mahitungod sa Pagkabanhaw. Basaha og dungan ang 1 Mga Taga-Corinto 15:40–44, ug dapita ang mga estudyante sa pagsusi kon unsay kalabotan sa hulagway ngadto sa gitudlo ni Pablo mahitungod sa Pagkabanhaw.

• Unsa nga mga kamatuoran ang gitudlo ni Pablo mahitungod sa kinaiyahan sa nabanhaw nga mga lawas? (Ang mga estudyante mahimong moila og mga kamatuoran sama sa mosunod: Ang nabanhaw nga mga lawas mga mahimayaon ug dili madunot. Ang nabanhaw nga mga lawas makaangkon og managlahi nga ang-ang sa himaya.)

• Sa inyong hunahuna ngano kaha nga adunay mga kalainan sa himaya tali sa nabanhaw nga mga binuhat?

Itudlo nga may pipila kita ka mga tudling sa kasulatan nga naghulagway sa nabanhaw nga lawas gikan sa usa niining mga gingharian. Mahimong basahon sa mga estudyante ang Joseph Smith—Kasaysayan 1:17 ug ang Doktrina ug mga Pakigsaad 110:2–4 aron magbasa mahitungod sa nahimaya, nabanhaw nga lawas sa Manluluwas.

• Unsa ang nakadasig ninyo samtang nagtuon kamo mahitungod sa nabanhaw nga Kristo?

Aron matabangan ang mga estudyante sa pagpalawom sa ilang kahibalo kon nganong may mga kalainan sa himaya sa nabanhaw nga mga lawas, dapita sila nga magtinabangay sa ilang kapares ug tan-awon kon unsa ang ilang makat-onan gikan sa Doktrina ug mga Pakigsaad 88:22–31.

• Unsa ang gitudlo niini nga mga bersikulo kanato mahitungod sa Pagkabanhaw? (Ang mga estudyante mahimong moila og usa ka kamatuoran nga sama sa mosunod: Diha sa Pagkabanhaw, makadawat kita og nahimaya nga lawas sumala sa diosnong balaod nga atong pilion nga maoy sundon.)

• Sa unsang paagi kini nga kahibalo maka-impluwensiya sa mga pagpili nga inyong himoon karon?

Ikonsiderar ang pagbasa og dungan sa mosunod nga pamahayag ni Presidente Russell M. Nelson:

Tungod sa walay kinutoban nga Pag-ula ni Jesukristo, ang plano sa Langitnong Amahan usa ka hingpit nga plano! Ang pagsabot sa katalagsaon sa plano sa Dios mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot. Kini makatugot sa matag usa nato sa pagpili sa unsang paagi kita magpuyo dinhi sa yuta ug asa kita magpuyo sa kahangtoran. …

… Ang inyong mga pagpili karon motino og tulo ka butang: asa kamo magpuyo hangtod sa kahangtoran, ang matang sa lawas nga kamo mabanhaw, ug kadtong inyong ikauban sa pagpuyo sa kahangtoran. …

Sa ingon, kon kita dili maalamong mopili nga mopuyo sa telestial nga mga balaod karon, kita nagpili nga mabanhaw sa telestial nga lawas. Kita nagpili nga dili mopuyo uban sa atong mga pamilya sa kahangtoran.

Mao nga, minahal kong kaigsoonan, unsaon ug asa ug uban ni kinsa kamo gusto nga magpuyo sa kahangtoran? Kamo may kahigayonan sa pagpili. (“Paghunahuna og Celestial!,” LiahonaNob. 2023, 117–18)

Hatagi ang mga estudyante og panahon sa pagrekord sa ilang mga hunahuna mahitungod sa pangutana ni Presidente Nelson: “Unsaon ug asa ug uban ni kinsa kamo gusto nga magpuyo sa kahangtoran?” Awhaga sila sa pagpamalandong sa mga pagpili nga ilang gibuhat ug kon kana nga mga pagpili naggiya nila ngadto sa celestial nga himaya. Ang mga estudyante mahimo usab nga morekord sa ilang mga hunahuna ug mga pagbati mahitungod sa walay kinutoban nga Pag-ula sa Manluluwas ug sa hingpit nga plano sa Amahan sa kaluwasan nga naghimong posible sa celestial nga himaya.

Balik ngadto sa “Mga Opsiyon nga Kalihokan sa Pagkat-on.”