1–3 Juan; Judas

Ipakita ang mosunod nga pagsukod sa kaugalingon, ug dapita ang mga estudyante nga kompletohon kini sa ilang kaugalingon:

Human makompleto ang pagtimbang-timbang sa kaugalingon, dapita ang mga estudyante sa pagpamalandong sa mosunod nga pangutana:

• Unsa ang gipadayag niini nga pagtimbang-timbang sa kaugalingon mahitungod sa unsay atong gibuhat agig tubag sa sala?

Ipasabot nga si Juan nagtanyag kanato og importante nga mensahe mahitungod sa sala ug unsaon sa pagbuntog niini. Dapita ang mga estudyante sa pagtuon sa 1 Juan 1:5–10; 2:1–6, nga mangita sa mga kamatuoran mahitungod sa paagi sa Ginoo sa pagbuntog sa sala. Mahimo usab nimong hangyoon ang mga estudyante sa paghunahuna sa dugang nga panabot sa Hubad ni Joseph Smith, 1 Juan 2:1. Mahimo ka nga mangutana sama sa mosunod:

• Sa unsang paagi nga ang pagpuyo diha sa kahayag sa ebanghelyo sa Manluluwas makatabang kanato sa pagbuntog sa sala?

• Ngano nga ang pagkompisal usa ka importante nga lakang sa pagbuntog sa sala?

• Unsay inyong nakat-onan bahin sa tahas sa Manluluwas sa kapasayloan sa atong mga sala? (Tabangi ang mga estudyante sa pag-ila sa mga baroganan sama sa mosunod: Tungod kay si Jesukristo mitubos sa atong mga sala, mahimo kitang mapasaylo kon kita maghinulsol. Si Jesukristo mao ang atong Manlalaban ngadto sa Amahan.)

Mahimong importante ang paghatag sa mga estudyante og panahon sa pagpalawom sa ilang pagsabot sa tahas sa Manluluwas isip atong Manlalaban ngadto sa Langitnong Amahan. Sila makatuon gikan sa mosunod nga mga kapanguhaan. Samtang magtuon sila, paandama sila og mubo nga mensahe mahitungod kon sa unsang paagi si Jesukristo, isip atong Manlalaban, makatabang sa usa ka tawo nga nawad-an sa kadasig tungod sa ilang mga sala.

• Basaha ang pipila ka mga tudling sa kasulatan nga gilista diha sa entry nga ““Manlalaban”” sa Giya ngadto sa mga Kasulatan (Librarya sa Ebanghelyo).

• Basaha ang “1 Juan 2:1–2; 4:10. Unsay buot ipasabot nga si Jesus mao ang atong Manlalaban?” diha sa Mga Tabang sa Kasulatan: Bag-ong Tugon.

Human sa panahon sa pagtuon, dapita ang mga estudyante sa pagpangita og kapares ug magpuli-puli sa pagpakigbahin sa ilang mensahe kon sa unsang paagi si Jesukristo, isip atong Manlalaban, makatabang nato sa pagbuntog sa sala.

Aron matabangan ang mga estudyante nga mobati sa kamatuoran ug importansya ni Jesukristo isip atong Manlalaban, mahimo kang mangutana:

• Unsa nga mga hunahuna ug mga pagbati ang anaa kaninyo mahitungod ni Jesukristo, nasayod sa bili nga Iyang gibayad aron Siya mahimong inyong Manlalaban?

• Sa unsang paagi ang pagtan-aw kang Jesukristo isip inyong Manlalaban makapausab sa inyong panglantaw sa paghinulsol? (Mahimong irekord sa mga estudyante ang ilang mga hunahuna ug mga impresyon.)

Sa pagtapos, mahimo nimong ipabalik sa mga estudyante ang pagtimbang-timbang sa kaugalingon nga ilang gihimo sa pagsugod sa klase. Ipasusi pag-usab nila ang ilang mga tubag base sa ilang nakat-onan o gibati karon.

Balik ngadto sa “Mga Opsiyon nga Kalihokan sa Pagkat-on.”

Mahimo nimong ipakita ang mosunod nga mga hulagway sa Manluluwas. Dapita ang mga estudyante sa pagpakigbahin kon unsa nga mga hunahuna ug mga pagbati nga sila aduna dihang sila nagtan-aw niini nga mga hulagway.

• Unsa ang atong makat-unan gikan ni Jesukristo mahitungod sa gugma? (Kon makatabang, mahimo kang mobasa sa Juan 13:34–35.)

Ipasabot nga usa sa kinauyokan nga mga mensahe sa 1 Juan mao ang gugma. Si Juan migamit sa pulong nga gugma sobra sa 30 ka higayon. Mahimong isulat diha sa pisara ang mosunod nga mga ulohan. Mahimo usab kining isulat sa mga estudyante sa papel o sa digital.

Depende sa gidak-on sa imong klase, ang mga estudyante mahimong magtrabaho nga mag-inusara, dunay kapares, o diha sa gagmay nga mga grupo. Sangoni ang mga indibidwal, mga kapares, o mga grupo sa usa sa mosunod nga mga tudling. Ipapangita nila ang mga pulong, hugpong sa mga pulong, o mga ideya nga mahimong ibutang ubos sa matag ulohan. Ipasulat nila ang ilang mga panabot ubos sa angay nga ulohan sa ilang kaugalingong papel ug dayon diha sa pisara.

1. 1 Juan 2:7–11

2. 1 Juan 3:10–15

3. 1 Juan 3:16-19, 23

4. 1 Juan 4:7–16

5. 1 Juan 4:17–21

6. 1 Juan 5:1–5

Human masulat sa mga estudyante ang ilang mga panabot diha sa pisara, dapita sila sa pag-ila sa gipahayag, gipasabot, o gihulagway nga mga kamatuoran nga gikan niini nga mga bersikulo (tan-awa sa “Pag-ila sa mga Kamatuoran sa Ebanghelyo diha sa mga Kasulatan” sa Mga Kahanas sa Pagtuon sa Kasulatan). Mahimo nilang isulat sa pisara ang ilang mga kamatuoran, nga mahimong maglakip sa mosunod: Atong ipahayag ang atong gugma sa Dios kon kita maghigugmaay ug moserbisyo sa usag usa. Ang Dios gugma. Ang Dios mipakita sa Iyang gugma alang kanato pinaagi sa pagpadala sa Iyang Anak ngari sa kalibotan. Ang gugma sa Dios nagahingilin sa kahadlok. Atong ipakita ang atong gugma sa Dios pinaagi sa pagtuman sa Iyang mga sugo.

Samtang ang mga estudyante moila sa mga kamatuoran, hatagi sila og panahon sa paghunahuna sa kaimportante niini nga mga kamatuoran mahitungod sa gugma. Mahimo kamong mangutana sama sa mosunod:

• Kanus-a nimo nakita kini nga kamatuoran mahitungod sa gugma nga ipakita sa buhat?

• Sa unsang paagi ka naimpluwensyahan sa usa ka tawo nga nagsunod niini nga kamatuoran?

• Unsa kaha ang kalainan sa inyong kinabuhi kon kamo mituo niini nga kamatuoran?

Hunahunaa ang pagpakigbahin sa mosunod nga pamahayag gikan ni Presidente Thomas S. Monson:

Sa tinuod, ang gugma mao ang kahulogan sa ebanghelyo ug si Jesukristo mao ang atong Ehemplo. Ang Iyang kinabuhi usa ka kabilin sa gugma. …

Adunay daghang mga kinaiya nga maoy timailhan sa gugma, sama sa pagkamabination, pailob, pagkadili hakog, pagsabot, ug pagpasaylo. Sa tanan natong pakig-abin, kini ug ang ubang samang kinaiya makatabang sa pagpakita sa gugma nga anaa sa atong kasingkasing.

Sa kasagaran ang atong gugma makita sa atong adlaw-adlaw nga inter-aksyon sa usag usa. Ang importante mao ang atong abilidad nga makakita sa panginahanglan sa usa ka tawo ug dayon motabang. (“Gugma—ang Kahulugan sa Ebanghelyo,” Liahona, Mayo 2014, 91)

Ipakita ang mosunod nga mga pangutana, ug dapita ang mga estudyante nga hilom nga mamalandong niini ug irekord ang bisan unsang mga impresyon nga naa nila:

• Kinsa kaha ang nagkinahanglan nga mobati sa gugma sa Manluluwas pinaagi kanako karon?

• Unsay akong masulti o mabuhat sa pagtabang nila nga mobati sa gugma sa Manluluwas?

Awhaga ang mga estudyante sa paglihok sa bisan unsang mga pag-aghat nga ilang madawat. Pahinumdomi sila nga kasagaran atong ipahayag ang gugma sa ginagmay, adlaw-adlaw nga pagpakig-uban. Mahimo nimong ipadala kanila ang kinutlo ni Presidente Monson sa ulahi sa semana uban ang pahinumdom sa paglihok uban ang gugma.

Balik ngadto sa “Mga Opsiyon nga Kalihokan sa Pagkat-on.”

Mahimo nimong sugdan pinaagi sa pagpakigbahin sa mosunod nga pamahayag ni Elder Gary E. Stevenson:

Si Satanas, ang amahan sa mga bakak ug ang bantogang tiglingla, moimpluwensya kanato sa pagkwestyon sa mga butang nga ingon niana ug mopabaliwala sa mahangtorong mga kamatuoran o mousab niini ngadto sa butang nga mas makapahimuot. “Siya nagpasiugda og gubat batok sa mga santos sa Dios” [Doktrina ug mga Pakigsaad 76:29] ug migahin og milenyum sa pagplano ug pagbansay sa abilidad sa pagdani sa mga anak sa Dios nga motuo nga ang maayo daotan ug ang daotan maayo. (“Ayaw Paglingla Kanako,” Liahona, Nob. 2019, 94)

• Unsa ang pipila ka ehemplo sa sayop nga mga pagtulun-an ug pagpanglingla sa atong panahon?

Ipasabot nga si Juan, usa sa Apostoles sa Ginoo, mihimo og mga sulat sa pagtubag sa sayop nga mga pagtulun-an ug sa pagpanglingla taliwala sa mga Santos. Ang iyang ehemplo nagpakita nga ang mga apostoles ug mga propeta sa Ginoo nagtanyag og proteksiyon gikan sa bakak nga mga pagtulun-an ug mga pagpanglingla. Usa ka bakak nga pagtulun-an nga iyang gitumong mao ang Docetismo. Aron mas masabtan kon nganong nakapabalaka kini ni John, dapita ang mga estudyante sa pag-adto sa “1 Juan 4:1–3; 2 Juan 1:7. Ngano nga ang uban wala mokumpisal nga si Jesukristo mianhi sa unod?” diha sa Mga Tabang sa Kasulatan: Bag-ong Tugon.

• Sa unsang paagi kining sayop nga pagtulun-an makapahuyang sa pagtuo kang Jesukristo?

Dapita ang mga estudyante sa pagtrabaho kauban sa usa ka pares o diha sa gagmay nga mga grupo ug basahon ang 1 Juan 1:1–3; 2:18–28; 4:1–6; 2 Juan 1:7–11, mangita sa mosunod: (1) mga pasidaan bahin sa bakak nga mga pagtulun-an ug (2) mga paagi aron mapanalipdan. Human sa panahon sa pagtuon, mahimo kang mangutana:

• Unsang mga pasidaan ang gihatag ni Juan?

• Unsa sa imong hunahuna ang gipasabot sa pagka-antikristo?

• Unsaon man sa usa ka tawo pagsulay sa mga espiritu? (Tingali gusto nimo nga magdungan sa pagbasa sa “1 Juan 4:1–3. Unsay buot ipasabot sa ‘pagsulay sa mga espiritu,’ ug ngano nga kini importante?” diha sa Mga Tabang sa Kasulatan:Bag-ong Tugon.)

• Sa unsang paagi kaha kining mga pulong gikan ni Juan nakatabang niining karaang mga Santos?

Ipakigbahin ang mosunod nga pamahayag ni Presidente Russell M. Nelson:

Usahay kami isip mga lider sa Simbahan gisaway tungod sa hugot nga paghupot sa mga balaod sa Dios, pagpanalipod sa doktrina sa Manluluwas, ug pagsalikway sa katilingbanong mga pagpamugos sa atong panahon. Apan ang among sugo isip giordinahan nga apostoles mao ang “pagpanlakaw ngadto sa tibuok kalibotan sa pagsangyaw sa [Iyang] ebanghelyo ngadto sa matag linalang.” Kana nagpasabot nga kami gimandoan sa pagtudlo sa kamatuoran. …

Kini eksakto tungod kay kami gusto sa labing maayo alang sa tanang mga anak sa Dios nga among gisangyaw ang Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami sa kanunay nagtudlo sa kamatuoran! (“The Love and Laws of God” debosyonal sa Brigham Young University, Sept. 17, 2019], 3, speeches.byu.edu)

• Ngano nga usahay lisod ang pagdawat sa mga pulong sa mga propeta ug apostoles sa Ginoo?

• Sa unsang paagi ang imong kinabuhi gipanalipdan sa ilang mga pagtulun-an?

Dapita ang mga estudyante sa pag-abli sa koleksiyon nga “Kinatibuk-ang Komperensiya” sa Librarya sa Ebanghelyo. Gamita ang himan sa pagpangita diha sa “Speakers” nga seksiyon, ug i-type ang ngalan sa kasamtangan nga propeta sa Ginoo. Pangitaa ang mga ulohan sa iyang mga pakigpulong, pangitaa ang mga mensahe nga mahimong magsilbing mga pasidaan batok sa bakak nga mga pagtulun-an ug pagpanglingla. Pagpili ug usa ka pakigpulong, ug pangitaa ang tambag nga makapanalipod kanimo.

Human ang mga estudyante adunay panahon sa pagpangita, awhaga sila sa pagpakigbahin sa unsay ilang nakit-an ngadto sa kaedad o sa klase. Dapita sila sa pagpaminaw sa tambag nga ilang nakita ug ipadayon ang pagpangita sa mga mensahe gikan sa buhing propeta sa Ginoo nga manalipod kanila gikan sa sayop nga mga pagtulun-an ug pagpanglingla.

Balik ngadto sa “Mga Opsiyon nga Kalihokan sa Pagkat-on.”