Juan 2–4

Mahimo nimong ipakita ang nag-uban nga hulagway ug ipasabot nga ang mga kasaulogan sa kasal sa mga Judeo sa mga panahon sa Bag-ong Tugon mahimong molungtad og pipila ka adlaw. Ang mahutdan og bino tingali makapaugtas gayod alang sa tagtungod sa kumbira sa kasal.

Ipakita ang mosunod nga mga pangutana, ug dapita ang mga estudyante sa pagpili sa usa nga labing makapainteres kanila. Dayon dapita sila sa pagtuon sa Juan 2:1–11 aron makakita og tubag ngadto sa ilang pangutana.

• Unsay inyong makat-onan mahitungod sa Manluluwas dinhi niini nga istorya?

• Unsa ang inyong makat-onan gikan kang Maria dinhi niini nga istorya?

• Unsa ang labing nakadani kaninyo mahitungod niining unang narekord nga milagro sa Manluluwas?

Human magkanaa og panahon sa pagtuon, ang mga estudyante mahimong mosulat diha sa pisara og usa ka tubag nga ilang nakit-an bahin sa ilang pangutana. (Ang mga tubag mahimong maglakip og mga panabot susama sa mosunod: si Jesus miapil sa inadlaw-adlaw nga mga kalihokan sa kinabuhi. Si Jesukristo adunay gahom batok sa pisikal nga mga elemento. Nahibalo ang Manluluwas nga Siya dunay balaang misyon nga tumanon. Si Jesus mihigugma ug mitahod sa Iyang inahan. Si Maria misalig kang Jesus.)

Ang mga estudyante dayon mahimong magpuli-puli sa pagpili og lahi-lahi nga mga pamahayag gikan sa pisara ug sa pagpangutana sa mga indibidwal kinsa misulat niini sa pagpakigbahin kon nganong kini nga pamahayag importante ngadto kanila ug sa unsang paagi kini magamit sa atong mga kinabuhi. Itugyan ug tugoti ang mga pangutana, mga panabot, ug mga aplikasyon sa mga estudyante sa paggiya sa diskusyon.

Pahinumdom: Kon ang inyong mga estudyante adunay mga problema mahitungod kon giunsa pagtawag ni Jesus ang Iyang inahan diha sa Juan 2:4 o naghunahuna kon nganong himoon Niya ang tubig ngadto sa bino kon ikonsiderar ang Pulong sa Kaalam (tan-awa sa Juan 2:1–11), itudlo sila ngadto sa konektado nga mga butang diha sa Scripture Helps: New Testament [Mga Tabang sa Kasulatan: Bag-ong Tugon].

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa nag-uban nga hulagway ni Jesus nga naghinlo sa templo o ang pagtan-aw sa “Jesus Cleanses the Temple [Si Jesus Mihinlo sa Templo]” (1:34). Ipasabot nga atol sa Pagpalabay, liboan ka bisita ang miabot sa Jerusalem aron sa pagsaulog sa sagrado nga kapistahan. Daghan kanila ang nagkinahanglan sa pagpalit og mga hayop aron itanyag isip mga sakripisyo diha sa templo. (Ikonsiderar ang pagrebyo og dungan sa “Juan 2:16. Nganong adunay mga tig-ilis og kuwarta sa templo?” diha sa Scripture Helps: New Testament [Mga Tabang sa Kasulatan: Bag-ong Tugon] alang sa dugang nga impormasyon.)

1:34

Dapita ang mga estudyante sa pagbasa sa Juan 2:13–17, ug hisgoti kon unsay matudlo kanato mahitungod sa templo sa mga aksiyon ug mga pulong ni Jesus nga narekord niini nga tudling. Ang mga estudyante mahimong moila og kamatuoran sama sa mosunod: Ang templo mao ang balay sa Ginoo ug kinahanglang itratar uban ang balaang pagtahod.

Aron sa pagtabang sa mga estudyante sa pagpalawom sa ilang pagsabot kon unsay buot ipasabot sa paghatag og balaang pagtahod sa balay sa Ginoo, mahimo nimong ipakita ang mosunod nga mga opsiyon sa pagkat-on. (Mahimong importante ang paggahin og panahon sa pagrebyo sa kahanas nga “Pagpangita sa Kahulogan sa mga Pulong ug mga Hugpong sa mga Pulong” diha sa Mga Kahanas sa Pagtuon sa Kasulatan.) Dapita ang matag estudyante sa pagpili sa kalihokan nga labing makapainteres kanila ug mag-andam sa pagpakigbahin sa ilang nakat-onan.

• Pagkat-on og dugang mahitungod sa kahulogan sa balaang pagtahod gamit ang Define [Hatagan og Kahulogan] nga feature sa Librarya sa Ebanghelyo. Dayon tun-i ang aytem nga “Balaan nga Pagtahod” diha sa Giya ngadto sa mga Kasulatan. Hunahunaa ang mahitungod sa piho nga mga kinaiya ug mga pamatasan nga makatabang kanato nga mahimong mas adunay balaang pagtahod kon kita motambong sa templo.

• Sa matag Santos sa Ulahing mga Adlaw nga templo nakakulit ang mga pulong nga “Pagkabalaan ngadto sa Ginoo; ang Balay sa Ginoo.” Pagkat-on og dugang mahitungod sa kahulogan sa pagkabalaan gamit ang Define [Hatagan og Kahulogan] nga feature sa Librarya sa Ebanghelyo. Tun-i usab ang mga aytem alang sa “Pagkabalaan” ug “Balaan” diha sa Giya ngadto sa mga Kasulatan. Hunahunaa kon unsaon ninyo sa pagpasabot ngadto sa usa ka tawo kon nganong ang “Pagkabalaan ngadto sa Ginoo” nakakulit sa atong mga templo.

• Ang mga garment sa templo mahimong usa ka gamhanan nga pahinumdom sa atong kasinatian sa templo. Basaha o tan-awa ang “Sacred Temple Clothing [Sagradong mga Panapot sa Templo]” (4:12), ug hunahunaa kon unsaon ninyo sa pagpasabot ang sagrado nga kinaiya sa garment sa templo ngadto sa usa ka tawo nga nangandam nga motambong sa templo alang sa unang higayon.

  

  4:12

Human ang mga estudyante adunay panahon sa pagtuon, mahimo silang magporma og gagmay nga mga grupo ug magpuli-puli sa pagpakigbahin sa unsay ilang nakat-onan sa ilang pagtuon.

Sa pagtapos niini nga kalihokan, mahimo nimong hatagan ang mga estudyante og panahon sa pagpamalandong ug pagrekord sa ilang mga hunahuna mahitungod sa mosunod nga pangutana:

• Unsa ang usa ka butang nga inyong himoon aron sa pagpakita og mas dako nga balaang pagtahod alang sa balay sa Ginoo?

Balik ngadto sa “Mga Opsiyon sa Kalihokan sa Pagkat-on.”

Ipakita ang mosunod nga pangutana, ug dapita ang mga estudyante sa pagrekord og tubag: Unsaon nako sa pagkahibalo kon natawo na ako pag-usab?

Dapita ang mga estudyante sa pagpamalandong niini nga pangutana samtang maghisgot ka mahitungod sa mga pagtulun-an sa Manluluwas ngadto ni Nicodemo.

Basaha og dungan ang Juan 3:1–2, ug hisgoti kon unsay gipadayag niini nga mga bersikulo mahitungod kang Nicodemo. Dayon ipabasa sa mga estudyante ang Juan 3:3–8, mangita alang sa unsay gitudlo sa Manluluwas mahitungod sa pagkatawo pag-usab.

• Sa unsa nga paagi nga nasayop sa pagsabot si Nicodemo sa mga pulong sa Manluluwas?

• Unsa ang gitudlo sa Manluluwas aron sa pagpalapad sa pagsabot ni Nicodemo? (Ang mga estudyante mahimong moila og kamatuoran sama sa mosunod: Kinahanglan nga igaanak kita sa tubig ug sa Espiritu aron makasulod sa gingharian sa Dios.)

• Sa unsang paagi ang pagkaanak sa tubig ug sa Espiritu adunay kalabotan sa mga ordinansa sa bunyag ug kompirmasyon? (Kon makatabang, ipasabot nga si Propeta Joseph Smith mitudlo, “Ang pagkatawo pag-usab, moabut [pinaagi sa] Espiritu sa Dios pinaagi sa mga ordinansa” [Mga Pagtulun-an sa mga Presidente sa Simbahan: Joseph Smith (2007), 113]).

• Unsa kaha ang dugang nga mga pangutana nga aduna ang usa ka tawo samtang basahon nila ang tubag sa Manluluwas ngadto kang Nicodemo?

Itudlo nga usa ka paagi nga magkat-on og dugang mahitungod kon unsay gipasabot nga mahimong “matawo pag-usab” mao ang pagdangop ngadto sa mga kasulatan sa Pagpahiuli (tan-awa sa “Paggamit sa Kasulatan sa Pagpahiuli aron sa Pagsabot sa Biblia” diha sa Mga Kahanas sa Pagtuon sa Kasulatan). Dapita ang mga estudyante sa pagpangita og usa ka tudling sa kasulatan gikan sa Basahon ni Mormon, Doktrina ug mga Pakigsaad, o Perlas nga Labing Bililhon nga makatabang sa pagpaklaro kon unsay buot ipasabot nga matawo pag-usab. Kon gikinahanglan, ang mga estudyante mahimong motan-aw sa “Natawo sa Dios, Natawo Pag-usab” diha sa Giya ngadto sa mga Kasulatan (Librarya sa Ebanghelyo) alang sa may kalabotan nga mga tudling.

Human mohatag og panahon sa pagtuon, dapita ang mga estudyante sa pagsulat diha sa pisara og usa ka butang nga ilang nakat-onan mahitungod sa pagkatawo og usab. (Mahimo nilang ilakip ang mga pakisayran sa kasulatan.) Mahimo nimo dayon nga ipapangutana o mohimo og mga komento ang mga estudyante mahitungod sa mga pamahayag diha sa pisara. Mahimo nimong dapiton ang tawo nga misulat sa pamahayag sa paghatag og dugang nga mga panabot mahitungod sa unsay iyang gisulat.

Dapita ang mga estudyante nga mobalik ngadto sa kanhiay nga gipangutana: Unsaon nako sa pagkahibalo kon natawo na ako pag-usab? Dapita sila sa pagrekord og bisan unsang dugang nga mga panabot, mga hunahuna, o mga impresyon nga miabot kanila atol sa diskusyon.

Pahinumdom: Tungod kay ang pagkatawo pag-usab naglakip sa pag-usab ug pagkahimong nausab, ang pipila ka estudyante mahimong mawad-an og kadasig ug mobati nga dili igo ang kapaspas sa pag-usab. Kon kini usa ka kabalaka alang sa imong mga estudyante, ikonsiderar ang pagbasa ug paghisgot sa mosunod nga pamahayag ni Elder D. Todd Christofferson:

Kamo mangutana, ngano nga kining dako nga kausaban dili dayon mahitabo kanako? Kinahanglang hinumdoman ninyo ang talagsaong mga ehemplo sa katawhan ni Hari Benjamin, ni Alma ug ang uban sa kasulatan ingon lamang niana—talagsaon ug dili kasagaran. Alang sa kadaghanan kanato, ang mga kausaban, mas hinay-hinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagka-mortal. (“Natawo Pag-usab,” Liahona, Mayo 2008, 78)

Balik ngadto sa “Mga Opsiyon sa Kalihokan sa Pagkat-on.”

Kon wala nimo buhata ang nag-una nga kalihokan sa pagkat-on, ikonsiderar ang paghatag og kontekso alang niini nga hut-ong sa kasulatan pinaagi sa pagtan-aw sa “Jesus Teaches of Being Born Again [Si Jesus Nagtudlo sa Pagkahimong Natawo Pag-usab]” gikan sa time code 0:00 hangtod sa 2:40 o sa pagminubo sa Juan 3:1–10. Ipasabot nga sa pagtabang ni Nicodemo nga makasabot sa Iyang mga pulong, ang Manluluwas migamit og pamilyar nga istorya gikan sa Daang Tugon. Basaha og dungan ang Juan 3:14–15 ug, kon gikinahanglan, basaha ang Numeros 21:4–9.

6:4

Ipakita ang nag-uban nga litrato, ug pahinumdomi ang mga estudyante nga ang Ginoo kasagaran migamit og mga simbolo sa pagtudlo og importante nga mga kamatuoran sa ebanghelyo. (Tan-awa sa “Pagsabot sa Simbolismo diha sa mga Kasulatan” diha sa Mga Kahanas sa Pagtuon sa Kasulatan kon gibati nimo nga ang mga estudyante nagkinahanglan og dugang nga tabang sa mga simbolo.) Dapita ang mga estudyante sa pagpakigbahin sa unsay ilang gihunahuna nga girepresentar sa bitin nga tumbaga.

Mahimo dayon nimong ipakita ang mosunod nga litrato tupad sa litrato sa bitin nga tumbaga ug basaha ang Juan 3:16–17.

• Sa unsa nga mga paagi nga ang bitin nga tumbaga nagsimbolo ni Jesukristo? (Posibleng mga tubag: Ang duha “gibayaw”; ang duha gihatag sa Ginoo sa pagluwas sa Iyang katawhan; ang duha giandam agig tubag sa mga sala sa katawhan; ang gikinahanglan nga buhat aron maluwas mao lang ang “pagtan-aw” o “pagtuo.”)

Ikonsiderar ang pagsulat sa mosunod nga mga pangutana ug dili kompleto nga mga pamahayag diha sa pisara. Dapita ang mga estudyante sa pagtuon sa mga tudling, mangita og mga paagi sa pagkompleto sa mga pamahayag (ang mga pulong nga anaa diha sa parentesis gihatag lamang isip posible nga mga tubag):

• Juan 3:16–21; Doktrina ug mga Pakigsaad 34:1–3; Juan 14:15

• Gihigugma gayod sa Dios ang kalibotan nga … (Gihatag Niya ang Iyang Bugtong Anak).

• Gihigugma gayod kita ni Jesus nga … (Gihatag Niya ang Iyang kinabuhi).

• Gihigugma gayod nato ang Langitnong Amahan ug si Jesukristo nga kita … (motuman sa mga sugo).

Ang mga estudyante mahimong mopakigbahin sa lainlain nga mga paagi nga ilang nakompleto ang mga pamahayag. Samtang gipakigbahin nila kon giunsa nila pagkompleto ang unang duha ka pamahayag, awhaga sila sa pagpaambit og mga kasinatian nga nakatabang kanila nga masayod nga ang Langitnong Amahan ug si Jesukristo nahigugma kanila. Samtang ang mga estudyante mopakigbahin kon giunsa nila pagkompleto ang ikatulo nga pamahayag, dapita sila sa pagpakigbahin og mga paagi nga sila nagpakita sa ilang gugma alang sa Langitnong Amahan ug ni Jesukristo.

Kon itugot sa panahon, ang mga estudyante makasag-ulo sa Juan 3:16–17 aron nga kini nga mga pulong makahatag kanila og inspirasyon ug kahupay sa umaabot. (Pahinumdom: Ang “Pagsag-ulo sa mga Tudling sa Kasulatan” diha sa Mga Kahanas sa Pagtuon sa Kasulatan naghatag og lainlain nga mga pamaagi sa pagtabang sa pagsag-ulo.)

Balik ngadto sa “Mga Opsiyon sa Kalihokan sa Pagkat-on.”

Mahimo nimong sugdan kini nga kalihokan sa pagkat-on pinaagi sa paghisgot og kadiyot sa mga timaan ug mga problema nga may kalabotan sa nahubsan sa tubig [dehydration]. Dayon ikonsiderar ang paghisgot sa mga timaan ug mga problema nga may kalabotan sa espirituhanon nga nahubsan sa tubig.

Ikonsiderar ang pagpakita og usa ka hulagway sa Manluluwas uban sa babaye diha sa atabay ug dapita ang mga estudyante sa paghatag og katingbanan sa panghitabo o basaha og dungan kini nga asoy diha sa Juan 4:3–15. Kon makatabang, rebyoha ang “Juan 4:27. Nganong ang mga disipulo ni Jesus ‘natingala sila pag-ayo sa pagkakita nila nga nakigsulti siya sa usa ka [Samarianhon nga] babaye’?” diha sa Scripture Helps: New Testament [Mga Tabang sa Kasulatan: Bag-ong Tugon].

• Unsa ang atong makat-onan mahitungod ni Jesus gikan niining pakighinabi sa Samarianhon nga babaye?

• Unsaon ninyo sa pag-summarize kon unsa ang gitudlo sa Manluluwas niini nga babaye? (Ang mga estudyante mahimong mopakigbahin og kamatuoran sama niining usa: Ang pag-inom og maayo sa buhi nga tubig sa Manluluwas makawala sa espirituhanon nga kauhaw ug mogiya kanato ngadto sa kinabuhing dayon.)

• Sa unsang paagi ang tubig nagrepresentar ni Jesukristo? Unsa kaha ang buot ipasabot sa “buhi nga tubig”? (Kon ganahan ka og dugang nga mga ideya kon unsaon sa pagtabang sa mga estudyante nga makasabot sa simbolismo diha sa mga kasulatan, adto sa “Pagsabot sa Simbolismo diha sa mga Kasulatan” diha sa Mga Kahanas sa Pagtuon sa Kasulatan.)

Ikonsiderar ang pagbasa ug paghisgot sa mosunod nga pamahayag ni Elder David A. Bednar:

Ang buhi nga tubig nga gipasabot dinhi niini nga sitwasyon usa ka representasyon ni Ginoong Jesukristo ug sa Iyang ebanghelyo. Ug sama nga ang tubig gikinahanglan sa pagpatunhay sa pisikal nga kinabuhi, ang Manluluwas ug ang Iyang mga doktrina, mga baroganan, ug mga ordinansa mahinungdanon para sa kinabuhing dayon. Ikaw ug ako nanginahanglan sa Iyang buhi nga tubig kada adlaw ug sa igong suplay aron sa pagpatunhay sa atong nagpadayon nga espirituhanong pagtubo ug paglambo. (“A Reservoir of Living Water” [Church Educational System fireside alang sa mga young adult, Feb. 4, 2007], 2, broadcasts.ChurchofJesusChrist.org)

• Ngano nga ang doktrina ug mga ordinansa sa Ginoo gikinahanglan alang sa kinabuhing dayon? Unsa ang inyong mabuhat aron sa pag-ambit sa buhi nga tubig sa Ginoo “kada adlaw ug sa igong suplay”? (Mahimo nimong ilista diha sa pisara ang mga tubag sa mga estudyante.)

Ikonsiderar ang paghatag sa mga estudyante og panahon sa pagrekord og bisan unsa nga mga pagbati o mga pag-aghat nga aduna sila samtang ilang hunahunaon kon unsaon nga sila mas makainom og maayo ug kanunay sa buhi nga tubig sa Manluluwas.