Mateo 2; Lucas 2

Ipakita ang mosunod nga litrato ni Jesukristo isip ang Tiglalang. Dapita ang mga estudyante sa pagpakigbahin sa unsay atong nahibaloan mahitungod ni Jesukristo gikan sa kinabuhi sa wala pa dinhi sa yuta ug isip si Jehova, Dios sa Daang Tugon.

Christ the Creator [Kristo ang Tiglalang], ni Robert T. Barrett

Dayon ipakita ang usa ka hulagway ni Jesus isip usa ka masuso, ug dapita ang mga estudyante sa pagbasa sa Lucas 2:1–7, mangita alang sa mga kahimtang sa Iyang pagkatawo.

Kon kini makatabang, mahimo ninyong tan-awon ang “The Christ Child [Ang Batang Kristo]” gikan sa time code 1:00 hangtod sa 6:00 o rebyoha ang “Lucas 2:1–7. Unsa man ang mga kahimtang sa pagkatawo sa Manluluwas?” diha sa Scripture Helps: New Testament [Mga Tabang sa Kasulatan: Bag-ong Tugon].

17:56

• Kon ikonsiderar ang gahom, kahalangdon, ug himaya ni Jesukristo, unsa ang inyong mahinungdanon nga nakit-an mahitungod sa mga kahimtang sa Iyang pagkatawo?

Ipasabot nga diha sa usa ka panan-awon sa pagkatawo sa Manluluwas, ang propeta sa Basahon ni Mormon nga si Nephi gipangutana, “Nasayod ka ba sa pagpakig-angay sa Dios?” (1 Nephi 11:16). (Pahinumdom: Ang pulong nga pagpakig-angay niini nga konteksto nagpasabot og boluntaryong pagkanaog gikan sa mas taas nga kahimtang ngadto sa mas ubos nga kahimtang o kondisyon.) Hangyoa ang mga estudyante sa pagbasa mahitungod sa panan-awon ni Nephi diha sa 1 Nephi 11:13–23, mangita alang sa unsay nasabtan ni Nephi mahitungod sa pagpakig-angay sa Dios.

• Unsa kahay matudlo kanato sa pagpakig-angay ni Jesukristo mahitungod sa Iyang kinaiya? Unsa kahay mapadayag niini mahitungod sa Iyang mga pagbati alang kanato? (Tabangi ang mga estudyante sa pag-ila og kamatuoran sama sa mosunod: Ang pagpakig-angay ni Jesukristo nagpakita sa Iyang kamapainubsanon ug gugma alang kanato.)

• Sa unsa nga ubang mga paagi nga si Jesukristo nakig-angay aron Siya makapanalangin sa atong mga kinabuhi? (Ang mga estudyante mahimong mobasa sa 1 Nephi 11:26–33 alang sa dugang nga mga panabot.)

• Sa unsang paagi ang pagsabot sa pagpakig-angay sa Manluluwas makaimpluwensiya sa paagi nga kamo makakita ug makasagubang sa inyong personal nga mga hagit?

Aron sa pagtabang sa mga estudyante nga mobati sa kamahinungdanon sa pagpakig-angay sa Manluluwas, mahimo ninyong rebyohon og dungan ang mga pulong sa himno nga “Jesus, Kanhi Kabos” (Mga Himno, nu. 117) o tan-awa ang “Jesus, Once of Humble Birth [Jesus, Kanhi Kabos]” (5:37). Dapita ang mga estudyante sa pagpamalandong sa mensahe sa himno ug sa pagrekord sa bisang unsang mga hunahuna o mga impresyon nga ilang madawat.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa mosunod nga pamahayag ni Presidente Dieter F. Uchtdorf, kanhi sa Unang Kapangulohan:

Ngadto sa tanan nga gustong makasabot kinsa kami isip mga miyembro sa Ang Simbahan ni Jesukristo sa mga Santos sa Ulahing mga Adlaw, gusto kong motanyag og punto sa pagsugod nga gipasabot niining upat ka mga pulong: Kami nangita ni Kristo. Kami nangita nga makat-on mahitungod Kaniya. Aron sa pagsunod Kaniya. Aron mahimong mahisama Kaniya. Kada adlaw sa tibuok tuig, kami nangita Kaniya. (Dieter F. Uchtdorf, “Pagpangita ni Kristo Panahon sa Pasko,” Liahona, Dis. 2017, 4)

Hatagi ang mga estudyante og pipila ka minuto sa pagpamalandong ug sa pagrekord kon unsa ang ilang nabuhat niining semanaha aron sa pagtinguha kang Kristo. Dayon isulat diha sa pisara ang mosunod nga dili kompleto nga pamahayag: Ako makatinguha ni Jesukristo pinaagi sa …

Ipasabot nga ang mga estudyante makapangita og lainlain nga mga paagi sa pagkompleto niini nga pamahayag pinaagi sa pagpangita og gipasabot o gihulagway nga mga kamatuoran diha sa mosunod nga mga istorya. Samtang ang mga estudyante mobasa niini nga mga asoy, mahimo silang mangutana: Unsa ang atong makat-onan gikan sa ehemplo sa tawo o sa mga tawo niini nga istorya? (Kon ang mga estudyante magkinahanglan og dugang nga pagbansay niini nga kahanas, mahimo nimong rebyohon ang “Pag-ila sa mga Kamatuoran sa Ebanghelyo diha sa mga Kasulatan” sa Mga Kahanas sa Pagtuon sa Kasulatan.)

Dapita ang mga estudyante sa pagrekord kon unsaon nila pagtapos ang dili kompleto nga pamahayag base sa unsay ilang makat-onan gikan sa matag usa sa mosunod nga mga asoy:

• Mateo 2:1–2, 7–11 (ang Maalamon nga mga Tawo)

• Lucas 2:8–16 (ang mga magbalantay og karnero)

• Lucas 2:25–32 (Simeon), o tan-awa ang “The Christ Child Is Presented at the Temple [Ang Bata nga si Jesus Gipresentar sa Templo]” (2:04)

  

  2:4

• Lucas 2:36–38 (Ana)

Human magtugot og panahon alang sa pagtuon, dapita ang mga estudyante sa pagpakigbahin sa unsay ilang nakat-onan gikan niadtong ilang nabasahan. Dayon dapita ang mga estudyante sa pagsulat diha sa pisara sa lainlain nga mga paagi nga ilang gitapos ang pamahayag. Ang nakompleto nga mga pamahayag mahimong susama ngadto sa mosunod nga mga kamatuoran: Makatinguha ko ni Jesukristo pinaagi sa pagkat-on bahin Kaniya ug sa pagbantay alang sa mga timaan sa Iyang pag-anhi. Makatinguha ko ni Jesukristo pinaagi sa pagsimba Kaniya. Makatinguha ko ni Jesukristo pinaagi sa pagkahimong paspas nga mosalig Kaniya alang sa tabang. Makatinguha ko ni Jesukristo pinaagi sa kinabubut-on nga pagserbisyo diha sa templo. Makatinguha ko ni Jesukristo pinaagi sa makugihon nga pagsunod sa mga pag-aghat sa Espiritu. Makatinguha ko ni Jesukristo pinaagi sa sinserong pagpuasa ug pag-ampo.

Samtang ipakigbahin sa mga estudyante ang ilang nakompleto nga mga pamahayag, hunahunaa ang pagdapit kanila nga mopakigbahin usab kon sa unsang paagi kini nga mga matang sa mga aksiyon midala kanila, o sa usa ka tawo nga ilang nailhan, nga mas naduol ngadto sa Manluluwas.

Dapita ang mga estudyante sa pagpili og usa ka pamahayag gikan sa pisara, o usa ka pamahayag nga ilang kaugalingon, ug paghimo og yano nga plano kon unsaon nila kini paggamit aron sa pagtinguha sa Manluluwas.

Pahinumdom: Mahimo nimong dapiton ang mga estudyante sa sinugdanan sa imong sunod nga klase sa pagpakigbahin sa unsay ilang gibuhat aron sa pagsunod sa ilang plano.

Balik ngadto sa “Mga Opsiyon sa Kalihokan sa Pagkat-on.”

Mahimo nimong isulat diha sa pisara ang mga pulong nga gugma, pagdayeg, balaan nga pagtahod, serbisyo, ug debosyon. Dapita ang mga estudyante sa paghunahuna og mga panahon sa dihang gitinguha nila nga ipakita o ihatag kini nga mga butang ngadto sa Langitnong Amahan ug kang Jesukristo. Isulat ang pulong nga pagsimba ibabaw sa mga pulong diha sa pisara, ug ipasabot nga kini nga mga pulong anaa sa sentro sa tinuod nga pagsimba (tan-awa sa mga Hilisgotan ug mga Pangutana, “Pagsimba,” Librarya sa Ebanghelyo).

Dapita ang mga estudyante sa pagtuon sa asoy sa Maalamon nga mga Tawo diha sa Mateo 2:1–12 ug pangita og mga paagi nga kini nga mga tawo misimba sa Ginoo. Mahimong makatabang ang pagpakita sa “The Christ Child [Ang Batang Kristo]” gikan sa time code 13:44 hangtod sa 17:16.

17:56

• Unsay gisulti ug gibuhat sa Maalamon nga mga Tawo aron sa pagsimba sa Ginoo?

• Unsay atong makat-onan mahitungod sa kahulogan sa pagsimba gikan sa Maalamon nga mga Tawo? (Ang mga estudyante mahimong moila og kamatuoran sama sa mosunod: Atong gisimba ang Ginoo pinaagi sa pagpakita og gugma ug balaang pagtahod ngadto Kaniya diha sa atong mga pulong ug mga aksiyon.)

• Sa unsang paagi ang gagmay ug yano nga mga pagpahayag sa sinsero nga pagsimba mas makapaduol kanato ngadto sa Langitnong Amahan ug kang Jesukristo? (Ikonsiderar ang pagtan-aw sa “Returning to Prayer [Pagbalik ngadto sa Pag-ampo]” [4:43] aron sa pagtabang og tubag niini nga pangutana.)

  

  4:43

Aron sa pagtabang sa mga estudyante sa paghimo og epektibo, matarong nga aksiyon, ipakita ug basaha og dungan ang mosunod nga pamahayag ni Presidente Dieter F. Uchtdorf, kanhi sakop sa Unang Kapangulohan:

Ang Pasko ug ang pipila sa gihandom nga mga tradisyon sa panahon nagpahinumdom kanato nga kita, sama sa kaarang Maalamong mga Tawo, magtinguha kang Kristo ug ihalad Kaniya ang labing bililhon nga mga gasa: usa ka masulub-on nga kasingkasing ug mahinulsulon nga espiritu. Kinahanglang atong ihalad Kaniya ang atong gugma. Kinahanglan nga andam kita nga modala sa Iyang ngalan ug molakaw sa dalan sa pagkadisipulo. Kinahanglang mosaad kita nga kanunay mohinumdom Kaniya, mosunod sa Iyang ehemplo, ug magbuhat og kaayohan [tan-awa sa Mga Buhat 10:38; Doktrina ug mga Pakigsaad 20:77, 79]. (“Kabahin sa mga Kurtina, Pagkakontento, ug Pasko” [Debosyonal sa Pasko sa Unang Kapangulohan, Dis. 4, 2011], Librarya sa Ebanghelyo)

Ang mga estudyante mahimong mopakigbahin og lainlain nga mga paagi nga ilang gisimba ang Langitnong Amahan ug si Jesukristo pinaagi sa paghalad Kanila sa ilang masulub-on nga kasingkasing, gugma, ug kabubut-on. (Hunahunaa ang pagsulat sa mga tubag sa mga estudyante diha sa pisara.)

Hatagi ang mga estudyante og pipila ka minuto alang sa hilom nga pagpamalandong. Awhaga sila sa pag-ila ug pagrekord og usa ka butang nga ilang mabuhat karong semanaha aron sinserong mosimba sa Ginoo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa mosunod nga litrato ni Jesus sa Iyang pagkabatan-on.

Pangutan-a ang mga estudyante kon unsa kaha ilang hunahuna kon unsa sama si Jesus niadtong batan-on pa Siya. Mahimo usab nimo silang dapiton sa paghunahuna kon unsa kini sama nga magpadako Kaniya isip usa ka anak nga lalaki o magdako uban Kaniya isip usa ka igsoon.

Dapita ang mga estudyante sa pagrebyo sa Lucas 2:40–52 ug Hubad ni Joseph Smith, Mateo 3:24–26 (Librarya sa Ebanghelyo), ug sa pagpakigbahin og mga detalye gikan sa pagkabata ug pagkabatan-on ni Jesus nga labing nakadani kanila. Ipasabot nga ang Hubad ni Joseph Smith sa Lucas 2:46 nag-ingon nga, “Ug sila naminaw kaniya, ug nangutana kaniya og mga pangutana” (Librarya sa Ebanghelyo).

• Unsa ang gipadayag niini nga mga tudling mahitungod sa kinaiya ug mga hiyas ni Jesus isip usa ka batan-on?

Kon dili kini hisgotan sa mga estudyante, mahimo nimong ipasabot nga ang Manluluwas milambo sa paglabay sa panahon (tan-awa sa Lucas 2:40; Doktrina ug mga Pakigsaad 93:12–13) ug sa usa ka balanse nga paagi (tan-awa sa Lucas 2:52). Kon tinguhaon, mahimo nimong hisgotan kon unsa nga mga aspeto sa paglambo ang gipasabot sa mga termino nga “kinaadman,” “lawas,” ug “gikahimut-an siya sa Dios ug sa mga tawo” (bersikulo 52).

Ikonsiderar ang pagpakita sa mosunod nga kamatuoran o imahe: Kita makasunod sa ehemplo ni Jesus pinaagi sa paglambo sa intelektuwal nga paagi, pisikal nga paagi, espirituwal nga paagi, ug sosyal nga paagi.

• Ngano kaha nga importante nga paningkamotan ang matag usa niini nga mga aspeto samtang magtinguha kita nga mahisama sa Manluluwas?

• Unsa kaha ang mahitabo kon ibaliwala nato ang bisan unsa niini?

Dapita ang mga estudyante sa pagpili og usa ka dapit nga ganahan nilang mas detalyado nga hisgotan. Hangyoa sila sa pagporma og gagmay nga mga grupo uban niadtong adunay susama nga interes. Ipakita ang mosunod nga mga pag-aghat, ug dapita ang mga grupo sa pagpili og usa o dugang pa nga hisgotan.

• Ilha ang mga paagi nga kamo o ang uban nga inyong kaila nga milambo niini nga aspeto.

• Hunahunaa kon sa unsang paagi ang paglambo niini nga aspeto makatabang kaninyo nga mahimong mas sama sa Langitnong Amahan ug ni Jesukristo.

• Sutaa kon sa unsang paagi ang paglambo niini nga aspeto makatabang kaninyo nga makahimo og makahuloganon nga mga tampo sa panimalay, sa trabaho, sa eskwelahan, sa simbahan, o sa komunidad.

• Ilha ang mga babag nga mahimong mobalda kaninyo sa paglambo niini nga aspeto ug kon unsaon sa pagbuntog niini.

Aron sa pagtabang sa mga estudyante sa paglihok sa unsay ilang nakat-onan, hunahunaa ang pagpakigbahin sa mosunod nga pamahayag gikan ni Presidente Russell M. Nelson:

Makigtambag sa Ginoo kon unsaon ninyo pag-uswag sa balansing paagi. … Kinahanglan nga magtinguha kamo og personal nga pagpadayag. Kinahanglan nga mopili kamo alang sa inyong kaugalingon kon unsaon kini sa pagbuhat. Usahay ang Espiritu modasig ninyo sa paghimo og mga butang nga lisod. Nagtuo ko dawaton ninyo ang hagit. Makahimo kamo sa lisod nga mga butang. (diha sa “Ang Mga Lider Mipaila sa Bag-ong Paningkamot alang sa Kabataan ug Kabatan-onan,” Liahona, Nob. 2019, 124)

Hatagi ang mga estudyante og pipila ka minuto nga mahimong hilom ug maminaw sa Espiritu Santo. Awhaga sila sa pagrekord kon unsa ang ilang gibati nga giaghat nga buhaton. Kon pipila sa mga estudyante mibati nga nabug-atan bahin sa pagdawat niini nga hagit sa pagbuhat sa lisod nga mga butang, hunahunaa ang pagtan-aw ug paghisgot sa “Self-Care Made Simple [Pag-atiman sa Kaugalingon Gihimong Yano]” (3:40).

3:40

Balik ngadto sa “Mga Opsiyon sa Kalihokan sa Pagkat-on.”