“Mga Ideya Alang sa Unang Adlaw sa Klase,” Manwal sa Bag-ong Tugon alang sa Magtutudlo sa Institute (2025)
Light of the World [Kahayag sa Kalibotan], ni Howard Lyon
Mga Ideya Alang sa Unang Adlaw sa Klase
Ang Bag-ong Tugon naghatag og walay kataposang asoy sa mortal nga pangalagad ni Jesukristo ug sa pagkatukod sa unang Kristiyano nga Simbahan. Diha sa mga Ebanghelyo atong makat-onan alang sa atong mga kaugalingon ang bahin sa dili hitupngan nga kinabuhi sa Ginoo. Kita makadungog Kaniya nga motudlo, makasaksi sa Iyang mga milagro, ug mobati sa Iyang gugma samtang Siya mangalagad ngadto sa mga indibidwal. Kita magbarog sa sagrado nga yuta samtang kita mobasa mahitungod sa Iyang maulaong sakripisyo diha sa Getsemani ug diha sa krus. Ang mga asoy bahin sa Iyang Pagkabanhaw naghatag kanato og gamhanan nga ebidensiya nga si Jesukristo mibuntog sa kamatayon. Sa ikaduhang katunga sa Bag-ong Tugon, kita mahingangha sa hugot nga pagtuo ug kaisog sa mga disipulo kinsa mipadako sa Iyang Simbahan. Sa tinuoray, kining sagrado nga basahon usa ka halawom nga saksi nga si Jesus mao ang Kristo.
Dugang nga mga Kapanguhaan
Pahinumdom: Ang mga opsiyon sa pagkat-on dinhi niini nga leksiyon mahimong magamit samtang imong sugdan ang imong kurso sa Bag-ong Tugon nga mopahiangay sa Dali, Sunod Kanako, dili igsapayan kon kanus-a magsugod ang imong klase. Magamit usab kini kon ikaw nagtudlo sa Bag-ong Tugon 211 o 212.
Desinyo sa Kurso
Ang pagtuon sa Bag-ong Tugon makadala kanimo ug sa imong mga estudyante nga mas maduol ngadto sa Manluluwas sa gamhanan nga mga paagi. Mabantayan nimo nga kini nga manwal maghatag og daghang ideya aron sa pagtabang kanimo sa pagmugna og mga kasinatian nga makatabang sa imong mga estudyante nga mas mapaduol ngadto kang Jesukristo. Ang pagkat-on nga mosangpot sa pagkakabig dili mahimong dali-dalion. Ayaw pagpanagana nga mohinay aron ang mga estudyante adunay panahon sa pagpalawom sa ilang pagsabot. Tugoti ang mga estudyante og panahon nga mobati ug moila sa Espiritu ug mokonsiderar kon unsaon sa paggamit sa espirituhanon nga mga impresyon nga ilang madawat. Ang paghisgot sa tanang panghitabo ug mga pagtulun-an diha sa Bag-ong Tugon dili mao ang tumong.
Hinumdomi nga ang mga estudyante mas lagmit nga mobukas sa ilang mga hunahuna ug mga kasingkasing sa pagkat-on kon ilang mabati nga ang mga kasulatan mahimong makonektar ug adunay kalabotan ngadto sa ilang mga kinabuhi. Ikonsiderar kon sa unsang paagi ang mosunod nga mga elemento nga makita diha sa matag leksiyon makatabang kanimo sa pagmugna og makahuloganon nga mga kasinatian sa pagkat-on:
-
Pag-awhag og Personal nga Pagtuon. Ang matag leksiyon naglakip og mga ehemplo sa mubo nga mga mensahe nga imong kapilian ug ipadala atol sa semana aron sa pagdasig sa mga estudyante sa pagtuon sa mga kasulatan.
-
Mga Pangutana ug Pagpakigbahin. Kini nga seksiyon nag-awhag kanimo sa paghatag sa mga estudyante og mga kahigayonan sa sinugdanan sa klase sa pagpakigbahin og mga panabot, mga kamatuoran, ug mga pangutana nga sila aduna gikan sa gi-assign nga mga basahonon.
-
Pagbansay sa Kahanas. Kini nga seksiyon mopahibalo kanimo ngadto sa mga dapit diha sa mga kalihokan sa pagkat-on diin ang mga estudyante makabansay og piho nga mga kahanas sa pagtuon sa kasulatan. Kini nga mga pagbansay makita diha sa Mga Kahanas sa Pagtuon sa Kasulatan nga kapanguhaan diha sa Librarya sa Ebanghelyo ug mahinungdanon sa pagtabang sa mga estudyante nga mahimong mga tigkat-on nga mas makabarog sa kinaugalingong pagpaningkamot.
-
Mga Opsiyon sa Kalihokan sa Pagkat-on. Ang matag leksiyon naglakip og duha hangtod sa lima ka opsiyon sa kalihokan sa pagkat-on. Wala ka gilaoman nga mogamit sa tanang kalihokan. Hinuon, kinahanglan nimong susihon ang mga panginahanglan sa imong mga tigkat-on ug mopili sa mga kalihokan nga lagmit kaayo nga mopalawom sa pagkakabig ug mas mopaduol kanila ngadto sa Manluluwas.
Mga Opsiyon sa Kalihokan sa Pagkat-on
Aron sa pagpahiluna sa mga estudyante niini nga kurso, mahimo nimong pilion ang usa o dugang pa sa mosunod nga mga kalihokan nga gamiton sa unang adlaw sa klase. Tungod kay adunay mas daghang materyal nga gihatag dinhi kaysa lagmit mahisgotan sa usa ka klase, mainampoon nga ikonsiderar kon unsa nga mga kalihokan sa pagkat-on ang labing makatabang sa imong mga estudyante sa pagpalawom sa ilang hugot nga pagtuo diha kang Jesukristo. Kon gusto, mahimo nimong gamiton ang dugang pa niini nga mga kalihokan diha sa umaabot nga mga klase.
Pag-ugmad og Kahimtang sa Kristohanon nga Pagkat-on
Pagpalambo sa Atong Pagtudlo ug Pagkat-on
Pagmugna og pagbati nga nahisakop. Sa tibuok niini nga kurso, ikonsiderar kon unsa ang imong mahimo aron sa pagmugna og kahimtang sa gugma ug pagsalig aron ang mga estudyante mobati nga sila nahisakop. Ang mga estudyante mahimong mas mobati nga sila nahisakop kon sila motampo diha sa klase ug magkaubang moapil sa pagtukod sa ilang mga koneksiyon sa Langitnong Amahan ug ni Jesukristo. Si Elder D. Todd Christofferson mitudlo, “Isip nahiusa sa Amahan, sa Anak, ug sa Espiritu Santo nga walay pagduha-duha ang kataposan diha sa pagkasakop” (“Ang Doktrina sa Pagkasakop,” Liahona, Nob. 2022, 56). Kon ang mga estudyante mobati nga sila nahisakop, sila mas lagmit nga mopakigbahin sa ilang espirituhanon nga mga impresyon, mopahayag sa ilang mga gibati, ug mangutana.
Mahimo nimong ipakita ang mosunod nga mga litrato sa Manluluwas (o susama nga mga litrato) ug dapita ang mga estudyante sa pagpakigbahin kon unsa kaha sama nga matudloan pinaagi Kaniya.
Healer [Tig-ayo], ni Lightweave
The Savior’s Teaching on Discipleship [Ang Pagtulun-an sa Manluluwas bahin sa Pagkadisipulo], ni Justin Kunz
Living Water [Buhing Tubig], ni Simon Dewey
Dapita ang mga estudyante sa pagbasa sa Juan 13:34–35 ug 2 Nephi 26:33, mangita alang sa mga kamatuoran nga makatabang sa klase sa pagmugna og kahimtang sa Kristohanon nga pagkat-on. Aron sa pagtabang sa pagpalig-on sa pagsabot sa mga estudyante, mahimo kang mangutana:
-
Unsa kaha ang mga hagit nga atubangon sa usa ka tawo kon sila moadto sa institute alang sa unang higayon? Unsa ang labing nakatabang kaninyo nga mobati nga giabi-abi diha sa institute?
-
Sa unsang paagi kaha nga gusto sa Manluluwas nga atong tagdon kadtong kinsa moapil sa atong klase? (Ang mga estudyante mahimong moila og usa ka baroganan sama sa mosunod: Kinahanglan natong abi-abihon ang tanan nga moabot ug higugmaon sila sama nga ang Manluluwas naghigugma kanato.)
-
Kinsa kaha ang gusto sa Manluluwas nga inyong dapiton nga moapil niini nga klase? (Ang mga estudyante mahimong magpadala og text o mensahe sa usa ka tawo samtang anaa sila sa klase o ikonsiderar kon unsaon pagkontak kanila sa dili pa ang sunod klase.)
Mahimong makaayo alang sa matag estudyante ang pagpamalandong ug pagrekord og piho nga aksiyon nga ilang himoon aron sa pagtabang sa pagmugna og kahimtang sa pagkat-on nga adunay pagtahod, pagkahisakop, ug Kristohanon nga gugma. Mahimo usab nimong hisgotan kon unsa ang inyong mahimo isip usa ka klase aron mag-ugmad og mainiton ug maabi-abihon nga kasinatian alang sa tanang tigkat-on.
Pagdapit og Makugihon nga Pagkat-on
Mahimo nimong dapiton ang duha ka estudyante sa pagbasa sa mosunod nga panagsultihanay:
Maria: “Unsay imong hunahuna sa atong klase sa institute uban ni Sister Franco?”
Elena: “Ganahan kaayo ko niini! Makapadasig kini. Mahinamon kong motambong matag semana.”
Maria: “Wala ko kasabot. Kitang duha adunay susama nga magtutudlo ug klase, apan alang kanako, murag laay kini. Makasulti ko nga usa siya ka maayo nga tawo, apan kon mahimo siyang makahatag og dugang nga panabot, mas maayo kini sa klase. Nanghinaot ko nga mapalambo niya ang iyang pagtudlo aron makabaton ko og mas maayo nga kasinatian.”
-
Unsaon kaha ninyo paghulagway ang pamaagi ni Maria sa pagkat-on?
Dapita ang mga estudyante sa pagbasa sa Mateo 7:7–8, ug hisgoti kon sa unsang paagi ang paggamit sa mga pulong sa Manluluwas makatabang ni Maria sa pagpalambo sa iyang kasinatian sa institute. Mahimo kang makapangutana:
-
Unsa kaha kini tan-awon alang kanato nga mohangyo, mangita, ug manuktok? Sa unsang paagi ang paghangyo, pagpangita, ug pagpanuktok usa ka pagpahayag sa hugot nga pagtuo?
-
Sa unsang paagi kita mapanalanginan kon kita maninguha sa pagkat-on pinaagi sa hugot nga pagtuo? (Ang mga estudyante mahimong moila og usa ka kamatuoran susama sa mosunod: Makadawat kita og pagpadayag samtang molihok kita inubanan sa hugot nga pagtuo pinaagi sa paghangyo, pagpangita, ug pagpanuktok.)
-
Sa unsang paagi ang pag-angkon sa responsibilidad sa inyong kaugalingong pagkat-on nakatabang kaninyo nga makadawat og personal nga pagpadayag? (Awhaga ang mga estudyante sa pagpakigbahin og pipila ka ehemplo, o pagpakigbahin og usa sa imong kaugalingon.)
Basaha og dungan ang mosunod nga pamahayag ni Elder David A. Bednar:
Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baroganan mibukas sa iyang kasingkasing ngadto sa Espiritu Santo—ug nagdapit sa Iyang pagtudlo, gahom sa pagpamatuod, ug panghimatuod nga saksi. Ang pagkat-on uban ug pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Diha sa kinasingkasing ug pagkamakanunayon sa atong paglihok nga dinasig sa hugot nga pagtuo, mapakita nato sa atong Amahan sa Langit ug sa Iyang Anak nga si Jesukristo sa atong pagkaandam nga makat-on ug pagdawat og panudlo gikan sa Espiritu Santo. (“Pagkat-on sumala sa Pamaagi sa Ginoo,” Liahona, Okt. 2018, 52)
Dapita ang mga estudyante sa pagsulat og pipila ka dinasig sa hugot nga pagtuo nga mga aksiyon nga ganahan nilang himoon atol niini nga kurso aron sa pagpakita sa Ginoo sa ilang tinguha nga magkat-on gikan Kaniya. (Mahimo kang mosugyot nga irekord sa mga estudyante ang ilang mga ideya diha sa ilang mga phone o diha sa usa ka notebook.)
Hatagi ang mga estudyante og pipila ka minuto sa pagtakda sa ilang kaugalingon nga mga tumong sa pagkat-on alang niini nga kurso base sa unsay ilang nahunahunaan ug nabati atol sa klase. Mahimo nimong dapiton ang pipila ka estudyante sa pagpakigbahin sa unsay ilang buhaton sa pagtabang og mugna og mga ideya sa lainlain nga mga matang sa mga tumong. Awhaga ang mga estudyante sa pag-establisar og plano sa pagkab-ot sa ilang mga tumong. Hunahunaa kon sa unsang paagi nimo matabangan ang mga estudyante sa pagrebyo sa ilang mga tumong sa kinatibuk-an sa kurso.
Ang mga Ebanghelyo Nagpamatuod kang Jesukristo
Pahinumdom: Mahimo nimong gamiton ang mosunod nga sugyot sa pagtudlo kon nagsugod ka og pagtuon sa mga Ebanghelyo. Kon magsugod na ka og usa ka pagtuon sa Mga Buhat hangtod sa Gipadayag, hunahunaa ang paggamit sa sunod nga sugyot sa pagtudlo (tan-awa sa “Ang mga Disipulo sa Manluluwas Nagpadayon sa Iyang Buhat: Mga Buhat hangtod sa Gipadayag”).
Dapita ang pipila ka estudyante sa pagpakigbahin og pipila ka maayong balita nga bag-ohay nilang nadawat.
Tan-awa ang “Ebanghelyo, Mga” diha sa Giya ngadto sa mga Kasulatan (Librarya sa Ebanghelyo), ug hisgoti kon unsa ang mga Ebanghelyo ug unsay sulod niini. Mahimo kang makapangutana:
-
Unsa ang maayong balita sa ebanghelyo? (Tabangi ang mga estudyante sa pag-ila og usa ka kamatuoran nga susama ngadto sa mosunod gikan sa unsay ilang basahon: Ang maayong balita sa ebanghelyo mao nga si Jesukristo mihimo og usa ka pag-ula nga motubos sa tanang tawo gikan sa kamatayon ug moganti sa matag indibidwal sumala sa ilang mga aksiyon.)
-
Ngano nga kini nga mensahe mahitungod sa Manluluwas dili lang maayo nga balita apan sa pagkatinuod mao ang labing maayo nga balita?
Mahimo ninyong tan-awon ang “The Good News [Ang Maayong Balita]” (2:18) ug hisgotan ang mensahe nga gipakigbahin niini.
Pagpalambo sa Atong Pagtudlo ug Pagkat-on
Ipaila ang mga estudyante sa Scripture Helps: New Testament [Mga Tabang sa Kasulatan: Bag-ong Tugon]. Kini nga kapanguhaan makatabang sa mga estudyante nga mas makasabot sa mga kasulatan pinaagi sa paghatag og background nga impormasyon, mga tabang sa pinulongan, ug mga pagpasabot sa lisod nga mga tudling sa kasulatan (tan-awa sa “Introduction [Pasiuna],” diha sa Scripture Helps: New Testament [Mga Tabang sa Kasulatan: Bag-ong Tugon]).
Aron sa pagtabang sa mga estudyante nga makat-on mahitungod sa talagsaon nga panglantaw sa matag manunulat sa Ebanghelyo, mahimo nimong buhaton ang mosunod nga kalihokan:
Isulat ang mga ngalan nga Mateo, Marcos, Lucas, ug Juan diha sa pisara. Bahina ang klase ngadto sa mga grupo nga tag-upat, ug papilia ang matag sakop sa grupo og usa ka manunulat sa Ebanghelyo nga tun-an. Dayon dapita ang mga estudyante sa pag-abli sa Scripture Helps: New Testament [Mga Tabang sa Kasulatan: Bag-ong Tugon] ug pangitaon ang mosunod nga gisulat: “Unsa ang mga Ebanghelyo?,” “Ang Ebanghelyo ni Mateo,” “Ang Ebanghelyo ni Marcos,” “Ang Ebanghelyo ni Lucas,” ug “Ang Ebanghelyo ni Juan.”
Ipakita ang mosunod nga mga pangutana, ug dapita ang mga estudyante sa paggamit sa Scripture Helps: New Testament [Mga Tabang sa Kasulatan: Bag-ong Tugon] sa pagtubag niini nga may kalabotan sa ilang gipili nga manunulat sa Ebanghelyo:
-
Unsa ang kaagi niiini nga manunulat sa Ebanghelyo?
-
Kinsa ang iyang nag-unang sumusunod?
-
Sa unsang paagi kaha ang iyang sumusunod nakaimpluwensiya sa iyang asoy sa kinabuhi sa Manluluwas?
-
Sa unsang paagi kita mapanalanginan pinaagi sa pagtuon niini nga asoy sa kinabuhi sa Manluluwas?
Human magtugot og panahon alang sa pagtuon, dapita ang matag grupo sa pagpakigbahin sa unsay ilang nakat-onan. Dayon hisgoti isip usa ka klase kon sa unsang paagi ang panglantaw sa matag manunulat sa Ebanghelyo makapalambo sa atong pagsabot sa kinabuhi ug misyon ni Jesukristo.
Ikonsiderar ang pagdapit sa mga estudyante sa pag-abli sa “Harmony of the Gospels [Panag-uyon sa mga Ebanghelyo]” diha sa Mga Tabang sa Pagtuon diha sa Librarya sa Ebanghelyo ug tan-awa ang mga sulod. Hisgoti kon sa unsang paagi kini nga kapanguhaan makatabang kanato sa atong pagtuon sa kinabuhi sa Manluluwas. (Pahinumdom: Kon makatabang, ipakigbahin sa mga estudyante nga “uban sa kahibalo nga anaa karon, dili posible ang pagmugna og hingpit nga panag-uyon sa upat ka Ebanghelyo tungod kay mismo ang mga tagsulat sa Ebanghelyo dili kanunay magkasinabot sa sunod nga pagkahitabo [chronological] sa mga butang” [Bible Dictionary, “Gospels”]).
Sa pagtapos sa klase, hatagi ang mga estudyante og panahon sa pagpamalandong o pagpakigbahin kon unsay ilang gilaoman nga makat-onan samtang sila magtinguha nga mas mapaduol ngadto sa Manluluwas pinaagi sa pagtuon sa mga Ebanghelyo.
Ang mga Disipulo sa Manluluwas Nagpadayon sa Iyang Buhat: Mga Buhat hangtod sa Gipadayag
Aron sa pagtabang sa pagkonektar sa mga Ebanghelyo ngadto sa Mga Buhat hangtod sa Gipadayag, mahimo nimong ipakita ang lainlain nga mga litrato sa mortal nga pangalagad, kamatayon, Pagkabanhaw, ug Pagkayab sa Manluluwas ug hisgoti kon unsay gipakita niini. Mahimo dayon kang mangutana:
-
Sa unsang paagi nga ang mga pagtulun-an, mga milagro, ug Pagkabanhaw sa Manluluwas nakaapekto sa Iyang mga sumusunod?
Ipasabot nga ang ikaduhang katunga sa Bag-ong Tugon (Mga Buhat hangtod sa Gipadayag) usa ka rekord sa unsay gibuhat sa mga disipulo sa Manluluwas aron sa pagpadayon sa Iyang buhat human sa Iyang kamatayon ug Pagkabanhaw. Dapita ang mga estudyante sa pagbasa sa Mateo 28:19–20 ug Mga Buhat 1:8, ug hisgoti kon unsay gilaoman ni Jesukristo sa Iyang mga sulugoon.
Mahimo nimong ipakita ang mosunod nga paghulagway aron sa pagpakita sa unsay gibuhat sa Apostoles sa Ginoo sa pagdala sa ebanghelyo ngadto sa Judea, Samaria, ug lapas pa.
Ipasabot nga ang Mga Buhat 1:8 naglatid og usa ka kinatibuk-an nga bayanan alang sa basahon sa Mga Buhat ug sa mga sinulat sa Apostoles. Ang Mga Buhat 1–7 naghulagway sa pagtubo sa Simbahan sa Jerusalem; ang Mga Buhat 8–9 naghatag og gibug-aton sa mga paghago sa Apostoles didto sa Judea ug Samaria; ug ang Mga Buhat 10–28, inubanan sa mga sulat ug Gipadayag, nagsaysay sa pagpangalagad sa Apostoles ngadto sa mga Hentil.
Ipasabot nga ang Apostoles nga si Pedro, Pablo, ug Juan mao ang tulo ka nag-unang mga manunulat sa ikaduhang katunga sa Bag-ong Tugon. Mahimo nimong isulat ang mosunod nga mga pakisayran sa kasulatan diha sa pisara ug dapiton ang mga estudyante sa pagbasa niini, mangita kon giunsa niini nga Apostoles pagpamatuod sa Manluluwas: Pedro: Mga Buhat 2:22–24, 32–33, 36; Pablo: 1 Mga Taga-Corinto 15:3–8, 19–22; Juan: 1 Juan 1:7; 2:1–2; 3:5, 16.
-
Unsa ang inyong namatikdan mahitungod niini nga mga pagpamatuod? Sa unsang paagi sa inyong hunahuna ang mga pagpamatuod niini nga mga lalaki nakaapekto sa ilang mga sinulat? (Isip kabahin sa inyong panaghisgotan, mahimo nimong ipakigbahin sa mga estudyante ang usa ka kamatuoran susama sa mosunod: Ang mga basahon nga nasulat sa nahaunang Apostoles naglangkob sa ilang mga pagtulun-an ug pagpamatuod ni Jesukristo.)
-
Sa unsang paagi nga ang pagkaila nga kini nga mga lalaki mitutok sa ilang mga sinulat kang Jesukristo makaimpluwensiya kanato isip mga tigbasa? Unsa ang inyong mahimo aron mahimong usa ka mas nakasentro kang Kristo nga tigbasa diha sa inyong pagtuon sa Bag-ong Tugon?
Sa pagtapos sa klase, hatagi ang mga estudyante og panahon sa pagpamalandong o pagpakigbahin unsa ang ilang buhaton aron mas magpaduol ngadto sa Manluluwas samtang basahon nila ang Mga Buhat hangtod sa Gipadayag.