Ang Buhi nga Kristo

Niadtong Enero 1, 2000, ang Unang Kapangulohan ug ang Korum sa Napulog Duha ka Apostoles nag-isyu og deklarasyon nga nailhan nga “Ang Buhi nga Kristo: Ang Pagpamatuod sa mga Apostoles” (Librarya sa Ebanghelyo). Niini nga makasaysayanong dukomento, ang Apostoles nagpamatuod sa dili hitupngan nga kinabuhi, balaanong misyon, ug sagradong mga tahas ni Jesukristo.

Pahinumdom: Kini nga leksiyon mahimong itudlo bisan kanus-a atol niini nga kurso. Pananglitan, mahimo ninyong itudlo kini isip ang unang leksiyon sa kurso, panahon sa semana sa Pasko sa Pagkabanhaw, human magtuon sa upat nga mga Ebanghelyo, o sa kataposan sa kurso.

Dugang nga mga Kapanguhaan

Pahinumdom: Ang “Pasiuna alang sa Kurso” naghatag og giya kon unsaon sa paggamit ang upat ka sumbanang elemento sa leksiyon nga mosunod.

Pag-awhag og Personal nga Pagtuon

Sa wala pa ang klase, ikonsiderar ang pagpadala sa mga estudyante og usa sa mosunod nga mga mensahe, depende sa panahon sa tuig nga itudlo nimo kini nga leksiyon. Mahimo usab nimong ikonsiderar ang pagpadala og mga mensahe sa imong kaugalingon.

Sa dili pa ninyo sugdan ang inyong pagtuon sa Bag-ong Tugon, basaha ang “Ang Buhi nga Kristo: Ang Pagpamatuod sa mga Apostoles.” Samtang inyong basahon, ilha ang mga kamatuoran mahitunogd ni Jesukristo nga inyong gitinguha nga mas masabtan ug mas lawom nga pagbati.
Si Presidente Russell M. Nelson nag-awhag kanato sa paghatag og mas dakong pagtutok ngadto sa Manluluwas atol sa semana sa dili pa ang Pasko sa Pagkabanhaw (tan-awa sa “Tungod kay Siya Buhi, Makaangkon Kita og Kalinaw taliwala sa Pagkawalay Kasiguroan,” Inspiration (blog), Mar. 28, 2021, ChurchofJesusChrist.org). Basaha ug pamalandongi ang “Ang Buhi nga Kristo: Ang Pagpamatuod sa mga Apostoles” aron ang inyong kasinatian sa Pasko sa Pagkabanhaw mahimong mas nakatutok kang Kristo.
Samtang atong taposon ang atong pagtuon sa Bag-ong Tugon, basaha ang “Ang Buhi nga Kristo: Ang Pagpamatuod sa mga Apostoles.” Pamalandongi kon sa unsang paagi ang inyong kaugalingong pagpamatuod sa Manluluwas mitubo atol niini nga pagtuon sa kurso.

Mga Pangutana ug Pagpakigbahin

Paggahin og panahon alang sa mga estudyante nga makapangutana ug makapakigbahin og mga panabot ug mga kamatuoran nga ilang nadiskobrehan sa ilang personal nga pagtuon sa “Ang Buhi nga Kristo: Ang Pagpamatuod sa mga Apostoles.”

Pagbansay sa Kahanas

Ang kalihokan sa pagtuon sa handout nga “Pagtuon sa ‘Ang Buhi nga Kristo’” mahimong mao ang makatabang nga dapit aron magamit ang kahanas nga “Pagsiksik diha sa mga Kasulatan ug sa Librarya sa Ebanghelyo” sa Mga Kahanas sa Pagtuon sa Kasulatan.

Kalihokan sa Pagkat-on

Ang Buhi nga Kristo: Ang Pagpamatuod sa mga Apostoles

Unsa ang matudlo kanako sa “Ang Buhi nga Kristo” mahitungod sa Manluluwas?

Dapita ang mga estudyante sa paghanduraw nga usa ka tawo nga dili nato sama og tinuohan nangutana, “Unsa ang inyong gituohan mahitungod ni Jesukristo?”

Dapita ang mga estudyante sa paggahin og pipila ka minuto ug pagrekord sa labing importanteng mga butang nga gusto nilang ipakigbahin mahitungod sa Manluluwas.

Human ang mga estudyante adunay panahon sa pagrekord sa ilang mga hunahuna, pahinumdomi sila nga niadtong Enero 1, 2000, ang Uang Kapangulohan ug ang Kurom sa Napulog Duha ka Apostoles mipakigbahin kon unsa ang ilang gibati nga mao ang importante mahitungod sa Manluluwas sa “Ang Buhi nga Kristo: Ang Pagpamatuod sa mga Apostoles.”

Sa dili pa magtuon sa “Ang Buhi nga Kristo,” ikonsiderar ang pagpakigbahin sa mosunod nga pamahayag ni Elder Robert D. Hales:

Ang kalibotan nagkalayo gikan sa Ginoo nga mas paspas pa sukad. Ang kaaway ania nga binuhian sa kalibotan. Kita motan-aw, maminaw, mobasa, magtuon, ug mopakigbahin sa mga pulong sa propeta aron mapasidan-an ug maprotektahan. Sama pananglit, “Ang Pamilya: Usa ka Pamahayag ngadto sa Kalibutan” gihatag dugay na sa wala pa nato masinati ang mga hagit nga karon giatubang sa pamilya. “Ang Buhi nga Kristo: Ang Pagpamatuod sa mga Apostol” giandam nang daan alang sa panahon diin kita labing magkinahanglan niini. (“Kinatibuk-ang Komperensiya: Paglig-on sa Pagtuo ug Pagpamatuod,” Liahona, Nob. 2013, 7)

Unsa ang mipatigbabaw kaninyo gikan niini nga pamahayag?

Ipanghatag ang handout nga giulohan og “Pagtuon sa ‘Ang Buhi nga Kristo.’” Hatagi og panahon ang mga estudyante sa pagkompleto sa handout sa tagsa-tagsa. Mahimo nimong dapiton ang mga estudyante sa pagtuon sa “Ang Buhi nga Kristo” sa kinatibuk-an niini nga kalihokan sa pagkat-on. O mahimo nimong isangon sa lahilahi nga mga estudyante ang mga porsyon sa dukomento aron tun-an.

Tun-i ang handout sa “Ang Buhi nga Kristo”

Human ang mga estudyante matapos sa pagtuon, dapita sila sa pagpakigbahin sa ilang mga tubag gikan sa ilang handout uban sa usa ka pares o sa gagmay nga grupo. Dayon ikonsiderar ang paghisgot sa pipila ka pangutana sama sa mosunod isip tibuok klase:

Unsa ang inyong nakat-onan o gibati mahitungod sa Manluluwas samtang nagtuon kamo sa “Ang Buhi nga Kristo”?
Sa unsang mga paagi kaha ang mga kamatuoran nga gitudlo sa “Ang Buhi nga Kristo” mao ang mahinungdanon sa kalibotan karon? Kinsa ang imong pakigbahinan niini nga mga kamatuoran?
Sa unsang paagi ang pagkahibalo ug pagtuo sa mga kamatuoran sa “Ang Buhi nga Kristo” nakaimpluwensiya kon giunsa ninyo pagpuyo ang inyong kinabuhi?

Sa pagtapos, hatagi ang mga estudyante og panahon aron ikonsiderar kon unsa kaha ang ilang madugang sa ilang gisulat sa sinugdanan niini nga kalihokan. Mahimong ipakigbahin sa mga estudyante ang ilang giusab nga mga hunahuna mahitungod sa Manluluwas uban sa usa ka pares o sa gagmay nga mga grupo.

Ipamatuod ang mga kamatuoran mahitungod ni Jesukristo nga inyong gihisgotan niini nga leksiyon. Awhaga ang mga estudyante sa pagrekord sa bisan unsang espirituhanong mga pag-aghat nga ilang nadawat ug mobuhat niini.