Mga Hebreohanon 7–13

Dapita ang mga estudyante sa paghunahuna og higayon dihang nawad-an sila og paglaom mahitungod sa usa ka butang. Papamalandonga ang mga estudyante sa mosunod nga mga pangutana:

• Giunsa ninyo pagdumala ang kasinatian?

• Unsay inyong gibuhat nga nakatabang?

• Unsa ang wala makatabang?

Dayon dungan nga mobasa sa mosunod nga pamahayag ni Presidente Jeffrey R. Holland:

“Ang matag usa kanato adunay mga panahon nga kinahanglan kitang masayod nga mahimong mas maayo ang mga butang. … Alang sa emosyonal nga kahimsog ug espirituhanong kalagsik, ang tanan kinahanglang makapanglantaw sa unahan nga moabot ang kahupayan, sa usa ka butang nga makapahimuot ug makapalagsik ug malaomon, bisan kon kana nga panalangin hapit na mahitabo o madugay pa. Igo na nga makahibalo nga moabot kita didto, nga kon unsa man kini ka duol o ka layo, anaa ang saad sa “mga maayong butang nga nanagpangabot.” (“An High Priest of Good Things to Come,” Ensign, Nov. 1999, 36)

• Sa unsang paagi nga ang pagkahibalo nga adunay “mga maayong butang nga nanagpangabot” makatabang kaninyo sa pag-atubang sa mga hagit sa kinabuhi?

Dapita ang mga estudyante sa pagbasa sa Mga Hebreohanon 9:11 (o usa ka estudyante sa pagbasa niini og kusog) nga mangita sa usa ka paghulagway sa ngalan mahitungod ni Jesukristo. Isulat ang mosunod nga mga pakisayran sa kasulatan ug mga pangutana diha sa pisara. Dapita ang mga estudyante nga magporma og gagmayng grupo ug sa pagpili og usa sa mga tudling nga dungan nga tun-an. Ang mga estudyante kinahanglan nga mangita sa unsay ilang makat-onan mahitungod ni Jesukristo isip usa ka “halangdong pari sa mga maayong butang nga nanagpangabot.”

Aron matabangan ang mga estudyante nga masabtan ang kaagi ug mga simbolo ni Jesukristo isip atong Halangdon nga Pangulong Pari mahimo nilang basahon ang “Mga Hebreohanon 9. Unsay gibuhat sa halangdon nga pari sa adlaw sa Pag-ula?” sa Mga Tabang sa Kasulatan: Bag-ong Tugon.

Human mahatagan ang mga estudyante og panahon sa pagtuon, dapita sila sa pagpakigbahin sa ilang nakat-onan mahitungod ni Jesukristo isip atong Halangdong Pangulong Pari ug ang Tigpataliwala sa bag-o nga pakigsaad. Samtang mopakigbahin ang mga estudyante, mahimo nimong tabangan sila sa pag-ila sa mosunod nga kamatuoran: Tungod kay si Jesukristo mao ang Tigpataliwala sa bag-ong pakigsaad, kita makalaom alang sa maayong mga butang nga moabot.

Mahimo kang mangutana:

• Unsa ang gitudlo kanimo sa tahas ni Jesukristo isip tigpataliwala mahitungod sa inyong relasyon sa pakigsaad uban Kaniya? (Kon makatabang, mahimo ninyong basahon og dungan ang unang parapo sa Giya ngadto sa mga Kasulatan, “Tigpataliwala” sa Librarya sa Ebanghelyo.)

• Unsa ang inyong gipaabot tungod sa inyong pakigsaad nga relasyon uban ni Jesukristo?

Ikonsiderar ang pagpakigbahin sa mosunod nga pamahayag ni Elder Ulisses Soares:

Mag-ampo ko nga kita [makahimong] … magmaya sa gusto nakong tawagon nga “pagsalig sa pakigsaad pinaagi ni Jesukristo.” Kini nga pagsalig mao ang hilom apan segurado nga pasalig nga makadawat sa mga panalangin nga gisaad sa Dios alang niadtong nagtuman sa ilang mga pakigsaad ug gikinahanglan kaayo taliwala sa mahagitong mga sirkumstansiya sa atong panahon. (“Pagsalig sa Pakigsaad pinaagi ni Jesukristo,” Liahona, Mayo 2024, 17)

Dapita ang mga estudyante sa pagpamalandong kon sa unsang paagi ang “pagsalig sa pakigsaad pinaagi ni Jesukristo” makatabang nila nga makahibalo nga adunay maayong mga butang nga moabot. Ang mga estudyante makarekord sa ilang mga hunahuna ug mga pagbati. Awhaga ang pipila ka estudyante sa pagpakigbahin sa unsay ilang girekord.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakita ug pagbasa og dungan sa mosunod nga mga pamahayag sa mga propeta sa Ginoo:

Ang hugot nga pagtuo [mao] ang unang baroganan sa gipadayag nga relihiyon, ug ang pundasyon sa tanang pagkamatarong. (Mga Pagtulun-an sa mga Presidente sa Simbahan: Joseph F. Smith [1998], 58)

Sa tanan natong panginahanglan, nagtuo ko nga ang labing mahinungdanon mao ang pagpalambo sa pagtuo. (Gordon B. Hinckley, “Lord, Increase Our Faith,” Ensign, Nov. 1987, 54)

Pagmaya. Ang umaabot sama kahayag sa inyong hugot nga pagtuo. (Thomas S. Monson, “Pagmaya,” Liahona, Mayo 2009, 92)

Ang hugot nga pagtuo diha ni Jesukristo mao ang kinadak-ang gahom nga atong magamit niini nga kinabuhi. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid, ”Liahona, Mayo 2021, 103)

• Unsay inyong mahunahuna samtang inyong gibasa kini nga mga pamahayag?

• Unsay tahas sa pagtuo diha ni Jesukristo ang papel sa inyong kinabuhi? (Hatagi og panahon ang mga estudyante nga hilom nga mamalandong ug sa pagrekord sa ilang mga hunahuna.)

Dapita ang mga estudyante sa pagbasa sa Mga Hebreohanon 11:1–3, nga mangita sa kahulogan sa hugot nga pagtuo. Makagamit sila og usa ka diksiyonaryo, ug mga footnote aron mas masabtan ang buot ipasabot sa pagtuo (tan-awa sa kahanas “Pagpangita sa Kahulogan sa mga Pulong ug mga Hugpong sa mga Pulong,” diha sa Mga Kahanas sa Pagtuon sa Kasulatan). Dayon ipasulat sa mga estudyante ang kahulogan sa pagtuo diha sa pisara. Hatagi sila og panahon sa pagrebyo sa unsay gisulat sa uban.

• Human sa pagtan-aw sa mga kahulogan sa pagtuo diha sa pisara, ngano sa inyong hunahuna ang pagtuo kang Jesukristo tingali mao ang atong labing dako nga panginahanglan ug labing dako nga gahom?

Mahimo nimong pahinumdoman ang mga estudyante nga ang Mga Hebreohanon 11 naglangkob og daghang mga ehemplo sa mga tawo kinsa mipakita og hugot nga pagtuo kang Jesukristo. Ipakita ang mosunod nga mga ngalan ug mga pakisayran sa kasulatan ug isulat sa pisara ang mosunod nga dili kompleto nga kamatuoran: Uban sa hugot pagtuo ni Jesukristo, kita makahimo sa … Dapita ang mga estudyante sa pagpili og usa o daghang mga ngalan ug sa pagbasa sa may kalabotan nga mga bersikulo. Dayon ipaila sa mga estudyante ang lain-laing mga paagi sa pagkompleto sa pamahayag.

• Abel (bersikulo 4)

• Enoch (mga bersikulo 5–6)

• Noe (bersikulo 7)

• Abraham (mga bersikulo 8–10, 17–19)

• Moises (mga bersikulo 23–27)

• Mga Israelita (mga bersikulo 28–39)

Human mahatagi ang mga estudyante og panahon sa pagtuon, dapita sila sa pagpakigbahin kon unsa ang ilang nakat-onan mahitungod sa hugot nga pagtuo. Dasiga sila usab sa pagpakigbahin kon giunsa nila pagkompleto ang pamahayag diha sa pisara. Ang ilang mga tubag mahimong maglakip sa mosunod: Uban sa hugot nga pagtuo diha ni Jesukristo, kita makalahutay sa mga pag-antos, makahimo og mga milagro, ug makadawat sa balaang mga saad.

Samtang mopakigbahin ang mga estudyante sa ilang mga hunahuna ug makompleto ang pamahayag, hunahunaa ang pagpangutana sama sa mosunod aron mapalawom ang ilang pagkat-on:

• Sa unsang paagi ang tawo sa matag asoy nagpakita ug hugot nga pagtuo?

• Unsa ang inyong nakat-onan gikan niini nga mga asoy nga makapalig-on sa inyong hugot nga pagtuo diha ni Jesukristo?

• Unsa ang inyong nakat-onan mahitungod sa Dios samtang nagtuon kamo niining mga bersikulo?

Hunahunaa ang pagpakita sa mosunod nga pamahayag gikan ni Presidente Russell M. Nelson:

Ang hugot nga pagtuo kang Jesukristo mao ang pundasyon sa tanan nga tinuohan ug agianan sa balaang gahom. Sumala ni Apostol Pablo, “Kon walay pagtuo dili gayod mahimo ang pagpahimuot sa [Dios]” Mga Hebreohanon 11:6]. …

Ang tanan nga maayo sa kinabuhi—ang matag kalagmitan nga panalangin nga may mahangtorong kahulogan—magsugod sa hugot nga pagtuo. …

Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo Siya kanato nga motuo.

Minahal kong kaigsoonan, ang akong panawagan kaninyo … [mao nga] sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, bisan og ang inyong personal nga mga hagit pareha kadako sa Bukid sa Everest.

Ang inyong mga bukid tingali mga kasubo, pagduhaduha, sakit, o ubang personal nga mga problema. Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. Nagkinahanglan kana og buhat. …

Ang paghimo og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot. (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103–4)

• Unsa nga mga paningkamot ang nakatabang ninyo nga madugangan ang inyong pagtuo diha ni Jesukristo?

Dapita ang mga estudyante sa hilom nga pagpamalandong sa pamahayag ni Presidente Nelson ug sa pagrekord sa ilang mga tubag sa mosunod nga mga pangutana:

• Unsang personal nga hagit o kahimtang ang inyong giatubang karon?

• Sa unsang paagi nga ang pagpalambo sa inyong pagtuo diha ni Jesukristo makatabang niini nga hagit o kahimtang?

• Unsa nga paningkamot ang inyong mahimo aron mapalambo ang inyong pagtuo diha ni Jesukristo?

Balik ngadto sa “Mga Opsiyon nga Kalihokan sa Pagkat-on.”

Isulat ang mosunod nga mga pulong diha sa pisara: mopanton, mosilot, mokorehir, modisiplina, mohampak.

Kon gikinahanglan, dapita ang mga estudyante sa pagpangita sa kahulogan niini nga mga pulong. Dayon pangutana:

• Nakonektar ba ninyo kini nga mga pulong sa gugma? Kon mao, ngano man?

Dapita ang mga estudyante sa pagbasa sa Mga Hebreohanon 12:3–11, mangita kon unsa ang gitudlo niini nga mga bersikulo mahitungod sa kon ngano ang Dios mopanton kanato.

• Unsa ang gitudlo kaninyo sa mga bersikulo 5–11 mahitungod sa gugma sa Dios?

• Unsa ang mga katuyoan sa Dios sa pagpanton kanato? (Ang mga estudyante mahimong moila og usa ka kamatuoran sama sa mosunod: Tungod kay gihigugma kita sa Dios, kita Iyang gipanton, o gikorehian, aron atong matagamtam ang malinawon nga bunga sa pagkamatarong.)

• Unsa ang pipila ka paagi nga ang Ginoo nagpanton, o nagkorehir kanato?

Ikonsiderar ang pagpakigbahin sa mosunod nga pamahayag ni Elder D. Todd Christofferson:

Kon kita andam nga modawat niini, ang gikinahanglan nga pagkorehir moabot diha sa daghang mga porma ug gikan sa daghang mga tinubdan. Kini mahimong moabot diha sa atong mga pag-ampo samtang ang Dios mosulti diha sa atong hunahuna ug kasingkasing pinaagi sa Espiritu Santo (tan-awa sa D&P 8:2). Kini mahimong moabot diha sa porma sa mga pag-ampo nga gitubag og dili o sa lahi nga paagi kaysa atong gilaoman. Ang pagpanton mahimong moabot samtang nagtuon kita sa mga kasulatan ug gipahinumdoman sa mga kakulangan, pagkadili masulundon, o pagbalewala lang sa mga butang.

Ang pagkorehir mahimong magagikan sa uban, ilabi na niadtong [mga apostoles, mga propeta, mga patriarch, mga bishop, ug uban pa] kinsa dinasig sa Dios aron kita magmalipayon. …

Ang pagkorehir, unta malumo, mahimong magagikan sa usa ka kapikas. …

Ang mga ginikanan makahimo ug kinahanglang mokorehir, gani mopanton, aron ang ilang mga anak dili masugamak sa walay kalooy nga kaaway ug sa iyang mga tigsuporta. …

Hinumdomi nga kon atong batukan ang pagkorihir, ang uban mahimong hingpit nga mohunong sa paghatag niini, bisan pa man sa ilang gugma alang kanato. Kon kita sige man lang og kapakyas sa pagbuhat sa unsay gipanton sa usa ka mahigugmaon nga Dios, nan Siya usab mohunong. (“Ako Nagabadlong ug Nagapanton sa Akong Gihigugma,” Liahona, Mayo 2011, 97)

• Unsa ang labing nakadani kaninyo mahitungod sa mensahe ni Elder Christofferson?

Dapita ang mga estudyante sa hilom nga pagpamalandong sa usa ka panahon sa dihang gibati nila nga gipanton sa Ginoo. Dapita ang mga estudyante sa pagpamalandong ug sa pagrekord sa ilang mga hunahuna mahitungod sa mosunod nga mga pangutana:

• Giunsa ninyo sa pagtubag ang pagpanton o pagkorehir?

• Unsa ang gipaningkamotan sa Ginoo nga itudlo kaninyo?

• Unsa ang inyong mahimo aron mahimong mas madawaton sa pagpanton sa Ginoo?

Sa pagtapos sa klase, mahimo kamong motan-aw sa “The Will of God” (3:02) o mopakigbahin sa asoy ni Presidente Hugh B. Brown sa currant bush (tan-awa sa Hugh B. Brown, “Liahona Classic: The Currant Bush,” Liahona, Mar. 2002, 22).

3:2

Balik ngadto sa “Mga Opsiyon nga Kalihokan sa Pagkat-on.”