Mga Taga-Efeso

Dapita ang mga estudyante sa paghunahuna sa dihang sila o ang usa ka tawo nga ilang kaila mibati sama nga sila wala mabagay diha sa simbahan.

• Unsa nga tambag ang inyong ihatag ngadto sa usa ka tawo kinsa mibati niini nga paagi?

Ipasabot nga sa iyang sulat ngadto sa mga taga-Efeso, naobserbahan ni Pablo nga ang pipila ka miyembro mibati sama og sila “mga estranghero ug mga langyaw” taliwala sa mga Santos nga Judeo.(Mga Taga-Efeso 2:19). Kini nga mga miyembro sa Simbahan kaniadto mga Santos nga Hentil kinsa wala mibati nga sila nabagay tungod sa ilang kagahapon (tan-awa sa Mga Taga-Efeso 2:1–3).

Dapita ang mga estudyante sa pagtrabaho kauban sa usa ka pares o diha sa usa ka ginagmay nga mga grupo. Ipabasa kanila ang Mga Taga-Efeso 2:11–22, mangita og mga kamatuoran nga makatabang kanato sa pagdugang sa atong pagbati nga nasakop sa ubang mga Santos.

• Unsa sa inyong hunahuna ang kahulogan nga mahimong “mga katagilungsod” (Mga Taga-Efeso 2:19) diha sa Simbahan sa Ginoo?

• Unsa nga mga kamatuoran ang gitudlo ni Pablo nga makatabang sa pagdugang sa imong pagbati nga nasakop sa simbahan? (Ang mga estudyante mahimong moila og mga kamatuoran sama sa mosunod: Tungod sa Pag-ula sa Manluluwas, ang tanang mga tawo makahimo nga ma-Santos diha sa panimalay sa Dios. Kita mahimong mga “katagilungsod” uban sa mga Santos kon motukod kita sa atong pundasyon diha sa mga pagtulon-an sa mga apostol ug mga propeta ug diha ni Jesukristo, kinsa mao ang ulohang tukoran nga bato.)

Kon makatabang, ikaw makapakita sa mosunod nga imahe sa usa ka tukoran nga bato ug pundasyon ug dapita ang mga estudyante sa pagpakigbahin unsay ilang nakaplagan nga mahinungdanon mahitungod niini nga analohiya.

Hunahunaa ang pagpangutana sa mosunod:

• Ngano sa imong hunahuna magsinati kita og mas dako nga pagbati nga nasakop kon mosunod kita sa mga pagtulon-an sa apostoles ug mga propeta sa Ginoo?

• Sa unsang paagi ang paghimo ni Jesukristo nga tukoran nga bato sa imong kinabuhi mokuha sa gihunahuna nga mga babag tali kanimo ug sa ubang mga miyembro sa Simbahan? (Kon makatabang, ribyoha ang “Mga Taga-Efeso 2:20–21. Unsa ang importansya sa usa ka tukoran nga bato?” diha sa Mga Tabang sa Kasulatan: Bag-ong Tugon.)

Ikaw makapakita ug makabasa sa mosunod nga pamahayag ni Elder Christophe G. Giraud-Carrier:

Akong naamgohan nga ang ebanghelyo ni Jesukristo maoy tighimo natong managsama [equalizer]. Samtang hangupon nato kini sa tinuoray, … kita, ug ang uban usab, “dili na mga langyaw ug dumuloong, kondili mga katagilungsod sa mga balaan, ug sa panimalay sa Dios” [Mga Taga-Efeso 2:19].

Bag-o lang nakadungog ko og presidente sa branch sa usa sa among mga yunit nga dunay lain-laing pinulongan nga miingon bahin niini, sama sa gihimo ni Elder Gerrit W. Gong, isip pagkahisakop diha sa pakigsaad. … Nahisakop kita sa pundok sa katawhan diin ang tanan naningkamot sa pagbutang sa Manluluwas ug sa ilang mga pakigsaad diha sa sentro sa ilang kinabuhi ug sa pagsunod sa ebanghelyo sa malipayong paagi. … Sa ingon niini, kita mowagtang sa atong kaugalingong natural nga mga pagpihig ug mga pagkadili makiangayon ngadto sa uban, diin makatabang usab nga maminosan ang ilang mga pagpihig ug pagkadili makiangayon ngari kanato, sa talagsaong mahiyason nga sikulo. (“Kita Iyang mga Anak,” Liahona, Nob. 2023, 115–16)

• Sa unsang paagi nga ang pagbutang sa imong pakigsaad nga relasyon ngadto sa Langitnong Amahan ug ni Jesukristo diha sa sentro sa imong kinabui mitabang kanimo sa pagwagtang sa mga pagpihig o pagkadili makiangayon ngadto sa ubang mga miyembro sa Simbahan?

Dapita ang mga estudyante sa pagpamalandong unsay ilang mabuhat sa pag-amuma og usa ka mas dako nga pagbati nga nahisakop alang sa ilang mga kaugalingon ug sa ubang mga miyembro diha sa ilang mga ward.

Balik ngadto sa “Mga Kapilian nga Kalihokan sa Pagkat-on.”

Dapita ang mga estudyante sa paghanduraw nga sila anaa sa usa ka ward council ug ang bishop nagpahayag og kabalaka nga daghang miyembro sa ward ang nagduhaduha sa ilang pag-apil sa simbahan. Ang uban mibati sama og sila wala kaayoy nakuha gikan sa ilang pagkamiyembro sa Simbahan; ang uban mibati nga sila sa tinuod wala magkinahanglan sa pag-apil sa simbahan nga mahimong espiritwal; ug ang uban mibati ingon og ang ilang panahon mahimong mas maayo nga igahin sa pagbuhat og laing butang inig ka Dominggo.

Atol sa miting, nanghangyo ang bishop kanimo sa pag-andam og usa ka leksiyon sa Sunday School alang sa mga miyembro sa ward mahitungod sa mga panalangin sa pag-apil diha sa Simbahan sa Manluluwas.

Ipasabot nga misulat si Pablo mahitungod sa ka importante sa Simbahan sa Ginoo alang sa tanang Santos. Hatagi ang mga estudyante sa mga handout nga giulohan og “Mga Panalangin sa Pag-apil diha sa Simbahan sa Manluluwas,” ug dapita sila sa pag-andam og usa ka latid sa leksiyon.

Human mahatagan ang mga estudyante og panahon sa pagbuhat sa ilang mga latid, pabanos-banosa sila sa pagpakigbahin sa ilang tulo ngadto sa lima ka minuto nga leksiyon uban sa ilang pares. Ikaw makatapos niini nga kalihokan pinaagi sa pagdapit og pipila ka mga estudyante sa pagpakigbahin kon unsa ang ilang nakat-onan gikan sa usag usa nga mga leksiyon. Makadapit ka usab sa mga estudyante sa pagpakigbahin sa ilang leksiyon ngadto sa usa ka tawo nga ilang kaila.

Balik ngadto sa “Mga Kapilian nga Kalihokan sa Pagkat-on.”

Mahimo kang modapit og pipila ka mga estudyante sa pagpakigbahin og usa ka positibo nga kasinatian nga bag-ohay nilang naangkon uban sa usa ka sakop sa pamilya. Dayon pagdapit og mga estudyante sa paghunahuna og usa ka relasyon nga gusto nila nga ipalambo.

Ipasabot nga diha sa sulat ni Pablo ngadto sa mga taga-Efeso, siya mihatag og gibug-aton kon giunsa sa ehemplo sa Manluluwas paggiya kanato sa atong mga relasyon sa pamilya. Ipabasa sa mga estudyante ang Mga Taga-Efeso 5:21–33; 6:1–4, mangita sa mga baroganan nga makatabang sa paglig-on sa mga relasyon sa pamilya.

• Unsa nga mga baroganan ang gitudlo ni Pablo nga makalig-on sa inyong mga relasyon sa pamilya? (Ang mga estudyante mahimong moila og mga kamatuoran sama sa mosunod: Mga asawa ug mga bana kinahanglan nga maghigugmaay sa usag usa ingon nga ang Manluluwas naghigugma kanato. Ang Ginoo nagpanalangin kanato samtang kita nagtahod sa atong mga ginikanan. Ang mga ginikanan kinahanglang mopadako sa ilang mga anak diha sa pagmatuto ug pagpahimangno kabahin sa Ginoo.)

Samtang ang mga estudyante nakigbahin, ikaw makagamit sa usa sa mosunod nga mga ideya sa pagtudlo nga labing nahisubay sa inyong panaghisgotan:

Sa pagtapos sa kalihokan, dapita ang mga estudyante sa paghunahuna mahitungod sa mga relasyon sa pamilya nga gusto nila nga palamboon. Dapita sila sa pagpamalandong kabahin sa unsay ilang nakat-onan gikan sa ehemplo sa Manluluwas ug ipaila kon unsa ang ilang pagabuhaton sa pagpalambo sa ilang mga relasyon sa pamilya.

Pahinumdom: Kon ang mga estudyante mopahayag og kabalaka mahitungod sa pinulongan nga gigamit ni Pablo sa paghulagway sa relasyon sa usa ka asawa ngadto sa iyang bana, makabasa kamo og dungan sa “Mga Taga-Efeso 5:21–33. Unsa ang mensahe ni Pablo mahitungod sa pagkamanunuton diha sa kaminyoon?” sa Mga Tabang sa Kasulatan:Bag-ong Tugon. Makaadto ka usab sa “Kaminyoon” sa Mga Hilisgotan ug mga Pangutana (Librarya sa Ebanghelyo) sa pagpangita og mga pagtulon-an gikan sa ulahing mga adlaw nga mga lider sa Simbahan mahitungod sa pagkamanagsama sa mga lalaki ug sa mga babaye diha sa kaminyoon.

Balik ngadto sa “Mga Kapilian nga Kalihokan sa Pagkat-on.”

Makahimo ka sa pagsugod pinaagi sa pagbasa sa mosunod nga pahayag ni Elder Ulisses Soares:

Ang gubat sa maayo batok sa daotan mopadayon sa tibuok natong mga kinabuhi gumikan nga ang katuyoan sa kaaway mao ang paghimo sa tanang katawhan nga miserable sama kaniya. Si Satanas ug ang iyang mga anghel maninguha sa paglibog sa atong mga hunahuna ug maninguha sa pagpugong pinaagi sa pagtintal kanato sa pagpakasala. Kon sila makahimo, ilang daoton ang tanan nga maayo. Bisan pa niana, importante kini nga masabtan nga sila makabaton lamang og gahom ibabaw kanato kon kita motugot niini. (“Oo, Kita Makahimo ug Modaog Gayod!,” Liahona, Mayo 2015, 75)

• Sa unsang mga paagi si Satanas maninguha sa pagtintal sa atong mga young adult?

• Unsa nga mensahe sa paglaom ang gihatag ni Elder Soares?

Dapita ang mga estudyante sa pagbasa og hilom sa Mga Taga-Efeso 6:10–18, mangita kon sa unsang paagi kita makabaton og gahom ibabaw sa kaaway?

• Sumala ni Pablo, unsaon nimo sa pagsagubang sa daotang mga impluwensiya nga naglibot kanato sa atong panahon? (Ang mga estudyante mahimong moila og usa ka kamatuoran sama sa mosunod: Kon atong isul-ob ang tibuok taming sa Dios, siya mopanalipod kanato batok sa daotan.)

Sa unsang paagi ang pagsul-ob sa taming sa Dios nagpakita sa imong hugot nga pagtuo diha ni Jesukristo?

• Ngano kaha nga importante nga isul-ob ang tibuok taming sa Dios, dili lamang ang kabahin niini? (Makatan-aw kamo og dungan sa “The Armor of God” [2:06]).

2:6

Sa pagtabang sa mga estudyante sa pagpalawom sa ilang pagsabot sa simbolismo sa taming sa Dios, paghatag kanila sa handout “Putting the Armor of God.” (Alang sa dugang nga pagtuon, tan-awa sa “Pagsabot sa Simbolismo diha sa mga Kasulatan” sa Mga Kahanas sa Pagtuon sa Kasulatan.) Ang mga estudyante mahimong makigtambayayong sa usa ka kauban, o diha sa gagmay nga mga grupo.

Human ang mga estudyante dihay panahon sa pagkompleto sa handout, dapita sila sa pagpakigbahin unsa ang ilang nakat-onan mahitungod sa taming sa Dios. Isip kabahin sa imong panaghisgot, hunahunaa ang pagpangutana:

Sa unsang paagi ang pagsul-ob sa taming sa Dios mipanalipod kanimo batok sa daotan?

Sa pagtabang sa mga estudyante paggamit sa unsay ilang nakat-onan, makapakita ka sa mosunod nga mga pangutana ug dapita ang mga estudyante sa pagpamalandong niini. Ang mga estudyante makarekord sa bisan unsang mga panghunahuna ang ilang madawat.

• Hain niini nga mga piraso sa espirituhanong taming sa imong hunahuna imong magamit sa labing maayo?

• Asa niini ang labing mahuyang nga bahin sa imong taming?

• Unsay imong mahimo sa pagsiguro nga ikaw nagsul-ob sa tibuok taming sa Dios sa matag adlaw?

Balik ngadto sa “Mga Kapilian nga Kalihokan sa Pagkat-on.”