1 ug 2 Timoteo; Tito; Filemon

Daghang opsiyon sa pagkat-on ang gihatag kaninyo ug sa inyong mga estudyante. Sa mainampoong paagi pagpili kon hain nga opsiyon o mga opsiyon ang mahimong labing makahuloganon alang sa inyong klase.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakita sa mosunod nga pagtimbang-timbang sa kaugalingon. Hatagi og panahon ang mga estudyante sa pagkompleto niini sa ilang kaugalingon.

Awhaga ang mga estudyante samtang moapil sila niini nga kalihokan sa pagkat-on nga bantayan ang mga pag-aghat gikan sa Espiritu Santo nga makatabang nila nga mobarog isip usa ka saksi ni Jesukristo.

Aron matabangan ang mga estudyante nga makasabot sa konteksto nga may kalabotan sa ubang mga pagtulun-an ni Pablo ngadto ni Timoteo, mahimong makatabang ang pagpasabot nga si Timoteo usa ka suod ug kasaligan nga kauban ni Pablo (tan-awa sa 1 Mga Taga-Corinto 4:17). Si Timoteo nag-alagad isip usa ka lider sa Simbahan sa Efeso (tan-awa ang 1 Timoteo 1:3), usa ka dakong siyudad diin ang pagsimba og dios-dios ug imoralidad grabeng mikatap (tan-awa sa Mga Buhat 19:35). Gipasabot ni Pablo nga pipila ka mga miyembro nagduha-duha sa mga abilidad sa pagpangulo ni Timoteo tungod kay batan-on pa siya (tan-awa sa 1 Timoteo 4:12). Alang sa dugang nga impormasyon mahitungod ni Timoteo, tan-awa sa “Ngadto kang kinsa ang 1 Timoteo gisulat ug ngano?” and “Ngadto kang kinsa ang 2 Timoteo gisulat ug ngano?” sa Mga Tabang sa Kasulatan: Bag-ong Tugon.

Dapita ang mga estudyante sa pagtuon sa 1 Timoteo 4:12–16 ug 2 Timoteo 1:7–9, mangita sa tambag ni Pablo ngadto ni Timoteo. Aron matabangan ang mga estudyante sa paghisgot unsa ang ilang nakaplagan, ikonsiderar ang pagpangutana sa mosunod nga mga pangutana:

• Unsa ang inyong nakaplagan niini nga mga bersikulo nga makahuloganon kaninyo? Ngano man? (Samtang ang mga estudyante mopakigbahin sa ilang mga tubag niini nga mga pangutana, makatabang kamo nila sa pag-ila sa mga kamatuoran sama sa mosunod: Kon kita mga panig-ingnan sa mga magtutuo ni Jesukristo, makatabang kita sa pagdala og kaluwasan sa atong mga kaugalingon ug sa uban [tan-awa sa 1 Timoteo 4:12, 16]. Samtang matinguhaon kita nga mangita aron makabaton sa Espiritu uban kanato, atong mabuntog ang kahadlok ug dili ikaulaw ang atong pagpamatuod kang Jesukristo [tan-awa sa 2 Timoteo 1:7–9].)

Pahinumdomi ang mga estudyante nga sa 1 Timoteo 4:12, gilista ni Pablo ang daghang paagi nga kita mahimong mga panig-ingnan sa mga magtutuo. Itudlo nga ang pulong nga “pagpanulti” niini nga bersikulo nagpasabot sa atong kinaiya ug pamatasan. Ikonsiderar ang pagsulat sa mosunod nga mga pulong gikan sa bersikulo 12 isip ulohan diha sa pisara: pulong, pagpanulti, gugma nga putli, espiritu, hugot nga pagtuo, ug kaputli. Mahimo ninyong bahinon ang klase ngadto sa gagmay nga mga grupo ug hatagi ang matag grupo og usa sa mga pulong nga gilista diha sa pisara. Dapita sila sa paghisgot og dungan sa mosunod nga mga pangutana:

• Sa unsang paagi nga si Jesukristo mao ang hingpit nga panig-ingnan niini nga paagi?

• Unsa nga piho nga mga paagi nga ikaw mahimong usa ka panig-ingnan sa usa ka magtutuo niini nga paagi?

Dapita ang mga estudyante sa matag grupo sa pagpakigbahin sa ilang mga tubag sa mga pangutana nga ilang gihisgotan. Kamo o ang usa ka sakop sa matag grupo mahimong mosulat sa mga tubag diha sa pisara, ubos sa tugbang nga mga ulohan.

Mahimo usab ninyong hisgotan ang mga pangutana sama sa mosunod:

• Unsa kaha ang makahimo niini nga lisod nga mahimong panig-ingnan sa mga magtutuo? Unsa ang makatabang kanato sa pagbuntog niini nga mga hagit?

• Sa unsa nga paagi nga ang mga paningkamot sa uban nga mahimong usa ka paning-ingnan sa mga magtutuo nakatabang ninyo nga mas mahiduol ngadto ni Jesukristo?

Awhaga ang mga estudyante sa pagtino unsaon nila nga mas magamit sa hingpit ang tambag ni Pablo nga mahimong mga panig-ingnan sa mga magtutuo. Awhaga sila sa pagrekord ug sa pagsunod sa mga pag-aghat gikan sa Espiritu Santo.

Balik ngadto sa “Mga Opsiyon nga Kalihokan sa Pagkat-on.”

Pagpakita og usa ka kwarta ngadto sa klase. Dayon dapita ang mga estudyante sa paghisgot sa mosunod nga mga pangutana ngadto sa usa ka tawo nga naglingkod sa ilang tupad:

• Sa unsang mga paagi nga ang pagbaton og kwarta makabenepisyo?

• Unsa nga espirituwal nga mga kakuyaw ang ikalambigit sa kwarta?

Ipasabot nga si Pablo miila og usa ka bakak nga pagtuo sa pipila ka miyembro sa Simbahan—nga ang “relihiyon usa ka paagi sa pagpadato” (1 Timoteo 6:5). Awhaga ang mga estudyante samtang ilang tun-an ang mga pagtulun-an ni Pablo sa pagkonsiderar unsay ilang makat-onan gikan sa Espiritu Santo nga makatabang nila sa ilang personal nga mga sirkumstansiya.

Tun-i og dungan ang 1 Timoteo 6:6–10. Dapita ang mga estudyante sa pagpangita sa mga pasidaan ni Pablo mahitungod sa bahandi.

• Unsa sa inyong hunahuna ang buot ipasabot sa hugpong sa mga pulong nga “kay ang pagkamahigugmaon og salapi [kwarta] maoy tinubdan sa tanang pagkadaotan”? (1 Timoteo 6:10).

Ikonsiderar ang pagpakigbahin sa mosunod nga pamahayag ni Presidente Dallin H. Oaks isip kabahin sa inyong panaghisgotan:

Wala gayoy nag-uban nga kadaotan sa salapi. Ang Maayong Samarianhon migamit sa samang salapi aron moserbisyo sa iyang isigkatawo nga gigamit ni Judas sa pagluib sa Agalon. ‘Ang pagkamahigugmaon sa salapi [maoy] tinubdan sa tanang pagkadaotan.’ (1 Tim. 6:10.) Ang kritikal kaayong kalainan mao ang sukod sa pagkaespirituwal nga atong gibuhat sa pagtan-aw, pagtimbang-timbang, ug pagdumala sa mga butang niini nga kalibotan” (“Spirituality,” Ensign, Nov. 1985, 63).

• Sa unsang paagi nga ang naghingapin nga paghatag og prayoridad sa salapi o mga kabtangan makaapekto sa atong relasyon sa Langitnong Amahan ug ni Jesukristo?

Dapita ang mga estudyante sa pagbasa sa 1 Timoteo 6:11–12, 17–19, mangita sa tambag ni Pablo ngadto ni Timoteo ug niadtong adunay mga katigayonan. Sa pagdapit sa mga estudyante sa pagpakigbahin unsay ilang nakat-onan gikan niini nga mga bersikulo, ikonsiderar ang pagpangutana sama sa mosunod:

• Unsa nga tambag ang inyong nakita nga labing makatabang? Ngano man?

• Unsa nga mga kamatuoran ang inyong nakat-onan gikan sa mga pagtulun-an ni Pablo nga makagiya sa atong mga prayoridad sa atong mga kinabuhi? (Adunay daghang kamatuoran nga mahimong mailhan sa mga estudyante niini nga mga bersikulo, lakip sa mosunod: Ang pagsalig sa buhi nga Dios kay sa walay kaseguroan nga mga katigayonan mag-andam nato alang sa kinabuhing dayon.)

Aron sa pagtabang sa mga estudyante nga mas makasabot ug mobati sa kaimportante niini nga kamatuoran, dapita sila sa pagtan-aw sa “Katigayunan, Mga” sa Giya ngadto sa mga Kasulatan (Librarya sa Ebanghelyo) ug sa pagtuon sa pipila sa may kalabottan nga mga tudling sa kasulatan. Dapita ang mga estudyante sa pagpakigbahin og bisan unsang mga panabot nga ilang naangkon gikan sa ilang pagtuon. Mahimo usab kamong mangutana sama sa mosunod:

• Unsay inyong nahibaloan mahitungod sa Langitnong Amahan ug ni Jesukristo nga makatabang ninyo sa paghatag og prayoridad sa inyong relasyon Kanila kay sa salapi o materyal nga mga kabtangan? (Isip kabahin niini nga panaghisgotan, mahimo ninyong tan-awon ang “We Can Find Happiness” [6:18].)

  

  6:18

Dapita ang mga estudyante sa pagkonsiderar unsaon nila paggamit sa mga kamatuoran nga inyong gihisgotan karon sa ilang mga kinabuhi. Dapita sila sa pagrekord sa mga aksiyon nga ilang gihimo ug sa bisan unsa nga ubang mga impresyon nga ilang nadawat gikan sa Espiritu Santo.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagsugod niining kalihokan sa pagkat-on pinaagi sa paghisgot sa mosunod nga pamahayag ni Presidente Russell M. Nelson:

Akong minahal nga mga kaigsoonan, daghan kaayong talagsaong mga butang anaa sa unahan. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Tali karon ug sa adlaw sa Iyang pagbalik “uban sa gahom ug dakong himaya” [Joseph Smith—Mateo 1:36], Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon.

Bisan pa, kita karon nagpuyo sa unsay segurado nga mao ang labing komplikado nga panahon sa kasaysayan sa kalibotan. Ang mga ka komplikado ug mga hagit nakapahimo sa daghang mga tawo nga mobati nga nabug-atan ug gikapoy. (“Buntoga ang Kalibotan ug Pangita og Kapahulayan,” Liahona, Nob. 2022, 95)

• Unsa ang inyong mga hunahuna mahitungod niini nga pamahayag?

• Unsa ang pipila ka komplikado ug mga hagit sa atong panahon nga nakapahimo sa daghang mga tawo nga mobati nga nabug-atan ug gikapoy?

Ipasabot nga ang karaan ug moderno nga mga propeta mipasidaan mahitungod sa ka komplikado ug mga hagit nga may kalabotan sa kataposan nga mga adlaw. Mipakigbahin si Pablo og pipila niini nga mga pasidaan sa iyang ikaduha nga sulat ngadto ni Timoteo. Awhaga ang mga estudyante samtang sila magtuon sa pagkonsiderar sa unsang paagi nga ang tambag ni Pablo makatabang nila sa pagnabigar sa mga hagit nga ilang giatubang.

Basaha ang 2 Timoteo 3:1–7, 12–13; 4:3–4, mangita sa mga paghulagway ni Pablo sa mga ka kakuyaw sa kataposang mga adlaw. Alang sa tabang sa pagsabot sa malisod nga mga pulong o hugpong sa mga pulong niini nga mga bersikulo, ikonsiderar ang pagpabasa sa mga estudyante sa “2 Timoteo 3:1–7. Unsa ang gitudlo ni Pablo mahitungod sa mga katalagman sa kataposang mga adlaw?” sa Mga Tabang sa Kasulatan: Bag-ong Tugon.

• Unsa nga mga panig-ingnan sa mga kondisyon nga gihulagway ni Pablo ang inyong nakita sa kalibotan karon?

Tingali makatabang ang pagpakigbahin sa mosunod nga kasinatian ni Presidente Boyd K. Packer samtang nagbasa sa panagna ni Pablo nga narekord sa 2 Timoteo 3. Si Presidente Packer misaysay:

Samtang nagtuon usa ka adlaw, nagbasa ko niana nga punto ug naglingkod nga namalandong mahitungod sa ebidensya nga karon nagkompirma sa matag elemento niana nga panagna. Dihay kahimtang sa grabe kaayo nga kasubo ug kahadlok nga adunay daotang mahitabo, usa ka daotan nga pagbati sa kapakyasan, hapit nga wala nay kapuslanan. Gitan-aw nako ang pahina, ug usa ka pulong ang naklaro, dili tingali aksidente. Madasigon nga gibasa nako kini ug dayon nakadiskobre nga ang apostol nga nanagna nianang tanang kasamok milakip sa samang pakigpulong sa pagpanalipod batok niining tanan. (“Teach the Scriptures” [address to Church Educational System religious educators, Oct. 14, 1977], 5).

Ipasabot nga ang pulong nga naklaro ni Presidente Packer mao ang mga kasulatan (tan-awa sa 2 Timoteo 3:15). Dapita ang mga estudyante sa pagtuon sa 2 Timoteo 3:14–17, mangita sa tambag ni Pablo mahitungod kon unsa ang ikahatag sa mga kasulatan kanato taliwala sa mga kalisod sa atong panahon.

• Unsa sa inyong hunahuna nga ang mga pulong sa Dios diha sa mga kasulatan makatabang sa paghatag og panalipod gikan sa mga kalisod sa kataposang mga adlaw?

• Unsaon ninyo sa pag-summarize sa unsay gitudlo ni Pablo mahitungod sa mga kasulatan? (Gamit sa ilang kaugalingong mga pulong, ang mga estudyante mahimong moila og kamatuoran sama sa mosunod: Samtang magtuon kita sa pulong sa Dios, makaangkon kita og kaalam nga mogiya nato ngadto sa kaluwasan pinaagi sa hugot nga pagtuo diha kang Jesukristo.)

• Unsa ang pipila ka pulong sa Dios diha sa mga kasulatan nga nakatabang ninyo sa pag-nabigar sa mga hagit sa atong panahon? (Ikonsiderar ang pagdapit og daghang estudyante sa pagtubag niini nga pangutana. Mahimo silang mobasa sa ilang napili nga tudling sa kasulatan ngadto sa klase ug dayon mopasabot sa unsang paagi sila napanalanginan sa mga pagtulun-an sa Ginoo niini nga tudling.)

Awhaga ang mga estudyante sa paghunahuna og mga paagi nga ilang mapalambo ang ilang pagtuon sa kasulatan aron sila makadawat og dugang nga giya sa Ginoo sa ilang mga kinabuhi. Awhaga sila sa pagbuhat sa mga pag-aghat nga ilang nadawat gikan sa Espiritu Santo.

Balik ngadto sa “Mga Opsiyon nga Kalihokan sa Pagkat-on.”