Manwal ng Guro ng Institute para sa Bagong Tipan

Ang bawat lesson ay nagbibigay ng mga ideya para sa paghikayat ng personal na pag-aaral. Itinuro ni Pangulong Russell M. Nelson:

Ang araw-araw na masigasig na pag-aaral ng salita ng Diyos ay mahalaga para sa espirituwal na kaligtasan lalo na sa tumitinding ligalig sa panahong ito. Kapag nagpapakabusog tayo sa mga salita ni Cristo araw-araw, ang mga salita ni Cristo ay magsasabi sa atin kung paano tumugon sa mga paghihirap na hindi natin inakalang dadanasin natin. (“Pakinggan Siya,” Liahona, Mayo 2020, 89)

Isipin ang mga paraan na maaanyayahan, mahihikayat, matutulungan ang mga estudyante na pag-aralan ang kanilang mga banal na kasulatan sa buong linggo. Halimbawa, maaari kang magpadala ng mga mensaheng tutulong sa mga estudyante na pag-aralan ang nakatalagang scripture block para sa linggo at pumunta sa klase na handang magbahagi ng mga tanong at kaalaman. Ang mga ideya sa pagmemensahe ay matatagpuan sa simula ng balangkas ng bawat lesson. Kadalasan ay tumutugma ang mga ito sa isa sa mga opsiyon sa aktibidad sa pag-aaral sa lesson.

Halimbawa, narito ang mga ideya ng mga mensahe na maaari mong ipadala sa mga estudyanteng nag-aaral ng Juan 1:

• Pag-isipan kung ano ang matututuhan mo tungkol kay Jesucristo mula sa Kanyang mga tungkulin at titulong natukoy sa Juan 1:1–14.

• Basahin ang Juan 1:35–51 para malaman kung bakit mahalagang anyayahan ang iba na lumapit kay Cristo. Maaari mong anyayahan ang isang tao na dumalo sa institute sa linggong ito.

Maaari mo ring suriin ang mga pangangailangan ng mga estudyante sa pamamagitan ng pag-anyaya sa kanila na ipadala sa iyo ang mga tanong nila tungkol sa scripture block. Sa ibang komunikasyon, maaari mong anyayahan ang mga estudyante na simulan ang pagtalakay sa isang paksa sa mga kaklase bago magklase. Mag-isip ng mga paraan para matulungan ang mga estudyante na makamit ang kanilang mga mithiin sa pag-aaral at magkaroon ng mas malalim na pagmamahal sa kanilang personal na pag-aaral ng mga banal na kasulatan.

Maglaan ng oras na makapagtanong at makapagbahagi ng mga kaalaman at karanasan ang mga estudyante. Makatutulong ito sa kanila na maiugnay ang mga banal na kasulatan sa kanilang buhay. Nagbibigay-daan din ito na masuri mo nang mas mabuti ang mga pangangailangan at hangarin ng mga estudyante. Maaaring magandang pagkakataon din ito na mag-follow up ng mga paanyaya at karanasan mula sa nakaraang klase.

Ang paglalaan ng oras para makapagtanong at makapagbahagi ng mga kaalaman ang mga estudyante tungkol sa scripture block ay nagbibigay-daan din sa kanila na maimpluwensyahan ang daloy ng talakayan. Ang dami ng oras na ginugol sa pagbabahagi ay dapat naiaakma. Kailangan mong mahiwatigan kung kailan tutulungan ang mga estudyante na magpatuloy sa isa sa mga aktibidad sa pag-aaral, na makatutulong sa mga estudyante na maipamuhay ang kanilang tinatalakay.

Para makapaghikayat ng mga tanong at pagbabahagi, isipin ang sumusunod na mga paraan para masimulan ang aktibidad:

• Rebyuhin ang mga mensaheng ipinadala mo sa mga estudyante sa linggong iyon o anumang tanong na ipinadala nila sa iyo.

• Magdispley ng mga larawan o salitang naglalarawan ng mga pangyayari o pangunahing turo sa scripture block.

• Itanong sa mga estudyante kung ano ang mga tanong o kaalamang gusto nilang talakayin.

Maaari mong anyayahan ang mga estudyante na magtanong at magbahagi ng mga ideya sa klase, sa maliliit na grupo, sa isang kapartner, o sa iba pang malikhaing paraan, tulad ng paggamit ng social media. Isiping bigyan ng kaunting oras ang mga estudyante na rebyuhin o pag-aralan ang scripture block bago sila magbahagi.

Tandaan: Kung ang isang partikular na tanong o kaalaman ay nalihis sa paksa, maghanap ng mga paraan upang maibalik ang talakayan sa mga pangunahing katotohanan sa mga banal na kasulatan. Gayundin, maaaring mas mainam na tugunan ang ilang mga katanungan pagkatapos ng klase o pagkatapos ng karagdagang pag-aaral. OK lang sabihin na “Hindi ko alam. Pag-aralan pa natin ito at tingnan natin kung ano ang matututuhan natin bago ang susunod na klase.”

Isipin kung paano nagbabago ang buhay ng mga estudyante kapag mas nakakaasa sila sa sariling kakayahan sa pag-aaral ng ebanghelyo. Kapag natututo sila sa kanilang sarili, mas mapapalapit sila sa Tagapagligtas. Ang pagtulong sa mga estudyante na mapahusay ang kanilang kakayahan na matuto sa kanilang sarili ay mahalaga sa pagtuturong tulad ng kay Cristo.

Ang kursong ito ay tumutulong sa mga estudyante na magkaroon ng mga kasanayan na magdaragdag ng kanilang kakayahan na maunawaan at mapag-usapan ang mga banal na kasulatan. Karaniwan ang mga kasanayang ito ay isinasama sa mga aktibidad sa pag-aaral upang hindi ito makagambala sa daloy ng lesson. Para sa karagdagang tulong sa paggamit ng mga kasanayang ito, maaaring pumunta ang mga guro at estudyante sa Scripture Study Skills sa Gospel Library. Ang resource na ito ay nagbibigay ng gabay kung paano ipaliwanag, ipakita, at isagawa ang bawat kasanayan.

Kapag paulit-ulit na isinasagawa ng mga estudyante ang mga kasanayang ito sa buong kurso, mas magtitiwala sila sa kanilang kakayahan na matuto mula sa mga banal na kasulatan. Maghanap ng oras na mag-follow up at anyayahan ang mga estudyante na ibahagi ang kanilang mga karanasan gamit ang mga kasanayang ito.

Kasama sa bawat lesson ang maraming pagpipilian sa aktibidad sa pag-aaral. Suriin ang mga pangangailangan ng mga estudyante, at hingin ang patnubay ng Espiritu Santo habang pinipili mo ang mga opsiyon sa aktibidad sa pag-aaral na magiging kapaki-pakinabang sa kanila. Maglaan ng oras na kailangan sa pagpapalalim ng pag-unawa ng mga estudyante upang madama nila ang katotohanan at kahalagahan ng kanilang natututuhan. Karaniwan ay mas maraming mga pagpipilian sa aktibidad sa pag-aaral kaysa sa maaaring magawa sa isang klase, kaya huwag ipalagay na kailangan mong gamitin ang lahat ng ito.

Ang unang lesson sa materyal ng guro ay maaaring gamitin sa unang araw ng klase tuwing magsisimula ka sa loob ng buong taon. Ang lesson na ito ay makatutulong sa mga estudyante na lumikha ng ligtas na kapaligiran sa pag-aaral, magtakda ng mga mithiin para sa kanilang sariling pag-aaral, at pag-aralan ang buod ng Mga Ebanghelyo o ng Mga Gawa hanggang sa Apocalipsis.

Kapag nagtuturo ng materyal nang sunud-sunod, pumili sa pagitan ng mga aktibidad sa pag-aaral na kasabay ng scripture block na pag-aaralan para sa linggo. Halimbawa, sa linggo 4, maaari mong gamitin ang mga naaangkop na aktibidad sa pag-aaral na kinabibilangan ng katotohanang matatagpuan sa Mateo 19–25 sa materyal ng guro.