పౌలు యొక్క రోమ్‌ ప్రయాణంలో జరిగిన అద్భుతాలు

పరిశుద్ధాత్మ పౌలును యెరూషలేముకు వెళ్ళమని చెప్పాడు. పౌలు యేసు క్రీస్తు గురించి బోధించిన విషయాలు అక్కడ చాలామందికి నచ్చలేదు. వారు అతనిని ఖైదుచేసి గొలుసులతో బంధించారు. పౌలు తాను పరలోకం నుండి వెలుగును చూసిన సమయం, యేసు స్వరం విన్న సమయం మరియు బాప్తిస్మము తీసుకున్న సమయం గురించి అందరికీ చెప్పాడు.

అపొస్తలుల కార్యములు 21:4, 12–13, 27–40; 22:1–16

పౌలును చెరశాలలో వేశారు. అతను అక్కడ ఉండగా, యేసు పౌలుకు ప్రత్యక్షమై, “పౌలు, ధైర్యముగా ఉండుము” అని అన్నారు. పౌలు రోమ్‌లో తన గురించి సాక్ష్యం చెబుతాడని ఆయన అన్నారు

అపొస్తలుల కార్యములు 23:10–11

పౌలును అధిపతుల ముందుకు, రాజు ముందుకు తీసుకువెళ్లారు. ఆయన ఈ శక్తివంతమైన పాలకుల ఎదుట యేసు క్రీస్తు గురించి ధైర్యంగా సాక్ష్యమిచ్చాడు. అందరూ యేసుయందు నమ్మకముంచాలని ఆయన కోరాడు.

అపొస్తలుల కార్యములు 24:10–27; 25:6–8, 17–19; 26:1–29

చక్రవర్తి సీజరు ముందు తీర్పు పొందడానికి, రాజు పౌలను రోమ్‌కు పంపించాడు. పౌలు ఇతర ఖైదీలతో కలిసి ఓడలో ప్రయాణించాడు మార్గమధ్యంలో కొన్ని చోట్ల ఆగారు. ఒక చోట పౌలు త్వరలో శీతాకాలం వస్తుందని తెలుసుకున్నాడు. వారు ప్రయాణం కొనసాగిస్తే పెద్ద ప్రమాదం జరుగుతుందని చెప్పాడు. వాతావరణం మెరుగుపడే వరకు వేచి ఉండమని పౌలు ఓడ సిబ్బందికి చెప్పాడు.

అపొస్తలుల కార్యములు 27:1–10

ఎవరూ పౌలు మాట వినలేదు, వారు ప్రయాణం కొనసాగించారు. ఒక పెద్ద తుఫాను వచ్చింది అనేక రోజుల పాటు అలలు ఓడను అటు ఇటు కొట్టాయి. వారికి సూర్యుడు గాని నక్షత్రాలు గాని కనిపించలేదు. తుఫానులో తాము చనిపోతామని వారు అనుకున్నారు.

అపొస్తలుల కార్యములు 27:11–20

ఒక రాత్రి, దేవుని దూత పౌలును సందర్శించి, “పౌలా, భయపడకుము” అని అన్నాడు. దేవుడు ఇచ్చిన వాగ్దానం ప్రకారం, పౌలు రోమ్‌కు చేరుకుంటాడని దేవదూత చెప్పాడు. దేవుడు ఓడలో ఉన్న అందరినీ రక్షిస్తారు—వారిలో ఎవ్వరూ చనిపోరు అని ఆయన చెప్పాడు.

అపొస్తలుల కార్యములు 27:23–24

పౌలు దేవదూత చెప్పిన మాటలను అందరికీ చెప్పాడు. “ధైర్యము తెచ్చుకొనుడి, నేను దేవుని నమ్ముచున్నాను,” అని పౌలు అన్నాడు

అపొస్తలుల కార్యములు 27:21–25

కొన్ని రోజుల తర్వాత, ఓడ ఢీకొని మునిగిపోయింది. కానీ దేవదూత వాగ్దానం చేసినట్లే, ఓడలో ఉన్న వారిలో ఎవ్వరూ చనిపోలేదు. వారు అందరూ ఈదుకుంటూ మెలితే అనే దీవికి చేరుకున్నారు.

అపొస్తలుల కార్యములు 27:40–44; 28:1

మెలితే దీవిలో నివసించే ప్రజలు పౌలు మరియు ఓడ నుండి వచ్చిన ఇతరుల పట్ల దయగా ప్రవర్తించారు. అందరూ వెచ్చగా ఉండేందుకు వారు ఒక మంట వెలిగించారు.

అపొస్తలుల కార్యములు 28:2

అకస్మాత్తుగా మంటలలో నుంచి ఒక పాము బయటికి వచ్చి పౌలు చేతిపై కాటేసింది. కానీ పౌలుకు ఏమాత్రం హాని జరగలేదు. అతను పామును సులభంగా తోసి పడేశాడు. ప్రజలు ఆశ్చర్యపోయారు!

అపొస్తలుల కార్యములు 28:3–6

పొప్లి అనే ఒక వ్యక్తి పౌలును తన ఇంటిలో ఉండనిచ్చాడు. పొప్లియొక్క తండ్రి చాలా అనారోగ్యంతో ఉన్నాడు. పౌలు అతనిపై తన చేతులను ఉంచి, దేవుని శక్తితో అతనిని స్వస్థపరిచాడు.

అపొస్తలుల కార్యములు 28:7–8

మెలితే దీవిలో పౌలు మూడు నెలలు గడిపాడు. ప్రభువు ఆయనకు సహాయం చేసి అనేక అద్భుతాలు చేయించాడు; అనారోగ్యంతో ఉన్న ప్రజలను ఆశీర్వదించి స్వస్థపరిచాడు. ఆ తరువాత, ప్రభువు వాగ్దానం చేసినట్లే పౌలు రోమ్‌కు ప్రయాణించాడు.

అపొస్తలుల కార్యములు 28:9–16

పౌలు రోమ్‌లో ఉన్నప్పటికీ ఆయన ఇంకా ఖైదీగానే ఉన్నాడు. కానీ అతని కాపలాదారులు ప్రజలు అతనిని సందర్శించడానికి అనుమతించారు. వినడానికి సిద్ధంగా ఉన్న ప్రతి ఒక్కరికీ పౌలు యేసు క్రీస్తు గురించి బోధించాడు. అతను అనేక ప్రాంతాలలో ఉన్న సంఘ సభ్యులకు కూడా లేఖలు రాశాడు. ఈ లేఖలలో లేదా లేఖనాలలో కొన్ని క్రొత్త నిబంధనలో ఉన్నాయి.

అపొస్తలుల కార్యములు 28:16–31