యేసు బాప్తిస్మము తీసుకున్నారు

యేసు క్రీస్తు రాకడకు ప్రజలు సిద్ధపడటానికి సహాయం చేయడానికి దేవుడు యోహానును పిలిచారు. పశ్చాత్తాపపడి బాప్తిస్మము తీసుకోవాలని యోహాను ప్రజలకు బోధించాడు. ప్రజలు అతనిని బాప్తిస్మమిచ్చు యోహాను అని పిలిచేవారు.

మత్తయి 3:1–12

యోహాను ఒక శక్తివంతమైన బోధకుడు. ఆయన మాట వినడానికి మరియు బాప్తిస్మము తీసుకోవడానికి చాలా మంది వచ్చారు. ఒకరోజు, యేసు బాప్తిస్మము తీసుకోవడానికి వచ్చారు.

మత్తయి 3:5, 13

యేసు ఎల్లప్పుడూ దేవునికి విధేయుడని యోహానుకు తెలుసు. ఆయన పశ్చాత్తాపపడాల్సిన అవసరం లేదు. యేసుకు బాప్తిస్మము ఇవ్వాల్సిన అవసరం ఉందని యోహాను అనుకోలేదు. యేసే తనకు బాప్తిస్మము ఇవ్వాలని యోహాను అనుకున్నాడు!

మత్తయి 3:14

తాను కూడా బాప్తిస్మము తీసుకోవాలని యేసు చెప్పారు. ఆయన తన తండ్రి ఆజ్ఞలన్నిటినీ పాటించాలని కోరుకున్నారు. ఆయన మనకు ఒక ఉదాహరణగా ఉండాలనుకున్నారు. యోహాను ఆయనకు బాప్తిస్మము ఇచ్చాడు.

మత్తయి 3:13–15; 2 నీఫై 31:5–7

యేసు నీళ్లలో నుండి బయటకు వచ్చిన తరువాత, పరిశుద్ధాత్మ పావురంలా ఆయనపైకి దిగి వచ్చింది. పరలోక తండ్రి ఆకాశము నుండి మాట్లాడుతూ, “ఈయన నా ప్రియ కుమారుడు” అని అన్నారు. యేసు యందు పరలోక తండ్రి చాలా ఆనందంగా ఉన్నారు.

మత్తయి 3:16–17