తన గొఱ్ఱెలను మేపమని యేసు అపొస్తలులను అడుగుతారు

యేసు పునరుత్థానం చెందిన తర్వాత, పేతురు మరియు మరికొందరు అపొస్తలులు చేపలు పట్టడానికి వెళ్ళారు. వాళ్ళు రాత్రంతా చేపలు పట్టినా, ఏమీ పట్టలేదు.

యోహాను 21:1–3

మరుసటి రోజు ఉదయం, అపొస్తలులు యేసును ఒడ్డున చూశారు, కానీ అది ఆయనే అని వారికి తెలియదు. వారు ఏమైనా చేపలు పట్టారా అని ఆయన అడిగారు. పట్టలేదు అని వారు అన్నారు.

యోహాను 21:4–5

యేసు అపొస్తలులతో ఓడ కుడి వైపున వల వేయమని చెప్పాడు, అప్పుడు వారు చేపలు పట్టుకుంటారు. అపొస్తలులు యేసు చెప్పినట్లు చేసారు, మరియు వందకు పైగా చేపలు వలను నింపాయి! ఆ వల చేపలతో చాలా బరువుగా ఉండటంతో అపొస్తలులు దానిని పడవలోకి లాగలేకపోయారు.

యోహాను 21:6

అప్పుడు యోహాను ఆ వ్యక్తి ఎవరో గ్రహించాడు. అతను పేతురుతో, “ఆయన ప్రభువు” అని అన్నాడు. పేతురు సముద్రంలోకి దూకి యేసు వైపు ఈదుకుంటూ వెళ్ళాడు. ఇతర అపొస్తలులు పడవను, చేపలను ఒడ్డుకు చేర్చారు. యేసు రొట్టెలు, చేపలు వండుచుండగా, అపొస్తలులను తనతో కలిసి భోజనానికి ఆహ్వానించారు.

యోహాను 21:7–13

వాళ్ళు తిన్న తర్వాత యేసు పేతురును, “వీరందరికంటే నువ్వు నన్ను ఎక్కువగా ప్రేమిస్తున్నావా?” అని అడిగారు. పేతురు అవును అన్నాడు. అప్పుడు యేసు, “నా గొఱ్ఱె పిల్లలను మేపుము” అని అన్నారు.

యోహాను 21:15

అప్పుడు యేసు మళ్ళీ పేతురును తనను ప్రేమిస్తున్నావా అని అడిగాడు. మళ్ళీ, పేతురు అవును అన్నాడు. యేసు అతనితో, “నా గొఱ్ఱెలను మేపుము” అని అన్నారు.

యోహాను 21:16

యేసు పేతురును మూడవసారి తనను ప్రేమిస్తున్నావా అని అడిగారు. పేతురు, "ప్రభువా, నీవు సమస్తమును ఎరిగియున్నావు; నేను నిన్ను ప్రేమించుచున్నానని నీవే యెరుగుదువు" అని అన్నాడు. యేసు అతనితో, “నా గొఱ్ఱెలను మేపుము” అని అన్నారు. యేసును అనుసరించే ప్రజలను పేతురు జాగ్రత్తగా చూసుకోవాలని ఆయన కోరుకున్నారు.

యోహాను 21:17

తరువాత, యేసు తన అపొస్తలులను ఒక కొండపై తనను కలవమని అడిగారు. అక్కడ ఆయన వారికి తన సువార్తను ప్రపంచమంతటా ప్రకటించమని, తన ఆజ్ఞలను ప్రజలకు బోధించమని, నమ్మిన ప్రతి ఒక్కరికీ బాప్తిస్మం ఇవ్వమని చెప్పారు. “మీరు నాకు సాక్షులైయుందురు” అని ఆయన చెప్పారు. ఆయన వారితో ఉంటానని మరియు పరిశుద్ధాత్మ ద్వారా వారికి శక్తినిస్తానని వాగ్దానం చేశారు.

మత్తయి 28:16–20; మార్కు 16:15–19; అపొస్తలుల కార్యములు 1:8

అప్పుడు యేసు మేఘంలో ఆకాశంలోకి ఆరోహణమయ్యారు. ఆయన పరలోకంలో ఉన్న తన తండ్రి దగ్గరకు తిరిగి వెళ్ళారు. ఆయన వెళ్ళిపోవడాన్ని అపొస్తలులు చూస్తుండగా, ఇద్దరు దేవదూతలు కనిపించారు. యేసు పరలోకానికి ఆరోహణమైనట్లే, ఒకరోజు అదే విధంగా భూమికి తిరిగి వస్తాడని వారు చెప్పారు.

అపొస్తలుల కార్యములు 1:9–11