Bwebwenato ko an Jeje ko Rekwojarjar
Susa Young Gates im Joseph F. Smith

“Susa Young Gates im Joseph F. Smith,” Bwebwenato ko an Katak im Bujen Ko (2024)

“Susa Young Gates im Joseph F. Smith,” Bwebwenato ko an Katak im Bujen Ko

1902–1918

Susa Young Gates im Joseph F. Smith

Juon revelesōn kōn laļ eo an jetōb.

Brigham Young ej kōnono ippān leddik eo nejin Susa.

Susa Young Gates ekar leddik eo nejin Brigham Young. Ekar ļotak ilo Utah im rūttoļo̧k ijeņ. Em̧m̧an ippān jeje, im em̧m̧an ippān jerbal ilo Kabun̄ in an Irooj.

Armej ro Rekwojarjar, 3:9–10, 64

Susa ej bōk juon kōjeraam̧m̧an an priesthood.

Ke Susa ekar juon rūtto, ekar lukkuun nan̄inmej. Lieo ekar kajjitōk kōn juon kōjeraam̧m̧an an priesthood. Ilo kōjeraam̧m̧an eo, Irooj ekar jiron̄ļo̧k Susa bwe Ekōņaan bwe en kōm̧m̧an jerbal in tampeļ.

Armej ro Rekwojarjar, 3:193–94

Susa ej kōnono ippān bar juon kōrā kōn tampeļ ko im menmenbwij an baam̧le.

Ālkin kōjeraam̧m̧an eo, Susa ekar ājmourļo̧k. Ekar joļo̧k an iien ekkatak kōn menmenbwij eo an baam̧le eo an. Ke ekar loe membōr ro an baam̧le eo ro rekar mej ak rekar jab peptaij, ekar etal n̄an tampeļ eo bwe en maron̄ peptaij kake er. Em̧m̧an ippān jiron̄ļo̧k armej kōn jerbal in menmenbwij an baam̧le. Kabūrom̧ōjm̧ōj, elōn̄ armej ro rekar jab itok limoer.

Armej ro Rekwojarjar, 3:194–95, 206

Susa ej kōnono ippāņ Joseph F. Smith.

Juon raan, Susa ekar loļo̧k eo m̧ōttan Joseph F. Smith, Būreejtōn eo an Kabun̄ in. Būreejtōn Smith ekar lukkuun nan̄inmej ium̧win elōn̄ wiik ko. Susa ekar jeļā bwe ekar barāinwōt būrom̧ōj kōnke ļaddik eo nejin ekar mej. Ekar būrom̧ōj kōn men ko jet rej waļo̧k ilo laļ in barāinwōt, āinwōt tariņae ko im nan̄inmej ko.

Armej ro Rekwojarjar, 3:197–99, 205–6

Joseph F. Smith ej jiron̄ļo̧k Susa kōn visōn eo an.

Ak ke Susa ekar jijet ippān Būreejtōn Smith, ekar lukkuun em̧ōņōņō in kōnono n̄an e. Ekar jiron̄ļo̧k Susa bwe Anij ekar leļo̧k n̄an e juon visōn eaorōk. Aolepān ekar kōn laļ eo an jetōb, ijo me armej rej etal n̄ane ālkin aer mej. Visōn eo an ekar jeje ioon juon peba. Būreejtōn Smith ekar leļo̧k n̄an Susa im kar kajjitōk ippān bwe en riiti.

Armej ro Rekwojarjar, 3:206–7

Susa ej riiti kōn visōn eo.

Susa ej riiti peba eo. Ekar ba bwe Jisōs Kraist ekar loļo̧k laļ eo an jetōb. Ekar jilkinļo̧k Adam, Iv, im em̧m̧aan im kōrā ro jet retōmak n̄an katakin ilo laļ eo an jetōb ro rekar jab bōk gospel eo ke rekar mour. Rekar jipan̄ jetōb kein pojak bwe armej ro ren maron̄ peptaij kōn er ilo tampeļ eo.

Katak im Bujen Ko 138:11–19, 29–48; Armej ro Rekwojarjar, 3:206–7

Joseph F. Smith im Susa rej kōnono.

Susa ekar bwilōn̄ ke ej riiti visōn eo an Būreejtōn Smith. Būreejtōn Smith ekar ettōn̄dikdik n̄an e. “Susa,” ekar ba, “kwoj kōm̧m̧ane juon jerbal eļap.” Ekar ba n̄an e bwe ej iakwe e kōn an tōmak ilo Irooj.

Armej ro Rekwojarjar, 3:206

Susa ej jijet iturin Salt Lake Temple.

Susa ekar je kōn revelesōn eo ilo jōnōļ eo an. “O, ekar juon inenōm̧m̧an n̄an n̄a!” lieo ekar ba. Lieo ekar jab maron̄ kōttar n̄an jiron̄ļo̧k ro jeran im membōr ro jet an Kabun̄ in kōn menin. Ekar jeļā bwe visōn eo an Būreejtōn Smith enaaj jipan̄ Armej ro Rekwojarjar n̄an maron̄ m̧ōņōņō in kōm̧m̧ane jerbal in tampeļ ilo laļ eo an jetōb.

Armej ro Rekwojarjar, 3:207