Bwebwenato ko an Jeje ko Rekwojarjar
Baam̧le eo an Josep Smith

“Baam̧le eo an Josep Smith,” Bwebwenato ko ilo Katak im Bujen Ko (2024)

“Baam̧le eo an Josep Smith,” Bwebwenato ko ilo Katak im Bujen Ko

1805–1817

Baam̧le eo an Josep Smith

Baam̧le in tōmak

Josep Smith im baam̧le eo an rej jerbal ippān doon ilo atake eo aer.

Josep Smith eaar ļotak ilo Tijemba 23, 1805, ilo turōkin United States. Kar bar etan jemān in Josep. Kar etan jinen in Lucy. Ekar wōr jein im jatū ļaddik im leddik. Baam̧le eo an Josep rekar rikallib. Raar tōmak ilo Anij im iakwe doon.

Josep Smith—Bwebwenato 1:3–4

Josep Smith ke ej ļaddik jiddik. Neen anmiin̄ kar kore kōn teep in kinej. Jinen ekar inepata kake e.

Ke Josep ekar ļaddik jidikdik, ekar wōr juon an nan̄inmej me ekar kakure neen. Ekar lukkuun kōmetake. Baam̧le eo an Josep raar kajjieon̄ jipan̄e bwe en em̧m̧anļo̧k an mour, ak ekar metak wōt neen. Taktō ro raar kajjieon̄ kōm̧anm̧anļo̧k neen, ak raar jab maron̄.

Armej ro Rekwojarjar, 1:7

Josep ej babu ilo peet eo. Ļaddik ro jein im jatin rej jubukwe iturin peet eo an. Jinen ej kōnono ippān takto eo an ilo rājet.

Taktō ro raar ba rej aikuj m̧wijit neen Josep n̄an kōjparok mour eo an. Ak jinen ekar jab kōtļo̧k aer m̧wijiti. Ekar kajjitōk eļan̄n̄e elōn̄ bar iaļ n̄an jipan̄ Josep. Taktō ro raar kāālet n̄an m̧wijit jidik in di eo ilo neen. Josep ekar jeļā ke enaaj metak, ak ekar tōmak wōt bwe Anij enaaj kar jipan̄ e.

Armej ro Rekwojarjar, 1:7

Taktō eo an Josep Smith ekar leļo̧k n̄an e arkooļ n̄an aer m̧wijit neen. Josep ekar jab bōke. Jemān eaar dāpiji.

Taktō ro raar kōņaan leļo̧k arkooļ bwe Josep en idaak n̄an kamej metak eo. Ak Josep eaar ba jaab. Ekar kōņaan wōt bwe jemān en dāpiji.

Armej ro Rekwojarjar, 1:7

Jinen Josep Smith ekar diwōj jān ruum̧ eo ke taktō ro rej pojak in jino jerbal in m̧wijm̧wij eo.

Josep ekar kajjitōk bwe jinen en diwōj n̄an nam̧ōj. Ekar jab kōņaan bwe jinen en lo an metak ke taktō ro rej m̧wijiti neen.

An taktō eo m̧wijiti neen Josep Smith. Jemān eaar dāpiji n̄an leļo̧k jipan̄.

Jemān Joseph ekar dāpiji ilo an taktō ro m̧wijiti m̧ōttan ko redik in dii renana ilo neen. Eaar lukkuun metak, ak Anij ekar jipan̄ Josep bwe en peran. Ālkin jejjo̧ iiō, neen Josep ekar em̧m̧anļo̧k, ak ekar metak wōt an etetal.

Armej ro Rekwojarjar, 1: 6– 7

Josep Smith im baam̧le eo an ilo New York. Jerbal eo aer rekar kōm̧m̧an ron̄ ilo wōjke maple ko n̄an kōm̧m̧an syrup.

Ke Josep ekar rūttoļo̧k, baam̧le eo an raar em̧m̧akūt n̄an New York. Baam̧le eo an Josep rekar jerata. Raar jerbal bwe en wōr m̧ōn̄ā n̄an baam̧le eo aer. Josep eaar juon ļaddik em̧m̧an. Ekar m̧ōņōņō im em̧m̧an ippān ettōn̄ im limo.

Armej ro Rekwojarjar, 1:5–9

Baam̧le eo an Josep Smith rej jijjōt ippān doon ilo tebōļ in m̧ōn̄ā eo.

Baam̧le eo an Josep raar iakwe Jisōs Kraist. Rekar jar im riiti Baibōļ eo ippān doon. Bōtaab jinen im jemān Josep raar jab lukkuun jeļā kabun̄ ta eo ren kobaļo̧k ie. Juon bon̄, jinen Josep, Lucy, ekar jar im jiron̄ ajri ro ke ekōņaan pukot Kabun̄ eo an Jisōs Kraist em̧ool. Anij ekar uwaake jar eo an im kallim̧ur ke enaaj.

Armej ro Rekwojarjar, 1:10–11