Mary im Caroline Rollins

Mary Rollins ekar 12 iiō dettan ke mijenede ro raar jinoin loļo̧kļo̧k Kirtland, Ohio. Liin ekar ron̄ aer kōnono kōn Bok in Mormon. Ilo iien in, ekar wōr wōt juon kape in bok eo ilo Kirtland, im juon ritōl in Kabun̄ in kar etan Isaac Morley ekar wōr an.

Mary ekar etal n̄an m̧weo im̧ōn Brother Morley im kar kajjitōk n̄an lale bok eo. Brother Morley ekar kōtļo̧k an liin jibwe. Mary ekar kajjitōk eļan̄n̄e emaron̄ bōke n̄an m̧weo.

Brother Morley ekar jab kōņaan leļo̧k n̄an Mary kape in bok eo an. Ekar jan̄in lukkuun riiti aolepān. Mary ekar akweļap n̄an Brother Morley bwe en kōtļo̧k an barroiki.

Brother Morley ekar errā. Ekar ba n̄an Mary bwe emaron̄ bōke bok eo n̄an m̧weo im̧ōn eļan̄n̄e enaaj kar bar kōro̧o̧le ļo̧k raan eo tok juon. Mary ekar lukkuun kaorōke āinwōt juon men eaorōk. Liin ekar emmej enan̄in aolep bon̄ōn eo im riit.

Ke Mary ekar bar leļo̧k bok eo, Brother Morley ekar bwilōn̄ kōn jon̄an eo liin ekar riiti. “Ajri eņ,” ekar ba, “bōk bok in n̄an m̧weo im̧ōm̧ im kadedeikļo̧k. Imaron̄ kōttar.”

Mary ekar armej eo m̧oktata ilo Kirtland n̄an riiti aolepān Bok in Mormon. Ejjab to ālkin an liin kadededikļo̧k, liin ekar ioon Rikanaan Josep Smith. Ke ekar jeļā ewi jon̄an an Mary kar iakwe Bok in Mormon, ekar ba bwe liin emaron̄ bōk kape eo an Brother Morley. Enaaj kar leļo̧k bar juon n̄an Brother Morley.

Tokālik ilo iiō jab eo, Mary im baam̧le eo an raar em̧m̧akūtļo̧k n̄an Independence, Missouri. Liin ekar itok limo in n̄an alooje an ritōl ro an Kabun̄ in jino in kobaik ippān doon juon bok kāāl kar ņaetan Bok in Kien ko. Bok in enaaj wōr ie elōn̄ iaan revelesōn ko Jisōs Kraist ekar liļo̧k n̄an Josep Smith.

Katak im Bujen Ko 67; 70:1–4; Armej ro Rekwojarjar, 1:178

Bōtaab ewōr jet armej ro ilo Independence rekar jab kōņaan Kabun̄ in. Raar kōņaan bwe Armej ro Rekwojarjar ren em̧m̧akūt. Juon raan, em̧m̧aan ro rellu rekar rupe im deļo̧n̄e im̧weo ijo Bok in Kien ko raar būriin ie. Raar kadkad kake printing press eo ilo wintō eo im kōjjjepelōklōk peij ko an Bok in Kien ko n̄an lowaan iaļ eo.

Armej ro Rekwojarjar, 1:177–78

Mary im leddik eo jatin, Caroline, raar reilo̧k jān tulikin juon oror. Mary ekar jiron̄ Caroline bwe ekar kōņaan bōk alen in peij ko m̧okta jān aer kar kakkuri. Caroline ekar leļn̄o̧n̄ kōn em̧m̧aan ro rellu. “Renaaj m̧an kōj,” liin ekar ba. Bōtaab Mary im Caroline raar jeļā bwe alen in peij ko ewōr ie naan ko an Anij.

Armej ro Rekwojarjar, 1:178

Sister ro raar kōttar m̧ae iien eo em̧m̧aan ro rejjab reilo̧k. Innām raar ettōrļo̧k n̄an lowaan iaļ eo im kar bōk jon̄an peij ko remaron̄ kar jibwi. Ilo aer kar ekairirļo̧k, jet iaan em̧m̧aan ro raar lo er im kar lam̧ōj n̄an er n̄an bōjrak. Mary im Caroline raar lukkuun kuul peij ko im ettōr jon̄an wōt aer m̧ōkaj āinwōt aer maron̄ n̄an jikin kallib corn eo epaak er.

Armej ro Rekwojarjar, 1:178–79

Ruo em̧m̧aan raar kōpeļ sister ro n̄an jikin kallib corn ko. Corn ko ekar kanooj aitok, Mary im Caroline raar jab maron̄ lo ia eo raar etal n̄an e. Raar pedo laļļo̧k n̄an ioon laļ im ņooj peij ko ium̧wiero. Raar ron̄jake ilo ikōn̄ ke em̧m̧aan ro ruo rej etetal ilo corn eo im kappukot er.

Armej ro Rekwojarjar, 1:179

Ejjab etto em̧m̧aan ro rekar ebbweer. Mary im Caroline raar jab jorrāān. Raar kōjparok peij ko an revelesōn ko an Irooj n̄an Bok in Kien ko. Rainin revelesōn ko rej pād ilo bok eo an Katak im Bujen ko.

Armej ro Rekwojarjar, 1:179