Josep im Sidney rej Katak kōn Lan̄

Juon visōn kōn kōjeraam̧m̧an ko an Anij n̄an ajri ro Nejin.

Josep Smith im Sidney Rigdon rej riit im kōnono kōn Baibōļ eo.

Juon raan, Josep Smith im Sidney Rigdon raar riiti Baibōļ eo. Raar riit kōn ta eo ej waļo̧k n̄an armej ro ālikin aer mej. Josep im Sidney raar ļōmņak kōn ta eo raar riitii, im raar kōņaan katak eļapļo̧k.

Katak im Bujen Ko 76:11–18

Josep im Sidney ewōr juon aerro visōn kōn Jemādwōj Ilan̄ im Jisōs Kraist, ro kar jepooļ jān enjeļ ro.

Irooj ekar leļo̧k n̄an erro juon visōn ekabwilōn̄lōn̄. Raar lo Jemādwōj Ilan̄ im Jisōs Kraist kar jepooļ jān enjeļ ro. Raar ron̄ juon ainikien ej ba bwe Jisōs ej Nejin Anij. Ainikien eo ekar ba bwe Jisōs ekar mej kōn kōj innām kar jerkakpeje—E ekar bar mour. Kōn wōt ta eo E ekar kōm̧m̧ane, jenaaj barāinwōt jerkakpeje.

Katak im Bujen Ko 76:19–24, 39–43

Josep im Sidney ekar wōr juon aerro visōn kōn aelōn̄ in telestial.

Josep im Sidney raar katak bwe ālkin ad jerkakpeje, jenaaj mour ilo juon iaan jikin ko jilu ilo lan̄, ņaetaer aelōn̄ in kiin̄ ko. Armej ro im rejjab bōk gospel eo an Jisōs Kraist renaaj etal n̄an aelōn̄ in telestial. Irooj ekar keidi aelōn̄ in kiin̄ in n̄an meram eo an iju ko.

Katak im Bujen Ko 76:81–86

Josep im Sidney ekar wōr juon aerro visōn kōn aelōn̄ in terrestrial.

Josep im Sidney raar barāinwōt katak kōn juon aelōn̄ in kiin̄ kar ņaetan aelōn̄ in terrestrial Aelōn̄ in kiin̄ in ej n̄an armej ro im rej mour mour ko rem̧m̧an bōtaab rejjab lukkuun pokake gospel eo an Jisōs Kraist. Rejjab kajoor ilo tōmak eo aer ilo E. Irooj ekar keidi aelōn̄ in kiin̄ in n̄an meram eo an allōn̄.

Katak im Bujen Ko 76:71–80

Josep im Sidney ekar wōr juon aerro visōn kōn aelōn̄ in selestial.

Aelōn̄ in kiin̄ eo eutiej tata ej aelōn̄ in selestial. Armej ro ilo aelōn̄ in kiin̄ in raar kōm̧m̧ani bujen ko, ak kallim̧ur ko, ippān Anij im kar kōjparok bujen ko aer. Raar ukweļo̧k im kar ļoor Jisōs Kraist. Rej mour ippān Jemedwōj Ilan̄ im Jisōs Kraist n̄an indeeo im erom̧ āinwōt Er. Irooj ekar keidi aelōn̄ in kiin̄ in n̄an meram eo an aļ.

Katak im Bujen Ko 76:50–70

Irooj ekar jiron̄ Josep im Sidney n̄an jab kwaļo̧k aolep men ko raar loi ilo visōn eo aer. Bōtaab E ekar kōņaan bwe ren jeje kōn jet iaer im kwaļo̧ke ippān ro jet. Elōn̄ ro uwaan Kabun̄ in rekar itok limoier n̄an jiron̄ armej ro kōn visōn eo.

Katak im Bujen Ko 76:113–119; Armej ro Rekwojarjar, 1:149–50

Armej ro rej riit kōn bwebwenato in visōn eo.

Jet armej raar jab em̧ōņōņō kōn visōn eo. Ekar oktak jān ta eo raar tōmak. Bōtaab elōn̄ wōt iaan Armej ro Rekwojarjar raar kam̧m̧oolol aer jeļā kōn revelesōn in. Ekar kwaļo̧k n̄an er bwe Jemewōjd Ilan̄ ej iakwe ajri ro Nejin im kar kōm̧m̧ane juon iaļ n̄an er n̄an bar ro̧o̧l n̄an E.

Armej ro Rekwojarjar, 1:149–50