Rikam̧ool ro rej Lo Bok in Mormon Piliej ko

Josep, Emma, im Oliver raar waanmaanļo̧k im ukōti piliej kooļ ko ilo m̧weo im̧ōn Smith ro ilo Pennsylvania. Bōtaab armej ro ilo town eo aer raar kōņaan kabōjrak er. Oliver ekar wōr juon m̧ōttan kar etan David Whitmer eo ekar jokwe ilo New York. Oliver ekar kajjitōk ippān David eļan̄n̄e remaron̄ kar em̧m̧akūtļo̧k ippān baam̧le eo an Whitmer ro n̄an kadedeļo̧k ukok eo.

Armej ro Rekwojarjar, 1:68

David im baam̧ļe eo an rekar errā. Raar karuwaineneikļo̧k Josep, Emma, im Oliver n̄an m̧weo im̧weer. Kiiō remaron̄ jerbale ukok eo ilo aenōm̧m̧an. Ekar lōn̄ armej ro rej jokwe ilo m̧weo im̧ōn Whitmer ro. Ekar meļeļe in bwe ekar ļap jerbal n̄an kōm̧m̧ane, eļap tata n̄an jinen David, Mary.

Armej ro Rekwojarjar, 1:68–70

Juon raan, ke Mary ekar jerbal, enjeļ Moronai ekar loļo̧k e. Ekar ba bwe ekar jeļā bwe aolep dam̧oļo̧k in jerbal ko ekar kōm̧m̧ani rekar kōm̧m̧an an m̧ōk. Ekar kōņaan kōkajoorļo̧k tōmak eo an. Ekar kōpeļļo̧k juon pāāk im kar kanōk nam̧ōjtak piliej kooļ ko. Ekar ālōkļo̧k peij ko im kar kwaļo̧k n̄an Mary jeje ko. Ekar kallim̧uri Mary bwe liin enaaj kar jeraam̧m̧an.

Armej ro Rekwojarjar, 1:70–71

Jet armej ro raar jab tōmak bwe piliej ko raar lukkuun m̧ool. Josep ekar pokake kapilōk eo an Irooj n̄an jab kwaļo̧k piliej ko n̄an jabdewōt. Irooj ekar ba E enaaj kar kōm̧m̧an bwe en wōr jilu bar rikam̧ool ro n̄an lo piliej ko. David Whitmer, Martin Harris, im Oliver Cowdery rekar kajjitōk ippān Josep eļan̄n̄e remaron̄ jet rikam̧ool ro. Irooj ekar ba remaron̄.

Katak im Bujen Ko 5:11–12; 17; Armej ro Rekwojarjar, 1:73

Josep, Martin, Oliver, im David raar etal n̄an wōjke ko. Raar bukwelōlō im bōk koņaan doon kajjitōk ippān Anij eļan̄n̄e remaron̄ lo piliej ko, bōtaab ejjeļo̧k men ekar waļo̧k.

Armej ro Rekwojarjar, 1:73

Martin Harris ekar en̄jake bwe e ekar un eo jar eo aer ekar jab uwaak. Martin ekar ilo̧k, im ro jet raar jar wōt.

Armej ro Rekwojarjar, 1:73

Innām enjeļ eo ekar waļokļo̧k ilo juon meram eromaak. Ekar kwaļo̧k n̄an Oliver im David piliej kooļ ko im jeje ko ioer. Raar ron̄ ainikien Anij ba bwe Josep ekar ukōt piliej ko kōn kajoor eo an Anij im bwe ukok eo ekar jim̧we. Anij ekar barāinwōt ba rej aikuj jiron̄ jabdewōt ta eo raar loe im ron̄.

“Naan in Kam̧ool eo an Rikam̧ool ro Jilu”; Armej ro Rekwojarjar, 1:73–74

Josep ekar etal n̄an pukot Martin. Ekar jar wōt. Josep ekar jar ippān. Innām enjeļ eo ekar waļokļo̧k im kwaļo̧k piliej ko n̄an Martin, ejja wōt ekar kōm̧m̧ane n̄an Oliver im David.

Armej ro Rekwojarjar, 1:74

Tokālik, Josep ekar etal n̄an pukot ro jinen im jemān, ro kar loļo̧k Mary Whitmer. Ekar jiron̄ er ewi jon̄an an kar m̧ōņōņō bwe armej ro jet raar lo piliej kooļ ko. Kiiō rikam̧ool ro remaron̄ jiron̄ armej ro bwe Josep ekar ba m̧ool eo. Martin ekar jiron̄ aolep ewi jon̄an an m̧ōņōņō bwe Anij ekar kōtļo̧k an juon iaan rikam̧ool ro.

Armej ro Rekwojarjar, 1:74–75

Jejjo raan ko tokālik, Irooj ekar jiron̄ Josep n̄an kwaļo̧k piliej kooļ ko n̄an bar ruwalitōk armej ro—jemān, ruo iaan ļōm̧aro jein im jatin, emen iaan ļōm̧aro jein im jatin David, im brother in-law eo an David. Rekar jibwi piliej ko im elōk peij ko. Raar jeļā bwe piliej ko raar m̧ool.

“Naan in Kam̧ool eo an Rikam̧ool ro Ruwalitōk”; Armej ro Rekwojarjar, 1:75

Ukok eo an Bok in Mormon ekar kiiō dedeļo̧k. Josep ekar bar kōro̧o̧lļo̧k piliej kooļ ko n̄an enjeļ Moronai. Kiiō ekar iien eo n̄an būriini kape ko an bok eo bwe aolep en maron̄ riiti im katak eļapļo̧k kōn Jisōs Kraist.

Armej ro Rekwojarjar, 1:75–76

Ekar ļap wōņāān būriini Bok in Mormon. Martin Harris ekar ajeļo̧k jimettan in farm eo an n̄an kōļļāiki. Ekar kōm̧m̧an menin kōnke ekar jeļā Bok in Mormon eo ej m̧ool. Aolep kape in bok eo ewōr naan in kam̧ool eo an Martin im rikam̧ool ro jet n̄an aolep n̄an riiti. Rikam̧ool ro rekar jab kariab naan in kam̧ool eo aer.

Katak im Bujen Ko 19:26–27, 34–35; Armej ro Rekwojarjar, 1:76–78