Kalōk Nauvoo

Irooj ekar jiron̄ Armej ro Rekwojarjar n̄an kobaļo̧k ilo juon jikin kāāl. Ekar iturin juon reba eļap kar ņa etan Mississippi. Bwidej eo ekar tutu im epedkatkat. N̄an jet armej, ekar jab āinwōt juon jikin em̧m̧an n̄an kalōk juon jikin kweilo̧k. Bōtaab Rikanaan Josep Smith ekar jeļā bwe kōn jipan̄ eo an Irooj, er remaron̄ kar kōm̧m̧an bwe en aiboojoj.

Katak im Bujen Ko 124:25; Armej ro Rekwojarjar, 1:417

Armej ro Rekwojarjar raar buuļ jerbal n̄an kōm̧m̧an bwe en juon jikin em̧m̧an n̄an jokwe ie. Rikanaan Josep Smith ekar ņa etan town eo Nauvoo, eo ej meļeļe in “juon jikin aiboojoj.”

Armej ro Rekwojarjar, 1:417

Irooj ekar jiron̄ Armej ro Rekwojarjar n̄an kalōk juon em̧ ilo Nauvoo ijo ro ritok tak remaron̄ kar itok im kakkūje ie. E ekar kōņaan bwe Nauvoo en erom juon jikin ijo aolep rej en̄jake aer ruwainene.

Katak im Bujen Ko 124:22–24, 60; Armej ro Rekwojarjar, 1:426

Irooj ekar jiron̄ Rikanaan Josep bwe ewōr An karōk ko reļļap n̄an Nauvoo. E ekar kōņaan bwe Armej ro Rekwojarjar n̄an kobatok ijin bwe er ren maron̄ kalōk juon tampeļ. E ekar kajjitōk ippāer n̄an buuļ jerbal jon̄an wōt aer maron̄ n̄an kalōk m̧weo Im̧ōn. Armej ro Rekwojarjar raar m̧ōkaj in jino jerbal.

Katak im Bujen Ko 124:25–28, 44, 55; Armej ro Rekwojarjar, 1:420–21, 425–27

Irooj ekar kōņaan bwe Armej ro Rekwojarjar ren kalōk juon tampeļ kōnke ewōr An kōjeraam̧m̧an ko reļļap n̄an leļo̧k n̄an er. Ilo tampeļ eo, er renaaj kōm̧m̧ani bujen ko, ak kallim̧ur ko raorōk, ippān Irooj. Er renaaj barāinwōt katak kōn karōk in m̧ōņōņō eo an Jemādwōj Ilan̄ n̄an aolep ajri ro Nejin.

Katak im Bujen Ko 124:29–41; Armej ro Rekwojarjar, 1:453–55

Armej ro Rekwojarjar raar buuļ jerbal n̄an kalōk tampeļ eo, ejja āinwōt an Irooj kar kean̄. Ekar bōk juon iien aitok, bōtaab er raar m̧ōņōņō kōn raan eo n̄e er remaron̄ kajjojo katak kōn kallim̧ur ko raorōk ekar wōr an Irooj n̄an er ilo tampeļ eo An.

Armej ro Rekwojarjar, 1:453–55