“Em̧m̧akūt jān Nauvoo im Jibadek Rilik,” Bwebwenato ko ilo Katak im Bujen Ko (2024)
“Em̧m̧akūt jān Nauvoo im Jibadek Rilik,” Bwebwenato ko ilo Katak im Bujen Ko
Juun 1844–Juļae 1847
Likut Nauvoo im Jibadōk Rilik
Armej ro rekwojarjar rej kōm̧m̧an im kōjparoki kallim̧ur ko aer n̄an Irooj
Josep Smith ekar mej. Kiiō Brigham Young im Rijilōk ro jet rekar tōl Kabun̄ in. Brigham ekar jeļā bwe Armej ro Rekwojarjar rekar jab jokne aer pād ilo Nauvoo. Renaaj aikuj in em̧m̧akūt. Ak m̧okta, Irooj ekar kōņaan bwe ren kam̧ōj aer kalōke tampeļ eo. Ekar kōņaan bwe ren kōm̧m̧an bujen ko Ippān im maron̄ liāp āinwōt baam̧le ko.
Armej ro Rekwojarjar, 1:571, 579–80
Ālkin jejjo allōn̄ ko, tampeļ eo ekar pojak n̄an an armej ro kōm̧m̧ane bujen ko ijeņ. Taujin Armej ro Rekwojarjar rekar itok n̄an tampeļ eo. Brigham ekar pād wōt ilo tampeļ eo bon̄ eo n̄an jipan̄ er kōm̧m̧ane bujen ko ippān Irooj. Āliktata, Brigham ekar jiron̄ aolep ke rej aikuj em̧m̧akūt jān Nauvoo.
Armej ro Rekwojarjar, 1:582
Ke Brigham ekar ruj jibbon̄ eo juon, elōn̄ļo̧k Armej ro Rekwojarjar rekar kōttar ilo tampeļ eo. Brigham ekar jiron̄ er bwe ekar jab jokne n̄an pād ilo Nauvoo. Rekar aikuj in pukot juon jikin ekāāl ilo Rilik. Ekar kallim̧ur bwe renaaj kalōk juon tampeļ n̄e renaaj tōpar ijeņ
Armej ro Rekwojarjar, 1:582–83; 2:13–14
Ak Armej ro Rekwojarjar rekar jab em̧m̧akūt. Rekar kōņaan kōm̧m̧an bujen ko ippān Irooj m̧okta jān aer jino ito itak eo aer n̄an m̧weo im̧weer ekāāl.
Armej ro Rekwojarjar, 1:583
Brigham ekar loe mejāer im kar ukōt ļōmņak eo an. Ekar joļo̧k aolep raan ko an im raan eo juon jipan̄ Armej ro Rekwojarjar kōm̧m̧an bujen ko ilo tampeļ eo.
Armej ro Rekwojarjar, 1:583
Kiiō Armej ro Rekwojarjar rekar kōm̧m̧an bujen ko ippān Irooj, ekar iien n̄an likūt Nauvoo. Brigham ekar jeļā bwe Irooj ekar kōpooje juon jikin n̄an er. Ekar loe ilo juon visōn. Rekar jino ito itak eo aer. Mejatoto eo ekar m̧ōļo̧, im ioon bwidej ekar bedkat. Armej ro rekar nan̄inmej. Ekar m̧aat kijeer m̧ōn̄ā.
Armej ro Rekwojarjar, 2:16–18, 20–21
Armej ro Rekwojarjar ekar aitok wōt iaļ eo aer. Brigham ekar ļōmņak ewi wāween aer maron̄ kōm̧m̧ane juon ito itak eaitok im pen. Ekar jar kōn jipan̄ eo an Anij.
Armej ro Rekwojarjar, 2:46
Irooj ekar leļo̧k n̄an Brigham juon revelesōn. Ekar katakin Brigham wāween an tōl Armej ro Rekwojarjar. Ekar ba bwe rej aikuj jipan̄ doon lale rijeram̧ōl ro.
Irooj ekar ba bwe Armej ro Rekwojarjar rej aikuj keememej bujen ko rekar kōm̧m̧ani Ippān. Eļan̄n̄e renej, Enaaj kōjeraam̧m̧an er ilo ito itak eo aer.
Katak im Bujen Ko 136:4, 11, 42; Armej ro Rekwojarjar, 2:47
Ito itak eo ekar lukkuun in pen wōt. Jet armej rekar mej. Ak kōnke bujen in tampeļ ko aer, Armej ro Rekwojarjar rekar jeļā bwe renaaj loe ro uwaan baam̧le ko aer.
Jejjo allōn̄ tokālik, Armej ro Rekwojarjar rekar itaakļo̧k ilo Salt Lake Valley ilo 1847. Ke Brigham Young ekar loe valley eo ekar ba, “En̄in ej jikin eo ejim̧we.” Ekar ejja jikin eo ekar loe ilo juon visōn. En̄in ekar ijo Armej ro Rekwojarjar renaaj maron̄ jokane ie. Ijin rekar maron̄ kabun̄jar n̄an Irooj im kōm̧m̧ane jerbal eo An ilo aenōm̧m̧an.
Armej ro Rekwojarjar, 2:17, 64–67
Ium̧win iiō ko, elōn̄ ļo̧k im lōn̄ļo̧k Armej ro Rekwojarjar raar itaaktok. Rekar kalōk elōn̄ļo̧k tampeļ ko, ijo me armej ro remaron̄ kōm̧m̧an bujen ko ippān Irooj. Rekar jilkinļo̧k mijenede ro aolepān laļ in n̄an katakin gospel eo an Jisōs Kraist. Kabun̄ eo an Rilo̧mo̧o̧r ekar wōnm̧aanļo̧k wōt im eddōk, kōjeraam̧m̧an ajri ro nejin Jemedwōj Ilan̄ ijoko otemjej.