Kāām eo an Israel

Armej ro Rekwojarjar ro rekar jokwe ilo Independence, Missouri, rekar aikuj jipan̄. Rekar ļap aer jerbal n̄an kalōk Zaion āinwōt an kar Anij kajjitōk. Ak armej ro jet ilo bukwōn eo rekar jab kōņaan bwe ren pād ijeņ. Rekar kōm̧m̧an bwe Armej ro Rekwojarjar ren em̧m̧akūt jān m̧ōko m̧weer.

Armej ro Rekwojarjar, 1:195

Josep Smith ekar jokwe ilo Kirtland. Ekar ron̄ kōn ta eo ekar waļo̧k n̄an Armej ro Rekwojarjar ilo Missouri, im ekar būrom̧ōj. Ekar jar n̄an jeļā ta eo en kōm̧m̧ane. Irooj ekar jiron̄ļo̧k Josep n̄an kappok armej bwe ren etal ippān n̄an Missouri. Rekar kōjatdikdik bwe kien eo enaaj jipan̄ Armej ro Rekwojarjar kōro̧o̧lļo̧k m̧ōko m̧weer.

Katak im Bujen Ko 103:1–2, 11–20, 30–34; Saints, 1:195–96

Enan̄in 100 armej ro rekar paļentiir n̄an kobaļo̧k ippān. Rikanaan eo ekar ņaetan kūrub in Kāām eo an Israel. Rekar m̧ōņōņō in etal im jipan̄ Armej ro Rekwojarjar ilo Missouri.

Armej ro Rekwojarjar, 1:197–99

Brigham Young im eo m̧ōttan Heber Kimball rekar m̧ōttan kūrub in. Juon likao etan Wilford Woodruff ekar itok jān New York n̄an jipan̄.

Armej ro Rekwojarjar, 1:197–98

Elōn̄ļo̧k armej ro rekar kobaļo̧k ippān kāām eo. Rekar m̧aajļo̧k ium̧win juon allōn̄ likio im kijoone juon reba rebakbak n̄an Missouri. Rekar m̧ōk im kinejnej. Ṃaaj eo eaitok ekar barāinwōt kōm̧m̧an bwe jet armej ren jino illu. Ekar aitok wōt iaļ eo aer bwe ren tōparļo̧k bukwōn in Independence.

Armej ro Rekwojarjar, 1:200–201

Ke rekar m̧aajļo̧k wōt, juon kōrā ekar lam̧ōjļo̧k n̄an er. Liin ekar ba bwe ewōr jet em̧m̧aan rekar itok in tōn m̧an er.

Armej ro Rekwojarjar, 1:203

Kāām eo an Israel ekar bōjrak ilo bon̄ōn̄ eo ioon juon toļ ilōn̄ in juon reba. Ke rej kajutak em̧ nuknuk ko, ļalem em̧m̧aan rekar ettōr ļo̧k n̄an ippāer ioon kidia ko. Rekar jājjāj im ba bwe 300 bar em̧m̧aan ro rej itok ilo iaļ eo aer n̄an jodiki kāām eo. Elōn̄ membōr ro an Kāām eo an Israel rekar inepata. Josep ekar jiron̄ er bwe en wōr aer tōmak bwe Anij enaaj jipan̄ er.

Armej ro Rekwojarjar, 1:203

Ejjab etto mejatoto ekar obrak kōn kōdo̧ ko rekūre. Ekar jino ļap an wōt im wōtlo̧k. Reba eo ekar jino m̧wilaļļo̧k. Kōto ekar ukwōj wōjke ko. Ekar ļap an ejarom̧rom̧ imejatoto. Josep im ro jet rekar loe juon m̧ōnjar jidikdik ijo rekar maron̄ jokne ie. Rekar al al ko aolepān bon̄ōn̄ eo. “Anij ej pād ilo ļan̄ in!” Josep eaar ba.

Armej ro Rekwojarjar, 1:203–4

Ļan̄ eo ekar kabōjrak armej ro me rekar kōņaan jodiki er. Kāām eo ekar jokne. Ak kien eo ekar ba bwe reban jipan̄ Armej ro Rekwojarjar. Irooj ekar jiron̄ Josep bwe Kāām eo an Israel emaron̄ ro̧o̧l n̄an kapijuknen. Armej ro Rekwojarjar rej aikuj kalōk Zaion n̄an kōjparok kien ko an Anij. Ekar kallim̧ur bwe E enaaj “ire ilo pata ko an Zaion.”

Katak im Bujen Ko 105:1–19; Armej ro Rekwojarjar, 1:204–5

Jet membōr in kāām eo rekar illu ke rekar ron̄ menin. Rekar būrom̧ōj bwe rekar jab tariņae n̄an Zaion. Jet armej rekar ļōmņak bwe Kāām eo an Israel ekar luuj. Ak ro jet, āinwōt Brigham Young, Heber, im Wilford, rekar kam̧m̧oolol kōn iien eo n̄an maron̄ pād ippān Rikanaan Josep im ekkatak jān E.

Armej ro Rekwojarjar, 1:205–6

Tokālik, Irooj ekar jiron̄ Josep Smith n̄an kūr Jon̄oulruo Rijilōk ro n̄an jipan̄ tōl Kabun̄ eo An. Rijilōk ro renaaj rikam̧ool ro rejenolo̧k ilo etan Jisōs Kraist ilo aolepān laļ in. Ralitōk iaan Jon̄oulruo Rijilōk ro rekar m̧aaj ilo Kāām eo an Israel. Jerbal ippān Josep kar jipan̄ kōpooje er n̄an kūr in eaorōk.

Katak im Bujen Ko 18:26–27; 107:23; Armej ro Rekwojarjar, 1:214–17