“Martin Harris ej Jipan̄ Josep,” Bwebwenato ko an Katak im Bujen Ko (2024)
“Martin Harris ej Jipan̄ Josep,” Bwebwenato ko an Katak im Bujen Ko
1828–1829
Martin Harris ej Jipan̄ Josep
Jeļā n̄an lōke Irooj
Juon raan, ke Josep im Emma raar jokwe ilo Pennsylvania, juon m̧ōttaer etan in Martin Harris eaar loļo̧k er. Ewōr juon an Martin atake ekilep ilo New York. Ekar jeļā kōn jerbal eo an Josep ikijeen pileij gold ko. Ekar jipan̄ Josep m̧oktaļo̧k, im kiiō ekōņaan jeļā n̄e ebar wōr men en emaron̄ kōm̧m̧ane n̄an jipan̄.
Armej ro Rekwojarjar, 1:49
Josep im Emma raar kam̧m̧oolol. Elōn̄ armej raar ļōmņak Josep ekar riap. Ekar em̧m̧an ke ej wōr juon m̧ōttan āinwōt Martin Harris eo eaar tōmak ke pileij gold ko rem̧ool.
Armej ro Rekwojarjar, 1:49
Ke Josep ej ukōt pileij ko, Martin ej je ta ko ej ba. Martin eaar m̧ōņōņō in jipan̄ ilo jerbal in eļap an Irooj.
Armej ro Rekwojarjar, 1:50
Lucy, kōrā eo pāleen Martin, ekar jab m̧ōņōņō. Liin ekar jab tōmak ke pileij gold ko repād ippān Josep. Ekar ļōmņak Josep ekar kabwebweik Martin. Ekar kōņaan bwe Martin en ro̧o̧l n̄an New York im bōjrak an jipan̄ Josep.
Armej ro Rekwojarjar, 1:49–50
Ak Martin ear jerbal wōt ippān Josep. Eaar ļōmņak bwe n̄e Lucy en kar riiti ta ko rej jerbali, emaron̄ kar bar tōmak. Eaar kajjitōk ippān Josep n̄e emaron̄ bōk peij ko raar ukōti n̄an New York im kwaļo̧k n̄an kōrā eo pāleen. Josep ekar ba enaaj jar im kajjitōk ippān Anij.
Armej ro Rekwojarjar, 1:50–51
Anij eaar jiron̄ Josep bwe en jab kōtļo̧k an Martin bōk peij ko. Martin ekar kajjitōk bwe Josep en bar jar. Josep ekar jar im bōk ejja uwaak eo wōt. Bōtaab Martin elukkuun kar kōņaan kwaļo̧k peij ko n̄an kōrā eo pāleen, im Josep ekar kōņaan jipan̄ ļeo m̧ōttan. Josep eaar jar kein kajilu. Ilo iien in Anij eaar jiron̄ Josep ke emaron̄ kāālet ta eo ej kōm̧m̧ane.
Armej ro Rekwojarjar, 1:51
Josep eaar jiron̄ Martin ke emaron̄ bōk peij ko n̄an New York, ak emaron̄ kwaļo̧ki wōt n̄an jejjo̧ ro uwaan baam̧le eo an. Im ej aikuj bar kōro̧o̧ltok peij ko ruo wiik jān iien eo. Martin eaar errā im bok peij ko ippānlo̧k.
Armej ro Rekwojarjar, 1:51
Ke Martin eaar etal, eaar ļotak juon nejin Josep im Emma nin̄nin̄. Ak nin̄nin̄ eo ekar mej, im Emma eaar nan̄inmej. Emma im Josep raar lukkun būrom̧ōj.
Armej ro Rekwojarjar, 1:51–52
Josep ej inepata kōn Emma. Ekar bar inepata kōn Martin. Em̧ōj an mootļo̧k ruo wiik, Martin ejanin ro̧o̧ltok. Emma ekar bar inepata.
Armej ro Rekwojarjar, 1:52
Emma eaar jiron̄ Josep bwe en etal n̄an New York im pukot Martin. Josep eaar ioon Martin ilo m̧weeo m̧ōn jinen im jemān. Ke Josep eaar kajjitōk ippān Martin kōn peij ko, Martin ear lukkuun būrom̧ōj. Eaar ba ejako peij ko. Eaar pukoti aolep jikin ak eaar jab maron̄ loi.
Armej ro Rekwojarjar, 1:52–53
Josep eaar lukkun būrom̧ōj im mijak. Eaar jeļā ke ekar bōd n̄an kōtļo̧k bwe Martin en bōk peij ko. Eaar ro̧o̧l n̄an m̧weeo m̧ōn im jiron̄ Emma ta eo raar waļo̧k. Enjeļ Moronai eaar ro̧o̧ltok im bar bōk pileij gold ko. Eaar ba n̄e Josep enaaj ettā im ukweļo̧k, naaj bar leļo̧k pileij ko n̄an e bwe en bar ukook.
Katak im Bujen Ko 3:5–11; 10:1–3; Armej ro Rekwojarjar, 1:53–54
Ium̧win elōn̄ wiik, Josep eaar kejōkļo̧kjen kōn men eo ebwōd eaar kōm̧m̧ane. Eaar jar im kajjitōk jeorļo̧k bōd. Anij ear joļo̧k an bwōd. E eaar jiron̄ Josep bwe peij ko em̧ōj kooti, armej ro raar kooti raar kajjieon̄ kōbōjrak jerbal eo an Anij. Ak ejjeļo̧k emaron̄ kabōjrak jerbal eo an Anij. Ewōr juon an Anij karōk n̄an kawōnm̧aanļo̧k jerbal eo An.
Katak im Bujen Ko 3:1–10; Armej ro Rekwojarjar, 1:54–55
Moronai ej bar leļo̧k pileij ko n̄an Josep. Anij eaar jiron̄ Josep im Martin bwe eļan̄n̄e rej ettā im lōke E, renaaj wōnm̧aanļo̧k wōt im jipan̄ ilo jerbal eo An ilo elōn̄ wāween ko. Remaron̄ jipan̄ boktok Bok in Mormon n̄an laļin. Bok in emaron̄ jipan̄ armej ro ijoko jabdewōt ukweļo̧k im tōmak ilo Jisōs Kraist.
Katak im Bujen Ko 3:16–20; 5:21–35; Armej ro Rekwojarjar, 1:56–57