“Knight ro im Ro Jet rej Aiin Doon ļo̧k n̄an Zaion,” Bwebwenato ko an Katak im Bujen Ko (2024)
“Knight ro im Ro Jet rej Aiin Doon ļo̧k n̄an Zaion,” Bwebwenato ko an Katak im Bujen Ko
Tijem̧ba 1830–O̧kwōj 1831
Knight ro im Ro Jet rej Aiin Doon ļo̧k n̄an Zaion
Pokake kūr eo an Irooj
Polly im Joseph Knight raar jokwe ippān baam̧le eo aer ilo New York. Raar kanooj jeļā kajjien Rikanaan Josep. Ālkin aer katak kōn gospel eo, raar kāālet n̄an kobatok ilo Kabun̄ in. Ke Irooj ekar kajjitōk ippān Armej ro Rekwojarjar n̄an em̧m̧akūtļo̧k n̄an Ohio, Knight ro raar pokake.
Katak im Bujen Ko 37; Armej ro Rekwojarjar, 1:33, 94, 109–110
Knight ro raar m̧ōņōņō ke rekar itakļo̧k ilo Ohio. Leman Copely, juon membōr in Kabun̄ in, ekar ba jet iaan Armej ro Rekwojarjar remaron̄ jokwe ilo bwidej eo an. Ekar bwe ruum̧ ijo n̄an ekkat ine ko im kalōk m̧ōko. Joseph Knight im ļōm̧aro nejin raar buuļ jerbal n̄an kōm̧m̧an bwe meļaaj ko ren pojak n̄an ekkat.
Armej ro Rekwojarjar, 1:126–27
Bōtaab juon raan, Leman ekar oktak an ļōmņak kōn bwidej eo an. Ekar jab kōņaan bwe Armej ro Rekwojarjar ren bar jokwe ijo. Ekar jiron̄ Knight ro im aolep ro jet n̄an em̧m̧akūt.
Armej ro Rekwojarjar, 1:127
Armej ro Rekwojarjar raar inepata. Kiiō ekar ejjeļo̧k jikin n̄an aer jokwe ie. Raar kajjitōk ippān Rikanaan Josep Smith ta eo rej aikuj kōm̧m̧ane.
Katak im Bujen Ko 54; Armej ro Rekwojarjar, 1:127
Irooj ekar ba bwe Armej rein Rekwojarjar rej aikuj etal n̄an Missouri im kalōk Zaion. Zaion enaaj erom̧ juon jikin kweilo̧k eo ijo armej ro an Irooj remaron̄ aiin doon ie. Ilo Zaion, renaaj kalōk juon tampeļ ijo renaaj kōm̧m̧ani bujen ko, ak kallim̧ur ko ippān Anij. E enaaj kar kōjeraam̧m̧an er eļan̄n̄e rekar kōjparok bujen kein. Knight ro raar m̧ōņōņō n̄an etal.
Katak im Bujen Ko 29:1–8; 42:30–36; 45:59–66; 54:6–9; 57:1–2; Armej ro Rekwojarjar, 1:128
Ke Knight ro rekar ilo̧k n̄an Missouri, Polly ekar lukkuun nan̄inmej. Ļeo pāleen, Joseph, im ļōm̧aro nejin liin raar inepata bwe liin emaron̄ kar jab aitok an mour. Bōtaab Polly ekar jiron̄ baam̧le eo an bwe ekar kōņaan pād ilo Zaion m̧okta jān an mej. Liin ekar kōņaan menin eļapļo̧k jān aolep men.
Armej ro Rekwojarjar, 1:128
Ālkin juon iaļ aitok, Knight ro raar itaakļo̧k ilo Missouri. Polly ekar lukkuun in kam̧m̧oolol Irooj bwe ekar mour n̄an loe. Knight ro raar ļōmņak bwe jikin eo ekar aiboojoj. Ekar wōr ippāer tōmak bwe ren maron̄ kōjparok kien ko an Irooj n̄an kalōk Zaion ijo.
Armej ro Rekwojarjar, 1:132
Armej ro Rekwojarjar raar ba juon jar aorōk im kar ņa etan jikin eo Zaion, ijo armej ro an Irooj remaron̄ itok n̄ane. Rikanaan Josep ekar likūt juon dekā n̄an kakōļļeik ijo kona eo an tampeļ eo enaaj kar pād ie. Jejjo raan tokālik, Polly ekar mej. Irooj ekar kallim̧ur bwe Armej ro Rekwojarjar im raar itok n̄an Zaion im mej naaj kakkije ilo lan̄.
Katak im Bujen Ko 59:1–2; Armej ro Rekwojarjar, 1:132–33