Jikin Kalbuuj Liberty

Elōn̄ armej ro rekar jokwe ilo Missouri rekar dike Armej ro Rekwojarjar. Kabna eo ekar jilkinļo̧k ritariņae ro bwe ren kōm̧m̧akūt er. Ritariņae ro rekar likwarkware Armej ro Rekwojarjar jān m̧ōko m̧weer, ko̧te m̧weiuk ko jān m̧ōko m̧weer, im kōmetak elōn̄ iaer.

Armej ro Rekwojarjar, 1:355–56, 362, 364

Ritariņae ro rej kalbuuji Rikanaaan Josep Smith im ritōl ro jet an Kabun̄ in.

Armej ro Rekwojarjar, 1:357–58

Josep ekar kajjitōk n̄e emaron̄ bōk jidik iien m̧akeļo̧k iaan ippān baam̧le eo an. Ritariņae ro rekar ba jaab. Rekar bōkļo̧k Josep im rikalbuuj ro jet.

Armej ro Rekwojarjar, 1:366

Juon bon̄, Josep im rikalbuuj ro jet rekar ron̄jake ke ritariņae ro rekar kajirere kōn men ko renana rekar kōm̧m̧ani n̄an Armej ro Rekwojarjar. Josep ekar jab maron̄ dāpiji ļo̧k wōt an ron̄jake. Ekar jutak im lamōj, “Jab Kero̧ro̧!” Ekar kōnono kōn kajoor an Anij. Ritariņae ro rekar kor. Rekar ba en joļo̧k aer bōd im rekar bōjrak aer keroro.

Armej ro Rekwojarjar, 1:367–68

Tokālik, Josep im ro m̧ōttan rekar likūt er ilo juon jikin kalbuuj ilo juon bukwōn ņaetan Liberty. Jikin kalbuuj eo ekar lukkuun m̧ōļo, dik, im marok. Ekar wōr wōt jet ippāer ujooj kijen kau n̄an kiki ioer. Ekar wōr jidik wōt m̧ōn̄ā, im ekar kōm̧m̧an aer nan̄inmej.

Armej ro Rekwojarjar, 1:369–70, 374, 384–85

Josep ekar ļap an kōļmenļo̧kjeņ kōn Armej ro Rekwojarjar. Ekar iakwe er. Ekar būrom̧ōj kōn er. Ak ekar jab maron̄ kōm̧m̧an jabdewōt n̄an jipan̄ er.

Armej ro Rekwojarjar, 1:385–86

Josep ekar ļap an jar. Ekar kajjitōk ippān Anij ia eo Ej pād ie im etke Ekar jab jipan̄ Armej ro Rekwojarjar. Anij ekar ke meļo̧kļo̧k e im Kabun̄ eo?

Katak im Bujen Ko 121:1–6

Anij ekar uwaake jar eo an Josep. Ekar ba, “Nejū m̧aan, aenōm̧m̧an en n̄an am.” Ekar jiron̄ļo̧k Josep bwe apan̄ ko renaaj n̄an jidik wōt iien, im renaaj n̄an em̧m̧an eo an. Anij ekar kakeememej Josep bwe Jisōs Kraist ekar jelm̧ae aaet men ko reppenļo̧k. Ekar kallim̧ur bwe Enaaj pād ippān Josep “n̄an indeeo im indeeo.”

Katak im Bujen Ko 121:7; 122:5–9