Jane Manning ej Jibadōkļo̧k Nauvoo

Jane Manning im baam̧le eo an raar jokwe ilo juon jikin ijo jet armej ro raar jab em̧ōņōņō ippāer im ekar nana aer kōm̧m̧an n̄an er kōnke kōn kōļar in kilier. Juon raan, Jane ekar ron̄ an juon mijenede katakin. Liin ekar jeļā bwe naan eo em̧ool. Ilo Jabōt eo tok juon, liin ekar peptaij.

Armej ro Rekwojarjar, 1:500–501

Baam̧le eo an Jane raar kobatok ilo Kabun̄ in barāinwōt. Irooj ekar kōņaan bwe Armej ro Rekwojarjar ren aiin doon ļo̧k ilo Nauvoo. Jane ekar iakwe Irooj. Liin im baam̧le eo an raar kōņaan pād ippān Armej ro Rekwojarjar jet. Kōn menin raar jino iaļ eo aer n̄an Nauvoo.

Katak im Bujen Ko 124:25; Armej ro Rekwojarjar, 1:501

Jimettan in iaļ tūreep eo aer, raar em̧m̧akūtļo̧k kōn ļoon. Elōn̄ iaan armej ro ilo wa eo remaron̄ kar kōļļā wōņāān aer iuwe ilo jem̧ļo̧k in tūreep eo. Bōtaab em̧m̧aan ro jet raar jiron̄ļo̧k baam̧le eo an Jane bwe rej aikuj in kar kōļļā m̧okta. Ekar jab bwe aer jāān. Em̧m̧aan ro raar kōm̧m̧an bwe ren to jān wa eo, im kar jerak jān er.

Armej ro Rekwojarjar, 1:501

Baam̧le eo an Jane rekar aikuj wōt in etetal laļļo̧k 800 m̧aiļ ko, ak1,300 kilomita. Raar aikuj in kijoon juon dān em̧wilaļ ilo an ejjeļo̧k būriij. Raar aikuj in kiki nabōj. Mejatoto eo ekar emakijkij an kanooj m̧ōļo. Bōtaab baam̧le eo an Jane rekar pen bruwer n̄an ōprakļo̧k Nauvoo. Raar kōllowetak er make kōn al ke raar etetal.

Armej ro Rekwojarjar, 1:501, 505–6

Jane im baam̧le eo an raar etetal laļļo̧k m̧ae iien eo juuj ko aer raar potak im neer ekar metak. Bōtaab ke raar jar n̄an Anij kōn jipan̄, E ekar kemour neer.

Armej ro Rekwojarjar, 1:505

Raar jipan̄ armej ro raar ioon er ilo iaļ eo aer ļo̧k. Em̧ool jekdo̧o̧n raar bar jipan̄ kemour juon ajri eo edik kōn wōt tōmak eo aer.

Armej ro Rekwojarjar, 1:505–6

Āliktata, Jane im baam̧le eo an raar tōprakļo̧k Nauvoo. Raar m̧ōk im aikuj juon jikin aer pād. Kōn menin raar etal n̄an m̧weo im̧ōn Emma im Josep. Ke Josep ekar ron̄ kōn aolepān ta eo raar iooni, ekar jiron̄ļo̧k Jane, “Anij en kōjeraam̧m̧an eok. Kom̧wij pād ilubwilijin ro m̧ōttami kiiō.” Josep im Emma rekar karuwaineneik er n̄an jokwe ippāer.

Armej ro Rekwojarjar, 1:506