Newel im Ann Whitney Rej Ioon Rikanaan Josep

Ann im Newel Whitney ekar wōr juon aer im̧ōn wia ilo Kirtland, Ohio. Ann ekar jab rūttoļo̧k ilo an etal n̄an juon m̧ōnjar ak katak kōn Irooj, bōtaab liin ekar kōņaan jeļā kōn E. Ālkin an liin im Newel kar m̧are, raar jar elōn̄ alen im kar kajjitōk ippān Irooj n̄an tōl er.

Armej ro Rekwojarjar, 1:111–12

Juon bon̄ ilo aer kar jar, Ann im Newel raar lo juon visōn. Ilo visōn eo, juon kōdo̧ ekar pād ioon m̧weo im̧weer. Jetōb eo an Anij ekar kobrak er. Kōdo̧ eo ekar jepooļ er. Innām raar ron̄ juon ainikien jān lan̄. Ekar jiron̄ er, “Pojak n̄an bōk naan eo an Irooj, bwe ej itok.”

Armej ro Rekwojarjar, 1:111

Ālkin jidik iien, Parley Pratt ekar itok n̄an Kirtland. E im ro m̧ōttan kar katakin gospel eo an Jisōs Kraist. Ālkin wōt iien eo Ann ekar ron̄ ta eo raar katakin, liin ekar jeļā ekar m̧ool. Liin ekar jepļaak n̄an m̧weo n̄an kwaļo̧k nuuj eo ippān Newel. Ejjab tok raar peptaij.

Armej ro Rekwojarjar, 1:112

Ruo allōn̄ tokālik, juon em̧m̧aan im juon kōrā raar itok n̄an m̧ōn wia eo an Newel. Newel ekar jab jeļā kajjier, bōtaab em̧m̧aan eo ekar idik pein Newel im kar kūr Newel kōn etan. Em̧m̧aan eo ekar ba, “N̄a Josep rikanaan eo.” Ekar kōmeļeļeik bwe Irooj ekar uwaake jar ko an Newel. E ekar jilkinļo̧k Emma im Josep n̄an ioon Ann im Newel.

Armej ro Rekwojarjar, 1:113

Newel im Ann raar jeļā bwe visōn eo aer ekar kūrm̧ool. Raar kajjitōk ippān Josep im Emma n̄an pād ippāer ilo m̧weo im̧weer. Ann im Newel raar iakwe Jisōs im gospel eo An. Raar leļo̧k aolep men ko m̧weier n̄an Armej ro Rekwojarjar im n̄an Kabun̄ eo an Rilo̧mo̧o̧r.

Katak im Bujen Ko 38:23–27, 34–42; Armej ro Rekwojarjar, 1:114