Rej Kakkure Josep im Sidney

Jet armej raar em̧m̧an ippāer ta eo Josep Smith ekar katakin kōn Jemādwōj Ilan̄, Jisōs Kraist, im lan̄. Bōtaab armej ro jet ekar jab em̧m̧an ta eo ej kwaļo̧k. Jejjo iaer raar jino illu im kar kōņaan kabōjrak Josep jān an katakin.

Katak im Bujen Ko 76; Armej ro Rekwojarjar, 1:149–50

Juon bon̄, Josep ekar emmej im jipan̄ Emma lale juon iaan bo ro nejirro. Nin̄nin̄ eo ekar kanooj nan̄inmej.

Armej ro Rekwojarjar, 1:150

Emma ekar bōk nin̄nin̄ eo bwe Josep en kakkije. Ekar aikuj in kwaļo̧k naan ilo jibbon̄ eo. Āliktata, Josep im Emma aolep raar kiki.

Armej ro Rekwojarjar, 1:150

Ejjab to, kōjām eo ekar peļļo̧k, im juon kumi in em̧m̧aan ro rellu raar ettōrļo̧k n̄an lowaan ruum̧ eo. Emma ekar lam̧ōj ke em̧m̧aan ro raar kanōk Josep kōn pein, neen, im koļan bōran. Raar iper nabōjļo̧k jān m̧weo.

Armej ro Rekwojarjar, 1:150–51

Josep ekar kajjieon̄ ko jān em̧m̧aan ro, bōtaab raar lukkuun dāpiji. Josep ekar lo bwe em̧m̧aan ro raar barāinwōt bōke eo m̧ōttan Sidney Rigdon jān m̧weo im̧ōn.

Armej ro Rekwojarjar, 1:151

Em̧m̧aan ro raar potakki nuknuk ko an Josep im lutōk pij eo ebwil, im eddepdep ilo aolepān kilin im koļan bōran. Innām raar kalbubuik e kōn kooļ in bao ko im ko.

Armej ro Rekwojarjar, 1:152

Ālkin an em̧m̧aan ro ilo̧k, Josep ekar jepāppāpļo̧k n̄an m̧weo. Emma ekar leļn̄o̧n̄ ke ekar lo Josep. Ro m̧ōttaer im raar jokwe epaake er raar ron̄ kōn ta eo ekar waļo̧k im kar kairtok n̄an jipan̄. Emma ekar kirijļo̧k pij eo jān kilin Josep. Ilo aolepān bon̄ōn eo, Emma im ro m̧ōttan raar jipan̄ kauik Josep im Sidney.

Katak im Bujen Ko 25:5; Armej ro Rekwojarjar, 1:153

Raan eo tok juon, Josep ekar pād wōt ilo an ļap an metak. Bōtaab ekar ekkōņak nuknuk im katakin juon kumi in armej ro kōn Jisōs Kraist. Jet iaan em̧m̧aan ro raar kakkure e rekar ron̄ an katakin. Tokālik ilo raan eo, Josep ekar peptaiji jilu armej. Ekar kōm̧m̧ane wōt jerbal eo an Irooj, em̧ool jekdo̧o̧n n̄e armej ro raar kajjieon̄ kabōjrak e.

Katak im Bujen Ko 24:8; Armej ro Rekwojarjar, 1:153