Baam̧le eo an Jackson

Ālkin etal eo an kūrub eo kein kajuon an Armej ro Rekwojarjar n̄an Salt Lake Valley, taujin bar jet Armej ro Rekwojarjar rekar etal barāinwōt. Rekar ito itak ilo juon iaļ eaitok, im Irooj ekar jipan̄ er. Juon baam̧le eo ekar tōprak ilo ito itak eo aer ekar baam̧le eo an Jackson. Rekar likūt m̧weeo im̧weer ilo England im kar laudin̄din̄ in etal im jipan̄ Armej ro Rekwojarjar kalōk Zaion.

Katak im Bujen Ko 136:1–11; Armej ro Rekwojarjar, 2:222–23

Jackson ro rekar kijoone lo̧jet eo ioon juon tim̧a. Innām rekar bōk juon tūrein eo ej m̧ōttan wōt iaļ eo n̄an Salt Lake Valley. Rej aikuj etetal laļ ilo aolepān iaļ eo.

Armej ro Rekwojarjar, 2:222–23

Rekar kōm̧m̧ane juon diieka jidikdik n̄an ineeki m̧ōn̄ā ko kijeer, nuknuk ko, im men ko jet raikuji n̄an būktok. Elōn̄ Armej ro Rekwojarjar rekar tōparļo̧k ilo kōjparok n̄an bukwōn eo ilo iaļ in.

Armej ro Rekwojarjar, 2:223–26

Elizabeth im Aaron Jackson rekar bwilli diieka eo aer eddo. Ajri ro nejier, Martha, Mary, im Aaron Jr., rekar etetal laļ Ekar ļap jerbal. Rekar kōjatdikdik bwe renej tōparļo̧k bukwōn eo m̧okta jān iien m̧ōļo eo. Ak ke iien m̧ōļo eo ekar waļo̧k, rekar etal wōt ilo juon iaļ. Ekar jino an lukkuun m̧ōļo, im ekar jino m̧aatļo̧k kijeer m̧ōn̄ā.

Armej ro Rekwojarjar, 2:223–26, 229, 231–32

Ilo Salt Lake City, Brigham Young ekar jeļā kōn Armej ro Rekwojarjar ro rekar itok n̄an bukwōn eo. Ekar inepata kōn er. Raan eo juon ilo m̧ōnjar eo, ekar jiron̄ aolep bwe Armej rein Rekwojarjar rekar pād ilo jorrāān. Ekar kajjitōk ippāer n̄an kanne waikōn ko kōn men ko Armej ro Rekwojarjar renaaj aikuji. “Etal im bōktok armej rein,” ekar ba.

Armej ro Rekwojarjar, 2:229–30

Kōrā ro ilo kweilo̧k eo rekar wutuki takin māņāān ko aer im likūti ilo waikōn ko. Ro jet rekar leļo̧k m̧ōn̄ā ko kijeer, būļan̄kōj ko, juuj ko, im nuknuk ko. Ruo raan tokālik, elōn̄ļo̧k jān 50 em̧m̧aan ro im 20 waikōn ko rekar etal jān bukwōn eo n̄an jipan̄.

Armej ro Rekwojarjar, 2:230

Ke baam̧le eo an Jackson rekar etetal wōt, jiņo ekar jino wōtlo̧k. Aaron ekar lukkuun nan̄inmej. Ekar pen n̄an an etetal. Armej ro Rekwojarjar rekar aikuj in kijoone juon reba ekwōj, im menin ekar kōm̧m̧an an Aaron lukkuun m̧ōjņo̧ ļo̧k wōt. Bon̄ōn eo, Aaron ekar mej. Būrom̧ōj, baam̧le eo an renaaj aikuj etal wōt jān e.

Armej ro Rekwojarjar, 2:232–34

Jibbon̄ eo juon, eļapļo̧k jiņo ioon bwidej. Jackson ro im Armej ro Rekwojarjar jet rekar iuuni im bwilli diieka ko aer ilo jiņo eo. Rekar jar aolep raan bwe Anij en maron̄ jipan̄ er.

Katak im Bujen Ko 136:29; Armej ro Rekwojarjar, 2:234–35

Juon bon̄, Elizabeth ekar inepata kōn ajri ro nejin. Rekar kwōle im pio̧. Renaaj ke tōparļo̧k ilo Salt Lake Valley? Ekar emadidiļo̧k im kar ettōņak an loe Aaron. Ekar ba, “Kwon m̧ōņōņō, Elizabeth.” Ekar ba n̄an e bwe jipan̄ rej itok wōt.

Armej ro Rekwojarjar, 2:235–36

Aaron ekar jim̧we. Ejjab etto, em̧m̧aan ro jān Salt Lake rekar itaakļo̧k kōn waikōn ko aer. Rekar leļo̧k n̄an Armej ro Rekwojarjar m̧ōn̄ā im nuknuk. Armej ro Rekwojarjar rekar m̧ōņōņō im ettōn̄ im bo̧kwōj em̧m̧aan ro. Rekar al juon al im kam̧m̧oolol Jemedwōj Ilan̄ kōn an uwaake jar ko aer.

Katak im Bujen Ko 136:28; Armej ro Rekwojarjar, 2:236

Ke āliktata rej tōpar bukwōn eo, ekar raan in Jabōt. Brigham Young eaar jiron̄ļo̧k membōr ro an Kabun̄ in ilo Salt Lake City bwe ijjelo̧kin aer etal im jar, rej aikuj in karuwaineneiki Armej ro Rekwojarjar rekar itaakļo̧k. Rekar iakiakweiki Armej ro Rekwojarjar repio̧ im karuwaineneiktok er n̄an pād wōt ilo m̧ōko m̧weer.

Armej ro Rekwojarjar, 2:239–40